Pontade 10 08 (22/04/08) - 5

France: dibatiment su lis lenghis minorizadis te “Assemblee Nazionâl”

Ai 7 di Mai la “Assemblee Nazionâl” francese e frontarà tun dibatiment la situazion des lenghis minorizadis feveladis intal stât. E je la prime volte che la Cjamare dai deputâts e fronte in maniere direte cheste tematiche, al à spiegât il deputât breton Marc Le Fur, che al è ancje vicepresident de Assemblee. Propit in graciis di cheste incarghe, Le Fur al à rivât a otignî dal prin ministri François Fillon di frontâ chest argoment che te politiche francese al è dispès considerât un tabù. Le Fur al à ancje za provât trê voltis a puartâ denant de Assemblee une propueste di modifiche de Costituzion par gjavâ vie l’articul che al ten il francês di uniche lenghe uficiâl dal stât. Propit chest articul al è stât doprât ta chescj agns par impedî che la France e ratifichi la Cjarte europeane des lenghis regjonâls o minoritariis che e oblearès il stât a meti in vore misuris di tutele ative par lenghis tant che l’ocitan, il breton, il basc e il cors.
Font: Cabinet de Marc Le Fur, 16/04/08; Mon Divers, 17/04/08

Pontade 10 08 (22/04/08) - 4

Scozie: e cres la voie di referendum pe autodeterminazion

Dilunc vie de campagne eletorâl pes elezions che a àn dât al SNP la maiorance relative in Scozie, un dai cjavai di bataie dal Partît Nazionalist Scozês al jere stât chel dal referendum pe indipendence. A cuasi un an des elezions, il progjet referendari – che al viôt cuintri Laburiscj, Liberâi Democratics e Conservadôrs – al reste un dai obietîfs che il SNP si propon di rivâi dentri de fin de legjislature e la plui part dai citadins scozês e somee in cunvigne cun chest progjet. Cun di fat, un scandai jessût che al è pôc al mostre che il 65% dai scozês al vûl che il referendum si davuelzi. Cundut achel, se si votàs vuê, la opzion indipendentiste no varès la maiorance. Daûr dal ultin sondaç, di fat, il 41% dai scozês al sarès a pro de indipendence, il 40% al sarès cuintri e il 19% nol sa ancjemò ce che al sielzarès di fâ. La inchieste, fate de societât TNS System Three, e mostre risultâts avonde dongje di chê fate par cont dal Daily Mail che e da il 41% dai scozês favorevui ae indipendence, il 43% contraris e il 16% malsigûrs su la sielte di fâ. Cun di plui, ducj e doi i sondaçs a mostrin che la opzion indipendentiste e je daûr a vuadagnâ teren: dal Avost dal an passât a vuê, di fat, la poie ae idee di une Scozie indipendente e je cressude jenfri il 6 e il 10%. Pai dirigjents dal SNP chescj risultâts a son ancje la testemoneance dal bon guvier metût in at dal Partît Nazionalist Scozês e dal fastidi dai citadins pai atacs che a rivin dal guvier di Londre.
Font: SNP, 13/04/08; Scotland Today, 05/04/08; Mon Divers, 06/04/08

Pontade 10 08 (22/04/08) - 3

Rom: intervent de OSCE cuintri de discriminazion

Ai 8 di Avrîl e cole la Zornade internazionâl dal popul rom. Cualchi zornade indaûr, propit inte suaze di chest inovâl, il diretôr dal Ufici pes istituzions democratichis e pai dirits umans de OSCE, Christian Strohal, al è intervignût par riclamâ i guviers dai stâts membris a incressi i sfuarçs par dislidrisâ la discriminazion cuintri des popolazions rom e sigurâ la lôr partecipazion plene ae societât. Cun di fat, in dì di vuê, te plui part dai paîs, i membris des comunitâts rom si cjatin a jessi discriminâts tal cjamp de educazion, de cjase, dal lavôr e de sanitât. Tal 2003 la Organizazion pe Sigurece e la Cooperazion in Europe e veve metût jù un Plan di azion che al impegnave i siei membris a lotâ cuintri de discriminazion e dal razisim che i rom si cjatin a patî. Magari cussì no – al à dite Strohal – daspò cinc agns la situazion no je mudade cui sa trop e chestis comunitâts si cjatin a frontâ pidiments di ogni sorte cuant che a cirin di otignî chei dirits che i spietin a ducj i citadins. A front di cheste situazion, in Lui i rapresentants dai stâts membris de OSCE a varessin di tornâ a dâsi dongje par cirî di inzornâ e comedâ il Plan di azion. Intant, ai 6 di Avrîl, si è presentade a Bruxelles la Coalizion par une Politiche pai Rom Europeans che e à chê di sburtâ su lis istituzions comunitariis par che a cressin i sfuarçs cuintri de discriminazion. La CPRE e je formade di vot organizazions impegnadis te difese dai dirits umans, tant che Amnesty International e Minority Rights Group, o che a son espression de comunitât rom.
Font: Nationalia, 07/04/08

Pontade 10 08 (22/04/08) - 2

Paîs Basc: delegazion di Iparralde ae ONU

Dai 21 di Avrîl ai 2 di Mai, a New York, si davuelzà une schirie di audizions denant dal Forum permanent su lis cuestions autoctonis de ONU e, pe prime volte, e sarà sintude ancje une delegazion basche che e rive di Iparralde, ven a dî dal Paîs Basc setentrionâl che al è cjapât dentri tal stât francês. La iniziative, inmaneade dal grup “Autonomia Eraiki”, e à chê di denunciâ a nivel internazionâl la situazion che si cjatin a vivi i bascs, massime sot dal stât francês. Cun di fat, lis istituzions statâls francesis a àn sotscrit l’an passât la Declarazion ONU sui dirits dai popui natîfs, che e cjape dentri ancje i bascs, ma chel istès a van dilunc a dineâur i lôr dirits linguistics e nazionâi, a tacâ di chel di vê une realtât aministrative basche.
Font: Gara, 05/04/08; Mon Divers, 06/04/08

Pontade 10 08 (22/04/08) - 1

Galizie: in Mai, manifestazion nazionâl pe lenghe

Domenie ai 18 di Mai, a Sant Jacum di Galizie (Santiago de Compostela), si davuelzarà une manifestazion nazionâl pe lenghe galiziane. La iniziative e je stade inmaneade de organizazion “A Mesa pola Normalización Lingüística” che e à sielzût tant che slogan pe manifestazion: pal dirit a vivi par galizian (polo dereito a vivirmos en galego). Cumò A Mesa e je daûr a cjapâ dentri te iniziative ancje altris sogjets, tant che grups politics, organizazions sindacâls, associazions culturâls e aministrazions locâls. La organizazion e à ancje fat savê che la vilie de manifestazion al sarà dât fûr un manifest che al spiegarà lis resons che a son daûr de iniziative e lis domandis che si fasin indenant. A Mesa e denuncie, massime, il cressi dai atacs cuintri dai dirits linguistics dai galizians e i pidiments fats indenant par che no si meti in vore la legjislazion su la lenghe galiziane. In dì di vuê – a disin i dirigjents de organizazion – al è impussibil rivâ a vivi dome doprant il galizian, ancje se il Statût di autonomie lu ricognòs come uniche lenghe naturâl de Galizie.
Font: Galiza Hoxe, 24/03/08

Pontade 09 08 (08/04/08) - 9

France: minorancis discriminadis, lu dîs ancje la ONU

E je rivade al esam dal Consei dai dirits umans de ONU la informative metude adun de esperte indipendente Gay McDougall, specialiste in teme di minorancis. Intal document si dîs a clâr che il stât francês nol rispiete i dirits linguistics e culturâi des minorancis. Il stât al è obleât a creâ condizions che a favorissin la tutele des minorancis, ma in France chest nol sucêt. Par chest, si lei tal rapuart, a van modificadis lis politichis statâls in teme di minorancis che a àn di jessi concuardadis cu lis comunitâts interessadis. Cundut che il stât francês al à une legjislazion siore par fâi cuintri ae discriminazion, ma no le met in vore cuant che si trate di minorancis. Il prin pas che il stât francês al à di fâ par cambiâ la situazion al è ricognossi che sul so teritori a esistin minorancis nazionâls, linguistichis e religjosis. Daspò – e spieghe la McDougall – il guvier di Parîs al varà di ratificâ i diviers struments normatîfs europeans in teme di dirits des minorancis, tant che la Cjarte europeane pes lenghis regjonâls o minoritariis, la Convenzion cuadri pe protezion des minorancis nazionâls e la Convenzion di difese dai dirits umans e des libertâts di fonde.
Font: Gara, 05/04/08

Pontade 09 08 (08/04/08) - 8

Gales: azions par sburtâ une gnove leç linguistiche

Il prin di Avrîl al à viodût i ativiscj de Cymdeithas yr Iaith Gymraeg (Societât pe Lenghe Galese) impegnâts a tacâ sù manifescj e a jemplâ i mûrs dai supermarcjâts di diviersis citâts dal Gales par protestâ cuintri dal dinei dai proprietaris di doprâ il galês intai lôr ponts di vendite. La iniziative si insuaze tune campagne plui largje che e smire a otignî une gnove leç su la lenghe galese che a ‘nt sburti l’ûs ancje tal setôr privât. Par cumò, il Guvier dal Gales nol dâ segnâi di lâ ta chê direzion, ma tai ultins trente agns a son stadis propit lis azions no violentis de Cymdeithas a dâ un sburt grues ae politiche linguistiche pal galês.
Font: Eurolang, 03/04/08

Pontade 09 08 (08/04/08) - 7

Paîs Catalans: lis Baleârs si zontaran al pat pe politiche linguistiche

Il guvier des isulis Baleârs al à formalizât la sô intenzion di jentrâ intal acuardi di colaborazion in materie di politiche linguistiche sotscrit ai 16 di Març dal 2007 dai Guviers autonomics de Catalogne, de Galizie e de Comunitât Autonome Basche. La firme uficiâl dal pat si le varà in curt a Palma. Lis cuatri aministrazions a colaboraran, tra lis altris, par svilupâ il program des iniziativis pal An european des lenghis, par presentâ al Guvier spagnûl e ae Comission europeane la Declarazion di Parîs, ma ancje par elaborâ tradutôrs automatics tra lis trê lenghis.
Font: Guvier des Isulis Baleârs, 02/04/08; Mon Divers, 02/04/08

Pontade 09 08 (08/04/08) - 6

Paîs Catalans: al è nassût il portâl linguistic Optimot

Il Guvier catalan (Generalitat de Catalunya) al à screât il portâl Optimot che al met adun diviers servizis linguistics che prime a jerin sparniçâts ator pe rêt. Il gnûf sît, ancjemò in prove, al permet di cirî fûr peraulis su la fonde di une grande base di dâts formade di diviers dizionaris bilengâi catalan – castilian e specialistics. Cun di plui, e je la pussibilitât di fâ ricercjis ancje su la ortografie, la morfologjie, la toponomastiche e v.i.
Font: Generalitat de Catalunya, 01/04/08; Mon Divers, 01/04/08

Pontade 09 08 (08/04/08) - 5

Gales: pal Plaid Cymru l’obietîf al reste la indipendence

E je stade Elin Jones, ministre galese pai afârs agricui, la prime rapresentante dal partît nazionalist Plaid Cymru a partecipâ a di une riunion dal Consei dai ministris de Union Europeane. Cun di fat, sei la rapresentante galese, sei la cuintripart scozese, a àn compagnât a Bruxelles il ministri britanic impegnât inte discussion su la gnove politiche agricule comunitarie, ancje se cence dirit di intervignî intant de riunion. Dîs agns indaûr il Gales nol jere propit, in dì di vuê almancul al è dentri inte stanzie – e à declarât la Jones – ma il puest just pal Gales al è ator de taule. Une volte ator de taule no jerin nancje Malta o la Letonie che invezit cumò a son, duncje – e à zontât la ministre galese – la strade juste par rivâ a di un tant e je chê de indipendence. Par intant, dut câs, il Plaid Cymru che al è al guvier dal Gales adun cui laburiscj, al è daûr a lavorâ pal referendum che dentri dal 2011 al varès di trasformâ la Assemblee Nazionâl Galese tun vêr Parlament e incressi il nivel di autoguvier dal Gales.
Font: BBC News, 01/04/08

Pontade 09 08 (08/04/08) - 4

Grecie: dirits de minorance turche violâts

Pal Tribunâl european pai dirits umans, il stât grêc al à violât la Convenzion europeane sui dirits umans in doi câs che a viodin al centri la minorance turche che e vîf in Tracie. Intal prin, il Guvier al à dineât il dirit de riunion e di associazion cul proibî la nassite de Associazion culturâl des feminis turchis de regjon dai Rodopis par vie che a doprin l’adietîf “turc” intal non. Cun di fat, il stât grêc nol ricognòs la esistence di nissune minorance etniche, nazionâl o linguistiche, ma dome chê di une minorance musulmane. Dî il contrari al ven judicât une “menace pe societât democratiche”. Il secont câs, invezit, si riferìs ae Associazion turche di Xhanti che e je stade prime obleade de justizie greghe a cambiâ non (simpri par vie dal ûs dal adietîf “turc”) e po sierade par vie che e veve denunciât la opression de minorance turche de Tracie.
Font: Nationalia, 31/03/08

Pontade 09 08 (08/04/08) - 3

Paîs Catalans: nassude la Fondazion Llull

I Guviers de Andorra, de Catalogne des isulis Baleârs a àn uficializât la nassite de Fondazion Ramon Llull che e varà sît propit intal principât pirenaic. La gnove realtât e varà tant che fin principâl chel di sburtâ il studi de lenghe catalane e il svilup de culture dai Paîs Catalans. La sielte di trasformâ l’Istitût Ramon Llull tune fondazion e je stade fate par permeti a di un stât indipendent come Andorra di condividi un ent cun paîs che no son indipendents tant che la Catalogne e lis Baleârs. Pe nassite de fondazion a son stâts metûts 100 mil euros che a rivin pal 65% dal Istitût e pal 35% dal Guvier andoran.
Font: Mon Divers, 31/03/08

Pontade 09 08 (08/04/08) - 2

Paîs Catalans: Immi.Cat, portâl dai imigrâts catalans

Immi.Cat al è un sît internet nassût cun chê di dâ vôs ai catalans di divignince foreste. L’obietîf al è chel di promovi la culture catalane framieç dai imigrâts che a son vignûts a vivi in Catalogne e di judâ i catalans a cognossi miôr lis culturis puartadis de imigrazion. Lis diviersis organizazions che a son daûr de iniziative a varan dai spazis di pueste par fâ cognossi lis lôr ativitâts e la culture dai paîs di divignince dai lôr aderents. Tal manifest di fondazion di Immi.Cat si pues lei cuâl che al è il spirt di chest progjet, ven a dî: “O vin vût di lassâ i nestris paîs, o vin passât il troi dificil de emigrazion e de discriminazion intal forest. La emigrazion nus à fat pierdi la relazion cuotidiane cu lis nestris fameis e il contat cu la nestre realtât e cu la nestre culture, o vin dismetût di partecipâ al progjet storic des nestris nazions, ma cundut achel no lassarìn che nissun nus puarti vie la nestre identitât origjinarie. Cussì cemût che o difindìn il nestri dirit a jessi cemût che i nestris paris nus àn fat e che nus definìs come personis, cu la stesse decision o difindarìn il nestri dirit a jessi catalans e catalanis e, duncje, o difindarìn il dirit di cheste comunitât a decidi in maniere libare il so avignî.” Par chel che al rivuarde la lenghe, invezit, si lei che: “O ufrìn lis nestris lenghis e lis nestris culturis di divignince par insiorâ il patrimoni culturâl di chest paîs e e je la societât catalane che e à di profitânt. Ta cheste suaze di diviersitât linguistiche il catalan e je la lenghe che nus unìs ducj e dutis. E je la lenghe che ducj o condividìn e che o doprìn par intindisi. E je la nestre lenghe comune. (…) Propit parcè che o savìn il pericul che la supremazie des culturis tibiadoris e puarte aes culturis minoritariis, par chel o declarìn che o volìn vivi par catalan.”
Font: Vilaweb, 27/03/08

Pontade 09 08 (08/04/08) - 1

Macedonie: macedons discriminâts tai stâts dongje

Intant dal incuintri a Strasburc cul referent de Comission europeane pai dirits umans, Thomas Hammarberg, il president de Macedonie, Branko Crvenkovski, al à denunciât la situazion di discriminazion che a patissin lis minorancis macedonis in Grecie e in Bulgarie, ducj e doi stâts membris de Union Europeane. Une situazion ben diferente di chê che si à in Macedonie – al à ricognossût il diplomatic svedês – dulà che e je sigurade la tutele des minorancis sedino albanesis, turchis, serbis, arumenis o rom. Baste pensâ che la Macedonie e je l’unic stât european là che al è un Comun che al à il romanès tant che lenghe uficiâl.
Font: Eurolang, 29/02/08

Pontade 08 08 (25/03/08) - 5

Romanie: e cres la domande di autoguvier dai ongjarês

La indipendence autoproclamade dal Cossovo e à mot cetantis reazions, massime framieç des nazions cence stât e des comunitâts minorizadis europeanis. Ancje l’eurodeputât László Tőkés, membri de minorance ongjarese de Romanie, lu à citât tant che esempli di tignî cont tune interviste publicade che al è pôc sul cuotidian “Ziua”. Dut câs, plui che di indipendence, Tőkés al à fevelât di autoguvier dal Székelyföld, la regjon de Transilvanie là che la popolazion ongjarese dai székely e ja la maiorance. Pal eurodeputât de minorance magjare si podarès pensâ a di une forme di autonomie par dute la Transilvanie, su model de Vojvodine serbe, e ta chê suaze une forme di autoguvier plui fuart pal Székelyföld. Tőkés al à ancje pandût la sô sodisfazion pal svilup dal Magyar Polgari Part (Partît Civic Magjâr), il gnûf sogjet politic ongjarês che ai 14 di Març al è stât metût dentri in maniere uficiâl de Cort di apel di Bucarest intal regjistri dai partîts de Romanie. Ai 15 di Març, zornade che i ongjarês di dut il mont a memorein i erois de rivoluzion dal 1848, si son davueltis diviersis cerimoniis ancje intes diviersis provinciis de Transilvanie là che e je fuarte la comunitât magjare. Intant di chês manifestazions, diviers rapresentants politics de minorance a àn tignût discors là che a rivendichin la autonomie de regjon.
Font: Divers.ro, 17/03/08; Mon Divers, 10/03/08

Pontade 08 08 (25/03/08) - 4

Lusazie: simpri mancul tutele dal guvier todesc

Un grup di inteletuâi al à publicât ta chestis zornadis un apel che al è stât batiât “Memorandum par domandâ che il popul serbian al puedi continuâ a vivi”. I serbians, o sorabis, a vivin te regjon storiche de Lusazie, a cjaval jenfri la Sassonie e il Brandeburc, e a son la uniche minorance slave autoctone dentri dal stât todesc. Tal document si lamente che par vie di un conflit di competencis jenfri guvier federâl e i doi lands, i finanziaments pe minorance a son blocâts, daspò che tai ultins agns a jerin lâts simpri al mancul. Intal test si domande di meti fin a cheste situazion e di proviodi daurman a fissâ lis comptencis su chest cantin tra il guvier federâl e lis autonomiis di maniere di evitâ che la situazion si ripeti. Za di agns i serbians a denunciin che la tutele de lôr comunitât e je daûr a sbassâsi e che e jere plui alte cuant che e jere la Republiche Democratiche Todescje che no cumò.
Font: Provincie di Trent - Minorancis Linguistichis, 14/03/08; Nationalia, 14/03/08

Pontade 08 08 (25/03/08) - 3

Galizie: normalizazion linguistiche a planc inte scuele

Il decret di normalizazion linguistiche intes scuelis de Galizie fat bon ancjemò intal Jugn dal an passât dal esecutîf de Comunitât autonome al è inmò che al spiete di jessi metût in vore. Lu disin A Mesa pola Normalización Lingüistica e altris associazions impegnadis pai dirits linguistics dai galizians che a acusin l’assessorât pe educazion di no vê fat nuie par meti in vore il proviodiment. Cun di fat, no si à fat nissune azion par fâ cognossi il decret e par formâ i professôrs par che a puedin proviodi ai intervents di normalizazion linguistiche. Cun di plui, no si à nancje metude sù la direzion che e varès di stâ daûr e coordenâ lis azions previodudis de norme.
Font: Galiza Hoxe, 13/03/08

Pontade 08 08 (25/03/08) - 2

Frisie: il guvier neerlandês nol rispiete la Cjarte europeane

Cundut che i Paîs Bas a sedin stâts un dai prins stâts a firmâ e a ratificâ la Cjarte europeane pes lenghis regjonâls o minoritariis tal 1998, a dîs agns di distance si è ancjemò lontans dal meti pardabon in vore i siei contignûts. La cuestion si à palesade a clâr intant de ultime visite dal comitât european di esperts che al viôt dal rispiet de Cjarte. Tune interviste ae agjenzie di stampe Eurolang, Gerrit Ybema, che al è a cjâf dal comitât neerlandês pe aplicazion de Cjarte, al à spiegât trop che al sedi inmò di lavorâ. Par chel che al rivuarde la scuele, par esempli, la plui part des primariis e à juste une ore a setemane di frison, e ogni tant nancje chê. Si salve dome une rêt di cuindis istitûts trilengâi là che si doprin frison, olandês e inglês. Tal cjamp de radiotelevision, Omrop Fryslân e ven tratade come une des tredis emitentis regjonâls neerlandesis e no come la uniche emitente frisone, cun dutis lis diferencis dal câs. Dispès lis autoritâts centrâls no considerin la lenghe e la culture de Frisie tant che part de diviersitât europeane – al zonte Ybema – ma dome come folclôr regjonâl, e propit cheste mentalitât e je il prin pidiment pal rispiet dai dirits linguistics dai frisons.
Font: Eurolang, 12/03/08

Pontade 08 08 (25/03/08) - 1

Frisie: pas indenant pai frisons in Gjermanie

In Gjermanie, il guvier centrâl al à confermât il ricognossiment uficiâl dai frisons dal Saterland tant che minorance. Cheste decision e permetarà di une bande di meti in vore ad in plen i principis de Cjarte europeane pes lenghis regjonâls o minoritariis ancje par cheste minorance, e di chê altre di liberâ il moviment politic “Die Friesen” dal soiâr dal 5% dai vôts che al vâl par ducj chei altris partîts par vê une rapresentance.
Font: EFA, 04/03/08

Pontade 07 08 (11/03/08) - 9

Paîs Basc, Paîs Catalans, Galizie: risultât des elezions politichis

Lis elezions politichis intal stât spagnûl, che a àn dât la maiorance al PSOE vuidât di José Luis Rodríguez Zapatero, a son stadis segnadis de emozion jevade dal atentât mortâl atribuît a ETA che vinars stât al à causât la muart di un sindacalist leât al PSE, Isaías Carrasco. Ancjemò une volte, duncje, il vôt pes politichis spagnolis al è stât compagnât di une atentât, ancje se di nature e di pês une vore diviers rispiet a chel dal 2004. Cun di plui al è di dî che ta chestis elezions, plui che no tai agns stâts, si à vût un sburt ae polarizazion dal vôt su socialiscj e popolârs, tun confront che al à lassât pôc spazi par ducj chei altris.

Par chel che al rivuarde in particolâr il Paîs Basc, là che la campagne eletorâl e jere stade segnade de repression violente cuintri de çampe indipendentiste, i rapresentants di cheste aree politiche a vevin invidât i citadins bascs a no lâ a votâ. Chest par vie che i jere stât impedît ai doi partîts di riferiment de çampe indipendentiste (ANV e EHAK) di partecipâ aes elezions e che intai ultins mês a jerin stâts arestâts passe dusinte dirigjents e militants de aree nazionalitarie basche. I socialiscj, i popolârs, ma ancje i nazionaliscj moderâts (tant che il PNV) a vevin invezit domandât ai bascs di lâ ducj a votâ par rispuindi al atentât. Inte Comunitât Autonomiche Basche e in Navare la medie de astension e je stade dal 33,3%, come a dî che un basc su trê nol è lât a votâ. Une percentuâl plui alte di cuasi il 10% rispiet al 2004. In Gipuzkoa, la aree là che e je plui fuarte la çampe indipendentiste basche, la astension e à fintremai passât il 41%: une rispueste plui chê clare al procès di ilegalizazion di cheste aree politiche. Pal rest, in Hegoalde (Paîs Basc spagnûl), i socialiscj a son cressûts sù par jù dal 4,5%, ancje in graciis de emozion pal atentât di vinars, e a àn otignût 11 parlamentârs; i popolârs a àn pierdût pôc mancul dal 1% e a àn vût 5 elets; il PNV al à pierdût cuasi il 5% des preferencis e al à otignût in dut 6 parlamentârs (un in mancul dal 2004). Risultâts negatîfs ancje pai nazionaliscj bascs di Eusko Alkartasuna (che a àn pierdût l'unic parlamentâr che a vevin) e par Aralar; la coalizion basche NafarroaBai e à mantignût un elet intal parlament di Madrid.

Par chel che al rivuarde la Catalogne, i socialiscj a àn otignût 26 dai 47 puescj a disposizion e propit chest risultât al à contribuît al sucès dal PSOE su scjale statâl (di fat, 4 dai 5 elets in plui dai socialiscj a rivin propit dal Principât). Se o cjalìn ai partîts de aree nazionaliste catalane, l'unic risultât positîf al è chel dai moderâts di Convergència i Unió che a otegnin in dut 11 parlamentârs, un in plui dal 2004. ERC e patìs un colp dûr cu la pierdite di 5 dai 8 parlamentârs che e veve elet tal 2004. Iniciativa per Catalunya Verds e manten il deputât che e veve. Intal Paîs Valenzian, invezit, a son i popolârs a cuistâ teren, i socialiscj a tegnin bot, e la division jenfri Esquerra Unida e la gnove coalizion Bloc-Iniciativa-Verds ur fâs pierdi l'unic deputât che a vevin. Intes Isulis Baleârs socialiscj e popolârs si dividin a miezis i vot puescj a disposizion e a lassin a bocje sute Unitat per les Illes, la gnove coalizion che e cjapave dentri buine part dal panorame nazionalitari des isulis.

In Galizie il Bloc Nacionalista Galego al difint i risultâts e i 2 parlamentârs che al veve vût tal 2004; i socialiscj a otegnin 1o deputâts e i popolârs 11.

Par chel che al rivuarde i partîts di stamp autonomic, la Coalicion Canaria e cjape 2 deputâts, un in mancul dal 2004, e la Chunta Aragonesista e piert l'unic parlamentâr che e veve.
Font: Gara, 10/03/08; Vilaweb, 10/03/08; Galiza Hoxe, 10/03/08; El Paìs, 10/03/08; El Mundo, 10/03/08