Un dai obietîfs che il guvier de Comunitât Autonome Basche si propon di rivâi tal 2021 al è di fâ un salt indenant inte cressite dal euskara te sanitât publiche. Ancjemò tal 2013 si veve tacât a meti lis fondis par regjistrâ la preference linguistiche dai citadins cul obietîf di garantî a ducj un servizi sanitari te lenghe che a vevin miôr. Il procès di regjistrazion al è però di nature volontarie e duncje, cundut che al è in cressi, al va indenant plui a planc di ce che il guvier al sperave. Ae fin dal 2020 a jerin alc di plui di 285 mil i citadins che a vevin dât la lôr preference pe lenghe basche, o sei uns 13% de popolazion complessive.
I invistiments fats par
informâ i citadins in proposit a tachin però a dâ risultâts e di
fat, vie pal an passât, chei che a àn domandât di jessi seguîts
par basc a son stâts il 15% in plui dal an prime (44% in plui
rispiet al 2018). Intal belanç pal 2021 a son cussì stadis
infuartidis lis risorsis par cheste finalitât. Il progjet però nol
pues stâ in pîts se nol è avonde personâl in stât di doprâ la
lenghe basche. In dì di vuê, dai 28.500 membris de sanitât
publiche basche, a son plui o mancul 12 mil chei che a son in stât
di doprâ sei l’euskara
che il castilian. Tai ultins agns però lis competencis linguistichis
a àn aumentât il lôr pês intal procès di selezion dal personâl.
Vie pal 2021 si calcole di assumi altris 4 mil operadôrs sanitaris e
si à confermât che la cognossince de lenghe basche e sarà un
element centrâl intai concors.
Font: El Independiente, 10/01/21
Nessun commento:
Posta un commento