Ai
12 di Fevrâr, denant dal tribunâl suprem spagnûl, si à inviât il
procès cuintri dai dirigjents indipendentiscj catalans. Sot acuse
pai reâts di ribelion e di malversazion a son Oriol Junqueras,
Joaquim Forn, Jordi Turull, Raül Romeva, Dolors Bassa e Josep Rull,
ducj membris dal guvier catalan in cjarie tal moment dal referendum
su la indipendence. Sot procès par ribelion a son invezit Carme
Forcadell, che e jere presidente dal Parlament catalan, Jordi
Sànchez, in chê volte president de ANC, e Jordi Cuixart, president
dal Òmnium Cultural.
Altris membris dal esecutîf catalan – Meritxell Borràs, Carles
Mundó e Santi Vila – a son clamâts a rispuindi par disubidience e
malversazion. A di un pôcs dai membris de presidence dal Parlament
catalan – Lluís Coromina, Lluís Guinó, Anna Simó, Ramona
Barrufet e Joan Josep Nuet – e ae ex deputade de CUP Mireia Boya ur
ven invezit contestât “dome” il reât di disubidience. Il prin
di Fevrâr, intant che i acusâts a vignivin trasferîts des presons
catalanis a chês di Madrid, i judiçs a vevin confermât la date di
partence dal procès e la liste dai testemonis ametûts. Ta chê
stesse zornade i magjistrâts a vevin ancje fat savê che no saressin
stâts ametûts in aule osservadôrs internazionâi cemût che a
vevin domandât diviersis organizazions pai dirits umans. Pai
dirigjents indipendentiscj che si cjatin cumò in esili in Belgjiche,
in Svuizare o in Scozie si à decidût di procedi cuntun procès
separât rinviât a cuant che, se mai, si rivarà a otignî la lôr
estradizion.
Ai
7 di Fevrâr entitâts sociâls e partîts catalans a àn presentât
diviersis iniziativis in program par rivendicâ il dirit ae
autodeterminazion, che nol pues jessi tratât come un crimin, e par
protestâ cuintri dal procès ai dirigjents indipendentiscj. Pai 12
di Fevrâr – zornade che al scomence il procès – a son
previodûts dîs minûts di astension dal lavôr a partî di misdì
e, sot sere, manifestazions in dutis lis plui impuartantis citâts de
Catalogne. Tal dopodimisdì dai 16 di Fevrâr invezit e je stade
clamade adun une grande manifestazion pes stradis di Barcelone. Ai 21
di Fevrâr e je in program une zornade di siopar gjenerâl proclamât
de confederazion sindacâl CSC che e à cjatât za la adesion de
grande maiorance dai partîts politics catalans (JxCat, PDeCAT, ERC,
CUP, Crida
e Catalunya en Comú),
de ANC, dal Òmnium Cultural
e di cetantis altris organizazions. La ANC e à po inmaneât
iniziativis di proteste intune trentine di citâts ator pal mont,
manifestazions a son stadis inmaneadis ai 12 e ai 17 di Fevrâr in
diviersis citâts baschis, e si è daûr a organizâ une
manifestazion pai 16 di Març ancje a Madrid.
Chel
cuintri dai dirigjents indipendentiscj però al è dome un dai procès
metûts in pîts de magjistrature spagnole cun riferiment al percors
di autodeterminazion de Catalogne. Ai 4 di Fevrâr si à vude la
udience preliminâr – clamade adun par verificâ la coretece de
sede processuâl e la liste des testemoneancis ametudis – cuintri
di Josep Lluís Trapero, ex comandant dai mossos
d’esquadra (la polizie catalane), di
Pere Soler, ex diretôr dai mossos,
e di César Puig, za segretari gjenerâl dal dipartiment dal interni
dal guvier catalan. I trê a son acusâts di ribelion par no vê
impedît il vôt referendari dal prin di Otubar e lis protestis
cuintri des azions de polizie spagnole. Sot acuse, ma par sedizion,
ancje la ex intendente de polizie catalane, Teresa Laplana.
Procediments pe ipotesi di inativitât de bande dai mossos
in ocasion dal vôt referendari a son stâts po imbastîts in diviers
tribunâi ator pe Catalogne.
Lis
causis cuintri dal indipendentisim però a cjapin dentri ancjemò
altris situazions. A son chês leadis aes protestis e ai disordins
sucedûts par rispuindi ae repression rivade dopo dal vôt dal prin
di Otubar e che a àn puartât a passe 130 arescj. Une altre cause e
je chê coletive cuintri dai 712 sindics che a àn sostignût il
referendum che i si zontin chês particolârs cuintri di un pôcs di
aministradôrs locâi acusâts di disubidience e di resistence.
Altris procediments a son in vore a Barcelone cuintri di une
cuarantine di personis acusadis di vê colaborât ae organizazion dal
referendum e cuintri dai membris de zonte pes elezions. A son po lis
causis in pîts pes denunciis pai cussì clamâts “delits di odi”
cuintri di personis che a àn criticât o denunciât il compuartament
de guàrdia civil
e de polizie spagnole.
Dut
chest intant che a fasin fature a lâ indenant, in primis pe
mancjance di colaborazion des procuris e des istituzions statâls,
chei pôcs procediments inviâts cuintri dai agjents spagnûi
responsabii des violencis metudis in at il prin di Otubar. Il cuadri
complessîf de repression al à puartât la associazion catalane pai
dirits umans a presentâ un rapuart là che si documentin lis
violazions metudis in at des istituzions spagnolis che a àn colpît
dirits di fonde tant che chei ae libertât, ae sigurece personâl, ae
libertât di espression, ae difese, ae presunzion di inocence, ae
libertât di riunion e di associazion.
Font:
VilaWeb,
01-11/02/19;
Naiz:, 08/02/19
Nessun commento:
Posta un commento