Dopo
vê refudât cualsisei dialic cu lis istituzions catalanis o
cualsisei sorte di mediazion, sabide ai 21 di Otubar, intune riunion
straordenarie, il consei dai ministris spagnûl al à decidût di
meti in vore in maniere la plui largje pussibile l’articul 155 de
Costituzion cun chê di gjavâi ae Catalogne ogni forme di
autoguvier. Il prin ministri spagnûl Mariano Rajoy al à justificât
l’ûs di une misure mai doprade fin cumò cu la “disubidience
ribel, sistematiche e cussiente” de Generalitat
acusade di azions che “a atentin in maniere grivie ai interès
gjenerâi de Spagne”. Ancje se i detais no son stâts ancjemò
presentâts, si fevele di un comissariament totâl dal guvier e dal
Parlament de Catalogne: tal prin câs i podês a varessin di passâ
tes mans dai ministeris di Madrid e tal secont câs dal Senât
spagnûl là che il partît di Rajoy (PP) al à la maiorance
assolude. Al covente po ricuardât che intes ultimis elezions
politichis i trê partîts spagnûi che a poin la metude in vore dal
articul 155 – PP, PSOE e C’s – no àn vût nancje un senatôr
elet in Catalogne e no àn duncje nissune legjitimitât par cjapâ
decisions su chest teritori. Tra lis misuris in program si fevele
ancje dal passaç dai Mossos d’Esquadra
sot dal comant diret dal ministeri pal interni spagnûl e dal control
dai mieçs di comunicazion publics de Catalogne, o sei TV3 e
Catalunya Radio.
Cun di plui, Rajoy al à anticipât la intenzion di clamâ dongje
dentri di sîs mês gnovis elezions in Catalogne ma nol à spiegât
ce che al sucedarà se i catalans a sielzaran di gnûf une maiorance
indipendentiste e se, par evitâlu, si metaran fûr leç i partîts
nazionalitaris compagn di ce che si veve fat agns indaûr intal Paîs
Basc. Al sarà il Senât spagnûl a dâi il vie libare definitîf aes
misuris decidudis dal guvier spagnûl intant de riunion fissade pai
27 di Otubar.
La
rispueste catalane e je rivade in serade prime cul intervent de
presidente dal Parlament, Carme Forcadell, e po cun chel dal
president, Carles Puigdemont, che a àn acusât il guvier spagnûl di
jessi responsabil di un vêr colp di stât cuintri des istituzions
catalanis eletis in maniere democratiche dai citadins. Puigdemont al
à invidât i catalans a difindi in maniere pacifiche lis lôr
istituzions, al à escludût la pussibilitât di clamâ dongje gnovis
elezions (materie che e je di sô competence fintremai che al sarà
in cjarie) e al à fat savê che in setemane si darà adun il
Parlament par viodi ce fâ, ven a dî se procedi cu la declarazion
unilaterâl di indipendence o decidi gnovis misuris di resistence. La
procure di stât spagnole e à za fat savê che, tal câs che si
proclami la indipendence, Puigdemont al sarà clamât a rispuindi di
“ribelion”, reât che al previôt fin a 30 agns di galere.
In
plui dai moviments indipendentiscj, a condanâ lis misuris decidudis
dal guvier spagnûl a son stâts ancje Podemos
e i partîts di chês altris
nazionalitâts dal stât spagnûl. Catalunya
en Comù, il partît vuidât di Ada
Colau e di Xavier Domènech, al à invidât dutis lis fuarcis
catalanistis a dâsi adun par difindi la sovranitât. A compagnâ
chescj acjadiments a son cetantis mobilitazions popolârs ator pe
Catalogne. Tai ultins dîs la plui gruesse si à tignude ai 21 di
Otubar a Barcelone cun passe 400 mil personis in place par reclamâ
la liberazion dai leaders
des dôs entitâts principâls dal indipendentisim catalan, Jordi
Sànchez (ANC) e Jordi Cuixart (Òmnium
Cultural), impresonâts ai 16 di
Otubar.
Font:
Ara,
19-22/10/17;
VilaWeb, 19-22/10/17;
Naiz:, 19-22/10/17
Nessun commento:
Posta un commento