13/10/17

Catalogne: dì par dì, la cronache des ultimis dôs setemanis

A son zornadis decisivis chestis pal avignî de Catalogne e, plui in gjenerâl, di dut il stât spagnûl e il cuadri al cambie cuasi dì par dì. Par chest, in maniere straordenarie, si propon achì la cronache dai acjadiments principâi des ultimis dôs setemanis organizade par zornadis.




Vinars ai 29 di Setembar
Intant che di Madrid si va dilunc a dî che il prin di Otubar in Catalogne no si varà nissun referendum, intune conference stampe il puartevôs dal guvier catalan Jordi Turull, il vicepresident Oriol Junqueras e il responsabil pai forescj Raül Romeva a mostrin pe prime volte lis urnis che a saran dopradis par votâ e a sigurin che ducj i 5 milions 343 mil e 358 citadins cun dirit di vôt a varan la pussibilitât di dî la lôr intune des 6.249 postazions di vôt dai 2.315 coleçs sparniçâts ator pe Catalogne e che, cundut dai secuestris e des operazions di polizie des zornadis stadis, a son urnis e schedis in numar suficient par votâ.
Dopo che al cuarp i è stât ordenât de magjistrature spagnole di metisi ai ordins dal ministeri pal interni spagnûl, il comandant dai Mossos d’Esquadra (la polizie catalane), Josep Lluís Trapero, al vise i siei oms che l’obietîf al è di sierâ i coleçs eletorâi ma che, par mantignî la pâs sociâl, denant de resistence passive de int no si varà di doprâ la violence. Il guvier catalan al presente ricors cuintri des misuris de magjistrature spagnole par impedî il vôt, comprendude chê di gjavâi il control dai Mossos par metiju ai ordins dal guvier di Madrid.
Une delegazion di parlamentârs internazionâi, che e à tant che puartevôs l’ex ministri sloven Dimitrij Rupel, si cjate cul president dal guvier catalan Carles Puigdemont e cui rapresentants des organizazions indipendentistis. Cul jutori di altris osservadôrs internazionâi a controlaran il rispiet dai standards eletorâi internazionâi.
Ator pe Catalogne miârs di personis a partecipin ai ats finâi de campagne referendarie.
Font: El Punt Avui, 30/09/17

Sabide ai 30 di Setembar
Intant de zornade di cidin prime dal vôt, intal centri di Barcelone si à la manifestazion inmaneade dai unioniscj spagnûi cuintri dai referendum. Si stime che i partecipin uns 6 mil personis.
Grups di citadins a inmanein ativitâts culturâls e di intrateniment intai edificis – scuelis soredut – che a saran doprâts tant che sîts par votâ. Lis struturis a son cussì presidiadis ancje vie pe gnot di disinis di personis par impedî che la polizie lis sieri. In gjenar lis percuisizions fatis de polizie dentri des struturis no permetin di cjatâ ni urnis, ni schedis par votâ.
Font: El Punt Avui, 01/10/17

Domenie prin di Otubar
La zornade dal vôt e ven segnade des violencis de guardia civil e de polizie spagnole. Il guvier catalan al fevele di passe 840 ferîts, cualchidun ancje in cundizions seriis. Par impedî di votâ lis fuarcis di polizie spagnole – sù par jù 10 mil agjents, pe plui part fats rivâ tes zornadis prime di altris areis dal stât spagnûl – a intervegnin cuntune brutalitât e cuntune violence che a lassin scaturîts ducj. In plui des cjariis salvadiis cuintri di int che si limite ae resistence passive, a doprin ancje gas lacrimogjens e palotulis di gome (bandidis par leç de Catalogne). Lis violencis no sparagnin nissun, dispès a colpissin personis indenant cui agns e si zontin ancje a atacs di stamp sessist. Cundut achel, intant che la television catalane e i media internazionâi a mostrin chestis violencis, il prin ministri spagnûl Mariano Rajoy si limite a dî che «si à fat ce che al leve fat» e la vicepresidente dal guvier, Soraya Sáenz de Santamaria, e laude i agjents di polizie che – chestis lis peraulis precisis – «a àn operât cun professionalitât, in maniere proporzionâl e proporzionade» e che «lis lôr azions a àn vût di obietîf il materiâl eletorâl e mai lis personis». Peraulis che a indignin ancjemò di plui i catalans e che a sburtin il guvier vuidât di Puigdemont a domandâ l’intervent des istituzions europeanis. In tancj coleçs, là che la polizie spagnole no rive a intervignî par vie che no à avonde oms, a vegnin taiadis lis conessions a internet par impedî lis operazions di vôt che, par davuelzisi in maniere regolâr, a àn dibisugne di acedi al censiment eletorâl eletronic, e a vegnin blocâts i sîts metûts sù dal guvier catalan par garantî la trasmission dai dâts. Par ativâ colegaments gnûfs e par acedi aes rêts alternativis preparadis dal guvier cuintri dai atacs informatics, lis operazions di vôt a àn di jessi ritardadis dispès di une ore o ancje plui. I citadins a restin in code fin che a puedin votâ e in plui di cualchi câs si fermin ancje dopo par difindi i coleçs tal câs che a rivi la polizie. La votazion, fale tes sedis là che si à vût l’intervent des fuarcis di polizie, a van indenant fin vot di sere. Grups di citadins a restin fûr dai edificis fintremai che la conte dai vôts e lis operazions di sierade dal procès eletorâl no son rivadis insom par impedî che la polizie e puarti vie urnis e schedis.
Font: El Punt Avui, 02/10/17

Lunis ai 2 di Otubar
Pôc dopo de miezegnot a vegnin comunicâts i risultâts uficiôs dal referendum: si fevele di passe 2 milions e 200 mil votants e di 2 milions di sì pe indipendence. Un dât che però al è stât limitât des violencis de polizie e de sierade des sedis eletorâls. Dai 2.315 coleçs, di fat, si stime che almancul 400 – cuntun potenziâl di plui di 700 mil eletôrs – a sedin stâts sierâts prime dal vôt o che a vedin vût i materiâi eletorâi puartâts vie de polizie.
La dì dopo dal vôt e je segnade soredut de indignazion – ancje a nivel internazionâl – pes violencis metudis in at de polizie spagnole. Come prin at di condane, i rapresentants des istituzions catalanis a decidin di cjatâsi par un moment di cidin denant dai municipis. Denant di chel di Barcelone si dan dongje i rapresentants dal guvier catalan, dal Comun di Barcelone, di diviersis entitâts sovranistis e cetancj citadins.
Par rivendicâ il dirit ae autodeterminazion dai catalans e par denunciâ lis violencis de polizie, i sindacâts de çampe radicâl e indipendentiste in acuardi cu la CUP – moviment de çampe indipendentiste, libertarie e anticapitaliste – a proclamin pe dì dopo il siopar gjenerâl. Lis entitâts indipendentistis, chei altris sindacâts, lis associazions di categorie e paronâls a cjatin l’acuardi par un bloc gjenerâl des ativitâts in dute la Catalogne.
Font: El Punt Avui, 03/10/17

Martars ai 3 di Otubar
Il bloc gjenerâl des ativitâts proclamât la dì prime al cjate une adesion cence precedents. Dutis lis scuelis de Catalogne a restin sieradis. Intai puarts comerciâi no si à nissune ativitât. Te industrie – se si gjavin lis grandis marcjis internazionâls – la adesion e je tor dal 90%, tal setôr primari si va dal 70 al 95%, tal cumierç si fevele di uns 85/90% di partecipazion, tai traspuarts si è tor dal 30/40% di adesions. Fintremai Barcelone – là che la presince massive di turiscj e condizione dut – lis adesions a son cetantis ancje tai setôrs dal cumierç e de ristorazion, intant che i traspuarts a son blocâts cuasi dal dut.
In zornade a son programadis manifestazions di proteste in dutis lis citâts principâls de Catalogne. A Barcelone za de buinore si àn manifestazions spontaniis in diviers lûcs, cun protestis ancje fûr dai comants de polizie e de sede dal PP. Tor misdì a son i students a jemplâ lis stradis de aree universitarie paralizant ancje il trafic automobilistic. A sîs sot sere la manifestazion uficiâl che e à di rivâ in Plaça de Catalunya e clame adun une cuantitât di int cussì grande che il percors al ven jemplât prime ancjemò che si tachi. Si stime che la partecipazion e sedi su lis 700 mil personis. Manifestazions cence precedents ancje ta chês altris citâts catalanis: a Girona lis cifris a van dai 60 ai 100 mil partecipants, a Lleida si fevele di 45 mil di lôr, a Manresa e a Tarragona i manifestants a son sui 30 mil. Miârs di personis si dan adun però ancje tai centris medis e piçui de Catalogne par mostrâ la lôr indignazion pes violencis de polizie e par domandâ – cemût che si sint intal slogan plui cjantât intant des manifestazions – che «lis fuarcis di ocupazion a ledin vie» des tieris catalanis.
Intervent uficiâl di Felipe di Borbon. Il re di Spagne nol fâs nissun riferiment ai catalans ferîts e aes violencis de polizie e nancje ae dibisugne di dialic tra lis parts ma al contrari, cul fin di garantî la unitât statâl, al vierç la puarte al ûs dal articul 155 de Costituzion par gjavâi la autonomie ae Catalogne. Il so discors al entusiasme e al infuartìs la diestre spagnole, al jeve cualchi division intal PSOE, al cjate la critiche dure di Podemos e al lasse scaturîts i catalans pe sô parzialitât e unilateralitât.
La cuistion catalane e rive in serade tal Parlament european e denant de Comission Europeane là che, cundut dai invîts trasversâi al dialic, lis posizions a restin dividudis: popolârs, socialiscj e liberâi si platin daûr de difese dal “stât di dirit” par criticâ il procès indipendentist; verts, çampe radicâl e nazionalitaris a difindin il dirit dai catalans a esprimisi, a critichin cun fuarce lis violencis de polizie e a invidin la Comission a fâ di mediadore. Invît che nol ven acetât.
Font: El Punt Avui, 04/10/17

Miercus ai 4 di Otubar
Une magjistrade de Audiencia Nacional, il tribunâl speciâl in vore tal stât spagnûl, e clame a rispuindi de acuse di sedizion (previodude di une leç di ete franchiste) il comandant dai Mossos d’Esquadra Josep Lluís Trapero, la intendente dal cuarp Teresa Laplana, e i presidents des dôs entitâts principâls dal indipendentisim catalan Jordi Sànchez (ANC) e Jordi Cuixart (Òmnium Cultural).
Podemos si propon di lavorâ suntune mediazion tra i guviers di Madrid e di Barcelone. La ufierte e cole tal vueit denant dal refût dal prin ministri spagnûl di cualsisei confront cul president catalan.
Font: Ara, 05/10/17; El Punt Avui, 05/10/17

Joibe ai 5 di Otubar
Denant de pussibilitât che ai 9 di Otubar si dedi dongje il Parlament catalan par fâ buine la declarazion di indipendence, il tribunâl costituzionâl spagnûl al decît – pe prime volte di cuant che tal 1980 il Parlament de Catalogne al è tornât a vierzi – di suspindi la convocazion de assemblee: convocazion che par altri no jere ancjemò stade fate.
Par rispuindi a cui che al acuse la polizie catalane di no vê ubidît ai ordins par impedî il referendum dal prin di Otubar, i Mossos d’Esquadra a comunichin che tai dîs prime dal vôt a vevin sierât 400 sîts che a varessin vût di fâ di coleçs eletorâi, intant che te domenie a vevin sierât tra i 130 e i 140 lûcs di votazion. Dut chest cence nissune violence. La polizie spagnole e la guardia civil invezit, cundut des violencis metudis in at, no ‘ndi vevin sierâts plui di 70.
Doi istitûts bancjaris logâts in Catalogne a fasin savê che a spostaran la lôr sede legâl. Si trate di Caixabank (che si sposte a Valencia) e dal Banc Sabadell (che e ve a Alicante). Di là dal impat simbolic, la decision no à masse efiets sul plan pratic. La dì dopo il stes pas al ven comunicât dal grup energjetic Gas Natural e di cualchi altre realtât economiche.
Font: Ara, 06/10/17

Vinars ai 6 di Otubar
Il guvier catalan al comuniche i risultâts definitîfs dal referendum. I votants a son stâts 2.286.217, ven a dî il 43% dai citadins cun dirit di vôt. Risultât che però al è stât condizionât dal intervent de polizie. I votants che a àn dite di sì ae indipendence a son stâts il 90,18%, a front di un 7,83% che al à sielzût pal no. La aree là che si à votât di plui e je stade chê de Catalogne centrâl, cuntune partecipazion dal 58,15%, chê là che si à votât di mancul e je stade la regjon di Tarragona cul 36,82%.
Sintûts de Audiencia Nacional, Trapero, Laplana, Sànchez e Cuixart a jessin dal tribunâl cence misuris cautelârs. I cuatri a son acusâts di “sedizion” cun riferiment aes manifestazions popolârs che si vevin davueltis ai 20 di Setembar a Barcelone par protestâ cuintri dal arest di 14 funzionaris dal guvier catalan leâts ae organizazion dai referendum.
Il president catalan Puigdemont al fâs savê che martars ai 10 di Otubar, a sîs sot sere, si presentarà denant dal Parlament par riferî su la situazion politiche de Catalogne. La comunicazion no fâs nissun riferiment diret ae declarazion unilaterâl di indipendence previodude de leç intal câs di vitorie dai sì tal referendum.
Il ministeri spagnûl dal interni al fâs savê che lis fuarcis di polizie inviadis par impedî il referendum a restaran in Catalogne plui a dilunc di ce che si previodeve, ven a dî almancul fintremai i 18 di Otubar.
Il guvier spagnûl al imbastìs une suaze normative par favorî il spostament des impresis logadis in Catalogne.
Font: Naiz:, 06-07/10/17

Sabide ai 7 di Otubar
Barcelone i da acet a di une manifestazion clamade dongje par sburtâ il dialic tra i guviers di Madrid e di Barcelone. Diviers miârs di personis a aderissin ae iniziative. I numars a son avonde lontans di chei viodûts in place intant des manifestazions des zornadis prime.
Font: El Punt Avui, 08/10/17

Domenie ai 8 di Otubar
Barcelone e ven invadude di miârs di unioniscj che a rivendichin la partignince de Catalogne ae Spagne. Pai organizadôrs e pe stampe spagnole a sfiliin il milion, daûr di altris fonts no rivin a 200 mil. La plui part di lôr – si ben che a vegnin presentâts dai media spagnûi come la “maiorance cidine catalane” – a rivin cun corieris di dute la Spagne. In tancj no platin lis lôr tindincis di diestre. Intant de lôr presince in citât a son protagoniscj di diviers ats violents o di menace cuintri di dut ce che a pein cul indipendentisim catalan.
Font: VilaWeb, 08-09/10/17; Naiz:, 09/10/17

Lunis ai 9 di Otubar
Il Consei de Europe al domande une investigazion su lis violencis de polizie spagnole dal prin di Otubar.
La vicepresidente dal guvier spagnûl, Sáenz de Santamaria, e vise che in câs di declarazion di indipendence il guvier dal PP, cu la poie di C’s e PSOE, al è pront a doprâ l’articul 155 de Costituzion par gjavâi la autonomie ae Catalogne. No si fermin lis menacis di impresonament cuintri dal president catalan Puigdemont de bande di rapresentants di prin plan dal PP spagnûl. Atac vandalic vie pe gnot ae sede centrâl de CUP a Barcelone.
A van indenant i invîts internazionâi par rivâ a di une mediazion jenfri Spagne e Catalogne, tra i ultins chel di vot premis Nobel pe pâs e dal president dal Comitât european des Regjons.
La sindiche di Barcelone, Ada Colau, e domande al president catalan Puigdemont di no fâ la declarazion di indipendence intal doman dal moment che il vôt dal prin di Otubar nol è avonde par cjapâ chê strade, ma al pues jessi però une jeve par tornâ a dialogâ. Tal stes timp e invide il prin ministri spagnûl a no meti in at l’articul 155 e a ritirâ lis fuarcis di polizie spagnole inviadis in Catalogne.
La ANC e domande ai citadins di dâsi adun intal doman a sîs sot sere denant dal Parlament de Catalogne par sostignî la declarazion di indipendence.
Font: Vilaweb, 09/10/17; Ara, 09/10/17; Naiz:, 09/10/17

Martars ai 10 di Otubar
La atenzion de zornade e je dute centrade sul intervent che il president Puigdemont al à in program di fâ a sîs sot sere inte aule dal Parlament catalan. Intant che tes stradis fûr de Assemblee catalan si dan dongje miârs di partidants de indipendence, il discors al ven posticipât di une ore pes tensions che si àn tra lis dôs formazions che a formin la maiorance, Junts pel Sí e CUP, sui contignûts dal intervent dal president.
Intal so discors Puigdemont al cjape sù il mandât che al rive dal vôt popolâr dal prin di Otubar par che la «Catalogne e deventi un Stât indipendent in forme di Republiche», ma tal stes timp al manifeste la intenzion di «suspindi la declarazion di indipendence par che tes setemanis seguitivis si puedi inviâ un dialic che, cence di chel, no si pues rivâ a di une soluzion concuardade». In proposit, il president catalan al fâs riferiment aes iniziativis di mediazion che a son rivadis dopo dal vôt e al invide il guvier spagnûl e lis istituzions europeanis a mostrâ la stesse responsabilitât par risolvi la crisi istituzionâl in forme concuardade e intal rispiet de volontât dai citadins. «La Catalogne – al ricuarde però Puigdemont – si à vuadagnade il dirit di jessi Un Stât indipendent, di jessi rispietade e scoltade».
Il discors dal president al ven criticât cun viamence des fuarcis de diestre spagnoliste rapresentadis intal Parlament catalan: par Inés Arrimadas (C’s) e Xavier García Albiol (PP) la declarazion di indipendence, ancje se rinviade, e rapresente un “golpe” cuintri de democrazie. Par Miquel Iceta (PSC) invezit no si pues suspindi alc che no si à pardabon declarât. Tra lis fuarcis di oposizion la uniche vierzidure clare e rive di Lluís Rabell (Sí Que Es Pot) che al calcole la decision di Puigdemont une oportunitât pal dialic e al invide a evitâ ats unilaterâi che a sedino declarazions di indipendence o ben la metude in vore dal articul 155. Critichis ae decision dal president a rivin però ancje di une des dôs fuarcis de maiorance: Anna Gabriel (CUP) e lamente che cul no proclamâ la indipendence daurman si à pierdût une oportunitât ancje parcè che al è dibant provâ di negoziâ cun cualchidun, come il guvier spagnûl, che no ur ricognòs il dirit di autodeterminâsi. Delusion pal discors dal president a rivin ancje des organizazions indipendentistis principâls.
Di là di dut, finide la riunion dal Parlament, i membris dal guvier catalan e i deputâts di Junts pel Sí e CUP a firmin il test di une declarazion che e palese miôr i contignûts dal intervent di Puigdemont. «O metìn sù la Republiche catalane come Stât indipendent e sovran, di dirit, democratic e sociâl» al dîs il test e al zonte che, ancje se cu la volontât di vierzi negoziazions cul stât spagnûl, si invie un procès costituent e vincolant.
Font: TV3, 10/10/17; Naiz:, 10/10/17

Miercus ai 11 di Otubar
Dilunc vie de zornade e cjape forme la rispueste dal stât spagnûl al discors fat la sere prime dal president catalan Carles Puigdemont.
Il prin ministri spagnûl Mariano Rajoy si presente denant dal Congrès dai deputâts dopo vê za inviât i prins pas par podê meti in vore l’articul 155 de Costituzion spagnole e suspindi la autonomie catalane. Si domande a Puigdemont di sclarî se si à vude o no la proclamazion de indipendence e, se sì, si domande di revocâle par evitâ la jentrade in vore dal articul 155. Il guvier catalan al à timp fin 10 di matine dai 16 di Otubar par rispuindi su la proclamazion de indipendence e fintremai i 19 di Otubar par revocâle. La misure e ven definide intant di une riunion straordenarie dal consei dai ministris spagnûl, cul vie libare ancje dal segretari gjenerâl dal PSOE, Pedro Sánchez. Chest ultin al conferme di vê concuardât cul prin ministri la pussibilitât di inviâ dentri di sîs mês il dibatiment suntune riforme costituzionâl che e riviodi il sisteme des autonomiis.
Denant dal Congrès Rajoy al conferme che no si varà nissune mediazion e nancje nissun referendum concuardât, par vie che «no si à nissune mediazion pussibile tra la leç democratiche e la ilegalitât». Su la taule al reste dome l’inviament dal percors par meti in vore l’articul 155 e une promesse fumose di riforme costituzionâl. Rajoy al sclarìs però che pe Catalogne no si ricognossarà mai il dirit ae autodeterminazion. Il prin ministri spagnûl al va però inmò plui innà invidant lis fuarcis sovranistis catalanis al sisteme dal “autonomisim patist” come se i ultins siet agns di vite politiche e sociâl catalane no fossin mai esistûts. Critichis al intervent di Rajoy denant dal Congrès a rivin dai rapresentants dai partîts indipendentiscj e nazionalitaris e, par chel che al rivuarde i principâi partîts spagnûi, dome di Podemos che al va dilunc a domandâ un referendum concuardât.
La rispueste che e rive di Madrid e ven comentade dal president catalan in maniere lapidarie: «Tu domandis dialic e ti rispuindin cul meti su la taule l’articul 155. O vin capît.»
Intal stât spagnûl però no dutis lis istituzions a rispuindin al intervent di Puigdemont inte stesse maniere. Al è il câs dal Consei provinciâl di Gipuzkoa (Comunitât Autonome Basche) là che une maiorance formade di PNV e EH Bildu a ricognossin la proclamazion de Republiche catalane e la sospension de declarazion di indipendence fate cun chê di tignî viert il dialic.
Font: Ara, 11/10/17; Naiz:, 11/10/17

Joibe ai 12 di Otubar
Human Rights Watch – une des organizazions pai dirits umans plui impuartantis intal mont – dopo vê davuelt une investigazion su lis violencis dal prin di Otubar e à dât fûr un rapuart là che e denuncie che la polizie spagnole e à doprât la fuarce in maniere ecessive cuintri dai manifestants. Un dai responsabii de organizazion al spieghe che «ancje se la polizie e veve la leç de sô bande tal meti in vore un ordin judiziari, chest no i deve il dirit di doprâ la violence cuintri di manifestants pacifics». La organizazion e ricuarde che il guvier spagnûl al à l’oblic di garantî che si vedi une investigazion su lis violencis e, viodude la sô posizion, al sarès util che si fasès judâ di un organisim internazionâl indipendent.
La “Zornade de ispanitât” e je la ocasion par viodi in place a Barcelone e in altris citâts catalanis i ultras dal unionisim spagnûl. Diviers di lôr a son protagoniscj di violencis e menacis. Dome in citât, i Mossos d’Esquadra a identifichin plui di cincuante protagoniscj di chestis violencis. Al somearès ancje che tra di lôr si vedin personis za segnaladis pes violencis capitadis ai 9 di Otubar a Valencia, là che in ocasion de fieste nazionâl manifestants valenzians a son stâts agredîts di ultras de diestre spagnoliste. Inte capitâl catalane si ten ancje une manifestazion de estreme diestre spagnole là che, dongje de esposizion di simbui fassiscj, si brusin bandieris catalanis, si insultin lis autoritâts de Catalogne e si àn altris manifestazions di razisim.
Font: VilaWeb, 12/10/17; Ara, 12/10/17; Naiz:, 12/10/17

Nessun commento: