Ai
20 di Fevrâr, la vilie de Zornade internazionâl de lenghe mari, la
direzion gjenerâl pe politiche linguistiche dal Aragon e à
presentât e metût in linie un sît internet di pueste
(www.lenguasdearagon.org)
par promovi lis dôs lenghis propriis di cheste comunitât, o sei
aragonês e catalan. Il portâl al ufrìs un archivi di materiâi pal
studi, pal insegnament e pe cognossince de realtât linguistiche dal
Aragon, un repertori toponomastic cun 2 milions di vôs e
informazions su lis ativitâts e i progjets svilupâts de direzion
gjenerâl, di altris aministrazions publichis e di sogjets impegnâts
intal promovi lis lenghis propriis. Il sît, che al è in cressite
progressive, al à za 732 documents audio o video su la tradizion
orâl, 200 publicazions in linie e 70 videos di nature pal plui
didatiche.
Une
altre novitât che e rive di cheste comunitât e je la scree des
emissions di Chisla Radio, la prime emitente che e trasmet ad in plen
par aragonês. La radio, che si pues scoltâ in direte o cun materiâi
in podcast
su internet, e à tacât a trasmeti ai 4 di Fevrâr cuntune
programazion di trê oris. Il progjet si propon di tirâ dongje
contribûts di ducj i sogjets che a operin sul teritori cul e pal
aragonês. Daûr dal ultin censiment, l’aragonês al è lenghe mari
di 12 mil personis, 800 di lôr a jerin in scolte de prime
trasmission intant che 1.200 le àn discjariade di internet.
Font:
El Periodico de Aragon,
20/02/17;
Heraldo, 19/02/17
Nessun commento:
Posta un commento