Vie
pe gnot tra i 3 e i 4 di Novembar la polizie turche e à impresonât
Selahattin Demirtaş e Figen Yüksekdağ, i doi copresidents dal
Partît Democratic dal Popul (HDP), la formazion politiche di
riferiment de comunitât curde che tal stât turc e conte passe 22
milions di personis. La operazion, che e à tocjât diviersis citâts
dal Kurdistan turc e i uficis dal partît a Ankara, e à puartât a
arestâ une disine di parlamentârs dal HDP, il tierç partît par
numar di deputâts dentri dal Parlament turc e la fuarce principâl
di oposizion al regjim dal president turc Recep Tayyip Erdoğan. La
azion di polizie e je stade compagnade dal bloc cuasi totâl des rêts
di comunicazion sociâl plui impuartantis tant che Twitter, Facebook
e YouTube.
I parlamentârs curdis a son acusâts di fâ propagande
pal PKK, il moviment armât che dai prins agns ’80 al è in lote pe
autodeterminazion dal Kurdistan, e di vê stiçât lis violencis
sclopadis intal Autun dal 2014 cuant che la Turchie e blocave ogni
forme di jutori ae citât curde di Kobane assediade dai teroriscj dal
Stât Islamic. Acusis similârs ancje pai doi sindics di Amed /
Diyarbakır, la plui gruesse citât dal Kurdistan turc, arestâts
cualchi zornade prime dopo che, in Setembar, altris 24 sindics curdis
a jerin stâts suspindûts e sostituîts cun rapresentants dal AKP,
il partît di Erdoğan. Tal stes mês a jerin stadis blocadis lis
emissions di dîs televisions privadis, pe plui part di lenghe curde.
In Otubar invezit si veve vude la sospension di plui di 11 mil
insegnants curdis, simpri cu la acuse di simpatiis pal PKK. Ai 29 di
Otubar a jerin stâts sierâts altris cuindis media curdis e doi dîs
dopo la polizie e veve arestât plui di une disine di gjornaliscj e
dirigjents dal cuotidian Cumhuriyet, vôs de oposizion laiche turche.
Si stime che, a vuê, a sedin almancul 130 i gjornaliscj impresonâts
dome par vê davuelt la lôr ativitât di informazion libare. Dopo
dal arest dal deputâts dal HDP, fintremai lis istituzions
europeanis, che prime a vevin mantignût un profîl plui che bas, a
àn domandât in maniere uficiâl aes autoritâts turchis il rispiet
de democrazie parlamentâr e dai dirits umans. Il president dal
Parlament european, Martin Schulz, al à dite che chescj arescj a
metin in discussion la sostenibilitât des relazions tra UE e
Turchie.
Font:
Ekurd Daily,
04/11/16
Nessun commento:
Posta un commento