Intes
elezions europeanis dal 2014 il numar plui alt di elets espression
direte des nazionalitâts minorizadis si lu à vût intal ream di
Spagne. Par superâ i pidiments leâts al numar une vore alt di vôts
che al coventave par otignî dai eurodeputâts, la plui part dai
partîts nazionalitaris si è dade dongje in cartei eletorâi che a
cjapavin dentri formazions rapresentativis di nazionalitâts
diferentis.
Il risultât
miôr al è stât chel de Coalizion pe Europe (CEU), là che a jerin
dentri i rapresentants dal nazionalisim moderât catalan e basc, che
e à cjapât il 5,4% dai consens a nivel statâl e e à rivât a elei
trê eurodeputâts: doi di CiU (Ramón Tremosa e Francesc de Paula
Gambús) e une dal PNV (Izaskun Bilbao). Subite daûr e je rivade la
coalizion de Çampe pal dirit di decidi (EPDD), metude adun de çampe
indipendentiste catalane di ERC-NECat, che e à cjapât il 4% des
preferencis e doi elets (Josep Maria Terricabras e Ernest Maragall).
La coalizion I popui a decidin (LPD) che e meteve adun altris
formazions sovranistis e à cjapât il 2,1% dai vôts e puartât ae
elezion di Josu Juaristi di Bildu, partît de çampe indipendentiste
basche, cul acuardi che tor de metât legjislature i lassarà il
puest al prin dai no elets che al parten al Bloque Nacionalista
Galego. Jordi Sebastià Talavera, de formazion sovraniste catalane
Compromìs, al è stât elet invezit cu la coalizion Vierte europeane
(PE) che a nivel statâl e à cjapât il 1,9% des preferencis. Inte
coalizion de Çampe plurâl (IP), che e à cjapât il 10% dai vôts,
a jerin dentri ancje candidâts di formazions nazionalitaris: doi di
lôr a son stâts elets, ven a dî Ernest Urtasun Domenech di
Iniciativa per Catalunya Verds e Maria Lidia Senra dal moviment
galizian A Nova.
I
eurodeputâts sovraniscj bascs, catalans e galizian a son duncje nûf,
cuasi il dopli dal 2009. Un sucès che si zonte ae pierdite di
consens dai doi partîts spagnoliscj principâi, ven a dî socialiscj
(PSOE) e popolârs (PP), e al grues risultât de liste Podemos (8%
dai vôts e cinc elets), la uniche formazion spagnole a ricognossi in
maniere esplicite i dirit ae autodeterminazion des nazionalitâts
minorizadis.
Dongje di
chescj dâts al è il câs di meti dôs zontis plui in detai. La
prime si riferìs ae Catalogne, là che il vôt pes europeanis al
vignive let ancje tant che une prove di fuarce inte prospetive dal
referendum pe indipendence e ancje par chest la partecipazion al vôt
e je cressude di plui dal 10% rispiet al 2009. Pe prime volte, cul so
23,6%, ERC e je stade la formazion plui votade, passant denant di CiU
che e à cjapât il 21,8% des preferencis. ICV-EUiA e à vût invezit
il 10,3% dai vôts plaçantsi un pôc sot dai socialiscj, ma denant
dal PP. Lis trê fuarcis a pro de indipendence a àn duncje metût
adun passe il 55% dai consens. A cheste maiorance esplicite si à po
di zontâ che une altre fuarce indipendentiste, o sei la CUP, no si
presentave aes europeanis e che la liste Podemos, cundut che e opere
su scjale statâl, e je a pro dal dirit di autodeterminâsi. Chê
altre zonte si riferìs al Paîs Basc là che, se si metin adun i
risultâts inte Comunitât
Autonome Basche e in Navare,
al ven fûr che la formazion plui votade e je stade la çampe
indipendentiste di Bildu, che e je rivade denant sei dal PNV che dai
partîts spagnoliscj.
Font:
elections2014.eu; El País, 25-26/05/14; Naiz:, 25-26/05/14; VilaWeb;
25-26/05/14
Nessun commento:
Posta un commento