19/10/13

Paîs Catalans: maree in place tes Baleârs pal catalan

Ai 4 di Otubar la assemblee dai docents des isulis Baleârs e à decidût di suspindi il siopar cuintri de metude in vore dal decret su lis lenghis fat bon dal guvier de comunitât autonome des isulis par regolâ l’insegnament des dôs lenghis uficiâls des isulis, ven a dî catalan e spagnûl, e dal inglês. Il proviodiment al cjape il puest di chel dal 1997 che al viodeve il catalan tant che lenghe di riferiment par sostituîlu cuntun implant là che a fâ di paron a son il spagnûl e l’inglês. Il cussì clamât decret sul trilinguisim volût de diestre spagnoliste (PP) che e je cumò al guvier des isulis si è però cjatât denant di une oposizion dure no dome dai partîts catalaniscj e di çampe, ma ancje dai insegnants, dai students e dai sindacâts che a difindin la funzion centrâl de lenghe catalane.
I docents a àn manifestât la lôr contrarietât al decret cuntun siopar di trê setemanis che nol à precedents intes Baleârs e che cumò si à decidût di fermâ dome par no penalizâ i students. La proteste però e va indenant cuntune altre forme, cun di fat i insegnants a fasaran lezion daûr dal sisteme educatîf di prime cence meti in vore la gnove leç. Il refût dal decret sul trilinguisim al à viodût però il so moment plui alt domenie ai 29 di Setembar cuant che passe 80 mil personis a àn sfilât pes stradis di Palma par dî di no al proviodiment volût dal guvier vuidât di José Ramón Bauzá. La maree verde (chest il colôr des maiutis de campagne cuintri dal decret) che e à jemplât lis viis de capitâl des isulis (logade su la isule di Mallorca) e je stade compagnade di altris manifestazions che si son tignudis a Menorca, Eivissa e Formentera par un totâl di sù par jù 100 mil personis, o sei la plui grande manifestazion di place viodude inte storie des Baleârs.
Font: VilaWeb, 29/09/13 – 05/10/13; El Punt Avui, 01/10/13

Nessun commento: