In Irlande
dal Nord a van dilunc i scuintris e lis violencis inviadis dai
estremiscj unioniscj dopo che ai 3 di Dicembar il consei comunâl di
Béal Feirste / Belfast al veve fat bon un proviodiment là che si
decideve che la bandiere dal Ream Unît (Union Jack) e sarès stade
esponude fûr dal municipi dome par cualchi ricorence e no dut il
timp dal an. I scuintris tra bandis lealistis e polizie a jerin
tacâts za la sere de aprovazion dal proviodiment. Di in chê volte,
lis protestis si son slargjadis a diviersis localitâts de Irlande
dal Nord e se in diviers câs a àn viodût manifestazions cence
incidents, in altris a àn cjapât la forme di atacs cuintri de
polizie, di ats di vandalisim e fintremai di scuintris cun grups de
comunitât nazionaliste.
A cuarante dîs dal prin tacâ des violencis
a son aromai disinis e disinis i ferîts, e cetancj i dams. Dome inte
zornade dai 12 di Zenâr si fevele di une trentine di ferîts. Cun di
plui, ta cheste dade, si àn vût menacis cuintri dai rapresentants e
atacs aes sedis dai partîts che a àn votât a pro dal proviodiment,
o sei Alliance Party (moderâts), SDLP (nazionaliscj moderâts) e
Sinn Féin (republicans). Daûr des violencis a son piçui grups di
estremiscj lealiscj che la lôr azion e cjate aromai la condane dure
ancje de bande di cetancj rapresentants politics unioniscj che sul
imprin a vevin invidât a protestâ cuintri dal proviodiment su la
esposizion de bandiere britaniche. Cul lôr compuartament chescj
grups a fasin dome dam ae cause che a disin di volê difindi, al à
dite il segretari dal Ulster Unionist Party, Mike Nesbitt, intant che
dal Sinn Féin al è rivât un invît a ducj i partîts –
nazionaliscj e unioniscj – a dâsi dongje par isolâ i violents.
Font:
BBC, 07-12/01/13
Nessun commento:
Posta un commento