Paîs Catalans: doi tierçs dal Parlament pe indipendence

Chel che al jes des elezions pal Parlament catalan che si son tignudis domenie ai 25 di Novembar al è un cuadri avonde complès, ma che al mostre a clâr che cuasi trê cuarts dai eletôrs a àn votât par partîts che si son impegnâts par che ta cheste legjislature si davuelzi un referendum pe indipendence de Catalogne. A votâ al è lât cuasi il 70% dai citadins, la percentuâl di partecipazion eletorâl plui alte inte storie di cheste istituzion.
Convergència i Unió (CiU), la formazion politiche di riferiment dal nazionalisim moderât, e reste il partît plui votât cul 30,68% des preferencis, ma e piert une vore di consens rispiet aes elezions stadis e e rive a puartâ in Parlament 50 deputâts cuintri dai 62 che e veve te legjislature stade. Artur Mas, president catalan in scjadince al veve domandât pal so partît un vôt maioritari par podê vuidâ la Catalogne su la strade de indipendence, invezit si ricjate cuntune presince parlamentâr plui debile. Daûr di cheste pierdite di teren a son plui elements: lis politichis di austeritât metudis in vore ta chescj agns, la conversion al indipendentisim dopo de manifestazion massive dai 11 di Setembar che e à lassât perplès tancj catalans e, in part, ancje i scandui jevâts fûr di pueste cuintri di lui intal plen de campagne eletorâl. Che la maiorance de popolazion catalane e sedi a pro de indipendence però si lu viôt a clâr dai risultâts di chei altris partîts indipendentiscj: Esquerra Republicana de Catalunya (ERC) e à dopleât i risultâts rispiet al 2010 e cul 13,68% des preferencis e puarte in Parlament 21 deputâts a front dai 10 di prime, intant che Iniciativa pe Catalunya – Verds – Esquerra Unida i Alternativa (ICV-EUiA) e à otignût pôc mancul dal 10% dai vôts e 13 deputâts, trê in plui de legjislature stade. La Candidatura d’Unitat Popular – Alternativa d’Esquerres (CUP), la çampe indipendentiste e anticapitaliste, e jentre pe prime volte in Parlament cul 3,48% des preferencis e 3 deputâts. Une altre fuarce indipendentiste che la volte stade e veve otignût 4 deputâts, o sei Solidaritat Catalana per la Independència (SI), cul so 1,28% e reste fûr dal Parlament. Rispiet ae volte stade però, in totâl, la presince a pro de indipendence e cres. Intal front spagnolist la situazion piês e je chê dai socialiscj (PSC) che a cjapin a pene il 14,43% dai vôts e a colin di 28 a 20 deputâts, fasintsi passâ denant tant che seconde fuarce di ERC e segnant il risultât piês de lôr storie. Miôr i va ai popolârs (PP) che si fermin però al 12,99% dai vôts e a mandin in Parlament 19 dai lôr, dome un in plui de volte stade. L’eletorât spagnolist al premie soredut il partît dai Ciutadans (C’s) che al cjape il 7,58% des preferencis e al passe di 3 a 9 elets. Cuasi doi tierçs dal Parlament catalan a son duncje intes mans di fuarcis a pro de indipendence, ma CiU no à otignût chê grande maiorance che e sperave par guviernâ di bessole. A front di chest risultât Artur Mas al à confermât il so impegn par un referendum su la indipendence dilunc vie de legjislature, ma al à ametût che par cjapâ cheste strade CiU no pues stâ di bessole domandant la poie, in Parlament o ancje intal Guvier, di une o plui fuarcis dal front indipendentist. Un compagn di viaç pussibil al è rapresentât di ERC che però, par cumò, e à miôr no sbelançâsi sigurant dome che e savarà jessi ae altece de volontât dai catalans. Chescj dîs a saran duncje fis di incuintris tra i rapresentants dai partîts par cjatâ fûr une soluzion ae domande che e rive de maiorance dai catalans: un guvier plurâl che al sedi plui atent aes cuistions sociâls e che al vuidi il paîs su la strade de indipendence.

Font: VilaWeb, 25-26/11/12; Avui, 25-26/11/12