15/11/12

Paîs Basc: procès di pâs sot atac cul arest di Aurore Martin

Un pericul pe pâs. Cussì a son stâts descrits di cetancj di lôr l’arest e la estradizion in Spagne di Aurore Martin, militante di Batasuna di citadinance francese, che il prin di Novembar e jere stade fermade de gjandarmarie intant di un control stradâl dongje di Maule, intal Paîs Basc francês. Su la fonde di un ordin di arest internazionâl emetût des autoritâts spagnolis, la zovine e je stade arestade e consegnade cualchi ore plui tart ae vuardie civîl spagnole. Cumò si cjate inte preson di Soto del Real, dongje di Madrid. Aurore Martin e je imputade intun procediment inviât ancjemò intal 2008 dal judiç Baltasar Garzón – vuê inabilitât – cuintri di une cuarantine di militants de çampe indipendentiste basche. Lis “provis” cuintri di jê si riferissin dome ae sô ativitât politiche, tant che la partecipazion a conferencis stampe, ae presentazion di documents programatics o a manifestazions politichis.
Intal procediment cuintri di jê si dîs che la organizazion politiche Batasuna e je stade metude fûr leç dal stât spagnûl intal 2003, ma no si ten cont che intal stât francês – dulà che la zovine e vîf e e davuelç la sô ativitât – e je legâl. Chel istès, daûr dal teoreme che Batasuna e meteve in vore sul plan politic lis indicazions de organizazion armade ETA, Aurore Martin e riscje cumò dodis agns di preson par “partecipazion a organizazion di stamp teroristic”. Une acuse che, daûr di ce che a disin i stes dirigjents principâi dal sindacât de magjistrature francese, no à nissune fonde dal moment che intes ativitâts de militante basche nol è “nuie che al puedi jentrâ te definizion di terorisim”. Ni la fin de ativitât armade di ETA, ni la gnove fase politiche che si è vierte intal Paîs Basc e nancje la ativitât di Aurore Martin dentri de organizazion Bake Bidea che inta chescj agns e à lavorât par superâ in maniere pacifiche il conflit basc, a son stadis tignudis in cont des autoritâts spagnolis e di chês francesis. Intal Paîs Basc setentrionâl, là che si è daûr a cirî di superâ il conflit violent che al à segnât ancje chest teritori, l’arest e la estradizion de militante di Batasuna a àn lassât ducj scaturîts e a son stâts cjapâts tant che un atac al procès di pâs. Ai 3 di Novembar rapresentants di dutis lis fuarcis politichis di chest teritori, tant di nivel statâl (PS, UMP, MoDem, PCF) che baschis (EE-Berdeak, AB, EA, EAJ-PNB, Batasuna), ma ancje di sindacâts (CFDT, CGT, LAB, ELA, ELB, Solidaires) e organizazions sociâls a àn tignût une conference stampe unitarie par condanâ chest episodi, par domandâ spiegazions aes autoritâts francesis e par invidâlis a intervignî par comedâ la situazion. Cun di fat – a àn ricuardât – “e je la prime volte che la France e estrade une citadine francese par delits di opinion che, intal stât francês, no son reât”. Par esprimi la indignazion di dute la comunitât al è cui che al à spiegât che “il Paîs Basc nol à dibisugne vuê di dimostrazions di fuarce, ma di inteligjence politiche: magari cussì no, lis posizions intal câs Martin e ta chel de coletivitât teritoriâl a mostrin ben lis mancjancis dal guvier francês ta chest cjamp”. Par manifestâ la lôr solidarietât par Aurore Martin e par domandâ ai guviers di Parîs e di Madrid un cambiament di politiche sul procès di pâs basc e su la situazion dai presonîrs, 15 mil personis a àn manifestât ai 1o di Novembar pes stradis di Baiona / Bayonne in rispueste ae clamade de organizazion Herrira.
Font: Gara, 02-04 e 11/11/12

Nessun commento: