Romanie: proibide la zornade di mobilitazion székely

Lis autoritâts rumenis a àn proibît la celebrazion in program pe Zornade de libertât dal Székelyföld, o sei la part de Transilvanie là che e vîf la plui part de minorance ongjarese de Romanie. La manifestazion, in program vie pal mês di Març te citât di Marosvásárhely / Targu Mures, e jere stade pensade dai siei organizadôrs (Consei Nazionâl Székely) tant che ocasion par protestâ cuintri de riforme aministrative che si è daûr a imbastî in Romanie. Il progjet dal guvier rumen, di fat, al previôt di incuarpâ il Székelyföld intune regjon aministrative plui grande là che la comunitât ongjarese e deventarà mancul dal 30% de popolazion totâl. Cuintri de proibizion e je intervignude ancje la Aleance Libare Europeane (EFA) cuntune proteste uficiâl indreçade sei al president rumen che al sindic de citât là che la iniziative e varès vût di davuelzisi.

Font: EFA, 26/02/15

UE: pe EFA pas indaûr intes politichis pes minorancis

Cundut che lis istituzions europeanis a àn fat dai pas indaûr inte protezion des lenghis minorizadis cul lassâ tes mans dai singui stâts lis competencis e lis responsabilitâts ta chest cjamp e cul ridusi lis risorsis par svilupâ chestis lenghis, la diversitât linguistiche e varà un pês simpri plui fuart intal tornâ a disegnâ la Union Europeane. Al e chest, in struc, il messaç jessût dal confront inmaneât ai 24 di Fevrâr intal Parlament european de Aleance Libare Europeane (EFA) e di altris sogjets impegnâts pai dirits des comunitâts minorizadis. Di là des declarazions di façade, di fat, a son ancjemò tantis lis lenghis lassadis fûr de protezion ufierte di imprescj tant che la Cjarte des lenghis regjonâls o minoritariis, e lis comunitâts che a àn di frontâ lis azions di vualivament linguistic e identitari metudis in at dai stâts centrâi. Tune suaze dal gjenar no dome al covente infuartî i struments e i mecanisims di tutele, ma e devente ancjemò plui centrâl la funzion dal Parlament european tant che spazi democratic che al controli e al rispuindi aes politichis de Comission europeane.

Font: EFA, 26/02/15

Balcans: discriminazions etnichis denunciadis di AI

Daûr dal ultin rapuart di Amnesty International sui Balcans i atacs e lis menacis ai dirits umans a restin ancjemò tancj, des agressions e des discriminazions cuintri dai omosessuâi fintremai ai atacs ae libertât di stampe, cence dismenteâ la situazion dificile di diviersis minorancis linguistichis e nazionâls. Tal câs de Romanie, par esempli, si va dilunc a segnalâ lis discriminazions cuintri dai rom, ancje cun câs di dislozaments sfuarçâts. Rom e minorancis serbis a son lis comunitâts plui discriminadis in Cravuazie. In Macedonie, in plui de situazion dificile dai rom, si cjale cun pôre al cressi des violencis tra la comunitât macedone e la minorance albanese. Violencis e tensions etnichis a restin po di cjase ancje in Cossovo, massime intes areis dal Nord là che e vîf une gruesse minorance serbe.

Font: Balkan Insight, 25/02/15

Paîs Basc: gnove certificazion pal euskara in Navare

Il guvier de Navare al à tacât a lavorâ suntune norme su la certificazion linguistiche dal euskara che e permeti di svilupâ dai certificâts di cognossince de lenghe basche dai nivei plui bas (A1 e A2) a chei medis alts (B1 e B2) in linie cui criteris fissâts dal cuadri comun european di riferiment pes lenghis e che a valin par dute la comunitât autonome. L’intindiment al è chel di vê standards compagns in câs di concors publics, dal moment che in dì di vuê no ducj i ents publics de Navare a doprin i stes criteris.

Font: El Diario, 24/02/15

Montenegro: alarm pes cundizions dal cjamp par sfolâts rom

La Comission europeane cuintri dal razisim e de intolerance, un dai braçs dal Consei de Europe, al à riclamât il guvier dal Montenegro par che al sieri cence altris ritarts il cjamp di Konik, pôc fûr de capitâl Podgorica, là che a vivin uns 1500 dispatriâts rom scjampâts dal Cossovo là che a jerin vitimis di violence de bande di grups paramilitârs cossovans. I delegâts de Comission a son restâts scaturîts des cundizions di vite intal cjamp, là che la int e vîf in barachis di len e di bandon, dispès cence lûs, aghe e servizis. Ta chescj agns lis autoritâts dal Montenegro a àn inviât un percors par cjatâ une sistemazion divierse par sì e no un diesim de popolazion dal cjamp.

Font: Balkan Insight, 23/02/15

Paîs Catalans: mobilitazion a València pe scuele par catalan

Miârs di personis si son dadis dongje sabide ai 21 di Fevrâr a València pe manifestazion inmaneade de organizazion Escola Valenciana in ocasion de Zornade internazionâl de lenghe mari. La iniziative e je stade metude adun come une grande fieste segnade di cjants, di bai e de partecipazion di grups de tradizion catalane, ma cuntun clâr intindiment rivendicatîf che al à permetût di dâi visibilitât a ducj chei che a son impegnâts par une scuele là che il catalan, inte sô varietât valenziane, al vedi citadinance plene. Un messaç indreçât al prossim guvier di cheste comunitât autonome par che al cambii direzion rispiet aes politichis linguistichis negativis puartadis indenant inte scuele dal esecutîf dal PP cumò in cjarie.

Font: El Punt Avui, 22/02/15

Irlande: agjenzie statâl condanade pe violazion de leç sul gaelic

La agjenzie irlandese des tassis e je stade condanade de cort supreme par no vê rispietade la leç sul ûs de lenghe uficiâl che e previôt che ducj i ats e lis comunicazions indreçâts al public a vedin di jessi in forme bilengâl inglese irlandese o dome par irlandês. Tra il 2012 e il 2013 la agjenzie des tassis e veve dât fûr in passe un milion e mieç di cjasis un librut su lis impuestis scrit dome par inglês. Dopo de denuncie di diviers citadins, l’ufici dal comissari pe lenghe al veve verificât che la leç e jere stade violade e al veve multât la agjenzie. L’ent public però nol veve acetât la decision e al veve puartât la cuistion denant dal nivel plui alt de magjistrature irlandese. Il câs nol jere di pôc, se si pense che e jere la prime volte che la cort si cjatave a frontâ un ricors cuintri di une decision dal comissari pe lenghe. Pe agjenzie des tassis il fat che i libruts dâts fûr a fossin imbustâts e cul non des fameis scrit parsore ju rindeve un materiâl no indreçât al public: un tentatîf par svuincâ la leç che però la cort e à condanât.

Font: BBC, 20/02/15

Sami: gnovis strategjiis in comun pe lenghe

A jerin ancje delegâts sami rivâts de Norvegje, de Svezie, de Finlande e de Federazion Russe a Ottawa, in Canadà, pe assemblee dal Consei Artic dedicade aes lenghis nativis di chest teritori L’obietîf al jere chel di svilupâ strategjiis in comun e di infuartî il nivel di tutele e l’ûs des lenghis feveladis intes tieris artichis. In plui dal sami, ta cheste categorie, a jentrin ancje lis lenghis feveladis dai popui natîfs de Siberie, des nazions nativis americanis plui setentrionâls e des comunitâts inuit.

Font: Finugor, 19/02/15

Paîs Basc: euskara te scuele, a cressin lis pussibilitâts in Navare

Ai 19 di Fevrâr il Parlament de Navare al à fate buine une mende ae leç sul euskara che e permet di studiâ il e par basc in dutis lis scuelis publichis de comunitât autonome là che si vedi une domande suficiente. La modifiche e permet duncje di superâ la division de Navare in trê zonis – une considerade di lenghe basche, une miste e une tierce no bascofone – cun cheste ultime disprivade dal acès ai dirits linguistics a tacâ de presince dal euskara intes scuelis publichis. Il proviodiment al à vût il vôt cuintri dai partîts di diestre (UPN e PP) e chel a pro dal Partît Socialist, de federazion di çampe Izquierda-Ezkerra e dai nazionaliscj moderâts di Geroa Bai. A àn votât a pro ancje i indipendentiscj di Bildu e Aralar cundut che a calcolin cheste modifiche dome un prin pas inte direzion di une riforme complessive de leç che e superi ad in plen la division de Navare in trê zonis.

Font: Naiz:, 19/02/15; Noticias de Navarra, 19/02/15

Irlande: scuintri sul ûs public dal gaelic intal Nord

Ancjemò prime di jessi ratificade de assemblee dal ent, la propueste dai conseîrs dal Sinn Féin e dal SDLP di meti prin il non par irlandês e dopo chel par inglês intal logo che al identifiche il consei dal distret di Newry, Mourne e Down (Ceantair an Iúir, Mhúrn agus an Dúin), in Irlande dal Nord, e je za deventade un câs politic. I rapresentants dai partîts unioniscj, di fat, a son saltâts sù acusant la propueste di “setarisim culturâl” e i doi partîts che le àn fate indenant di doprâ la lenghe irlandese come “une arme par umiliâ la comunitât unioniste”. Acusis che i conseîrs de comunitât nazionaliste irlandese a refudin in non de avualiance dai dirits di cui che al à il gaelic irlandês tant che lenghe proprie e ricuardant che une sielte dal gjenar no dome no gjave la version inglese dal non dal consei, ma nol dinee nancje a di nissun il dirit a doprâ cheste lenghe, contrari di ce che par solit a fasin cul irlandês i unioniscj là che a son maiorance.

Font: BBC, 18/02/15

Paîs Basc: passe un cuart dai videozûcs bascs a son par euskara

Daûr dai ultins dâts publicâts intal progjet Minimap che, dal Novembar dal 2013 incà, al ten di voli i videozûcs svilupâts e produsûts intal Paîs Basc, dai 205 lavôrs professionâi o amatoriâi censîts, 58 a son par euskara. La lenghe basche e cjape dentri duncje plui dal 28% de produzion totâl. Il prin videozûc par euskara al rimonte al 2000 e, intai ultins agns, la produzion e je cressude ancje se i zûcs cun opzions in lenghe basche a restin ancjemò une minorance.

Font: Vesco Press, 14/02/15

Galizie: prin gjornâl digjitâl su la agriculture par galizian

Ai 10 di Fevrâr al è jessût in rêt un gnûf mieç di comunicazion par galizian. Si trate di www.campogalego.com e al è il prin gjornâl digjitâl ta cheste lenghe dut dedicât al setôr primari. Il so obietîf al è chel di informâ su ce che al sucêt intal mont de agriculture, dal arlevament e de industrie agroalimentâr de Galizie. In plui des gnovis dal setôr, il gjornâl al ufrìs sezions cun informazions di nature tecniche e sui servizis utii pai operadôrs agricui.

Font: Galicia Confidencial, 11/02/15

Paîs Catalans: une app par catalan tra lis miôr dal mont

La aplicazion par catalan Cookbooth e je stade sielzude framieç des sedis che ai 2 di Març si confrontaran pal titul di miôr app dal an al Mobile Premier Awards, o sei i plui impuartants premis internazionâi dal setôr. Si trate di une aplicazion disponibile par iPhone e Android che e permet di condividi des ricetis fotografichis. Ancje intal 2014 ae finâl dai premis a jerin rivadis des apps par catalan. Une di chestis, dedicade aes personis che a patissin di diabete, e veve ancje vinçût il premi pal impat plui marcât su la vite des personis.

Font: Generalitat de Catalunya, 10/02/15

Irlande: leç sul gaelic, consultazions viertis tal Nord

La ministre nordirlandese pe culture Carál Ní Chuilín e à presentât il stampon de leç su la lenghe gaeliche e e à inviât la consultazion publiche sul test che e restarà vierte par dodis setemanis. La leç su la lenghe irlandese e je previodude dai acuardis di pâs pe Irlande dal Nord, ma a distance di agns e reste ancjemò di aprovâ par vie de oposizion dai partîts unioniscj che, ancje cheste volte, a àn fat savê che a fasaran di dut par blocâle. Cun di fat, par agns a dilunc, la cuistion de lenghe e je stade vivude tant che une part dal conflit jenfri republicans irlandês e unioniscj, ancje se a planc la situazion e je daûr a cambiâ. In dì di vuê il 4% de popolazion de Irlande dal Nord al è in stât di fevelâ ben par gaelic, intant che uns 10% al declare di vê une cualchi competence ta cheste lenghe. E, se e je vere che il 55% de popolazion nordirlandese al declare di no vê intenzion di imparâ l’irlandês, il 54% al crôt che al sedi just che i servizis publics a sedin disponibii ancje par gaelic par cui che al à miôr o al à gust di doprâ cheste lenghe.

Font: BBC, 10/02/15

Cossovo: acuardi su la justizie inte aree serbe

I prins ministris dal Cossovo e de Serbie, Isa Mustafa e Aleksandar Vučić, a àn sotscrit a Bruxelles un acuardi su la aministrazion de justizie intes areis dal Cossovo che a son ancjemò a maiorance serbe. La intese, che e je nassude cu la mediazion des istituzions europeanis, e torne a meti in moviment il procès di normalizazion intai rapuarts tra i doi paîs che al jere fer di cuasi un an. L’acuardi al previôt che il tribunâl di riferiment pai siet comuns dal Cossovo setentrionâl al vedi nûf judiçs che a rivin de comunitât serbe e nûf di chê albanese e che il president dal tribunâl, logât inte citât a maiorance serbe di Mitrovica, al sedi un serp. Cjatade la intese su la aministrazion de justizie, il prin ministri cossovan al ponte cumò a dismantelâ lis fuarcis di polizie che a operin inte aree serbe dal Cossovo e che a fasin ancjemò riferiment a Belgrât, intant che pal prin ministri serp la prioritât e je chê di meti sù la gnove associazion dai comuns serps che e garantissi un alt nivel di autoguvier par cheste aree dal Cossovo.

Font: Balkan Insight, 10/02/15

Paîs Basc: inmò pôc euskara tes impresis privadis

Ai 9 di Fevrâr il delegât pe lenghe basche Patxi Baztarrika al à presentât denant dal Parlament de Comunitât Autonome Basche il rapuart su la metude in vore dal regolament sui dirits linguistics dai consumadôrs e dai utents. Se intal setôr public la normative e je metude in vore cuasi pardut, intal setôr privât dome il 22% al ufrìs i siei servizis ancje in lenghe basche. La situazion però e cambie une vore a seconde dal setôr: cun di fat a meti in vore la norme al è il 50% des bancjis, il 35% des grandis cjadenis comerciâls, il 25% des aziendis di traspuart, il 17% des impresis de comunicazion e jù jù fin al 1% dai supermarcjâts. Lis percentuâls a mudin po ancje daûr dai caratars sociolinguistics des areis là che lis impresis a son logadis e de pression fate dai utents par gjoldi dai lôr dirits linguistics. Par incressi la metude in vore dal regolament, il guvier de Comunitât al à za previodût intervents par 250 mil euros vie pal 2015 e par altris 250 mil euros intal 2016.

Font: Europa Press, 09/02/15

Bretagne: indenant cu lis votazions su la riunificazion

Dopo di chê dai 30 di Novembar dal 2014 a Sant-Widel-Skovrid / Saint-Viaud, sul prin tacâ di Fevrâr si son tignudis altris dôs consultazions popolârs su la riunificazion de Bretagne che a àn interessât i comuns di Langoed / Langouët e di Saoudan / Soudan. La partecipazion e je stade tra i 15 e i 20%: un dât che pai organizadôrs al è positîf viodude la sô dimension dal dut volontarie. Tra i citadins che a son lâts a votâ plui dal 75% si è declarât a pro de union dal dipartiment de Loire Atlantiche cul rest de Bretagne intune regjon aministrative sole, intant che plui dal 72% al à dite di jessi pe fusion dai conseis dai dipartiments e de regjon intune uniche Assemblee de Bretagne.

Font: Agence Bretagne Presse, 08/02/15

Galizie: passe 20 mil in place pai dirits linguistics

Passe 20 mil personis a àn rispuindût al apel dal coordenament Queremos Galego e ai 8 di Fevrâr a àn partecipât ae manifestazion che si è tignude a S. Jacum di Galizie (Santiago de Compostela) in difese dal dirit di doprâ il galizian e par protestâ cuintri de politiche linguistiche dal guvier galizian acusât di jessi il prin responsabil pai pas indaûr de lenghe. In plui dai citadins e dai membris dal associazionisim galizian, in place a jerin i rapresentants di ducj i partîts di oposizion, sei di aree nazionaliste (AGE, BNG), sei socialiscj (PsdeG). Intant dai comizis che a àn sierât la manifestazion, il puartevôs di Queremos Galego, Marcos Maceiras, al à atacât cun fuarce la Zonte di diestre che e guvierne la Galizie che cui siei proviodiments, tant che la modifiche de leç su la funzion publiche e la leç sul insegnament dal galizian, a àn pidimentât l’ûs de lenghe intai rapuarts cu la aministrazion publiche e dentri de scuele.

Font: Galicia Hoxe, 08/02/15

Paîs Catalans: un sburt aes multinazionâls pal ûs dal catalan

La fondazion Vincle e la Plateforme pe lenghe a àn metût fûr la version par inglês e adatade al public internazionâl dal portâl Empresa en catala. Chest gnûf imprest, nassût dal sburt dal sisteme imprenditoriâl catalan, al à chê di meti a disposizion ancje des multinazionâls che a àn sedis o filiâls intai paîs di lenghe catalane un spazi informatîf che al permet di cognossi la dimension dal marcjât linguistic catalan, lis leçs su la lenghe e esemplis di buinis pratichis sul plan linguistic di podê meti in vore.

Font: Generalitat de Catalunya, 06/02/15

Norvegje: popui natîfs di Barents a congrès

Si è tignût a Tromsø, in Norvegje, il tierç congrès dai popui natîfs de regjon di Barents là che a jerin rapresentâts sei i cuatri stâts che si dividin cheste aree de Europe setentrionâl, ven a dî Norvegje, Svezie, Finlande e Federazion Russe, sei i trê popui natîfs che a vivin alì, o sei sami, veps e nenets. Tra i risultâts dal congrès si à l’acuardi tra i cuatri stâts par finanziâ in maniere continuative e avuâl il grup di lavôr internazionâl dai popui natîfs. Intant de riunion però no son mancjadis lis critichis pai pidiments che lis autoritâts russis a vevin metût ai delegâts des comunitâts indigjenis che intal Setembar stât a vevin di lâ a New York pe conference mondiâl dai popui natîfs. Une vicende che, a àn rispuindût i rapresentants rus, e je za al centri di une investigazion che i siei risultâts a saran comunicâts al Consei pai dirits umans de ONU.

Font: Barents Observer, 05/02/15