Rom: ancjemò discriminazions e atacs ator pe Europe

In ocasion dal secont incuintri european dai rom, il Centri european pai dirits dai rom (ERRC) al à presentât un rapuart su la violazion dai dirits di cheste comunitât dal 2008 a vuê. Episodis di violence organizade cuintri dai rom a son stâts segnalâts inte Republiche Ceche, in Cravuazie, in Bulgarie, in Italie, in Irlande dal Nord, in Turchie e soredut in Ongjarie. In cierts câs a alimentâ cheste clime di violence a son ancje fuarcis politichis tant che inte Republiche Ceche, in Slovachie, in Italie, in Romanie e in Ongjarie, là che e je ative la organizazion paramilitâr Magyar Garda che, si ben che metude al bant de cort supreme, e va dilunc a operâ sul teritori. In tancj stâts a vegnin segnaladis discriminazions intal acès dai rom ai servizis sanitariis o di jutori sociâl. Ancjemò intal 2008 si vevin vût câs di sterilizazion sfuarçade di feminis rom inte Republiche Ceche, in Slovachie e in Ongjarie. Politichis di segregazion scolastiche pai fruts rom a son invezit denunciadis in Bulgarie, Cravuazie, Republiche Ceche, Grecie, Ongjarie, Romanie, Slovachie e fintremai in Irlande dal Nord, Spagne e Portugal. Inmò plui a larc a son presintis politichis di segregazion abitative. Intal rapuart, di fat, a son puartâts esemplis che si riferissin a Bulgarie, Republiche Ceche, Grecie, Spagne, France, Cipri, Ongjarie, Italie, Lituanie, Polonie, Portugal, Romanie, Slovenie e Slovachie. Une des situazions piês, di chest pont di viste, e risulte propite chê intal stât talian, dulà che a vegnin denunciadis lis azions di polizie par slontanâ grups rom dai lôr insediaments cence dâur nissune alternative, in plene violazion des leçs internazionâls. Il Centri european pai dirits dai rom al domande duncje aes autoritâts europeanis e ai guviers dai stâts membris di intervignî, ancje cun integrazions ae legjislazion, par garantî il rispiet dai dirits di fonde ancje pai rom.

Font: ERRC, 08/04/10

Ream Unît: elezions gjenerâls ai 6 di Mai, aleance SNP - PC

La comunicazion dal prin ministri britanic Gordon Brown che lis prossimis elezions gjenerâls si davuelzaran ai 6 di Mai e à di fat inviât la campagne eletorâl intal Ream Unît. Une campagne che, cun dute probabilitât, e sarà centrade su tematichis economichis e sui tais aes spesis publichis. Se i Laburiscj a domandin ai eletôrs une conferme par continuâ il lavôr fat fin cumò, i Conservadôrs si proponin par inviâ une partence gnove e i Liberâi Democratics a declarin di jessi la vere fuarce dal cambiament. I prins scandais publicâts dai gjornâi a dan i Conservadôrs tra il 37 e il 41%, i Laburiscj tra il 29 e il 33%, e i Liberâi Democratics tra il 17 e il 21%. Dai 650 puescj a disposizion in Parlament, 59 a saran decidûts in Scozie e 40 di Gales. Ancje alì, duncje, e je tacade la mobilitazion des fuarcis politichis. Il prin ministri scozês Alex Salmond, che al vuide il Scottish National Party, e il segretari dal Plaid Cymru, Ieuan Wyn Jones, si son presentâts adun par sburtâ i eletôrs a dâi plui fuarce ai lôr partîts, presentâts come i unics in stât di difindi pardabon a Londre i interès de Scozie e dal Gales. E il lôr pês al podarès in efiets aumentâ tal câs che si rivi a di un Parlament là che nissun partît al à une maiorance assolude, cemût che di plui bandis si previôt. Tun câs dal gjenar, di fat, i vôts dal SNP e dal Plaid Cymru a podaressin jessi decisîfs par tignî sù un guvier. Une ipotesi che par cumò e ven dineade sei dai Conservadôrs che dai Laburiscj, ma che si rivarà a pesâle pardabon dome dopo dal vôt. I doi partîts nazionaliscj, par intant, a disin che, tal câs di tais ae spese sociâl, a saran lis unichis fuarcis a fâi cuintri ae riduzion di puescj di vore, scuelis e ospedâi in Scozie e in Gales: lis areis mancul impuartantis par Londre e lis primis a riscjâ il tai cemût che si à za viodût in passât. Intes elezions stadis, in Scozie a jerin stâts elets 41 parlamentârs laburiscj, 11 liberâi democratics, 6 nazionaliscj scozês e dome un conservadôr. Cumò, a front des dificoltâts dal Labour e de scjarse simpatie dai scozês pai Tories, a profitâ de situazion a podaressin jessi i Liberâi Democratics o l’SNP. In Gales, invezit, la partide e je une vore plui vierte.

Font: BBC, 06/04/10

Scozie: plan trienâl pal gaelic presentât a Glasgow

Il Consei comunâl di Glasgow / Glaschu al à presentât il so plan trienâl par promovi l’ûs de lenghe gaeliche scozese in citât. Tra i prins ponts in program si à la vierzidure di une seconde scuele gaeliche e un ûs plui slargjât de lenghe sei inte segnaletiche, sei intes comunicazions uficiâls dal comun. La conseire comunâl Aileen Colleran (laburiste) e à spiegât che tal zîr di pôcs agns la presince dal gaelic in citât e sarà simpri plui marcade: si le viodarà scrite pes stradis, sui edificis e intes buteghis, si le sintarà a fevelâ tes scuelis, tai mieçs di comunicazion e par strade. Il plan imbastît dal comun al è stât preseât dal Bord na Gaidhlig, l’organisim di riferiment de politiche linguistiche pal gaelic, che al à ancje ricuardât la posizion centrâl che la citât di Glasgow e à pai scozês che a fevelin par gaelic al pont di jessi ancje clamade Baile Mor nan Gaidheal, ven a dî la Grande Citât dai Gaelics.

Font: BBC, 06/04/10

Irlande: proteste republicane inte preson di Maghaberry

E je durade cuasi trê dîs la proteste di un grup di militants republicans irlandês inte preson di Maghaberry. A inviâle a jerin stâts sedis membris de Continuity IRA, dîs de Real IRA e doi dal INLA, ducj grups de dissidence armade republicane. La proteste, che si à sierade in maniere pacifiche, e jere nassude par vie des condizions di reclusion dai presonîrs che si vevin cjatâts a vê di restâ in cele ancje par 23 oris in dì cence acès a aghe, mangjâ, e docis, ma ancje pe proibizion di tignî intor i lilis che a ricuardin il riviel de Pasche dal 1916. Al somee che la proteste e sedi finide daspò che si à cjatât une mediazion tra i presonîrs e lis autoritâts carcerariis.

Font: BBC, 06/04/10

Frisie: mobilitazion cuintri de ipotesi di eliminâ la provincie frisone

Za di cualchi timp intai Paîs Bas si fevele di revision dal implant aministratîf locâl, massime cun progjets di abolizion o di union des provinciis. I plui cjalts ta cheste direzion a son i liberâi dal moviment Demòcrates 66 che a calcolin lis provinciis dome une spese e a proponin la lôr union in maniere di formâ cuatri grandis regjons. Su posizions similârs a son ancje rapresentants dal partît laburist (Partij van de Arbeid) tant che la ex ministre dal interni Guusje ter Horst. Daûr di cheste logjiche, ancje la provincie de Frisie e varès di jessi eliminade par meti sù, adun cu lis provinciis di Groninghe e Drenthe, la regjon dai Paîs Bas setentrionâi. Al è bielzà dal 1992 che lis trê provinciis a ufrissin dai servizis in comun, ma lis lôr aministrazions a son intervignudis daurman par smentî cualsisei progjet di fusion. Chest, dut câs, nol à bastât a cuietâ la preocupazion nassude framieç dai moviments frisons che a ricuardin la specificitât linguistiche e nazionâl de lôr provincie inte suaze dai Paîs Bas. In particolâr, il Partît Nazionâl Frison (Frysk Nasjonale Partij) al à anticipât che ai 21 di Avrîl al presentarà intal Parlament frison une propueste che no dome e refude ogni ipotesi di eliminazion de provincie, ma e domande invezit di cressi lis competencis in man ae aministrazion locâl. Il partît nazionalist al à ancje fat indenant la propueste di un referendum popolâr là che la comunitât frisone e puedi palesâ la sô posizion sul argoment. A mobilitâsi a son stâts ancje altris grups frisons, tant che il Ried fan de Fryske Beweging che al à inviât une petizion su internet cuintri de eliminazion de provincie.

Font: Món Divers, 05/04/10

Paîs Basc: grande partecipazion al Aberri Eguna di Independentistak

Cundut dal brut timp e dai puescj di bloc metûts in vore de polizie spagnole, la celebrazion dal Aberri Eguna – la Zornade de Patrie Basche – inmaneade des fuarcis de çampe indipendentiste basche e je stade une des plui partecipadis dai ultins dîs agns. Si calcole che ae manifestazion, che si è davuelte ai 4 di Avrîl a cjaval tra lis localitâts di Irun e Hendaia / Hendaye, a vedin partecipât uns 14 mil personis. A inmaneâ la iniziative al è stât il coordenament Independentistak cu la adesion de çampe indipendentiste basche, di Eusko Alkartasuna e ancje di une rapresentance di Aralar. Il Partît Nazionalist Basc, invezit, al à sielzût di celebrâ l’Aberri Eguna par so cont a Bilbo / Bilbao. Ancje di chê place, dut câs, al è rivât un apel a dutis lis fuarcis dal nazionalisim basc a lavorâ adun par superâ la politiche di opression statâl puartade indenant di socialiscj e popolârs.

Font: Gara, 04-06/04/10

Romanie: ancjemò pôc ongjarês inte aministrazion publiche

Il prin di Avrîl al è stât presentât un studi sul ûs dal ongjarês intes aministrazions publichis dal distret di Hargita / Harghita, in Transilvanie. La ricercje e je stade puartade indenant dal istitût pal studi dai problemis des minorancis e e studie sei la misure che lis aministrazions locâls e lis istituzions decentradis dal stât a garantissin i dirits linguistics, sei trop che la comunitât ongjarese e dopre la sô lenghe proprie intai rapuarts cu lis aministrazions publichis. Di une bande al ven fûr che l’ûs de lenghe intes aministrazions locâls al è avonde bon, cundut che intune buine part dai comuns dal distret (sù par jù il 40%) la modulistiche e lis comunicazions istituzionâls scritis no son bilengâls. La situazion e je plui dificile cuant che si à a ce fâ cu lis istituzions statâls decentradis. Lis conclusions dal studi, duncje, a son che la aplicazion de leç di tutele des minorancis e à ancjemò un sucès limitât. Par chest si domande di svilupâ cun plui fuarce in dutis lis aministrazions publichis dal distret la cartelonistiche, la modulistiche e la comunicazion istituzionâl scrite ancje par ongjarês. Si propon po ancje dai cors di formazion bilengâl obligatoris pai dipendents publics e un control intai ents decentrâts par controlâ che a sedin metudis in vore lis normis di tutele linguistiche.

Font: Divers.ro, 02/04/10

Paîs Basc: iniziative internazionâl a pro de fin dal conflit

Une vincjine di personalitâts internazionâls impegnadis inte risoluzion di conflits a àn presentât denant dal Parlament european un document là che a domandin ae formazion armade basche ETA di fermâ dutis lis sôs azions militârs e inviâ un fermait-il-fûc permanent e al guvier spagnûl di garantî spazis di azion e di espression ancje ae çampe indipendentiste basche di maniere di rivâ a di une risoluzion politiche dal conflit. Daûr de iniziative al è l’avocat sudafrican Brian Currin, mediatôr di grande esperience, ma ancje Nobels pe pâs tant che John Hume o Frederik Willem de Klerk e oms di stât tant che Mary Robinson e Albert Reynolds. Intal document si presee ancje il sfuarç fat propit de çampe indipendentiste basche in direzion di une soluzion pacifiche dal conflit.

Font: Nationalia, 30/03/10

Paîs Basc: manifestazion pai dirits linguistics in Navare

A jerin sù par jù 3 mil lis personis che ai 28 di Març a àn manifestât pes stradis di Iruñea / Pamplona par rivendicâ il rispiet dai dirits linguistics in dute la Navare. Cun di fat, in dì di vuê, il teritori di cheste regjon al è dividût in trê fassis – bascofone, miste e no bascofone – là che la tutele linguistiche e je divierse. Te aree calcolade “no bascofone” in realtât no si garantìs nissun dirit linguistic par cui che al fevele par basc. A inviâ la mobilitazion al è stât un coletîf di gjenitôrs che a domandin pai lôr fîs il dirit di studiâ par euskara, la lenghe basche. Intant de manifestazion, dut câs, si à domandât che lis misuris di tutele e di promozion dal basc a vegnin slargjadis a dute la Navare e no dome par chel che si riferìs ae istruzion.

Font: Gara, 28/03/10

Asturiis: atac al ûs dal asturian cu la aministrazion autonome

Pal tribunâl pai contenziôs aministratîfs di Uviéu / Oviedo i funzionaris de aministrazion autonome des Asturiis no àn il dirit di doprâ la lenghe asturiane intes lôr comunicazions internis. La sentence e à lassadis scaturidis dutis lis realtâts associativis impegnadis pe promozion di cheste lenghe, massime par vie che juste cualchi timp prime il tribunâl costituzionâl spagnûl al veve ricognossût il dirit dai asturians a indreçâsi aes autoritâts autonomichis inte lôr lenghe proprie. Il câs al jere nassût dal ricors fat indenant di un avocat asturian che si veve viodût a dineâ un permès di lavôr par vie che al jere scrit par asturian. Il tribunâl di Uviéu al à justificât la sô sentence cul fat che la leç e garantirès in maniere esplicite dome ai citadins di doprâ la lôr lenghe intai rapuarts cu la aministrazion autonome, ma no ai funzionaris che a àn a ce fâ cul public e che il tribunâl costituzionâl nol à frontât cheste cuestion. La uniche maniere par garantî ad in plen i dirits linguistics – e comente la Academie pe lenghe asturiane – e je chê di cambiâ il statût di autonomie par ricognossi al asturian il status di couficialitât adun cul castilian.

Font: Nationalia, 26/03/10

Paîs Basc: gnove strente dal guvier socialist su la çampe abertzale

Il ministri dal interni spagnûl, Alfredo Pérez Rubalcaba, al à presentât lis liniis di fonde de propueste di riforme de leç eletorâl che e varès di rivâ al esam dal Parlament in Mai. Il progjet di riforme al à l’obietîf declarât di strenzi inmò di plui i spazis di partecipazion eletorâl de çampe indipendentiste basche, che intai ultins agns e à viodût dutis lis sôs espressions politichis metudis fûr leç. Cun di fat, in plui di proibî la presentazion di candidaturis che a puedin jessi in cualchi maniere leadis aes formazions politichis za fûr leç o ancje dome ae lôr ativitât politiche, si vûl slargjâ lis pussibilitâts par impugnâ lis candidaturis eletorâls e di meti fûr leç lis listis ancje intal mieç di une campagne eletorâl. Se po la ilegalizazion di une formazion politiche e ves di rivâ dopo des elezions, daûr de propueste di riforme volude dal guvier socialist spagnûl, i elets di cheste liste, se a vuelin restâ in carghe, a varan di fâ une ritratazion publiche des ideis che a àn puartât ae condane de lôr liste e condanâ in maniere esplicite ETA. La çampe indipendentiste basche che zaromai di timp e à inviât un percors pe risoluzion politiche dal conflit e pe fin di ogni forme di violence, sei de bande di ETA che dai stâts spagnûl e francês, e à presentât cheste propueste come une dimostrazion di debolece de bande dal guvier di Madrid e di pôre di confront democratic cu la stesse ezkerra abertzale. Critichis duris ae propueste presentade di Rubalcaba a son rivadis di dutis lis formazions politichis baschis, ancje chês plui moderadis: dal Partît Nazionalist Basc (PNV) si à dite che no si pues, par resons ideologjichis, impedî la esistence di un moviment politic e che e je une barbaritât juridiche dî che la çampe indipendentiste basche e je chel istès di ETA; Eusko Alkartasuna e à fevelât di une riforme che e ponte a imponi la volontât dal nazionalisim spagnûl su chê de maiorance sociâl e politiche dal popul basc; Aralar e Ezker Batua a àn dite che no si pues spietâsi nuie di bon di cheste corse tra socialiscj e popolârs spagnûi par mostrâ di jessi plui dûrs; Alternatiba e à fevelât di aberazion democratiche. Cheste gnove propueste, par altri, e va a cressi inmò plui la tension che si à svilupade intal Paîs Basc daspò de muart di un poliziot francês intant di un scuintri a fûc cun membris di ETA e de aparizion dal cuarp cence vite dal militant basc Jon Anza, là che tancj a pensin che si trati di un episodi di “vuere sporcje”.

Font: Gara, 26/03/10

Scozie: timps luncs par slargjâ a ducj l’acès ae tv par gaelic

Il Bòrd na Gàidhlig, l’organisim di riferiment de politiche linguistiche pal gaelic scozês, al à pandût il so marum pe decision dal BBC Trust di slungjâ ancjemò i timps par permeti di viodi il canâl televisîf par gaelic BBC Alba ancje cul sisteme Freeview. Cun chest sisteme, di fat, si permetarès a ducj di vê acès a chest canâl che la maiorance dai scozês, in dì di vuê, no rive a viodi. La domande e gjolt ancje de poie dal Parlament scozês, ma l’organisim diretîf de BBC al à fat savê che prime di meti lis emissions di BBC Alba ancje su Freeview al podarès passâ fintremai un an.

Font: Bòrd na Gàidhlig, 24/03/10

Paîs Basc: consultazion suntune coletivitât teritoriâl basche in Iparralde

Intal Paîs Basc setentrionâl (Iparralde), sot aministrazion francese, ai 14 e ai 21 di Març si son davueltis une schirie di consultazions popolârs par domandâ ai citadins se a son dacuardi cu la nassite di une coletivitât teritoriâl basche. A inmaneâ lis votazions al è stât il coordenament Batera che si à declarât sodisfat pai risultâts de iniziative. Cun di fat, sui 193.505 citadins che a podevin partecipâ, a son stâts 34.610 (il 17,89%) chei che a son lâts a votâ e, intal 78,22% dai câs, si son declarâts a pro de nassite di chest gnûf sogjet aministratîf. Si trate di un risultât no di pôc, a disin i rapresentants di Batera, se si pense al fat che a inmaneâ lis votazions e je stade une realtât associative, cun ducj i problemis logjistics dal câs, e che i mieçs di comunicazion no àn dât cui sa ce spazi ae iniziative. La partecipazion e je stade une vore variade a seconde dai lûcs, cuntun minim di 5,99% e un massim di 64,96%.

Font: Journal du Pays Basque, 24/03/10

Elezions regjonâls francesis: il cuadri gjenerâl

Ai 14 e ai 21 di Març intal stât francês si son davuelts il prin e il secont turni des elezions regjonâls che cun passe il 54% des preferencis a àn dât la vitorie ae coalizion di çampe, vuidade dai socialiscj, e i àn consegnât dutis lis regjons de “France metropolitane” fûr che la Alsazie. Tra lis novitâts di chestis elezions o cjatìn lis listis di Europe Ecologie là che a jerin dentri i rapresentants di diviers partîts nazionalitaris o autonomiscj. Intal prin turni, chest cartel eletorâl al à vût une medie di passe il 12% di vôts e intal secont turni, cuasi pardut, si è dât dongje cun chês altris fuarcis di çampe di maniere che, in dì di vuê, si cjate inte coalizion di guvier de plui part des regjons. Ta cheste posizion e pues duncje puartâ indenant cun plui fuarce i siei obietîfs che a previodin ancje un aument dal podê des aministrazions locâls, un mudament dai confins regjonâi che a ‘nt rispieti la storie, e la promozion des lenghis minorizadis. Intes filis di Europe Ecologie a son stâts elets ancje 15 membris de Federazion des regjons e dai popui solidaris. Tra di lôr o cjatìn ancje un rapresentant dal Congrès Mondiâl Amazigh (o sei un berber) e un membri dal Moviment Regjon Savoie.

Font: Le Monde, 14 e 22/03/10; EFA, 23/03/10

Elezions regjonâls francesis: nissun nazionalist basc elet

Su la fonde de division regjonâl cumò in vore intal stât francês, il Paîs Basc setentrionâl nol à une sô autonomie teritoriâl, ma al è cjapât dentri te regjon de Aquitanie là che la rapresentance basche e je, duncje, une vore limitade. Chest al rint dificil rivâ a mandâ in consei regjonâl dai rapresentants dai moviments nazionaliscj che, par solit, a corin in maniere disleade dai partîts francês. Al è ce che al è sucedût ancje ta chestis elezions là che Euskadi Europan, la liste leade al Partît Nazionalist Basc, e Euskal Herri Bai, la liste di riferiment de çampe indipendentiste, no àn vût avonde vôts par passâ al secont turni e no àn fat nissune aleance che ur permetès di elei cualchidun. Nuie di fâ nancje par Eusko Alkartasuna che si veve dât dongje te liste Europe Ecologie.

Font: Journal du Pays Basque, 16-18/03/10

Elezions regjonâls francesis: nissun elet nazionalist inte Catalogne Nord

Inte regjon de Lenghedoc – Roussillon, che e cjape dentri ancje la Catalogne Nord, al è stât confermât ae presidence il dissident socialist Georges Frêche cul 54,19% dai vôts. Nissun candidât dai partîts catalaniscj al è stât elet: Convergència Democratica e jere aleade cu la liste socialiste uficiâl che no à rivât a passâ il prin turni; stes al vâl par Esquerra Republicana che e coreve cun Europe Ecologie; Unitat Catalana, invezit, e jere aleade cu la UMP, ma no à cjapât avonde vôts par rivâ a mandâ un dai siei in consei regjonâl.

Font: Món Divers, 22/03/10

Elezions regjonâls francesis: cinc elets dal PO in Ocitanie

Inte Ocitanie, che e je dividude in diviers regjons aministrativis, si à vût il plui impuartant risultât di simpri pal Partit Occitan che al à rivât a elei cinc dai siei membris in cuatri diviers conseis regjonâi: doi te regjon Provence – Alps – Côte d’Azur e un parom intes regjons de Alvernie, de Aquitanie e dai Pireneus di Mieç. Un tant al rive in graciis de adesion dal partît ocitan ae liste Europe Ecologie che po, intal secont turni, si è dade dongje cui socialiscj lant a vinci in dutis e cuatri chestis regjons.

Font: EFA, 23/03/10

Elezions regjonâls francesis: la Alsazie e reste a diestre

La Alsazie e je stade la uniche regjon de “France metropolitane” a restâ intes mans de UMP, il partît dal president francês Nicolas Sarkozy. Cun passe il 46% dai vôts intal secont turni chest partît al à otignût 28 dai 47 conseîrs de assemblee regjonâl alsaziane, cuintri dai 14 de coalizion di çampe e dai 5 de estreme diestre (Front National). Nissun elet pai autonomiscj di Unser Land che, propit sul ultin, invezit di jentrâ te aleance Europe Ecologie, a àn sielzût di dâsi dongje cul MoDem di François Bayrou che nol à rivât a passâ il prin turni eletorâl.

Font: Le Monde, 22/03/10; Món Divers, 15/03/10

Elezions regjonâls francesis: i nazionalitaris a cressin in Bretagne

In Bretagne si à vût, invezit, une situazion avonde particolâr dal moment che al secont turni eletorâl il partît socialist al à sielzût di no fâ aleance cun Europe Ecologie. Si à vût, duncje, une corse a trê là che, dongje di chestis dôs formazions, al jere ancje l’UMP. I socialiscj a àn vût un pôc plui dal 50% dai vôts e 52 dai 83 conseîrs de assemblee regjonâl. L’UMP a ‘nd à vûts 20 (cul 32,36% dai vôts) e Europe Ecologie 11 (cul 17,37% des preferencis). Tra i elets di cheste ultime liste a son ancje cuatri rapresentants de Union Démocratique Bretonne, un in plui rispiet aes elezions regjonâls stadis. Il Parti Breton, che al veve sielzût di partecipâ aes elezions cu la liste nazionaliste “Nous te ferons Bretagne”, nol à rivât a passâ al secont turni ma al à miorât i siei risultâts. Inte regjon aministrative de Bretagne, cul 4,29% di vôts al prin turni, nol à rivât par pôc a passâ il soiâr dal 5% fissât par partecipâ ancje al secont. Intal dipartiment de Loire Atlantiche, che al è cjapât dentri intune altre regjon aministrative, al à vût il 2,62% des preferencis. In dut a son cuasi 60 mil i citadins che a àn dât il lôr vôt a cheste formazion politiche, cuintri dai 32 mil che le vevin votade intes elezions europeanis dal an passât.

Font: Le Monde, 21-22/03/10; UDB, 22/03/10; Parti Breton, 16/03/10; EFA, 23/03/10

Elezions regjonâls francesis: il sucès dai nazionaliscj in Corsiche

I risultâts plui impuartants pai moviments nazionalitariis a rivin de Corsiche dulà che sei i moderâts di Femu a Corsica che i indipendentiscj di Corsica Libera a àn passât il prin turni e, intal secont, a àn miorât i risultâts vûts intal prin. Il sucès plui grues al è chel di Femu a Corsica che daspò dal 18,4% dai vôts otignûts intal prin turni al à vût il 25,89% di preferencis intal secont, puartant inte assemblee corse 11 dai siei rapresentants. Plui limitade, invezit, la cressite di Corsica Libera che e je passade dal 9,36% dal prin turni al 9,85% dal secont e che e à vût 4 elets tra lis sôs filis. In pratiche lis fuarcis nazionalitariis a rapresentin plui di un tierç dal eletorât, a àn 15 dai 51 conseîrs de assemblee corse (cuasi il dopli di chei che a vevin la volte stade) e, in diviersis citâts, a son il prin o il secont partît plui votât. L’UMP, che al guviernave la isule, si ricjate juste cun 12 conseîrs e cuntun pugn di vôts in plui di Femu a Corsica. La vitorie e je lade ae coalizion di çampe cul 36,62% des preferencis e 24 elets: masse pôc, duncje, par garantî un guvier salt ae isule. Par cumò, dut câs, e je stade scartade la ipotesi di une aleance di guvier cui nazionaliscj. Cussì, ai 25 di Març, tant pe elezion dal gnûf president de assemblee che par chê dal gnûf president dal esecutîf, si à vût di spietâ il tierç turni di vôt, o sei chel a maiorance relative. Ae vuide dal esecutîf cors al è il socialist Paul Giacobbi (i nazionaliscj a àn votât adun par Jean Christophe Angelini), intant che president de assemblee corse al è stât elet il comunist Dominique Bucchini (tal prin turni la liste comuniste, po jentrade te aleance di çampe vuidade dai socialiscj, e veve cjapât passe il 10% dai vôts).

Font: Radio Alta Frequenza, 22-25/03/10; Le Monde, 21-22/03/10; Ministeri dal interni francês, 22/03/10