Paîs celtics: sfuarç unitari par sburtâ lis lenghis celtichis su Wikipedia

La Celtic League e à imbastît un progjet che al ponte a incressi la presince des lenghis celtichis su la rêt e, in particolâr, su Wikipedia. Lis lenghis interessadis a son duncje il galês, il gaelic irlandês, il breton, il gaelic scozês, il cornic e il manx. Tal zîr di un an, si ponte a fâ jentrâ une des lenghis celtichis tra lis dîs plui dopradis su Wikipedia. Un tant di une bande par ufrî plui risorsis scritis ta chestis lenghis intun lûc che al è disponibil par ducj, e di chê altre par incressi la cognossince des lenghis celtichis ator pal mont e la cussience di chei che lis fevelin. Par rivâ a chescj obietîfs, in plui di tirâ dongje int che si impegni a scrivi articui ta chestis lenghis par Wikipedia, la Celtic League e cirarà di coordenâ lis azions des diviersis organizazions che a operin a pro de lenghe intes sîs nazions celtichis. Cun di plui, a man a man che il progjet al larà indenant, si proviodarà a informâ sui progrès fats.

Font: Gaelport, 20/10/09; Celtic League, 10/09

Italie: marum pal rapuart su la Convenzion pes minorancis nazionâls

Si slargje il marum tra i sogjets impegnâts inte difese dai dirits linguistics pai contignûts dal tierç rapuart su la metude in vore de Convenzion cuadri pe protezion des minorancis nazionâls inviât, che nol è tant, al Consei de Europe dal guvier talian. Cun di fat, il document al varès di fâ il pont su lis misuris di tutele metudis in vore intal stât talian a pro des lenghis minoritariis. Il test, invezit, al à dentri mancjancis, informazions parziâls e fintremai erôrs. Tra i prins a denunciâ cheste situazion a son stâts sarts e furlans.

Font: Comitadu pro sa limba sarda, 20/10/09; Comitât 482, 18-22/10/09

UE: presentât il rapuart su la situazion abitative dai rom

I rom a son une des comunitâts minorizadis plui gruessis tra chês che a vivin in Europe, ma a son ancje la plui discriminade. Cheste situazion si le viôt a palês ancje par chel che si riferìs aes politichis abitativis dai diviers guviers. Propit chest argoment al è al centri dal rapuart metût adun de Agjenzie pai dirits di fonde de Union Europeane che lu à presentât a Bruxelles ai 20 di Otubar. Intal document si lamente prin di dut la mancjance di dâts suficients par vê un cuadri complet de situazion, e si domande ai stâts membris di proviodi a jemplâ chescj vueits. Il rapuart al segnale i câs evidents di segregazion metûts in vore in diviers paîs, ma ancje chei intervents di politiche abitative che, magari in buine fede, a deventin po un imprest par separâ i rom dal rest de popolazion. Cun di plui, intal document a son denunciâts ancje i câs di espulsion sfuarçade di rom des lôr cjasis. Il rapuart al presente ancje i esemplis di politichis positivis metudis in vore in ciertis areis de UE. Dut câs, il cuadri gjenerâl al reste une vore seri. Ancje par chest si domande di svilupâ une Strategjie cuadri europeane pe inclusion dai rom.

Font: European Roma Rights centre, 20/10/09

Letonie: e cale la comunitât russe

Daûr dai dâts publicâts ta chestis zornadis de direzion centrâl di statistiche dal guvier de Letonie, intai ultins vincj agns, la comunitât russe che e vîf intal paîs si è sbassade di plui dal 6%. Dut câs, i rus a restin la plui gruesse minorance dal paîs baltic là che a son il 27,8% de popolazion totâl. Tra lis comunitâts che si son sbassadis intai ultins agns o cjatìn ancje bielorùs (3,6% de popolazion), ucrains (2,5%) e ebreus (0,45). I letons a son, invezit, pôc mancul dal 60% de popolazion e, ancje par chest, no mancjin i problemis intai rapuarts cu lis minorancis, a tacâ propit di chê russe.

Font: RIA Novosti, 19/10/09

Irlande: progjet radiofonic pei fruts des scuelis gaelichis

Doprâ i imprescj tecnologjics par svilupâ la abilitât intal scrivi e par incressi lis capacitâts linguistichis dai fruts che a studiin intes scuelis cul gaelic tant che lenghe veicolâr. A son i obietîfs dal progjet Tonnta che al è stât presentât ta chestis zornadis a Béal Feirste / Belfast e che al ven svilupât par mieç di une web radio. Cun cheste iniziative si vûl ancje sburtâ i fruts che a studiin irlandês a imbastî une comunitât in lenghe gaeliche su internet. Intant de presentazion dal progjet, la ministre nordirlandese pe educazion, Caitríona Ruane, e à ricuardât cemût che intai ultins agns al sedi cressût il numar di chei che a studiin e che a fevelin par irlandês e, di consecuence, ancje la domande par gnovis scuelis là che il gaelic al è doprât tant che lenghe veicolâr.

Font: Gaelport, 19/10/09

Scozie: insegnâ il gaelic su Twitter

Insegnâ il gaelic scozês su Twitter. Al è ce che e je daûr a fâ Fiona J. Mackenzie, une cjantante scozese che, une volte par setemane, e met a disposizion dai tescj scrits, compagnâts di audio e musiche. Partide tant che un zûc, la iniziative e je cumò seguide di cuasi 600 personis che a vivin ancje in altris paîs. Il fat di vê dome 140 caratars par ogni messaç al permet di meti a disposizion frasis plui semplicis e pratichis di imparâ rispiet ai materiâi didatics classics.

Font: BBC, 19/10/09

Paîs Basc: in miârs ae edizion 2009 di Nafarroa Oinez

La edizion di chest an di Nafarroa Oinez (Navare a pît), che si è davuelte ai 18 di Otubar a Lakuntza, e je stade une des plui partecipadis inte storie di cheste manifestazion a pro de lenghe basche. Dongje di miârs di citadins e di diviersis rapresentancis istituzionâls baschis, la iniziative e à viodût la presince ancje di delegazions rivadis dal Aragon, de Bretagne, dal Gales, de Ocitanie e dai Paîs Catalans. La edizion 2009 de manifestazion e veve tant che sproc “Txikiak Handi”, par ricuardâ che ancje i piçui a puedin deventâ grancj se a lavorin in maniere solidarie. Intant de iniziative si à ancje denunciât i problemis che la lenghe basche si cjate denant in Navare par colpe de politiche dal guvier autonomic.

Font: Gara, 19/10/09

Galizie: manifestazion grandone a pro de lenghe

Daûr de stime dai organizadôrs a jerin 100 mil lis personis che ai 18 di Otubar a àn manifestât pes stradis di Sant Jacum di Galizie (Santiago de Compostela) in rispueste al apel dal coordenament “Queremos galego” che al met adun diviers sogjets impegnâts pai dirits linguistics dai galizians. La manifestazion e veve chê di rivendicâ il dirit di vivi ad in plen par galizian e di protestâ cuintri de politiche metude in vore dal guvier vuidât di Alberto Núñez Feijoo (PP) che e menace lis misuris a pro de lenghe galiziane fatis buinis intai ultins agns. Se i galizians a son ancjemò galizians – si à dite intant dai discors uficiâi in place – al è massime par vie de lôr lenghe e chest a varessin di tignîlu a ments ancje chei che vuê a àn in man il guvier de comunitât autonome de Galizie e che, cence di cheste identitât nazionâl e linguistiche fuarte, no varessin lis lôr incarghis.

Font: Vieiros Galiza Hoxe, 18/10/09

Paîs Basc: grande rispueste popolâr ai ultins arescj

Za di cualchi timp la çampe indipendentiste basche e jere daûr a lavorâ suntune propueste gnove par cjatâ fûr une soluzion politiche al conflit che di agns al cjape dentri il Paîs Basc e par meti adun un coordenament des fuarcis nazionalitariis. Par colpî cheste ativitât, su ordin dal judiç Baltasar Garzón, la polizie e à arestât ai 14 di Otubar dîs dai rapresentants plui impuartants di cheste aree politiche, tra chescj l’ex puartevôs di Batasuna, Arnaldo Otegi, e l’ex dirigjent dal sindacât nazionalitari LAB, Rafa Diez Usabiaga. La acuse mote cuintri di lôr e je di lavorâ par tornâ a meti sù Batasuna su ordin de organizazion armade basche ETA. Chescj gnûfs arescj – sburtâts dai socialiscj cu la poie dai popolârs – a àn mot la proteste di ducj i partîts nazionaliscj bascs, ma ancje di altris fuarcis politichis dal stât spagnûl. Cun di plui, la repression metude in at dai orghins judiziaris e politics dal stât spagnûl e à sburtât une reazion inmò plui fuarte de bande de societât basche, testemoneade de manifestazion di proteste clamade dongje ai 17 di Otubar a Donostia dai sindacâts nazionalitaris bascs (ELA, LAB, ESK, ESTEE-EILAS, EHNE e HIRU) là che a àn partecipât cuasi 40 mil personis. Si trate – come che a àn vût di ameti fintremai i cuotidians spagnûi – de plui grande manifestazion che si à viodût intai ultins agns intal Paîs Basc. La partecipazion e je stade massive e trasversâl, cu la adesion di ducj i partîts nazionaliscj bascs (Aralar, Eusko Alkartasuna, Hamaikabat, PNV) e di Ezker Batua – Izquierda Unida.

Font: Gara, 13-21/10/09

Irlande: l’INLA al declare la fin de lote armade

L’Irish National Liberation Army (INLA) al à declarât di vê finît cu la lote armade e che, di cumò indenant, al puartarà indenant i siei obietîfs dome par mieç di azions politichis. La comunicazion e je stade fate ai 11 di Otubar dai rapresentants dal Irish Republican Socialist Party (IRSP), che al rapresente la ale politiche dal moviment. In dì di vuê no si sa nuie sul procès di disarmament dal INLA, ma al somee che a sedin za stâts inviâts dai contats cul guvier par rivâ a chest obietîf intai prossims mês. La gnove e je stade cjapade in maniere positive, ancje se cuntune cierte cautele, de bande dai rapresentants politics principâi de Irlande dal Nord che però, dopo des peraulis, a domandin di viodi i fats. L’INLA, che al veve in pîts un fermait il fûc bielzà di undis agns, al jere nassût tor de metât dai agns ’70 di une cueste dal cussì clamât Official IRA.

Font: BBC, 11/10/09; AP/RN, 15/10/09

Sahara Ocidentâl: siet ativiscj pai dirits umans secuestrâts in Maroc

Un grup di siet ativiscj saharawi pai dirits umans a son stâts secuestrâts dai servizis segrets marochins a pene che a son sbarcjâts al aeropuart di Casablanca. I siet a tornavin di un viaç là che a vevin visitât i cjamps di profugance de popolazion saharawi in Alzerie e che a vevin tignût intervents par denunciâ la repression in vore intal Sahara Ocidentâl sot ocupazion marochine. Di lôr no si àn plui notiziis e no si sa là che a sedin stâts puartâts. I rapresentants de comunitât saharawi a àn domandât aes autoritâts internazionâls, a tacâ dal consei di sigurece de ONU, di ativâsi daurman pe lôr liberazion. Intes presons marochinis a son une vore i ativiscj saharawi impresonâts, di un pôcs di lôr no si àn plui notiziis ancje di une vore di timp.

Font: Ambassade RASD Rome, 09/10/09

Scozie: ai 30 di Otubar i LibDems a decidaran se poiâ il referendum

Daspò che su la stampe si son moltiplicadis lis declarazions di parlamentârs liberâi democratics scozês che si declarin a pro dal referendum su la indipendence, la direzion dal partît e à decidût di frontâ la cuestion intune riunion a puartis sieradis che si davuelzarà ai 30 di Otubar. I LibDems a son contraris al progjet indipendentist dal Partît Nazionâl Scozês (SNP), ma diviers dai sei membris a crodin che refudâsi di poiâ un referendum che la plui part dai citadins e domande al riscji di dâi plui fuarce al SNP e ae sô politiche pe indipendence. Se i liberâi democratics a vessin di decidi di cambiâ la lôr linie di oposizion al referendum, intal Parlament scozês a saressin i numars par aprovâ la leç che e permetarà di davuelzi il referendum intal 2010.

Font: Nationalia, 08/10/09; The Scotsman, 08/10/09

Aragon: prin pas pe leç su lis lenghis

Il Parlament dal Aragon al à acetât la presentazion de propueste di leç su lis lenghis fate indenant dal Partît Socialist (PSOE). A votâ par che il test al sedi esaminât de Aule, in plui dai socialiscj, a son stâts Izquierda Unida (IU) e Chunta Aragonesista (ChA). Il Partît Aragonês (PAR), aleât di guvier dai socialiscj, al à sielt di astignîsi dal moment che nol condivît cierts contignûts de leç. I unics a votâ cuintri a son stâts i popolârs (PP). Il test al ricognòs un pôcs di dirits linguistics ai citadins de Franja che a fevelin par catalan e a chei des valadis pirenaichis che a doprin l’aragonês. Lis dôs lenghis, dut câs, no vegnin ricognossudis tant che couficiâls intai teritoris là che a son feveladis, come che invezit e domande la Chunta Aragonesista.

Font: Món Divers, 08/10/09

Italie / Slovenie: prin pas pe leç su lis lenghis

L’europarlamentâr liberâl democratic sloven Jelko Kacin al à inviât al comissari european pe culture e a chel pal multilinguisim une letare là che al denuncie la violazion dai dirits umans de comunitât slovene intal stât talian. La proteste e nas in particolâr pe vicende dal teatri sloven di Triest là che lis autoritâts talianis no varessin rispietât i impegns previodûts de leç pal so funzionament. Kacin al domande aes autoritâts europeanis di nomenâ un comissari pai dirits umans.

Font: ANSA, 07/10/09

Scozie: vie libare al ûs dal gaelic cu lis istituzions europeanis

Il guvier scozês, chel britanic e lis autoritâts europeanis a àn sotscrit un acuardi che al permet ai citadins che a fevelin par gaelic scozês di comunicâ par scrit cu lis istituzions comunitariis te lôr lenghe proprie e di ricevi rispuestis inte stesse lenghe. Il gaelic, che al è fevelât di mancul di 60 mil personis, si zonte duncje al basc, al catalan, al galês e al galizian tra lis lenghis no statâls che si puedin doprâ par comunicâ cu lis istituzions europeanis. I coscj des traduzions a saran cuvierts dal guvier scozês. Il ministri pe culture Mike Russell al à declarât che si trate di un pas indenant impuartant pal ricognossiment dal gaelic in patrie e intal forest.

Font: BBC, 07/10/09

Italie: consegnât il tierç rapuart su la Convenzion pes minorancis nazionâls

Il guvier talian al à inviât al Consei de Europe, ancje se cuntun ciert ritart, il tierç rapuart su la metude in vore de Convenzion cuadri pe protezion des minorancis nazionâls. Il document al presente lis misuris di tutele metudis in vore intal stât talian a pro des lenghis minoritariis. Lis misuris previodudis de Convenzion a interessin dutis lis comunitâts minorizadis ricognossudis cu la leç statâl 482/99 plui rom e sinti. Lis autoritâts talianis a son stadis riclamadis plui voltis di chês europeanis par no vê rispietât ad in plen i dirits des minorancis.

Font: Ministeri dal Interni talian, 06/10/09

Paîs Basc: i socialiscj a rompin i acuardis cun Nafarroa Bai intai Comuns

Intal 2007 i socialiscj de Navare (PSN), sburtâts des pressions che a rivavin di Madrid, a vevin refudât un acuardi cu la coalizion nazionaliste basche Nafarroa Bai (NaBai) e cu la çampe radicâl (IUN) e a vevin duncje lassât il guvier de Comunitât Forâl intes mans de diestre (UPN e CDN). Cumò a àn decidût di rompi ancje i acuardis di guvier che a vevin cun NaBai in siet Comuns de Navare. I socialiscj a àn justificât cheste decision cul fat che il sindic di Atarrabia / Villava (in fuarce a NaBai) al à permetût a un rapresentant di ANV, partît de çampe indipendentiste basche metût fûr leç, di dâ il vie uficiâl (txupinazo) ae fieste dal paîs. In pratiche, il PSN al acuse la coalizion nazionaliste basche di svicinâsi ae çampe indipendentiste e, duncje, di cimiâ a ETA. Daspò di cheste decision, i rapresentants de çampe indipendentiste basche a àn declarât che il PSN al mostre simpri plui a clâr che al è daûr a colaborâ cu la UPN par impedî cualsisei cambi politic in Navare.

Font: Gara, 05-06/10/09

Gales: delusion pe ordenance su la lenghe

La version definitive de ordenance di competence legjislative (LCO) su la lenghe galese e à lassât cu la bocje garbe la plui part des organizazions impegnadis inte promozion di cheste lenghe. Il coment plui dûr al rive de Cymdeithas yr Iaith Gymraeg che e lamente il fat che no si à vût il trasferiment plen des competencis sul galês di Londre a Caerdydd / Cardiff. Dal moment che il guvier galês al à dome dai podês limitâts – e spieghe la presidente de associazion, Menna Machreth – no si varà la pussibilitât di garantî ae popolazion dal Gales ducj i dirits linguistics che i jerin stât imprometûts tal acuardi di guvier jenfri socialiscj e nazionaliscj. La Cymdeithas e bat massime su la mancjance di garanziis pal ûs de lenghe sul puest di vore e intai servizis ufierts des compagniis privadis. Une cierte delusion pal proviodiment e salte fûr ancje dal Ufici pe lenghe galese. O sin contents che si vedi rivâts al trasferiment di ciertis competencis e che si vedi fat cualchi pas indenant – a àn dite i rapresentants dal Ufici – ma nus displâs che il test fat bon al sedi plui limitât de version proponude sul imprin.

Font: Welsh Language Board, o5/10/09; Cymdeithas, 06/10/09

Romanie: acuardi tra la ETV e la television ongjarese

Il vicepresident de television publiche ongjarese (MTV), Balazs Medveczky, e il president de fondazion “Janovics Jeno” che e gjestìs la Television Ongjarese in Transilvanie (ETV), Zsolt Nagy, a àn sotscrit un contrat di colaborazion tra lis dôs emitentis. L’acuardi al previôt il scambi des trasmissions produsudis des dôs televisions e al garantìs ae ETV l’acès plen ai archivis de television publiche magjare. Cun di plui, il personâl de emitente de comunitât ongjarese de Romanie al varà la pussibilitât di formâsi alì de MTV.

Font: Divers.ro, 05/10/09

Paîs Catalans / Ocitanie: gnovis cuotidianis par aranês su la tv catalane

Cui 5 di Otubar, il canâl informatîf de Televisió de Catalunya 3/24 al à tacât a trasmeti un boletin informatîf cuotidian par aranês, ven a dî la varietât ocitane che si fevele inte Val di Aran. La emission e cuvierzarà dut il teritori de Catalogne e no dome la valade pirenaiche là che si dopre l’ocitan. Cun di plui, la television catalane e à ancje vierzût un portâl di pueste pe Val di Aran cu lis informazions dedicadis a chest teritori e i materiâi produsûts de emitente par aranês.

Font: Món Divers, 05/10/09