Paîs Basc: euskara e castilian lenghis propriis dal Osasuna

“Lis lenghis dal Club Atlético Osasuna a son il castilian e l’euskara e, duncje, a saran dopradis dutis e dôs in maniere normâl par dutis lis sôs ativitâts”. Cussì si vierç l’articul dal statût gnûf de societât di balon di Iruñea / Pamplona dedicât al bilinguisim che di cumò indenant al varà di caraterizâ lis ativitâts dal Osasuna e che al previôt ancje percors di formazion par judâ il personâl de societât e i siei zuiadôrs a imparâ la lenghe basche. La revision dal statût e à za superât i controi legâi e si insuaze tun progjet di valorizazion progressive dal euskara che si veve inviât cualchi an indaûr.

Font: Noticias de Navarra, 18/08/21

Cossovo: in cressi i ats di violence cuintri dai serps

La polizie cossovane e à arestât trê personis acusadis di vê pacât ai 17 di Avost un fantat serp a Mitrovica par vie de sô partignince nazionâl. Si trate dal cuart episodi di violence etniche cuintri di membris de minorance serbe che e vîf in Cossovo tal zîr di un mês. Su la cuistion al è intervignût ancje il guvier di Belgrât par marcâ cemût che chescj episodis a sedin cressûts une vore dal principi di chest an par vie dai discors di intolerance cuintri de comunitât serbe che a rivin dal gnûf guvier cossovan. Par cjalcjâ la coresponsabilitât istituzionâl che e je daûr di chestis agressions, il guvier serp al à segnalât che un dai responsabii dal ultin at di violence capitât a Mitrovica al partignarès aes fuarcis di polizie cossovanis: declarazion che par cumò no je stade ancjemò smentide dal guvier di Pristina.

Font: Balkan Insight, 18/08/21

Paîs Catalans: catalan tra lis opzions linguistichis de Tesla

La Tesla e je la prime imprese automobilistiche che e previôt il catalan tant che opzion linguistiche tai siei veicui. Lu fâs cul cjapâ dentri cheste lenghe tra chês dopradis intal panel di control dai siei veicui e ancje tal manuâl di ûs des veturis. La iniziative e je nassude in gracie dai contats vûts cu la entitât catalane pai dirits linguistics Plataforma per la Llengua. La organizazion e invide cumò ancje chês altris cjasis automobilistichis a lâ daûr dal esempli de Tesla, a partî di chês che a àn stabiliments propit intai Paîs Catalans.

Font: RacoCatalà, 18/08/21

Gales: continuitât de lenghe menaçade dal marcjât imobiliâr

La incressite dal presit des cjasis in Gales e je la plui alte tal Ream Unît, ven a dî il 2,3% dome tal ultin mês e il 10,9% intun an. Cheste situazion e impedìs ai zovins dal puest di vê acès al marcjât imobiliâr e ju sburte a emigrâ. Si trate di une menace une vore serie ae tignude des comunitâts di lenghe galese che dispès si cjatin propit intes areis plui interessadis dal marcjât turistic e des secondis cjasis. La associazion pe lenghe galese Cymdeithas yr Iaith e je cussì impegnade tune campagne par denunciâ cheste situazion che e à puartât a diviersis azions simbolichis tant che la scjalade des monts plui altis dal Gales là che a son stâts metûts fûr strissons cu la scrite «Nid yw Cymru ar Werth» (il Gales nol è in vendite). La organizazion e domande al guvier di procedi cuntune leç di setôr che e dedi aes comunitâts locâls il control sul marcjât imobiliâr e su la planificazion urbanistiche, cu la pussibilitât ancje di meti un tet aes secondis cjasis e di controlâ i presits di vendite e di afit. Ancje il partît nazionalitari Plaid Cymru al domande al esecutîf galês di meti di bande i progjets pilote e di procedi cuntune azion radicâl e urgjente che e tuteli lis comunitâts locâls.

Font: Nation Cymru, 16/08/21

Sápmi: lenghe, gjenar e gákti al centri dal Pride di chest an

Dai 5 ai 8 di Avost si à davuelt a Ohcejohka / Utsjoki, dongje dal confin jenfri Norvegje e Finlande, il Sápmi Pride. Nassude tal 2014, la manifestazion e cîr di pontâ la atenzion su lis rivendicazions e lis bataiis di cui che al patìs une dople minorizazion, o sei chê nazionâl e chê di gjenar. In plui de marcje tipiche di chest apontament, la iniziative e proponeve ancje diviers laboratoris e moments di discussion. Tra i temis discutûts chest an si à ancje cemût rindi il lessic des varietâts sami plui atent al gjenar e cemût adatâ il codiç di ûs dal gákti, o sei il costum tradizionâl dai sami, a cui che no si identifiche cu lis normis tradizionâls di division di gjenar.

Font: The Barents Observer, 11/08/21