Geroa Bai – la aleance nazionaliste moderade che e fâs part dal guvier de Navare – no plate la sô insodisfazion pal compuartament dai socialiscj (PSN) che a vuidin la coalizion che e sosten l’esecutîf de Comunitât autonome. I rapuarts cui aleâts a son bogns e l’acuardi metût adun par bati lis diestris al va dilunc a jessi calcolât positîf ma – a disin i rapresentants di Geroa Bai – i socialiscj no àn mantignût l’impegn che si vevin cjapâts par garantî il just ricognossiment de lenghe basche dentri de aministrazion publiche. Cundut des diviersis propuestis fatis indenant – e zonte la coalizion nazionaliste – il PSN nol à fat nancje un pas indenant su chest front. Cumò – a disin – e je rivade la ore che i socialiscj a metin di bande la fobie pal euskara doprade in campagne eletorâl e a mantegnin i impegns di guvier che si son cjapâts.
02/09/21
Gales: galês tra lis lenghis plui popolârs su Duolingo
Il galês al è une des lenghis plui popolârs su Duolingo, la aplicazion par imparâ lis lenghis doprade di plui di 40 milions di personis ator pal mont. Dilunc vie dal 2020 lis personis che a àn discjariât la app par imparâ il galês a son aumentadis dal 44%, cuntun nivel di incressite plui alt di lenghis tant che francês, hindi, gjaponês o turc, il plui alt dentri dal Ream Unît. Daûr dai dâts comunicâts de direzion di Duolingo, la aplicazion pal galês e ven doprade di passe un milion e 600 mil personis, di chestis chês calcoladis come students atîfs a son 474 mil. Il galês però nol è l’unic tra lis lenghis celtichis a atirâ l’interès dai utents. Cun di fat, a son 400 mil lis personis che a doprin chest sisteme par imparâ o almancul par svicinâsi al gaelic scozês: une cifre cetant plui grande des personis che in dì di vuê a fevelin cheste lenghe.
Galizie: denunciis pe violazion dai dirits linguistics dopleadis
Il numar des denunciis par violazion dai dirits linguistics presentadis vie pal 2020 denant dal difensôr civic de Galizie (Valedor do Pobo) a son dopleadis rispiet al an prime. Se tal 2019 a jerin stadis 48, intal zîr di un an a son passadis a 96. I câs denunciâts a son di nature divierse ma a van ducj cuintri di ce che e previôt la normative linguistiche: si va de cartelonistiche che no dopre i toponims locâi al ûs esclusîf dal castilian intai documents uficiâi, dal dinei dai insegnants a corezi provis scritis par galizian a rispuestis dadis par castilian a domandis formâls presentadis par galizian. Trê cuarts des denunciis a son stadis presentadis dai citadins cul jutori des organizazions A Mesa pola Normalización Lingüística e Observatorio de Dereitos Lingüísticos.
Paîs Catalans: repression ancje su membris dal guvier catalan
L’indult parziâl concedût dal guvier spagnûl ai dirigjents politics catalans condanâts pal referendum dal prin di Otubar dal 2017 nol à puartât ae fin de repression judiziarie metude in at cuintri dal indipendentisim catalan che, al contrari, e colpìs ancje diviers dai membris dal guvier catalan in cjarie. Roger Torrent – che tal esecutîf si ocupe di economie – al è sot inchieste cun altris trê di lôr par disubidience par vie des ativitâts davueltis cul ufici di presidence dal Parlament catalan inte legjislature stade. La delegade pe culture, Natàlia Garriga, e je investigade cuntune trentine di altris personis pai preparatîfs dal referendum dal prin di Otubar. Cundut de assoluzion in prin grât, Tània Verge – delegade pes politichis di gjenar – e je colpide dal un ricors presentât de publiche acuse. La repression judiziarie e interesse ancje il delegât pe educazion, Josep González Cambray, che al è te vincjine di indagâts intal cussì clamât câs Volhov e par chest al è stât ancje arestât de polizie. La repression, dut câs, no tocje dome i membris dal atuâl guvier catalan. Pai fats leâts al referendum su la indipendence, si stime che a sedin almancul 3 mil lis personis arestadis, indagadis o sot procès.
Paîs Basc: in cressi lis violazions dai dirits linguistics
Il guvier de Comunitât Autonome Basche al à fate buine la memorie metude adun dal servizi pe garanzie dai dirits linguistics (Elebide) su la fonde des 264 segnalazions rivadis dilunc vie dal 2020 su la violazion dai dirits linguistics, 52 in plui di chês presentadis l’an prime. Si trate di azions o di compuartaments che a van cuintri dai dirits garantîts de normative linguistiche in vore. A son 196 i câs che la denuncie e je stade tignude par buine e, pal 85,7%, a interessin il setôr public: plui de metât si riferissin propit a violazions sucedudis dentri de aministrazion autonomiche, i vegnin daûr lis aministrazions locâls, i uficis decentrâts dal stât spagnûl e lis aministrazions provinciâls. Une denuncie su cinc e je par ats o compuartaments leâts ae gjestion de emergjence sanitarie. Cuasi tal 95% dai câs si à cjatade une soluzion, ven a dî che la persone che e à presentât la segnalazion si à mostrade sodisfate de rispueste dade dal sogjet clamât in cause.