Stât spagnûl: visite ONU par viodi de situazion des minorancis

Il relatôr speciâl de ONU su lis minorancis, Fernand de Varennes, al sarà in visite tal stât spagnûl tra i 14 e i 25 di Zenâr par racuei informazions su la situazion des minorancis nazionâls, linguistichis e religjosis che a vivin intal ream di Spagne, in particolâr su temis tant che la educazion, la partecipazion politiche e la lote cuintri de intolerance. A son duncje previodûts incuintris cun funzionaris dal guvier centrâl e di chei autonomics, cun rapresentants de societât civîl e cun membris des minorancis. De Varennes in plui che a Madrid, al à in program visitis intai Paîs Catalans, tal Paîs Basc, in Galizie e in Andalusie. Ta cheste ultime comunitât e sarà frontade in particolâr la situazion des comunitâts gjitanis.

Font: VilaWeb, 11/01/19

Paîs Catalans: gnovis azions cuintri de “catalanofobie”

An dopo an l’ûs dal catalan intal cjamp de justizie al va dilunc a calâ. Lis dificoltâts che i citadins e i professioniscj si cjatin denant par impleâ la lenghe proprie tai tribunâi a puartin a pidimentâ la tutele juridiche e fintremai a discriminazions palesis di cui che al fevele par catalan. Par chest la organizazion Plataforma per la Llengua, te suaze de sô campagne “Prou de catalanofòbia” (vonde cu la catalanofobie), e à dât fûr un spot recitât dai atôrs Carme Sansa e Ricard Borràs che, a partî di fats reâi, al denuncie cheste situazion. Il contrast tra la situazion intal stât spagnûl e chê di altris paîs e je saltade tai voi cun clarece propit in ocasion des vicendis judiziariis dai esiliâts catalans in Belgjiche là che i avocats dai acusâts a àn podût sielzi tra un percors judiziari par francês o par flamant. Il dirit al ûs de lenghe catalane ancje te justizie invezit al reste dome su la cjarte dal moment che i judiçs e il personâl che al lavore intai tribunâi dai Paîs Catalans no àn nissun oblic di cognossi la lenghe e par vie che, viodûts i precedents discriminatoris, tancj no riscjin di doprâ il catalan par pôre di jessi penalizâts. Pe Plataforma e covente une gnove leç cuintri des discriminazions linguistichis che e previodi ancje sanzions dal moment che, se la pedagogjie e reste la strade principâl, cuant che no son alternativis al covente punî. Par lâ ta cheste direzion e à ancje inviât une racuelte di firmis in rêt là che tai prins dîs si son notâts za uns 15 mil citadins (www.proudecatalanofobia.cat).

Font: Plataforma per la Llengua, 11/01/19

Ocitanie: gnove campagne pe uficialitât dal ocitan

Il moviment de çampe radicâl ocitane Libertat al à fat savê che sul finî di Fevrâr al lançarà une campagne pe uficialitât dal ocitan e par chest al invide ducj i coletîfs che a condividin cheste bataie a mobilitâsi, a puartâ il lôr contribût e a metisi in rêt. Cun di fat, a disin, nissun moviment, par trop grant che al sedi, al pues rivâ di bessôl a chest obietîf. Par Libertat la lenghe e je la fonde de identitât e cence di jê nol è pussibil nissun avignî pe Ocitanie. Cu la uficialitât, la lenghe proprie e à duncje di cjatâ il so puest inte educazion, inte formazion, inte aministrazion e tai servizis publics, intai mieçs di comunicazion e in dute la societât ocitane.

Font: Jornalet, 11/01/19

Paîs Catalans: la Viquipèdia e rive a 600 mil articui

La Viquipèdia, la version catalane de enciclopedie libare in rêt, e je rivade a 600 mil articui. La cifre e je stade tocjade ai 10 di Zenâr cuntun toc dedicât ae biografie de ativiste Pura Velarde. Des 303 versions regjistradis di cheste enciclopedie ator pal mont, chê in lenghe catalane e je la vincjesime par numar di contignûts, inant che sul plan de cualitât dai siei articui si cjate tra lis primis trê. Nassude tal 2001, si à svilupade in gracie dal contribût di 300 mil personis che a àn scrit, editât o comedât i articui che le componin. Vie pal 2018 la version catalane de enciclopedie libare e à vût passe 196 milions di consultazions.

Font: Generalitat de Catalunya, 10/01/19

Paîs Basc: presentade la edizion 21 de Korrika

Ai 9 di Zenâr la organizazion AEK (Coordenament pe alfabetizazion e pe baschizazion) e à presentât la vincjeunesime edizion de Korrika, la corse inmaneade ogni doi agns par cjapâ sù fonts pe promozion e pal insegnament de lenghe basche e par slargjâ il so ûs inte societât. La manifestazion si davuelzarà dai 4 ai 14 di Avrîl. Si partìs de localitât di Gares / Puente la Reina, in Navare, e dopo di vê scjavaçât dutis lis regjons storichis dal Paîs Basc si rivarà a Gasteiz. La corse e tocjarà ancje dutis lis citâts principâls e, plui in detai, Iruñea / Pamplona ai 6 di Avrîl, Baiona / Bayonne ai 7, Bilbo / Bilbao ai 11 e Donostia ai 12.

Font: MediaBask, 09/01/19; EiTB, 09/01/19

Asturiis: asturian simpri plui margjinalizât su la RTPA

La Xunta pola Defensa de la Llingua Asturiana e a screât il 2019 cuntun comunicât là che e denuncie la incressite de margjinalizazion de lenghe proprie inte RTPA, la Radiotelevision dal Principât des Asturiis. La organizazion e segnale cemût che la emitente publiche e va cuintri dal Statût di autonomie, de leç sui ûs linguistics e fintremai de stesse normative che le regole, che e previôt che la RTPA e sedi un imprest par promovi l’asturian. Vie pal 2018 la situazion e je lade fintremai in piês cu la scancelazion de direte mensîl par asturian di une partide e cence che si dopleàs in lenghe proprie nancje une trasmission. I programs lâts in onde par asturian a son stâts une vore pôcs e ancje chei programâts intai oraris piês. Par chel che al rivuarde la radio publiche, in plui de lenghe, si à penalizât fintremai la musiche asturiane che no à rivât a passâ nancje la ore di presince par setemane.

Font: InfoAsturies, 05/01/19

Paîs Catalans: tes Baleârs si invie Cinemacat

La organizazion Obra Cultural Balear, in gracie de colaborazion cun CineCiutat e cu la direzion gjenerâl pe politiche linguistiche, e inviarà ca di pôc il progjet Cinemacat par promovi il cine par catalan ancje su la isule di Mallorca. Par intant si proponarà ogni joibe un film in version origjinâl o sottitulât par catalan ma l’intindiment al è di rivâ a di une programazion stabile dal cine par catalan prime a Palma e po ancje in altris localitâts de isule.

Font: La Vanguardia, 04/01/19

Aragon: pas indenant pal insegnament di catalan e aragonês

Daûr dai dâts dal dipartiment pe educazion, intal Aragon a son cuasi cent i istitûts scolastics là che si insegne il catalan o l’aragonês. Ca di cualchi setemane e varès di jessi fate buine une gnove ordenance par regolâ l’insegnament e l’ûs di chestis lenghis intai istitûts autorizâts. Lis novitâts a varessin di previodi la pussibilitât di insegnâ par catalan o par aragonês tra lis cuatri e lis sîs voltis par setemane tes scuelis de infanzie e di doprâ in maniere veicolâr la lenghe proprie par insegnâ une materie tes primariis e tes secondariis.

Font: Hoy Aragon, 03/01/19

Irlande: in cressi il gaelic tes scuelis dal Gaeltacht

Il ministri pe educazion de Republiche de Irlande, Joe McHugh, al à comentât cun sodisfazion i risultâts dal prin rapuart su la metude in vore dal program di valorizazion des scuelis dal Gaeltacht, o sei lis areis là che l’irlandês al è ancjemò fevelât in maniere significative. Il program, che al interesse 105 scuelis primariis e 28 secondariis, al è stât inviât intal 2017 cun chê di slargjâ e di incressi la cualitât dal insegnament in lenghe gaeliche. Il rapuart al diven des ispezions davueltis intes scuelis tra il mês di Setembar e chel di Dicembar. Il program al à za permetût di slargjâ l’ûs de imersion linguistiche tai prins agns di scuele e al à cjatât une grande adesion de bande dai insegnants e des fameis. Tra i problemis segnalâts si à invezit la dificoltât a fâ doprâ l’irlandês ai students des superiôrs fûr dal orari di lezion. Dut câs lis primis misuris imbastidis par fâi cuintri a cheste problematiche a àn za tacât a dâ risultâts positîfs. McHugh al à fat savê che vie pal 2019 lis risorsis pe educazion intal Gaeltacht a saran cressudis a 5 milions di euros, cuasi il dopli di chês dal an passât.

Font: Galway Daily, 29/12/18

Cossovo: l’esercit al divît inmò di plui serps e cossovans

Ai 14 di Dicembar il Parlament cossovan, cun 105 vôts su 120, al à fate buine la leç che i assegne ae fuarce di sigurece dal Cossovo lis carateristichis e lis competencis di un esercit vêr e no plui chês di un cuarp di polizie. Chest cambi al è stât fat cuntune leç ordenarie e cence di un mudament costituzionâl in maniere di no vê bisugne de poie ancje di doi tierçs dai vincj deputâts assegnâts aes comunitâts minoritariis dal Cossovo. Il vôt al è stât boicotât de Srpska Lista, il moviment di racuelte de minorance serbe che di bessôl al conte dîs parlamentârs e che, fin cumò, al veve rivât a impedî ogni tentatîf di meti in pîts un esercit cossovan par vie costituzionâl. Il puartevôs dal moviment, Goran Rakić, al à fat savê che la leç e sarà impugnade denant de cort costituzionâl. Al à ancje fat capî che se cualchi repart di chest esercit al ves di provâ a jentrâ tes areis a maiorance serbe al sarà calcolât di fuarce di ocupazion ilegâl. La uniche poie, sul plan internazionâl, e je rivade dai Stâts Unîts, intant che sei la UE che la NATO a àn judicât in maniere negative la iniziative, massime pal fat di no vêle concuardade cu lis minorancis, in primis chê serbe.

Font: Balkan Insight, 14/12/18

Corsiche: al è muart Edmond Simeoni, “l’om di Aleria”

Ai 14 di Dicembar al è muart, ae etât di 84 agns, Edmond Simeoni. Considerât un dai paris dal nazionalisim cors contemporani, intal 1967 al jere stât un dai fondadôrs dal moviment Azion Regjonaliste Corse deventade po, sîs agns plui tart, Azzione per a Rinascita di a Corsica (ARC). La sô partecipazion ai fats di Aleria intal Avost dal 1975, anticipâts di un so discors di fûc cualchi zornade prime, a puartin a considerâlu l’om di ponte dal gnûf nazionalisim cors e i costin un an e sîs mês di preson. Intal 1977 al partecipe ae creazion de Unione di u Populu Corsu (UPC) che, tes sôs filis, al sarà po elet intal 1982 inte prime Assemblee de Corsiche. Cinc agns plui tart al cjape lis distancis de lote armade puartade indenant di une part dal moviment nazionâl cors par sostignî l’autoguvier de isule dome par vie politiche. Tai agns ’90 e tai prins agns dal secul gnûf al va dilunc cul so impegn politic ancje par mieç di coalizions – tant che Corsica Nazione e Unione Naziunale – che a cirin di meti adun lis diviersis animis dal nazionalitarisim cors. Un percors che i permetarà po propit a so fi, Gilles Simeoni, di deventâ il prin president nazionalist dal guvier cors. Miedi di mistîr, Edmond Simeoni al è stât in prime linie ancje in cetantis bataiis pe difese ambientâl de isule e cuintri dal razisim.

Font: France 3 Corse ViaStella, 14/12/18

Gales: simpri plui a risi la emitence radiofoniche galese

La gnove che une emitente dute par inglês e cjaparà la concession de frecuence assegnade fin cumò a Radio Ceredigion e à tornât a impiâ lis protestis des organizazions galesis impegnadis pai dirits linguistics. Ce che si domande e je la devoluzion ae Assemblee Nazionâl dal Gales des competencis su la emitence radiotelevisive che cumò a vegnin gjestidis di Londre. In dì di vuê, di fat, i galês no àn nissune pussibilitât di dî la lôr su cheste tematiche. Cun di plui, si riscje che la situazion e ledi ancjemò in piês dal moment che il guvier britanic al è daûr a pensâ a liberalizâ inmò di plui il setôr cul risi che lis radio comerciâls che a operin in Gales no vedin nissun oblic di garantî une presince ancje minime de lenghe galese o di notiziaris che a fevelin di ce che al sucêt in Gales.

Font: Cymdeithas yr Iaith, 13/12/18

Europe: ELEN sui dams de Brexit pes lenghis celtichis

ELEN – Rêt Europeane pe Avualiance Linguistiche che e ten adun 150 organizazions di 45 comunitâts minorizadis de Europe – e à dât fûr un document uficiâl che, in acuardi cui siei membris galês, scozês, irlandês e cornics, al segnale i efiets une vore negatîfs che l’acuardi su la jessude dal Ream Unît de Union Europeane al riscje di vê su lis lenghis celtichis feveladis intes isulis. Dongje de pierdite di finanziaments direts par mieç di programs tant che Erasmus Plus, Creative Europe o Horizon 2020, a van calcolât ancje i efiets su lis comunitâts che inmò a fevelin chestis lenghis e che, dispès, a son centradis intes areis rurâls o plui disvantazadis. Cun di fat, la mancjance di misuris di jutori par ativitâts tant che agriculture, pescje o turisim che a rivavin de UE a menacin la tignude economiche di chestis comunitâts cul risi che la int e vedi di lâ vie fiscant cussì i ultins lûcs là che chestis lenghis a jerin ancjemò dopradis in maniere cuotidiane e vivarose. Un tant al vâl pes areis rurâls dal Gales là che la jessude de suaze des politichis europeanis e menace di meti in crisi cetantis aziendis agriculis, o pes isulis scozesis cuntune economie leade ae pescje e al turisim. Un câs particolâr al è po chel de Irlande là che la jessude de UE e riscje di fâ saltâ ancje ducj i finanziaments transfrontalîrs e i progjets di cooperazion che ta chescj agns a vevin zovât ancje ae lenghe irlandese. Di chi duncje l’apel a no cjapâ une strade che e menace efiets cussì disastrôs pes comunitâts di lenghe galese, irlandese, gaeliche e corniche.

Font: ELEN, 13/12/18

Bretagne: ancje 19 parlamentârs a sburtin pe riunificazion

Disenûf parlamentârs bretons a àn firmât une letare vierte là che a domandin al consei dipartimentâl de Loire Atlantiche di imbastî une consultazion popolâr su la union di chest dipartiment al rest de Bretagne intune uniche regjon aministrative. Tredis deputâts e sîs senatôrs a àn invidât i conseîrs a dâi une rispueste positive ae petizion fate indenant de organizazion Breizh Unvan / Bretagne Réunie e sotscrite in pocjis setemanis di passe 100 mil eletôrs de Loire Atlantiche, o sei sù par jù il 10% dal cuarp eletorâl dal dipartiment. Chê sul referendum pe riunificazion de Bretagne storiche e je la plui grande racuelte di firmis mai vude fin cumò intun singul dipartiment dal stât francês. Intun moment là che i citadins si sintin simpri plui lontans des istituzions – a ricuardin i parlamentârs che a àn firmât l’apel – al sarès pecjât mortâl impedî cheste volontât di partecipazion.

Font: Agence Bretagne Presse, 13/12/18

Paîs Catalans: dossier su lis violazions dai dirits linguistics

Une delegazion dal comitât di esperts dal Consei de Europe che al viôt dal rispiet de Cjarte europeane des lenghis regjonâls o minoritariis si à cjatade ai 12 di Dicembar cui rapresentants de direzion gjenerâl di politiche linguistiche dal guvier catalan. E je stade la ocasion par presentâur lis violazions dai dirits linguistics metudis in at des autoritâts statâls. Tra lis principâls si à la mancjance de cognossince dal catalan e dal ocitan aranês tra il personâl dai tribunâi cul efiet di pidimentâ l’ûs di chestis lenghis intai procediments judiziaris. La mancjance de cognossince des lenghis couficiâls si le cjate ancje framieç de plui part dal personâl dai uficis e dai servizis statâi che a operin in Catalogne, tai sîts internet di chestis istituzions e tai modui pal public. Si àn po cetantis normativis statâls che a pretindin l’ûs dal castilian cence tignî cont di chês altris lenghis couficiâls, che i si zontin i intervents statâi par pidimentâ o fintremai par anulâ lis normativis sui ûs linguistics fatis buinis in Catalogne. Par finî, dal stât centrâl a rivin ancje limitazions su le emission e la ricezion di programs radiotelevisîfs tra lis Comunitâts che a condividin la stesse lenghe proprie e il dinei a domandâ l’ûs uficiâl dal catalan intes istituzions europeanis.

Font: Generalitat de Catalunya, 12/12/18

Paîs Catalans: al cres il catalan tai mieçs di comunicazion

In gracie di un acuardi cul guvier catalan la plateforme digjitâl Movistar+ e za à proviodût a sottitulâ par catalan 250 cines e 60 seriis televisivis cun chê di slargjâ simpri di plui la ufierte di contignûts audiovisîfs ta cheste lenghe, in particolâr par mieç di produzions in lenghe origjinâl cui sottitui. Novitâts positivis a rivin però ancje de plateforme par messaçs Telegram che e à metût il catalan tra lis sôs opzions linguistichis, che fin cumò a contavin dome altris cundis lenghis. La opzion e je za disponibile par dispositîfs Android, iOS, TDesktop e macOS.

Font: Europa Press, 10/12/18; Generalitat de Catalunya, 11/12/18

Aragon: sì de universitât di Zaragoza ae catedre di aragonês

Il senât academic de universitât di Zaragoza al à decidût di inviâ la specialitât di lenghe aragonese intai cors di lauree par formâ insegnants pes scuelis de infanzie e pes primariis. Nol è tant che si à ufiert la pussibilitât di studiâ l’aragonês tai prins agns di scuele: in dì di vuê i fruts che lu studiin a son uns 1.200 e i professôrs che lu insegnin une vincjine, ma par lôr fin cumò nol esisteve un percors di formazion specific. Par jentrâ in vore la misure e à di vê il vie libare sei dal guvier dal Aragon, sei di chel spagnûl. Se lis autorizazions a saran dadis avonde in curt si podarà partî cu la gnove catedre za cul an academic 2019-2020.

Font: Heraldo, 10/12/18

Paîs Basc: indenant a cressi il personâl euskaldun te sanitât

A cuindis agns di distance di cuant che si à inviât il procès di normalizazion linguistiche ancje dentri di Osakidetza – o sei il sisteme sanitari public de Comunitât Autonome Basche – i risultâts a son une vore positîfs. A dîlu al è stât il conseîr cun deleghe pe sanitât, Jon Darpón, che al à ricuardât cemût che dal 2003 indenant il personâl sanitari in linie cul profîl linguistic previodût pe sô incarghe al è passât dal 7,6% al 46,6%. L’an passât si à inviât ancje il regjistri di preference linguistiche dai pazients che al à puartât za 240 mil personis a indicâ l’euskara tant che lenghe miôr par jessi seguidis dal personâl sanitari, cuntun nivel di sodisfazion sul ûs e su la presince de lenghe basche che al è di 6,4 suntune scjale di 10.

Font: Europa Press, 03/12/18

Gales: prin toc par galês disore dal milion di scoltis su Spotify

“Gwenwyn” (tuessin) dal grup Alffa e je la prime cjançon in lenghe galese a passâ il milion di scoltis su Spotify. Un risultât che il cjantant e ghitarist Dion Jones e il baterist Sion Land no si spietavin par nuie ancje se il lôr talent ju veve za puartâts a jessi selezionâts pal progjet “Horizons Artists” inmaneât de BBC dal Gales par promovi la gnove musiche galese. I doi fantats, che nol è tant che a àn finît di scuele, a son stâts ancje scriturâts de etichete Recordiau Côsh che e ponte une vore su di lôr par mostrâ che, cu la buine musiche, lis bariduris linguistichis si rivin a sdrumâ.

Font: BBC, 03/12/18; The Guardian, 07/12/18

Irlande: la cognossince dal gaelic e reste debule

Un scandai puartât indenant de agjenzie di ricercje e statistiche de Irlande dal Nord al stime tor dal 15% la popolazion des sîs conteis setentrionâls de isule che e à une cualchi cognossince dal gaelic irlandês. Dut câs dome il 4% al dopre la lenghe ogni dì o une vore dispès in cjase o tes relazions sociâls. Pal rest, tra chei che a àn declarât di cognossi la lenghe, dome il 5% al à un nivel alt di competence che i permet di capî discors complès, intant che il 46% al cognòs dome pocjis frasis semplicis di interazion sociâl. Il dât al marche duncje la urgjence di une leç organiche pal irlandês che e ven invezit contrastade cun fuarce dai partîts unioniscj nordirlandês.

Font: Belfast Telegraph, 29/11/18