Paîs Catalans: incressite e impunitât des agressions fassistis

A son daûr a cressi i atacs di stamp fassist cuintri di militants indipendentiscj e di citadins impegnâts in ativitâts a pro de liberazion dai presonîrs politics catalans. Simpri plui dispès di fat, ai vandalisims cuintri dai simbui dal indipendentisim e de campagne pai presonîrs e pai esiliâts, si zontin lis agressions fisichis. Chel istès, ancje se cualchidun dai responsabii al è stât identificât, par cumò no si à vût nissun arest e nissun procès intai lôr confronts. Se a chest si compagne il cidin di buine part de stampe spagnole, il risi al è chel di alimentâ une clime di impunitât che e lassi cjamp libar a azions simpri plui violentis e sistematichis. Par chest ai 4 di Avost il president dal guvier catalan, Quim Torra, al à mandât une letare vierte ai mieçs di comunicazion e a ducj i partîts politics catalans e spagnûi par che a denunciin e a cjapin une posizion fuarte su chest teme. No si trate di jessi pro o cuintri de indipendence – al à sclarît – ma di jessi dentri o fûr dal sisteme democratic.

Font: Jornalet, 06/08/18

Stât spagnûl: catalan e galizian a sparissin de agjenzie tributarie

La gnove societât (Konecta BTO) che tal mês di Lui e à vinçût l’apalt par gjestî il servizi di contat telefonic cu la Agjenzie tributarie dal stât spagnûl no rispuint aes telefonadis che a rivin par catalan e par galizian. Il contrat di apalt al previôt che si garantissi ai contribuents che a clamin de Catalogne, de Comunitât Valenziane e des Baleârs un servizi di rispueste par catalan e a chei che a clamin de Galizie par galizian. La aziende però no rispiete chest aspiet dal contrat e, par cumò, no à nancje ufiert ai utents nissune spiegazion in mert a chest disservizi. La aministrazion centrâl dal stât e à ricognossût che la societât che e à cjapât in man l’apalt no rispiete il contrat ma e à sigurât che il probleme al sarà comedât in curt.

Font: El Diario, 04/08/18

Paîs Catalans: vuide a buteghis e locâi catalanofons dal Nord

La organizazion Plataforma per la Llengua e à publicât in rêt la sô Guía CatNord, un sît internet là che si puedin cjatâ dutis lis informazions plui impuartantis su lis buteghis e i locâi de Catalogne Nord (sot aministrazion francese) là che si dopre la lenghe catalane. L’obietîf al è sei di sburtâ l’ûs sociâl dal catalan intal setôr dal cumierç, sei di incressi i spazis di socializazion in lenghe proprie. La vuide e cjape dentri cent realtâts comerciâls sparniçadis ator par dute la Catalogne Nord. Lis buteghis e i locâi selezionâts si podarà ricognossiju ancje in gracie di adesîfs di pueste che a segnalin che alì si fevele par catalan.

Font: El Nacional, 04/08/18

Cossovo: gnovis tensions su la istituzion de Zajednica

Ai 4 di Avost a scjadevin i cuatri mês assegnâts al grup di lavôr incjariât di meti jù il stampon dal statût de Zajednica, la Associazion dai Comuns Serps dal Cossovo. La mancjance di cualsisei informazion sul andament dai lavôrs e sui contignûts dal test a àn cressût une vore lis tensions sei dentri dal Cossovo, sei cu la Serbie. Cussì il president cossovan Hashim Thaci di une bande al sigurave che la scjadince e sarès stade rispietade, di chê altre al proponeve une revision dai confins che e cjapàs dentri la aree serbe a maiorance albanese di Bujanovac, Medveđa e Preševo / Presheva. I partîts cossovans invezit a fevelavin di menace ae integritât statâl e a contestavin ogni forme di autonomie pes minorancis serbis. Il president de Serbie, Aleksandar Vučić, ur rispuindeve invidant lis comunitâts serbis dal Cossovo a no colâ tes provocazions e garantint la lôr sigurece cuintri di ogni menace. Dome ai 6 di Avost il ministri cossovan pes aministrazions locâls al à comunicât di vê ricevût il stampon dal statût de Associazion dai Comuns Serps e che lu varès inviât aes autoritâts europeanis che dal 2015 incà a cirin di mediâ su cheste cuistion. La dì dopo però sei i uficis de Comission Europeane, sei chei de presidence cossovane a àn dineât di vê ricevût alc. La responsabile pe politiche foreste de UE, Federica Mogherini, e à sigurât che il teme al sarà frontât a Bruxelles di Thaci, Vučić e dai delegâts europeans inte prime date utile, date che però e reste ancjemò di fissâ.

Font: Balkan Insight, 03-06/08/18; Gazeta Express, 03-07/08/18; Focus News Agency, 06/08/18

Paîs Catalans: campagne par vê Spotify par catalan

E je a pene partide une campagne par domandâ che Spotify al meti a disposizion une interface ancje par catalan. Al centri de campagne e je une racuelte di adesions inviade a partî dal sisteme di petizions che il stes Spotify al ufrìs ai siei utents (https://goo.gl/Chb880). La iniziative, che e à za otignût la poie de direzion gjenerâl di politiche linguistiche dal guvier catalan, e sarà fate cognossi ator pes rêts di comunicazion sociâl a partî di un concet sempliç: se si scolte musiche par catalan parcè no si varessial ancje di cirîle e di fâle cognossi par catalan? Par dâi plui visibilitât ae campagne si domandarà ancje ai musiciscj catalans di sostignîle.

Font: Generalitat de Catalunya, 03/08/18

Paîs Basc: sentence a pro dal euskara in Navare

Il tribunâl superiôr di justizie de Navare al à boçât il ricors presentât dal sindacât Afapna cuintri de assegnazion di un puest inte aministrazion publiche su la fonde dal nivel di cognossince de lenghe basche. Daûr de sentence, la cognossince dal euskara e je un criteri coret di selezion dal personâl in ducj i câs là che la dibisugne di cognossi cheste lenghe e je justificade, o sei tai câs di un contat diret cun personis che a àn il basc di prime lenghe. La decision dal tribunâl e da un colp no di pôc ae strategjie dal sindacât Afapna e de diestre spagnoliste e regjonaliste che di agns a cirin di pidimentâ ogni pas indenant, ancje minim, inte normalizazion dal ûs de lenghe basche inte aministrazion publiche de Navare.

Font: Diario de Navarra, 02/08/18

Alsazie: gnove mobilitazion pe Coletivitât a statût speciâl

Il moviment alsazian Unser Land al à invidât i deputâts elets ta chel teritori a profitâ dal progjet di leç di revision costituzionâl cumò al esam de Assemblee francese par sburtâ un emendament che al fasi de Alsazie une Coletivitât cuntune specifiche autonomie legjislative. Il stât francês al previôt za autonomiis particolârs pe Corsiche e pes areis metropolitanis di Parîs e di Lion. La Alsazie, cu la sô vocazion transnazionâl e lis sôs specificitâts linguistichis e storichis, e varès dutis lis cjartis a puest par gjoldi di chel stes status. Il prin ministri francês al à comunicât ai elets alsazians che dentri di Otubar, dopo di un confront cui rapresentants locâi, si decidarà se procedi cu la fusion dai doi dipartiments che in dì di vuê e je dividude la Alsazie. Par Unser Land però, cence di un statût speciâl, la fusion no cambiarà plui di tant la situazion. Par chest a invidin ancje i citadins a mobilitâsi par fâ rivâ il messaç ai deputâts alsazians e al guvier di Parîs.

Font: FRPS, 02 e 03/08/18

Aragon: certificazion linguistiche cuasi pronte pal aragonês

In curt si podarà certificâ il nivel di cognossince dal aragonês daûr dai criteris fissâts dal cuadri comun european di riferiment pes lenghis. Cun di fat, il guvier dal Aragon al à publicât il decret che al autorize la concession di certificâts di nivel A2, B1 e B2 riferîts ae competence in lenghe aragonese. Cui che al vûl certificâ il so nivel di competence al varà di partecipâ aes provis di pueste che a saran inmaneadis in maniere periodiche. La certificazion e varà di riferiment la Academie aragonese de lenghe che il guvier dal Aragon al è daûr a meti sù.

Font: Aragón Hoy, 01/08/18

Scozie: in 14 mil in place a Inverness pe indipendence

Ai 28 di Lui plui di 14 mil personis si son dadis adun a Inbhir Nis / Inverness par manifestâ a pro de indipendence de Scozie. Si trate de plui grande manifestazion politiche viodude fin cumò te capitâl regjonâl des Highlands. La iniziative e je stade inmaneade de associazion All Under One Banner che e veve za imbastît cun sucès altris manifestazions indipendentistis ator pe Scozie. Denant de adesion massive dai citadins si à za programât altris dôs manifestazions, une a Dùn Dèagh / Dundee ai 18 di Avost e chê altre a Edimburc ai 6 di Otubar.

Font: The National, 30/07/18

Stât francês: si ponte a di une tv publiche plui “regjonâl”

Il document finâl de comission ministeriâl francese su la trasformazion dal audiovisîf public al previôt di infuartî la “vocazion regjonâl” di France 3. Plui in detai, si ponte a moltiplicâ par trê i spazis dedicâts ai programs regjonâi in onde su chest canâl che cussì a passaressin di dôs a sîs oris in dì. Pe Federazion des Regjons e dai Popui Solidaris – che e met adun moviments politics espression des comunitâts alsazianis, baschis, bretonis, catalanis, corsis, ocitanis e savoiardis dal stât francês – la riforme e larès ancje te direzion juste se nol fos che lis misuris proponudis a son masse clipis. Juste par fâ un pâr di esemplis, lis sîs oris “regjonâls” proponudis a son mancul di ce che si spietavisi e lis lenghis propriis no son tignudis in nissune considerazion. La Federazion e domande che almancul il 25% dai programs al sedi intes lenghis propriis e che si ledi daûr dal model de television corse Via Stella che e trasmet par vincjedôs oris in dì e che e invistìs massime su programs produsûts di societâts di chel teritori.

Font: Federation RPS, 26/07/18

Russie: lenghis propriis a risi di opzionalitât

Ai 25 di Lui la Duma – la cjamare dai deputâts russe – e à fate buine in tierce leture une leç che e va a riformâ l’ûs des lenghis di insegnament intes scuelis primariis de Federazion Russe. Il pont centrâl dal proviodiment al è che a saran i gjenitôrs a sielzi la lenghe doprade par insegnâ ai lôr fîs. Chest al vûl dî che tes Republichis e tes Comunitâts autonomis che, dongje dal rus, a àn une lenghe proprie uficiâl, la lenghe native no sarà plui obligatorie. Si trate di une misure che e met a risi l’ûs des lenghis propriis intal insegnament e lis indebolìs ancjemò di plui a front dal rus. Cuintri dal proviodiment a vevin cjapât posizion il president dal consei pai dirits umans e cetantis organizazions pe lenghe des comunitâts nazionâls minorizadis, massime te aree caucasiche, uraliche e siberiane. Al jere stât il president rus Vladimir Putin a prometi l’an passât che i rus che a vivin tes Republichis e tes Comunitâts autonomis no saressin plui stâts obleâts a studiâ lis lenghis nativis. Par che il test al deventi leç a mancjin dome il vie libare dal Consei federâl rus e la firme dal stes Putin.

Font: RAPSI News, 25/07/18; RFE RL, 25/07/18

Ocitanie: promozion dal ocitan tai tribunâi aranês

In ocasion de zornade di studis inmaneade dal Istitût di Studis Aranês – Academie Aranese de Lenghe Ocitane intune cul ordin dai avocats de Catalogne si à decidût di promovi l’ûs dal ocitan intai tribunâi de Val di Aran, valade pirenaiche de Catalogne là che si fevele par ocitan. Tra lis primis misuris di meti in vore si à pensât a manifescj e materiâi informatîfs par fâ cognossi ai citadins i dirits che a àn intal ûs de lenghe proprie te justizie e a pacuts di benvignût pai magjistrâts che a rivin inte valade cu lis informazions su lis specificitâts linguistichis dal teritori.

Font: Jornalet, 24/07/18

Paîs Catalans: sindics adun pes libertâts dal popul catalan

Un centenâr di sindics de Catalogne setentrionâl sot aministrazion francese a àn sotscrit un manifest là che si rivendiche il rispiet des libertâts e dai dirits di fonde dal popul catalan. Il document al vûl manifestâ la solidarietât dai aministradôrs catalans dal Nord a chei dal Sud, protagoniscj dal procès indipendentist e par chest sot atac de bande des autoritâts spagnolis. Il manifest – che al è za stât consegnât ai sindics che a aderissin ae Associazion dai Municipis pe Indipendence – al sarà inviât ancje al president de Republiche francese, Emmanuel Macron, e ai aministradôrs di altris comuns dal stât francês che a àn domandât di podê firmâlu ancje lôr.

Font: VilaWeb, 24/07/18

Galizie: campagne a pro dal cine par galizian

La organizazion A Mesa pola Normalización Lingüística e à inviât un sît internet par rivendicâ e par difindi il cine in lenghe galiziane sei sui canâi tradizionâi, sei su lis plateformis digjitâls tant che Netflix. La iniziative e ponte a dâi evidence al manifest pal cine galizian sotscrit di passe 150 professioniscj dal setôr e di diviersis realtâts di categorie tant che la Academie galiziane dal Audiovisîf, la Associazion dai professioniscj de dopleadure, la Associazion dai produtôrs indipendents e la Associazion galiziane dai atôrs e des atoris. Il manifest e chês altris azions leadis ae campagne rivendicative pal cine galizian si cjatin alì de direzion www.manifestocinemagalego.gal .

Font: Codigo Cero, 24/07/18

Bretagne: mobilitazions cuintri de plaie des secondis cjasis

Tai ultins agns chê dal “statût dal resident” e jere une misure domandade massime dai moviments nazionalitaris cors par fâi cuintri al abusivisim edilizi e ae incressite cence control des secondis cjasis. Cumò però a domandâlu e je ancje la UDB (Union Democratiche Bretone) che e propon di sperimentâlu sul imprin intes isulis de Bretagne là che lis secondis cjasis a son deventadis une plaie e là che, a front dai trops di turiscj che lis jemplin tai mês estîfs, i zovins dal puest a son obleâts a cirîsi un avignî inaltrò. A denunciâ cun fuarce cheste situazion al è soredut il coletîf Dispac’h che ai 22 di Lui, par protestâ cuintri de speculazion imobiliâr sul litorâl breton, al à plantât otante crôs su la splaze di Carnac par simbolizâ la muart dai comuns de costiere bretone scjafoiâts de proliferazion des secondis cjasis e de “monoculture” turistiche che i gjave ai residents il lôr teritori e ju rint simpri plui precaris. Di fat, se la medie bretone des residencis secondariis e je tor dal 14%, a Carnac e rive al 73% cun passe 6 mil cjasis che a restin vueidis par plui di trê cuarts dal an. Ancje chest al contribuìs ae pierdite identitarie, culturâl e linguistiche de Bretagne.

Font: 7seizh, 22/07/18; Federation RPS, 24/07/18

Ocitanie: dopo di 23 agns e siere La Setmana

La societât cooperative Vistedit, che di 23 agns e publicave il setemanâl in lenghe ocitane La Setmana e lis rivistis pai plui piçui Papagai e Plumalhon, e à comunicât che e sarà metude in licuidazion. Un tant al compuarte duncje ancje la fin di dutis lis sôs publicazions. Daûr di cheste situazion e je la decision dal Ufici Public de Lenghe Ocitane di no finanziâ plui Vistedit intun moment là che la cooperative si cjatave za cun problemis economics avonde seris.

Font: Jornalet, 19/07/18

Sápmi: prin confront sul disfrutament dal Násafjäll

Ai 19 di Lui il ministeri norvegjês pes ativitâts produtivis al à invidât rapresentants dai Parlaments Sami de Norvegje e de Svezie, dai ents locâi e di altris realtâts interessadis par un sorelûc e un prin confront sul progjet di disfrutament minerari che al interesse il Násafjäll, un teritori a cjaval tra Norvegje e Svezie che, in plui di jessi doprât di secui come passon pes renis, si cjate ad ôr di un parc nazionâl e di une aree di tutele dal paisaç. La compagnie Elkem AS e à intenzion di vierzi une miniere di cuarç che e pense di sgjavâ par 6/8 mês ad an par almancul 30 agns a dilunc. Cuatri secui indaûr, simpri ta cheste aree, si veve vût une miniere di arint che il so disfrutament al veve puartât fintremai a sclavizâ la popolazion locâl e si veve lassât daûr un incuinament che si viôt inmò in dì di vuê. Lis comunitâts sami di Svaipa, Semisjaur-Njarg e Gran, e il distret pal arlevament des renis di Saltfjell, a àn cussì proclamât l’autoguvier dal Násafjäll e decidût une moratorie che e impedissi cualsisei ativitât minerarie. La maiorance dai delegâts che a àn partecipât al sorelûc, in plui di lamentâ i ritarts par no dî la mancjance di informazions sul progjet, e à mostrât di vê pôre dai efiets negatîfs che la miniere e varès sui Sami, sul ambient e su la economie tradizionâl dal teritori, in primis l’arlevament des renis che al da di vivi a passe dusinte personis. I rapresentants de Elkem AS a àn fat savê che a son disponibii a di un acuardi cu lis comunitâts locâls ma che, se nol ves di rivâ, a fasaran valê la lôr concession e a laran indenant distès cul progjet. I Sami a àn rispuindût che fintremai che i progjets di disfrutament minerari no saran blocâts la aree e restarà ad in plen sot dal lôr control.

Font: The Barents Observer, 19/07/18

Serbie: a Bujanovac si riscje la segregazion scolastiche

Bujanovac e je une des localitâts de Serbie cuntune maiorance di lenghe albanese. Cun di fat, dai 47 mil abitants si stime che il 60% al sedi albanês, il 30% serp e plui o mancul il 10% rom. Il sisteme cumò in vore al previôt doi modei scolastics diferents, un cul serp come lenghe veicolâr e chel altri cul albanês. Cussì, dai doi istitûts primaris, un al è di lenghe albanese e un serbe. La plui part dai fruts rom e frecuente chest secont istitût. Cumò però si riscje une altre crevadure. La maiorance dai gjenitôrs serps, di fat, e à domandât che i lôr fîs a frecuentin classis separadis rispiet ai fruts rom. Se in gjenerâl il rapuart tra serps e rom al è di 3 a 1, te scuele primarie chest ecuilibri si ribalte cun 740 fruts rom e 360 serps. Fin cumò duncje in dutis lis classis si veve une maiorance di fruts rom: situazion che lis fameis serbis no vuelin plui acetâ. Di chi la domande di une separazion marcade tra lis dôs comunitâts. Ta cheste maniere però – a disin lis associazions pai dirits umans – si mande sù pai stecs il lavôr fat cun fature ta chescj agns par judâ la integrazion e si riscje di alçâ ancjemò di plui la tension za alte par vie dai rapuarts tirâts cu la comunitât albanese.

Font: Balkan Insight, 19/07/18

Paîs Catalans: promozion linguistiche, 214 i sogjets ricognossûts

Intal 2018 la liste uficiâl des realtâts che a promovin la lenghe catalane si è slungjade di altris 23 sogjets, cuntune incressite dal 8% rispiet al an prime. Si trate di 163 realtâts associativis e 51 fondazions. La plui part – o sei 117 – e lavore tal cjamp de culture, 31 a son chês di nature professionâl o imprenditoriâl, 19 chês impegnadis in maniere specifiche pe lenghe, 19 chês di nature zovanîl o sportive, 18 si ocupin di integrazion sociâl e 10 di siencis e tecnologjie. La liste e cjape dentri i sogjets associatîfs cun sede tai Paîs Catalans che a àn tra lis lôr finalitâts statutariis ancje l’obietîf di incressi la cognossince e l’ûs de lenghe catalane dentri de societât. Il guvier catalan al previôt sconts fiscâi par cui che al fâs donazions a chestis realtâts.

Font: Generalitat de Catalunya, 18/07/18

Gales: al cres il public de tv publiche S4C

A cjaval tra 2017 e 2018 la television publiche in lenghe galese S4C e à cressût i siei spetatôrs dal 5% in Gales e fintremai dal 12% intal rest dal Ream Unît. La emitente e je viodude ogni setemane di 365 mil personis in Gales e di 690 mil intal teritori statâl, intant che su Internet e su iPlayer lis visitis a son sui 8 milions e 200 mil. In dì di vuê, il cost complessîf de television galese al è sui 84 milions di sterlinis: il 90% al rive dal paiament dal cjanul, il 8% al è metût dal guvier britanic e il 2% di ativitâts comerciâls.

Font: BBC, 17/07/18