Irlande: prin pas pe riforme de leç su lis lenghis

Ai 30 di Mai, intant di un incuintri di guvier, il ministri Seán Kyne al à anticipât un pôcs dai contignûts de propueste par riformâ la leç su lis lenghis uficiâls de Republiche di Irlande. Des sôs declarazions al somee che diviers dai emendaments previodûts a vegnin incuintri aes domandis fatis indenant dal comissari pe lenghe irlandese, Rónán Ó Domhnaill, e de organizazion pai dirits linguistics Conradh na Gaeilge. Par esempli si varès di sostituî il sisteme dai plans linguistics pal gaelic cun nivei di tutele standard in vore in ducj i ents publics e di proviodi che almancul il 20% dai dipendents publics che si cjaparà sù a vore di cumò indenant al vedi une buine paronance dal irlandês fevelât e scrit.

Font: CnaG, 30/05/17

Scozie: gnove propueste pal vôt su la indipendence

Chê de prime ministre scozese Nicola Sturgeon su la date pal davuelziment di un secont referendum su la indipendence e je une posizion clopadice. Dopo vê cambiât posizion plui di une volte, sul prin tacâ dal an, e veve proponût di tornâ a votâ tra l’Autun dal 2018 e la Vierte dal 2019. Une posizion che e veve cjatât la poie dal Parlament scozês che, ai 28 di Març, al veve fate buine une mozion là che al domandave al Parlament britanic di meti in vore la cussì clamade “sezion 30”, o sei il percors che al permet ae Assemblee scozese di votâ su materiis risiervadis a Westminster tant che, a pont, il referendum su la indipendence. Cumò però, intant de campagne eletorâl pal Parlament britanic, Nicola Sturgeon e à dite che il referendum al varès di davuelzisi dopo che a saran fissâts i detais de jessude dal Ream Unît de Union Europeane, ma prime che l’acuardi di separazion al vegni firmât. Une date che, viodûts i timps stimâts dal guvier di Londre, e riscje di lâ plui innà dal 2019.

Font: The Guardian, 30/05/17

Paîs Catalans: progjet par rignuvî l’insegnament pai adults

La direzion gjenerâl pe politiche linguistiche dal guvier catalan e à inviât il progjet ÈLIA che si propon di rignuvî la ufierte formative di catalan pai adults. In dì di vuê in Catalogne si stime che a sedin doi milions e mieç di personis che a volaressin miorâ la lôr cognossince dal catalan. Il progjet al ponte duncje a rispuindi a cheste domande. ÈLIA si divît in dôs fasis. Te prime, in program chest an, si larà a scrutinâ il rapuart dai adults cul insegnament de lenghe e la lôr cognossince dai percors e dai imprescj za disponibii par chest fin. Intant de seconde fase, che si davuelzarà vie pal 2018, su la fonde des informazions rigjavadis intant de prime, si sviluparà un plan di inovazion de ufierte formative atuâl sul plan pedagogjic, metodologjic, strumentâl e promozionâl.

Font: Generalitat de Catalunya, 29/05/17

Paîs Catalans: aleance televisive intercatalane

Dal acuardi tra lis televisions publichis de Catalogne e des Baleârs – TV3 e IB3 – al è daûr a nassi un spazi comun par catalan batiât Bon Dia Televisió che al sarà trasmetût vie internet. L’intindiment al è chel di rivâ a chel 60% de popolazion che al consume contignûts audiovisîfs par mieç de rêt. Pal moment i materiâi trasmetûts a rivaran dai archivis des dôs televisions, cu la prospetive di zontâ ancje i programs di Canal 9, la television publiche par catalan sierade sot dal penultin guvier de Comunitât Autonome Valenziane. Ta cheste maniere si varessin materiâi in stât di cuvierzi la plui part des tieris di lenghe catalane.

Font: Mallorca Diario, 26/05/17

Ucraine: gnovis cuotis linguistichis pes televisions

Il Parlament de Ucraine al fate buine une leç par regolâ la presince des lenghis intes stazions televisivis dal paîs. Il test al previôt che ducj i canâi che a àn une difusion di nivel statâl a vedin almancul i trê cuarts des lôr emissions par ucrain. Pes televisions di dimension locâl si domande invezit un minim dal 60% dai spazis inte lenghe di stât che a deventin il 75% tal câs dai telegjornâi. Chestis cuotis no varessin di rapresentâ un pidiment pe plui part des lenghis minorizadis feveladis in Ucraine, fale che pal rus che, in plui di jessi maioritari in diviersis regjons, al è une lenghe une vore doprade ancje intal setôr radiotelevisîf.

Font: Broad Band TV News, 25/05/17

Paîs Basc: riforme de politiche linguistiche in Navare

E ve indenant a pas di corse la riforme de politiche linguistiche in Navare. Il guvier de Comunitât al à fat bon il progjet di riforme de leç che e regole l’ûs de lenghe basche intes aministrazions, intes agjenziis e intai ents publics. La gnove leç e elimine l’implant limitatîf di chê prime, par garantî a un numar simpri plui grant di citadins di acedi ai servizis publics ancje par euskara. In Navare, di fat, lis personis che a fevelin par basc a son cressudis a 80 mil. Un aument che al tocje massime i zovins sot dai 24 agns che, tal 25% dai câs, a àn une buine paronance de lenghe. Di cheste incressite al nas ancje il vie libare dal Parlament de Navare al slargjament di 54 a 98 comuns de aree linguistiche miste, o sei chê là che l’euskara al gjolt di une cierte tutele.

Font: EiTB, 24 e 31/05/17

Paîs Catalans: plan linguistic pal personâl dal guvier valenzian

Il guvier valenzian al à presentât il plan di compagnament linguistic pai dipendents de Comunitât autonome in maniere che a vedin lis competencis suficientis par rapuartâsi cui citadins intes dôs lenghis uficiâls, ven a dî il catalan – te sô varietât valenziane – e il castilian. Vuê come vuê, di fat, cundut che il 57,3% dal personâl al declare di jessi in stât di doprâ il catalan, dome il 12,3% des comunicazions cul public a son ta cheste lenghe. Il plan si poie su cinc intervents di fonde. Il prin al metarà a disposizion dai funzionaris modei di documents, dizionaris tematics e publicazions che ur permetin di meti adun lis pratichis par catalan. Il secont al previôt cors sul lengaç aministratîf, juridic e sanitari. Il tierç al ufrìs consulencis linguistichis vie telefon o chat. Il cuart intervent al met adun tutorâts, jutoris personalizâts e volontariât linguistic. L’ultin al ponte a svilupâ une rêt interne programade ancje par catalan.

Font: 20 minutos, 23/05/17

Irlande: il comun di Belfast si vierç aes lenghis

Cui 23 di Mai la aministrazion comunâl di Béal Feirste / Belfast e à inviât une consultazion publiche par sintî la opinion dai citadins su lis politichis linguistichis che e pense di meti in vore. L’esecutîf citadin si propon in particolâr di inviâ un ufici di pueste pe lenghe irlandese e di svilupâ politichis par promovi la varietât di scots che si fevele in Irlande dal Nord. La consultazion e larà indenant par vot setemanis a dilunc.

Font: BBC, 23/05/17

Gales: maiorance a pro de devoluzion de radiotelevision

La maiorance de popolazion galese e vûl che lis competencis su la gjestion dal sisteme radiotelevisîf locâl a vegnin trasferidis dal Parlament di Londre ae Assemblee Nazionâl dal Gales. Daûr di un sondaç dal centri di statistichis YouGov, il 52% dai galês al domande la devoluzion dai podês ta cheste materie, intant che a jessi contrari al è a pene il 27% de popolazion. Se si gjave duncje chei che no àn cjapât posizion, la percentuâl e devente di 65% a pro e 35% cuintri. La organizazion Cymdeithas yr Iaith Gymraeg e à lançât za di cualchi mês une campagne pe devoluzion dai podês che cumò e conte ancje su la poie di disinis di citadins che si refudin di paiâ lis tassis su la television se la competence no sarà trasferide aes Assemblee Nazionâl dal Gales. La iniziative – a àn spiegât – no cjale dome ai beneficis che la devoluzion e puartarès ae presince de lenghe galese dentri dal sisteme radiotelevisîf, ma ancje a favorî la incressite de atenzion par ce che al sucêt in Gales.

Font: Cymdeithas, 22/05/17

Irlande: in miârs in place a Belfast pai dirits linguistics

Sabide ai 20 di Mai miârs di citadins a àn rispuindût al apel de organizazion pai dirits linguistics An Dream Dearg e a àn sfilât pes stradis di Béal Feirste / Belfast, dal cuartîr nazionalist di Falls fintremai il palaç dal comun, intal centri de citât. La iniziative e veve chê di mostrâ inmò une volte la poie par une leç organiche sul irlandês in stât di garantî ad in plen i dirits linguistics de comunitât di lenghe gaeliche de Irlande dal Nord. La rivendicazion e je stade al centri, massime tai ultins mês, di diviersis manifestazions sei te capitâl nordirlandese, sei tes citâts di Doire / Derry e di Iúr Cinn Tráchta / Newry e, dopo des ultimis elezions, e cjate la poie di 50 dai 90 deputâts de Assemblee de Irlande dal Nord.

Font: BBC, 20/05/17

Galizie: in place pal dirit di vivi par galizian cence limitazions

Ai 17 di Mai, in ocasion de Zornade dedicade ae leterature galiziane, miârs di personis a àn sfilât pes stradis di Sant Jacum di Galizie (Santiago de Compostela) par domandâ aes autoritâts di svilupâ politichis in stât di podê doprâ la lenghe proprie cence limitazions in ducj i cjamps de vite. La manifestazion e je stade inmaneade de plateforme pai dirits linguistics Queremos Galego e, in plui di cetancj citadins, e à viodût la partecipazion di rapresentants dai principâi partîts di oposizion (BNG, En Marea, PSdeG, Esquerda Unida), di sindacâts e di associazions pe lenghe. La iniziative e à dât flât ae proteste cuintri des politichis metudis in at dal guvier galizian intai ultins agns. In plui di limitâ la presince de lenghe proprie te scuele, il guvier dal PP al ven acusât di pidimentâ l’ûs dal galizian in cetancj setôrs (economie, justizie, salût e v.i.) cu la sô mancjance di politichis ativis.

Font: Galicia Confidencial, 17/05/17

Macedonie: superâts i pidiments pe nassite dal gnûf guvier

Lis pressions internazionâls e la pôre che dopo des violencis in Parlament dai 27 di Avrîl la situazion e podès deventâ inmò plui critiche, a àn puartât il president de Macedonie, Gjorge Ivanov, a dâi la incarghe di formâ il gnûf guvier dal paîs al leader dal partît sociâl democratic (SDSM), Zoran Zaev. Par plui di doi mês Ivanov si veve refudât di fâlu cu la acuse che lis promessis fatis di Zaev ae comunitât albanese che e rapresente un cuart de popolazion dal stât a metevin a risi la integritât de Macedonie. Il rapresentant sociâl democratic al veve otignût la poie dai trê partîts principâi de minorance albanese su la fonde di une serie di concessions sul plan linguistic e economic, ma al veve sigurât che nissune di chestis misuris e varès metût a risi la unitât e la sovranitât statâl. Zaev al varès cumò di presentâ la sô scuadre di guvier dentri de fin dal mês. Des trê formazions politichis albanesis che i permetin di vê une maiorance di 67 sui 120 deputâts dal Parlament, dôs – la Union Democratiche pe Integrazion e la Aleance pai Albanês – a àn za dade la disponibilitât a jentrâ intal gnûf esecutîf, intant che la tierce – Besa – e à condizionât la sô partecipazion direte ae esclusion dal guvier di personis cjapadis dentri in scandui leâts ae coruzion.

Font: Balkan Insight, 17-18/05/17

Paîs Basc: campagne par sburtâ l’euskara te rêt

La fondazion PuntuEUS, CodeSyntax, la federazion des ikastolas e Kontseilua a àn presentât un progjet unitari che si propon di sburtâ l’ûs prioritari de lenghe basche cuant che si dopre Internet. In dì di vuê si stime che dome il 3-5% dai internautis dal Paîs Basc a vedin programât l’euskara tant che lenghe di navigazion. Il concet di fonde al è une vore sempliç, plui si dopre il basc su la rêt e plui i responsabii dai sîts e dai servizis informatics a varan di tignî cont di cheste lenghe. Si à duncje imbastît une campagne par invidâ a doprâ configurazions par euskara sui ordenadôrs e sui celulârs e si à metût a disposizion un plugin e une aplicazion che a voltin in automatic par basc i dispositîfs doprâts dal utent.

Font: EiTB, 16/05/17

Bretagne: pidiments statâi pai nons propris bretons

Si à sierade tal zîr di pocjis zornadis la polemiche nassude dal refût dal ufici di stât civîl dal comun di Kemper / Quimper di regjistrâ il non sielzût par lôr fi di une cubie bretone. Su la fonde di une circolâr dal ministeri de justizie dal 2014, i funzionaris a vevin dineât ai gjenitôrs la trascrizion dal non “Fañch” (non propri par breton) par vie che l’ene cul tilde nol jere tra lis letaris autorizadis de circolâr e riferidis dome ae lenghe francese. Su la cuistion e je intervignude però la aministrazion comunâl che e à decidût di procedi cu la regjistrazion poiantsi su riferiments juridics judicâts di nivel plui alt di une circolâr ministeriâl tant che l’articul de Costituzion republicane che e ricognòs lis “lenghis regjonâls” tant che part dal patrimoni de France o chel dal codiç civîl che al garantìs ai gjenitôrs il dirit di sielzi pai lôr fîs il non che a àn miôr. La zonte comunâl si à cjapade la responsabilitât politiche de decision, ma la cuistion e reste vierte dal moment che la circolâr ministeriâl e je un pidiment par ducj chei gjenitôrs che a vessin voie dâi ai fîs nons inte lôr lenghe proprie, là che si àn grafemis che no partegnin al alfabet francês. Di chi la domande, rivade di plui bandis, di mendâ la circolâr par garantî i dirits dai citadins che a fevelin une lenghe minorizade.

Font: Le Telegramme, 15/05/17

Paîs Catalans: presentât l’InformeCAT 2017

La organizazion Plataforma per la Llengua e à presentât l’InformeCAT 2017, o sei il rapuart che al met adun i cincuante dâts plui significatîfs sul stât de lenghe catalane. Il document, rivât ae sô seste edizion, al mostre la incressite dal catalan in diviers cjamps, tant che culture, Internet e gnovis tecnologjiis. Par esempli, dai dîs sîts plui frecuentâts dai catalans nûf a àn ancje une version te lôr lenghe proprie. Il ledrôs de medaie al diven dal mancjât ricognossiment juridic in cierts setôrs incressût de ofensive puartade indenant dal stât spagnûl massime tai ultins agns. Il catalan al reste cussì margjinâl intal cjamp de justizie, intant che il ministeri des financis al à eliminât la version par catalan dal model di declarazion de IVZ e dai manuâi pe declarazion dai redits.

Paîs Basc: passe 40 Comuns de Navare a vuelin l’euskara

La leç su lenghe basche dal 1986 e divît la Navare in trê areis – chê bascofone, chê miste e chê no bascofone – là che te prime l’euskara al è ad in plen couficiâl, te seconde al gjolt di une cierte tutele e te ultime di nissune. Dopo agns di bloc totâl, il guvier nazionalitari de Comunitât autonome al à previodût la pussibilitât pai Comuns di cambiâ la lôr aree di partignince e duncje ancje i dirits linguistics pai residents. A front dai 12 Comuns che sul imprin a vevin sburtât par vê cheste pussibilitât, in dì di vuê a son 43 lis aministrazions locâls che a àn domandât di passâ de aree no bascofone a chê miste, intant che une – chê di Atez – e à domandât di passâ de aree miste a chê bascofone. Si fevele duncje di uns 39 mil citadins, il 6% de popolazion de Navare, che a varan cussì la pussibilitât di vê acès ai servizis in lenghe basche.

Font: EiTB, 12/05/17

Paîs Catalans: catalan veicolâr tes istituzions valenzianis

Ai 12 di Mai il guvier valenzian al à fat bon il decret par regolâ i ûs istituzionâi e aministratîfs des lenghis uficiâls de Comunitât o sei il catalan – te sô varietât valenziane – e il castilian. Il decret, che al jentrarà in vore a sîs mês de publicazion sul boletin uficiâl, al definìs il catalan tant che lenghe proprie de aministrazion valenziane. Sul plan istituzionâl, dut ce che al inten la identitât de comunitât al sarà metût jù par catalan, compagn des comunicazions internis ae aministrazion. Il decret al previôt ancje che lis comunicazions istituzionâls cul public e cui ents locâi e la tabelonistiche publiche a saran par catalan tes areis catalanofonis e par castilian ta chês altris. I sistemis telefonics e telematics automatics, i contignûts dai sîts Internet e des rêts sociâls, i avîs e i cartei, la publicitât e lis publicazions de Comunitât a varan il catalan come prime lenghe. I studis, i progjets e i documents contratuâi de aministrazion a saran metûts jù par catalan. Il guvier valenzian al à decidût ancje che i siei dipendents a contat cul public a varan di butâ la peraule par catalan e dome dopo, se dal câs, passâ al castilian, intant che i rapresentants des istituzions a saran clamâts a doprâ il catalan intai lôr intervents publics.

Font: Levante, 12/05/17

Aragon: la lenghe proprie e jentre ancje tes superiôrs

A van indenant lis azions dal guvier dal Aragon par incressi la presince de lenghe proprie inte istruzion. L’esecutîf progressist de Comunitât autonome (formât di PSOE e Chunta) al à fat bon il gnûf plan di studis pes scuelis secondariis e, tra lis novitâts principâls, al à previodût l’insegnament dal aragonês intai istitûts des provinciis setentrionâls là che cheste lenghe e je inmò presinte. Cul prossim an scolastic a jentraran in vore cuatri blocs didatics specifics pal aragonês, o sei insegnament orâl, insegnament scrit, cognossince de lenghe e educazion leterarie. Cun di plui, il plan di studis al invide ancje a doprâ la lenghe proprie in forme veicolâr par insegnâ altris materiis.

Font: ABC Aragón, 11/05/17

Finlande: pas di svicinament tra Sami e Stât centrâl

Il guvier finlandês e il Parlament Sami a àn concuardât di inviâ un procès di veretât e di riconciliazion che al judi a disvelâ lis pagjinis neris dai rapuarts jenfri finlandês e sami, e a superâlis par imbastî un inizi gnûf intes relazions tra lis dôs comunitâts. Par cumò dut câs si sa dome che il procès si fasarà, ma no cemût che si sviluparà. Di ce che si à capît, par savê alc di plui si varà di spietâ cualchi setemane intant che i prins pas concrets a varessin di viodisi chest Autun. Ancje tai ultins timps i rapuarts tra lis istituzions finlandesis e il Parlament Sami a son stâts avonde tirâts e la sperance e je che chest procès al puedi mudâ la situazion e judâ a fâ sù un avignî miôr.

Font: The Barents Observer, 11/05/17

Estonie: cause cuintri dal dinei dal rus veicolâr

Ativiscj pai dirits linguistics a àn presentât une denuncie alì de Cort europeane pai dirits umans cuintri dal dinei des autoritâts de Estonie a doprâ il rus tant che lenghe di insegnament intal istitût superiôr Haabersti di Tallinn. Daûr di une leç dal 2011, lis scuelis a son obleadis a svilupâ almancul il 60% dal insegnament par eston. Chel istès a son previodudis ecezions che a àn però di jessi autorizadis des autoritâts statâls. Ancjemò tal 2015 la direzion di doi istitûts superiôrs di Tallinn, in acuardi cu lis fameis dai students, a vevin domandât di doprâ il rus tant che lenghe di insegnament. Lis domandis a son stadis però refudadis e cumò, in gracie de disponibilitât di cualchi gjenitôr, si à decidût di puartâ la cuistion suntun plan internazionâl par mieç di une cause denant de Cort europeane.

Font: TASS, 05/05/17