Irlande: in tribunâl il no dal guvier dal Nord al plan pal gaelic

Il comitât esecutîf de organizazion Conradh na Gaeilge al à decidût che al puartarà in judizi il guvier de Irlande dal Nord dopo de sô decision di no fâ buine la propueste di leç su la lenghe irlandese che e cjape dentri la strategjie di politiche linguistiche pai prossims agns. La strategjie pe lenghe e jere stade uficializade de ministre pe culture Carál Ní Chuilín ai 30 di Zenâr dal 2015 e par un an a dilunc e jere stade al centri di un percors di discussion e di condivision cui citadins, cu lis organizazions pe lenghe e cun altris realtâts associativis. Al moment dal vôt però, i rapresentants unioniscj e chei dal Alliance Party no le àn fate buine. La leç su la lenghe gaeliche e jere previodude ancjemò dai acuardis di pâs pe Irlande dal Nord e il stes program di guvier 2011 – 2015 le calcolave une prioritât. Di chi duncje la decision de organizazion pe lenghe irlandese di cjapâ la strade judiziarie par obleâ il guvier nordirlandês a mantignî i siei impegns.

Font: CnaG, 04/04/16

Ocitanie: buine rispueste al tradutôr automatic de Generalitat

Il guvier catalan (Generalitat) al à publicât i dâts sul ûs dal tradutôr automatic dal ocitan che al mostre un cressi dal interès pe scriture in lenghe ocitane. Dilunc vie dal 2015 si àn vûts passe 220 mil acès par traduzions e plui di 12 milions di peraulis voltadis. Il servizi su Internet metût a disposizion de Generalitat al permet di voltâ pagjinis web e tescj fin a 2.500 caratars sei par ocitan standard, sei par aranês, o sei la varietât ocitane che si fevele tune valade pirenaiche dal principât de Catalogne.

Font: Jornalet, 02/04/16

Gales: gnûf setemanâl locâl cun plui spazi pal galês

Cun Avrîl si invie la aventure editoriâl dal Ceredigion Herald, un gnûf setemanâl che al cuvierzarà la aree centrimeridionâl dal Gales là che si cjatin ancje lis citâts di Aberystwyth e di Aberteifi / Cardigan. Sul imprin al sarà stampât in 10 mil copiis in spiete di viodi ce acet che al cjatarà te int. Il setemanâl al varà in ogni numar almancul trê o cuatri pagjinis dutis par galês, in plui di dâi spazi ancje ai contribûts che opinioniscj e letôrs a mandaran ta cheste lenghe. Si trate di une novitât interessante dal moment che la plui part de stampe periodiche e jes dome par inglês.

Font: BBC, 01/04/16

Paîs Catalans: procès sovranist, no al intervent de magjistrature

Passe 280 aministrazions comunâls a àn aprovât mozions di poie ae risoluzion sovraniste fate buine dal Parlament catalan ai 9 di Novembar dal an passât. L’Audencia spagnole, che e à cjapât sù la ereditât dal tribunâl speciâl franchist, e à inviât une cause gjenerâl cuintri di chescj comuns. Il prin di Avrîl la Assemblea Nacional Catalana (ANC), la Associació de Municipis per la Independència (AMI), la Associació Catalana de Municipis (ACM) e l’Òmnium Cultural a àn inmaneât une iniziative a Barcelone par manifestâ solidarietât ai aministradôrs sot inchieste e par dî di no al intervent de magjistrature intal procès sovranist de Catalogne. No si puedin perseguî sindics e aministradôrs – a àn dite intant de manifestazion – dome pal fat che a promovin il dirit ae autodeterminazion dal popul catalan.

Font: VilaWeb, 01/04/16

Paîs Basc: finanziaments transfrontalîrs pal euskara

Al sarà di un milion e 730 mil euros pal 2016 il font di cooperazion metût sù dal guvier de Comunitât Autonome Basche, tal stât spagnûl, e dal Ufici public de lenghe basche che al opere par promovi l’euskara in Ipar Euskal Herria, o sei il Paîs Basc setentrionâl sot aministrazion francese. La plui part di chestis risorsis, ven a dî un milion e 380 mil euros, a son pes organizazions principâls che a lavorin in Ipar Euskal Herria a pro de lenghe basche te istruzion, te educazion, tai mieçs di comunicazion e te culture. Chei altris 350 mil euros invezit a saran dividûts tra progjets plui piçui selezionâts par mieç di un bant public. Tra lis novitâts finanziadis chest an si à la seste edizion de inchieste sociolinguistiche su la lenghe basche e la promozion ancje tal Paîs Basc setentrionâl dai imprescj didatics disponibii sul portâl de organizazion HABE.

Font: Euskara, 31/03/16

Paîs Catalans: Twitter par catalan su iOS e Android

La version par catalan di Twitter e je cumò a disposizion ancje pe telefonie mobile iOS e Android. La gnove e je stade comunicade sul finî di Març dal grup di traduzion di cheste rêt sociâl. Chest pas, in plui dal catalan, al à interessât ancje lenghis di stât tant che bulgar, cravuat, serp e slovac. La lenghe catalane e je la diesime novesime in ûs su Twitter.

Font: El Periodico, 29/03/16

Ocitanie: un milion pe promozion de lenghe dal ÒPLO

L’Ufici Public pe Lenghe Ocitane (ÒPLO), inviât che nol è tant des Regjons Aquitanie - Limosin - Poitou-Charents e Lenghedoc - Roussillon - Sud Pireneus, al à metût a disposizion un milion di euros par valorizâ e par sburtâ l’ûs dal ocitan. I fonts a saran indreçâts massime par infuartî l’insegnament de lenghe proprie tes scuelis publichis e par garantî materiâi didatics pe rêt des scuelis privadis ocitanis (Calandreta). Altris risorsis a laran par sostignî lis ativitâts dal Congrès Permanent pe Lenghe Ocitane (CPLO), dal Istitût di Studis ocitans (IEO), dai centris ocitans di formazion professionâl di Tolosa / Toulouse e Ortès / Orthez, de television vie internet Oc-tèle e de societât di dopleadure Conta’m. I fonts a cuvierzin ancje il lanç dal premi “Jan Moreu” dedicât ae inovazion in politiche linguistiche.

Font: Jornalet, 28/03/16

Bretagne: mobilitazion par misuris urgjentis pe lenghe

Une azion direte cu la presince di disinis di personis e la esposizion di un strisson su la balconade dal palaç de Regjon a Roazhon / Rennes par domandâ misuris urgjentis in difese de lenghe bretone. Al è ce che a àn fat ai 26 di Març i militants dal coletîf Stourmonp Asambles’vit ar Brezhoneg (Lotìn adun pal breton) cu la poie dai grups Ai’ta, Breizhistance, Breizh Impact e UDB. Cinc lis azions di fonde domandadis di chestis organizazions, ven a dî svilupâ la rêt des scuelis bilengâls; infuartî l’insegnament a imersion; imbastî un spazi setemanâl par breton su la television publiche; assegnâ une frecuence par garantî la difusion des radios bretonis; e meti la segnaletiche bilengâl su dute la rêt viarie regjonâl.

Font: Le Télégramme, 26/03/16

Alsazie: fusion regjonâl, il Consei de Europe i da tuart a Parîs

Ai 22 di Març il Consei de Europe al à dât fûr il rapuart su la segnalazion fate indenant dal coletîf Alsaciens Réunis e dal moviment Franche-Comté in mert ae violazion de bande dal stât francês dal articul 5 de Cjarte europeane des autonomiis locâls che al previôt di sintî il parê des popolazions interessadis intal câs che si ledi a mudâ i confins dai ents teritoriâi. Al è propit il câs de riforme dal sisteme teritoriâl fate buine dal Parlament francês che, tra lis altris, e previôt ancje la fusion de Alsazie cun Lorene e Champagne-Ardenne di une bande e de Francje Contee cu la Borgogne di chê altre. Alsaciens Réunis e Franche-Comté adun cun altris coletîfs contraris ae fusion a vevin domandât che a fossin i citadins a decidi in proposit cuntun referendum. Cheste pussibilitât e je stade però dineade dal guvier di Parîs. Dopo che il Consei di stât francês al à declarât di no vê la competence par valutâ se il referendum al ves di jessi garantît o no, si à decidût di bati la strade dal Consei de Europe che, tes conclusions dal so rapuart su la cuistion, al segnale la violazion de Cjarte des autonomiis locâls e al da reson a alsazians e francjecontês. I Alsaciens Réunis a domandin duncje al esecutîf francês di clamâ dongje un referendum popolâr su la fusion dentri di trê mês, a calcolin la riforme dal sisteme teritoriâl no legjitime e a invidin i citadins a boicotâ lis decisions cjapadis dai gnûfs guviers regjonâi jessûts di cheste riforme.

Font: Alsaciens Réunis, 22/03/16

Scozie: un milion di sterlinis dal guvier scozês pe tv gaeliche

Il guvier scozês al à decidût di finanziâ cuntun milion di sterlinis la societât MG Alba che, adun cu la BBC scozese, e gjestìs la television digjitâl in lenghe gaeliche BBC Alba. Il contribût al cuvierç i agns 2016 e 2017 e si zonte al milion che l’esecutîf di Edimburc al veve metût pe dade 2014 – 2016. Pal ministri scozês pes lenghis, Alasdair Allan, si trate di un invistiment che al jude il disvilup de lenghe gaeliche de Scozie cun vantaçs sul plan des comunitâts locâls, de educazion, de formazion e ancje de economie. Cheste cifre e va a zontâsi ai cuasi 12 milions di euros che a rapresentin il cûr dal belanç anuâl de television gaeliche. Fonts a rivavin ancje dal guvier britanic che però, intal Novembar dal an passât, nol à rignuvît la convenzion pal finanziament dal canâl televisîf.

Font: BBC, 21/03/16

Frisie: Omrop Fryslân e piert la sô indipendence

Cundut dai sfuarçs svilupâts dal FNP e di altris organizazions frisonis, il guvier neerlandês al à confermât il so plan par fondi intun unic sogjet radiotelevisîf Omrop Fryslân e altris media che a operin a nivel locâl intes provinciis de Frisie, de Drenthe e di Groninghe. Il progjet, che al à chel di garantî un sparagn pes cassis dal stât, al met duncje fin dopo 28 agns di ativitât ae indipendence de uniche emitente in lenghe frisone dai Paîs Bas. La mobilitazion des organizazions frisonis e à rivât però almancul a otignî la nassite di un Consei dai media che al tegni controlade la presince dal frison inte programazion radiotelevisive locâl.

Font: EFA, 21/03/16

Ocitanie: si cîr un non pe gnove regjon ocitane-catalane

La riforme dal sisteme regjonâl fate buine l’an passât intal stât francês al à puartât ae fusion di diviersis Regjons e ae nassite di ents teritoriâi inmò plui grancj. La plui part de Ocitanie si ricjate cussì dividude tra trê grandis Regjons o sei Provence - Alps - Côte d’Azur, Aquitanie - Limosin - Poitou-Charents, e Lenghedoc - Roussillon - Sud Pireneus. Il guvier di cheste ultime al à decidût di cirî fûr un non gnûf e par fâlu al à domandât a ducj di dî la lôr. Ai 15 di Avrîl il Consei regjonâl al tamesarà lis propuestis rivadis in maniere di rivâ a di une liste di pôcs nons che a saran po al centri di une votazion popolâr di fâ, cun dute probabilitât, vie internet. Ai 24 di Jugn il non sielzût al sarà proponût de assemblee regjonâl al guvier francês che al varà la ultime peraule. Tra lis propuestis che za a zirin si à chês, tant che Lenghedoc - Pireneus, che a van daûr dal implant dai nons istituzionâi francês, a chês che a riclamin la partignince di chestis tieris ae Ocitanie storiche. Trê in particolâr lis propuestis che a rivin de aree nazionalitarie, ven a dî: “Ocitanie”, contestât di cui che al dîs che no si pues clamâ un toc cul non di dute nazion; “Ocitanie - Catalogne”, par vie che ta cheste Regjon e ven cjapade dentri ancje la Catalogne Nord; e “Ocitanie centrâl”.

Font: Jornalet, 19/03/16

UE: atacs cuintri dal catalan al esam dal Parlament european

Il Comitât su lis libertâts civîls, la justizie e i afârs internis dal Parlament european al à frontât la situazion de lenghe catalane intal stât spagnûl. Al centri de discussion al jere l’ultin rapuart sul rispiet dai dirits linguistics metût adun de organizazion catalane Plataforma per la Llengua. Il rapuart al fâs il pont su lis violazions dai dirits linguistics e su lis discriminazions che cui che al fevele par catalan si cjate ancjemò a patî intal stât spagnûl che, in câs documentâts, a àn puartât fintremai a pierdi la custodie di un fi o a viodisi refudade la assistence ospedaliere. E je la prime volte che l’organisim comunitari al fronte une tematiche di cheste fate e a sburtâ par rivâ a chest risultât e je stade massime la Rêt Europeane pe Avualiance Linguistiche (ELEN) che e veve za puartât la cuistion denant de ONU. A partî dal câs catalan, l’europarlamentâr di ERC Josep Maria Terricabras al à domandât che il Parlament al fronti intune session a teme la situazion di dutis lis lenghis che in Europe si cjatin a vivi une situazion di minorizazion e discriminazion.

Font: Catalan News Agency, 17/03/16

Scozie: progjet par une scuele gaeliche virtuâl

Cun 140 mil sterlinis, il Bòrd na Gàidhlig al à metudis lis fondis pal progjet E-Sgoil, ven a stâi il svilup di une scuele gaeliche virtuâl. L’intindiment al è chel di meti in rêt dutis lis scuelis de Scozie che a àn il gaelic tant che lenghe veicolâr, a partî di chês secondariis, in maniere di creâ un sît di scambi e di confront par students e operadôrs dal setôr. Tra lis variis sezions in program si ‘ndi varà ancje une là che i professôrs a podaran condividi lezions, progjets e materiâi educatîfs.

Font: Bòrd na Gàidhlig, 17/03/16

Paîs Catalans: passe 200 mil par imparâ il catalan sul web

Il spazi virtuâl par imparâ il catalan metût sù intal 2008 de direzion centrâl di politiche linguistiche dal guvier catalan (Generalitat) al à passât i 200 mil utents. Il sît internet “Parla.cat” al da acès a dodis cors complets di catalan par forescj, che a van dal nivel di base a chel de suficience, cu la pussibilitât ancje dal jutori di un tutôr. In medie a iscrivisi ai cors a son 80 personis ogni dì, o sei tra lis 25 e lis 30 mil ogni an. A doprâ il sît a son stâts utents di 198 stâts ator pal mont. I dîs stâts cul numar plui alt di personis che a sielzin chest percors par imparâ la lenghe a son Spagne, France, Stâts Unîts, Italie, Gjermanie, Ream Unît, Messic, Brasîl, Argjentine e Colombie.

Font: La Vanguardia, 15/03/16

Corsiche - Sardegne: prin pas par un pat tra lis dôs isulis

Pai presidents des dôs Regjons, Gilles Simeoni e Francesco Pigliaru, chê metude su la declarazion di intindiments tra Corsiche e Sardegne e je une firme “storiche” par vie che e met lis fondis par un pat tra lis dôs isulis che si propon di inviâ une colaborazion plui strente par frontâ i problemis comuns, ma ancje di promovi adun i propris interès sei tai confronts dai guviers centrâi, sei a nivel di istituzions europeanis. Un front unic duncje che al dedi plui fuarce aes rivendicazions dai doi popui sul plan politic, sociâl, economic, culturâl e linguistic. Un pat che si intint po di infuartî cu la zonte des Baleârs, in maniere di imbastî une aleance tra lis isulis dal mediterani ocidentâl che, tra i tancj elements in comun, a àn chê di jessi patrie di comunitâts nazionâls e linguistichis diviersis rispiet a chei dai stâts di partignince.

Font: RAS, 14/03/16

Irlande: passe 50 mil personis ae edizion 2016 dal Rith

Passe 50 mil personis a àn partecipât ae edizion 2016 dal Rith, o sei la corse inmaneade cun chê di tirâ sù fonts a pro dal gaelic irlandês e di sensibilizâ i citadins sul valôr di cheste lenghe. La edizion di chest an, che si è tignude tra i 4 e i 14 di Març, si è disvilupade su 700 chilometris tocjant dutis lis 32 conteis de Irlande, sei te Republiche che intal Nord. La manifestazion e je stade finanziade di ents locâi, associazions, grups sportîfs, scuelis, impresis e singui citadins che a àn dât il lôr contribût ancje cul cori dilunc des diviersis tratis de corse. Il Rith 2016 si è sierât denant dal Trinity College di Dublin, là che si à let un messaç dal president de Republiche de Irlande, Micheal D. Higgins. Nassude intal 2010, la corse si davuelç ogni doi agns e chê dal 2016 e je stade la plui partecipade. Il Rith al jentrave ancje tal program des iniziativis par ricuardâ i cent agns dal Riviel de Pasche dal 1916 (Éirí amach na Cásca / Easter Rising), moment centrâl inte lote pe indipendence de isule e pe nassite di une Republiche irlandese.

Font: CnaG:, 14/03/16; Independent, 15/03/16

Irlande: no dal esecutîf nordirlandês ae leç pal gaelic

L’esecutîf nordirlandês, cul vôt dai rapresentants unioniscj e di chei dal Alliance Party, al à dite di no ae propueste di leç su la lenghe irlandese che e previodeve ancje la strategjie di politiche linguistiche di svilupâ intai prossims agns. Cundut che il test al jesseve di un lunc percors di discussion e di consultazion popolâr, al moment dal vôt al à cjatât la poie dome dai rapresentants politics de aree republicane e nazionaliste irlandese. La decision al à lassât cu la bocje garbe massime lis realtâts associativis impegnadis pe lenghe, a partî de organizazion Conradh na Gaeilge che e à ricuardât cemût che al sedi vergognôs che il gaelic de Irlande dal Nord al sedi la uniche lenghe des isulis britanichis a no gjoldi inmò di une tutele legjislative.

Font: CnaG, 11/03/16

Romanie: manifestazion pe Zornade de libertât dal Székelyföld

Sù par jù 4 mil personis a àn partecipât ae manifestazion in program pe Zornade de libertât dal Székelyföld, o sei la part de Transilvanie là che e vîf la plui part de minorance ongjarese de Romanie. La iniziative, che si è davuelte ai 10 di Març te citât di Marosvásárhely / Targu Mures, e je stade inmaneade dal Consei Nazionâl Székely. E je stade la ocasion par tornâ a rivendicâ une regjon autonome dal Székelyföld, a front dal progjet di riforme teritoriâl de Romanie che al ponte invezit a incuarpâ chest teritori intune regjon plui grande là che la comunitât ongjarese e deventarà mancul dal 30% de popolazion totâl. Il Consei Nazionâl Székely al domande une regjon indotade di plui podês sul plan aministratîf e economic, là che l’ongjarês al sedi lenghe couficiâl e là che i simbui espression di cheste comunitât a puedin jessi esponûts cence il risi di finî sot procès. I rapresentants di chest moviment a àn duncje invidât lis autoritâts rumenis a vierzi un dialic istituzionâl par lâ ta cheste direzion. Ae manifestazion al à partecipât ancje Gunther Dauwen, diretôr de Aleance Libare Europeane, che al à invidât lis autoritâts rumenis a scoltâ lis rivendicazions de comunitât di lenghe ongjarese. Tal 2014 la Zornade de libertât dal Székelyföld e jere stade segnade di scuintris violents cu la polizie, l’an passât e jere stade improibide des autoritâts rumenis, chest an invezit si à sierade cence incidents.

Font: Hungarian Ambiance, 10/03/16; Agerpres, 11/03/16

Paîs Catalans: i dâts de inchieste sul ûs de lenghe tal Nord

Ai 10 di Març, inte Cjase de Generalitat di Perpinyà / Perpignan, a son stât presentâts i risultâts de inchieste sui ûs linguistics inte Catalogne Nord, o sei chê cjapade dentri intal stât francês. La ricercje si riferìs al 2015 e e je stade fate cuntun model che al permet di confrontâle cu la inchieste dal 2004. Il 61% de popolazion cun plui di 15 agns al declare di capî ben o avonde ben il catalan, il 35,4% di jessi in stât di fevelâlu, il 39,2% di savêlu lei e il 14,3% di jessi bon di scrivilu. Rispiet al 2004 lis percentuâls si son un tic sbassadis, ancje se il numar assolût di cui che al fevele par catalan al è cressût: merit dal aument de popolazion e segnâl che ancje se la trasmission intergjenerazionâl e clope, i gnûfs rivâts no àn fastidi a cjapâ sù la lenghe. Dome il 5,7% de int al dopre il catalan in maniere abituâl, dât che però al è in cressi rispiet al 2004. Il catalan si lu fevele massime in cjase (16,1%) o cui amîs (15%). Sul front dai servizis e dai consums la lenghe si le dopre di plui intes buteghis piçulis (8,1%) e di mancul cu la aministrazion publiche (0,6%). Par chel che al rivuarde la politiche linguistiche, l’85% al volarès une television locâl par catalan, il 76,1% l’insegnament bilengâl, il 75% une leç su lis lenghis e il 58% il catalan couficiâl.

Font: VilaWeb, 11/03/16