Alsazie: riforme regjonâl, un altri ricors boçât

Intal stât francês, e massime in Alsazie e in Bretagne, a van indenant lis iniziativis cuintri de riforme des regjons fate buine dal Parlament francês che, tal prin câs, e previôt la fusion de Alsazie cun Lorene e Champagne-Ardenne e, tal secont, e dinee la riunificazion dal dipartiment de Loire Atlantiche cul rest de Bretagne storiche. Cuintri de riforme e des elezions regjonâls di Dicembar che a rapresentin un pas in direzion dal gnûf implant aministratîf volût di Parîs a son stâts presentâts diviers ricors. In plui di cualchi câs, si segnale che la riforme e larès cuintri dai contignûts de Cjarte europeane des autonomiis locâls ratificade de France intal 2007. Propit ta chescj dîs il consei di stât al à boçât un ricors presentât di doi rapresentants des istituzions alsazianis, ma a restin ancjemò in pîts i percors judiziaris di altris doi ricors fats indenant dal coletîf Alsaciens Réunis, de Federazion Democratiche Alsaziane e dal moviment Franche-Comté, contrari ae fusion tra Francje Contee e Borgogne.

Font: Jornalet, 05/10/15

Sami: scuintri in Finlande su la partignince ae comunitât

Ogni cuatri agns lis elezions pal Sámediggi, il Parlament sami de Finlande, a permetin di decidi i 21 rapresentants che a varan in man l’autoguvier culturâl di cheste comunitât. Lis listis eletorâls a vegnin inzornadis su la fonde des domandis di adesion che a rivin ai organisims parlamentârs, ancje se la ultime peraule i spiete ae cort aministrative supreme de Finlande. In dì di vuê si stime che ta chest stât i sami a sedin 10 mil, ma i eletôrs dal Parlament de comunitât a son uns 6 mil. Vie pal 2015 i organisims parlamentârs a àn acetât plui o mancul cinccent domandis rivadis in buine part dai fîs di membris za iscrits che a àn finît 18 agns. Cuasi dusinte personis che a àn vût boçade la lôr domande a àn presentât ricors denant de cort supreme finlandese che e à dât reson a 93 di lôr. La decision e à creât un scuintri dûr tra il Parlament sami e lis istituzions finlandesis acusadis di pontâ ae assimilazion de comunitât. Cheste situazion e sabore divisions pericolosis dal moment che i rapresentants des istituzions sami a disin che il ricognossiment de bande de comunitât al è un element fondamentâl par jessi pardabon dai sami intant che lis personis che si sintin di partignî a cheste comunitât a san che la lôr esclusion des listis eletorâls pal Sámediggi no i permet un plen ricognossiment de lôr identitât.

Font: Barents Observer, 04/10/15

Scozie: il gaelic al cres tra i plui zovins

La comunitât di lenghe gaeliche e reste une piçule minorance dentri de Scozie cun, pôc sù pôc jù, 87 mil personis che pe plui part a vivin intes isulis ocidentâls, tes Highlands e te aree di Glaschu / Glasgow. Daûr dal ultin censiment al ven fûr che lis personis in stât di fevelâ cheste lenghe a son 966 di mancul rispiet a dîs agns prime: un dât che, se nol è positîf, al mostre che la diminuzion de comunitât e je daûr a ralentâ. L’element che al fâs sperâ ben al è però il cressi de lenghe framieç dai plui zovins. Cun di fat, intai ultins dîs agns i fruts e i fantats che a fevelin par gaelic a son 618 in plui. Mert ancje de politiche scolastiche dal guvier scozês là che pe lenghe gaeliche a son stât invistîts passe 40 milions di sterlinis in dîs agns.

Font: STV News, 30/09/15

Gales: regulis gnovis pal galês tai servizis publics

L’ufici dal comissari pe lenghe galese al à mandât al guvier galês, aes aministrazions locâls e ai ents gjestôrs dai parcs i gnûfs standards linguistics, o sei i servizis par galês che a varan di garantî. Lis gnovis misuris a jentraran in vore cui 26 di Març di chest an che al ven. A vegnin confermâts servizis tant che la segnaletiche bilengâl e il dirit pai citadins di vê rispuestis par galês de bande dai funzionaris publics, ma si ‘ndi zontin ancje altris tant che l’oblic pes aministrazions di vê uficis stampe cun personâl in stât di fevelâ par galês e di mandâ fûr i comunicâts ancje ta cheste lenghe. Par cui che nol rispiete i standards gnûfs a son previodudis ancje sanzions economichis. Ca di pôc, il comissari pe lenghe al varès di dâ fûr ancje i standards pe sanitât e par altris organisims publics, in plui che par chês aziendis privadis che a gjestissin servizis di interès public. Pe organizazion Cymdeithas yr Iaith Gymraeg al covente sveltî e semplificâ chest procès che, in dì di vuê, al domande timps avonde luncs par garantî ai citadins servizis inte lôr lenghe proprie.

Font: BBC, 30/09/15

Paîs Basc: il film par euskara Loreak candidât ai Oscars

La Academie Spagnole dal Cine e à sielzût il film Loreak tant che rapresentant dal stât spagnûl inte corse pai Oscars inte categorie dai miôr films no par inglês. E je la prime volte che i rapresentants de Academie a selezionin un cine dut in lenghe basche. Cun di fat, a rompi il monopoli dal castilian al jere stât dome il film par catalan Pa negre di Agustí Villaronga. La sielte de pelicule di Jon Garaño e di Josemari Goenaga e à cjapât plui di cualchidun di sorprese dal moment che in ocasion dai Goya, o sei i premis pal cine dal stât spagnûl, il film basc nol veve rivât a vinci. Forsit, al à comentât Goenaga, al dipent dal fat che i selezionadôrs a àn pensât che Loreak si adatàs di plui al public american. Ogni an intal Paîs Basc si produsin une disine di luncmetraçs, in medie però dome doi a son zirâts par euskara. La vitalitât dal cine basc, che e pues contâ su plui di sessante societâts di produzion audiovisive, e je rapresentade ancje de cualitât dai siei curtmetraçs e dai films di animazion.

Font: Deia, 29/09/15; El Correo, 30/09/15

Estonie: prime television publiche par rus

La television di stât de Estonie e à inviât ETV+, il prin canâl televisîf public dut par rus. La gnove emitente e previôt dîs oris di programazion cuotidiane par rus cun sottitui par eston. Par cumò, la disponibilitât finanziarie de television e je di 4 milions di euros par an. La comunitât di lenghe russe e rapresente un cuart de popolazion totâl de republiche baltiche, là che però dome la lenghe estone e je ricognossude tant che uficiâl. Par viodi programs inte lôr lenghe, duncje, i rus a jerin obleâts a cjalâ lis televisions de Federazion Russe. Le decision di inviâ un canâl par rus e je stade cjapade dal guvier di Tallinn cun chê di sbassâ la influence di Mosche sui rus de Estonie, massime dopo de anession de Crimee e dal conflit intes regjons russofonis de Ucraine.

Font: The Washington Post, 28/09/15

Paîs Catalans: maiorance indipendentiste tal Parlament catalan

Lis elezions che si son tignudis domenie ai 27 di Setembar in Catalogne a àn puartât intal Parlament une maiorance indipendentiste. Cun di fat, la coalizion Junts pel Sí cul 39,54% dai vôts e à cjapât 62 deputâts che, adun cui 10 parlamentârs de CUP (8,20% des preferencis), a permetin al front a pro de indipendence di vê la maiorance assolude intal gnûf Parlament. La coalizion Catalunya sí que es pot, che e domande plui autoguvier e un percors concuardât pe autodeterminazion, e à cjapât il 8,94% dai consens e 11 deputâts. I socialiscj (PSC), che in Catalogne a son a pro di une incressite dal autoguvier, a àn vût 16 parlamentârs e il 12,72% dai vôts. Ciutadans cui siei 25 deputâts e il 17,93% dai consens al è il partît plui votât inte aree de diestre spagnoliste, là che al à superât di un biel pôc il PP ancje tant che radicalitât politiche. I popolârs a àn vût di fat di contentâsi di 11 elets e dal 8,5% dai vôts. Se par elets la aree indipendentiste e à la maiorance cun 72 deputâts cuintri 63, in tiermins di vôts si ferme però al 47,74% dai vôts. Un tant duncje al permet di procedi sul plan legjislatîf cul percors in direzion de indipendence, ma al indebolìs la sô legjitimitât.

Font: VilaWeb, 27 e 28/09/15; Naiz:, 28/09/15

Paîs Catalans: politiche linguistiche gnove tal Valenzian

Il gnûf guvier de Comunitât Valenziane al à chê di cambiâ in maniere radicâl la politiche tai confronts de lenghe proprie rispiet al esecutîf stât. I ponts centrâi di cheste azion a son stâts presentâts intune conference stampe che si è tignude ai 24 di Setembar. La prioritât e sarà chê di sburtâ il catalan (achì clamât par solit valenzian) inte aministrazion publiche, là che si vûl che al deventi la lenghe di ûs normâl. Si intint però promovilu ancje intal setôr privât là che si pense a marcjis di cualitât o ben a facilitazions pes realtâts economichis che a doprin cheste lenghe intai lôr rapuarts aziendâi, cui clients e cul public. Si ponte ancje a tornâ a inviâ i rapuarts cu la Academie Valenziane de Lenghe, cu lis universitâts e cul Consei Valenzian de Culture, in plui di judâ lis associazions impegnadis pe lenghe e i uficis linguistics des aministrazions locâls. Par chel che al rivuarde il sisteme scolastic no si à ancjemò anticipât nuie, ancje se si intint vierzi un confront cui esperts dal setôr. In gjenerâl, l’intindiment al è chel di saborâ dute la popolazion a cognossi cuatri lenghis: catalan, castilian, inglês e une altre lenghe internazionâl.

Font: Valencia Plaza, 24/09/15

Ocitanie: ancje la Alvernie tal Ufici public de lenghe ocitane

Ancje la regjon de Alvernie e à decidût di aderî al Ufici public pe lenghe ocitane (OPLO) che la sô creazion e jere stade votade l’an passât dai conseis regjonâi de Aquitanie e dai Pireneus di Mieç. La assemblee de Alvernie e à votât la sô adesion in maniere unanime intant de riunion dai 22 di Setembar. Cun di plui, tes stessis zornadis, ancje il president de Provence al à mostrât l’interès de sô regjon par jentrâ intal organisim. L’ufici, clamât a svilupâ une politiche unitarie a pro de lenghe ocitane, al è duncje daûr a deventâ pardabon pont di riferiment e di rapresentance des diviersis realtâts aministrativis che a formin la Ocitanie.

Font: Jornalet, 23/09/15

Paîs Catalans: manifestazion moltitudinarie pe indipendence

Pe cuarte volte in cuatri agns, ai 11 di Setembar, i catalans a àn manifestât la lôr adesion al progjet indipendentist e a àn jemplât lis stradis di Barcelone in ocasion de Diada, la fieste nazionâl de Catalogne. Cun di fat, centenârs di miârs di personis – un milion e 400 mil pe polizie locâl, doi milions daûr di altris fonts – a àn partecipât ae Via Lliure a la República Catalana, la manifestazion inmaneade de Assemblea Nacional Catalana e dal Òmnium Cultural. Chest an la iniziative e à jemplât la Meridiana di Barcelone e lis stradis laterâls par passe cinc chilometris, ven a dî di Sant Andreu al Parc de la Ciutadella. Intun at che al voleve rapresentâ la vie democratiche pe indipendence, di concuistâ cul vôt, une grande frece e à scjavaçât dut il percors in direzion dal Parlament catalan par incjastrâsi intune grande urne dopo vê passât pes dîs tratis che a rapresentavin cun colôrs diviers i ponts di fonde de Republiche catalane che si vûl edificâ, o sei: ecuilibri teritoriâl, diversitât, solidarietât, vierzidure al mont, sostenibilitât, avualiance, inovazion, rinovament democratic, educazion e culture, benstâ e justizie sociâl. La manifestazion e je colade te zornade di vierzidure de campagne eletorâl pes elezions catalanis dai 27 di Setembar che a son aromai consideradis di ducj un vêr referendum su la indipendence.

Font: VilaWeb, 11-12/09/15; La Vanguardia, 11-12/09/15; El Punt Avui, 11-12/09/15; Naiz:, 11-12/09/15

Friûl: fûr il bant par Suns Europe

Cun chest an la manifestazion Suns si slargje e si infuartìs ancjemò di plui. Cun di fat, dongje de musiche, il festival al cjaparà dentri ancje il cine e la leterature intes lenghis minorizadis de Europe. Il cûr de manifestazion, in program a Udin / Udine dai 25 di Novembar ai 11 di Dicembar, al reste però il concors musicâl dedicât aes cjançons in lenghe minorizade che si slargje a cjapâ dentri dut il continent. La dimension alpine – mediteranie che il concors al veve fin al an passât e ven dut câs confermade cu la manifestazion Suns Sardigna, in program ai 28 di Novembar a Casteddu / Cagliari, che e devente une sorte di semifinâl di Suns Europe. Ducj i detais su la iniziative e il bant par partecipâ si ju cjate sul sît www.sunscontest.com .

Font: Eurolang, 07/09/15

Irlande: sucès intal Nord pe campagne a pro dal gaelic

La campagne Líofa, inviade intal Setembar dal 2011 dal ministeri pe culture de Irlande dal Nord cun chê di sburtâ la int a imparâ e a doprâ il gaelic irlandês, e à cjatât un sucès cence precedents che al à puartât a incressi i siei obietîfs. Cun di fat, sul imprin, la iniziative si proponeve di cjatâ fûr un miâr di personis che si impegnassin in maniere formâl a imparâ e a tacâ a fevelâ par irlandês dentri dal 2015. A vuê però a son passe 13 mil lis personis che a àn za sotscrit l’impegn domandât de campagne. I organizadôrs de iniziative a àn cussì decidût di alçâ l’obietîf che si vevin proponût e di puartâ a 20 mil il numar di sotscritôrs che si impegnin a imparâ e a doprâ la lenghe dentri dal 2020.

Font: BBC, 05/09/15

Bretagne: a cressin lis iscrizions tes scuelis Diwan

La gnove presidente de rêt di scuelis a imersion bretonis Diwan, Stéphanie Stoll, no à platât la sô sodisfazion intal comunicâ i dâts des iscrizions pal an scolastic 2015/2016. Il percors scolastic des Diwan al conte di fat 4.097 arlêfs cuntune incressite dal 6% rispiet al an passât. Par chel che al rivuarde lis scuelis primariis l’aument al è stât dal 5,7%, tes secondariis dal 6,5% e fintremai dal 11% intal unic liceu gjestît de rêt bretone, al pont che aromai al è urgjent vierzi un secont istitût par rivâ a garantî un servizi adat ae domande. Magari cussì no, e à ricuardât la presidente des Diwan, a front de incressite dai iscrits, a son ancje problemis avonde seris che a restin di risolvi. Il prin al è chel de mancjance di insegnants formâts e ricognossûts. Il teme al rapresentave un dai ponts dal pat sotscrit timp indaûr jenfri il stât francês e la regjon Bretagne che par cumò però al reste ancjemò su la cjarte.

Font: Ouest France, 04/09/15

Paîs Catalans: indipendence uniche garanzie pe lenghe

Ai 3 di Setembar la organizazion Plataforma per la Llengua e à presentât un studi sui belançs linguistics che al mostre il tratament diferent che il stât spagnûl al à tai confronts dal castilian e dal catalan. Su la fonde dai dâts racuelts e presentâts, la organizazion e à concludût che la uniche strade par saltâ fûr de situazion di “ecezionalitât” che e vîf la lenghe catalane e je chê de indipendence. Cheste diagnosi no si fonde però dome sul tratament che il stât i risierve al catalan, ma ancje sul fat che no si rive a viodi nissune volontât sostanziâl de classe politiche spagnole – ni di maiorance, ni di oposizion – par mudâ il regjim costituzionâl atuâl in chel di un paîs pardabon plurilengâl.

Font: VilaWeb, 03/09/15

Ocitanie: tal Bearn maçade sul insegnament dal ocitan

Par fâi cuintri al tai massîf dal insegnament de lenghe ocitane intes scuelis primariis dal Bearn e je stade inviade une mobilitazion che e previôt ancje une campagne di letaris indreçadis ai presidents de regjon Aquitanie e dal dipartiment dai Pireneus Atlantics là che chest teritori al è cjapât dentri. In pratiche, cence nissun confront cui operadôrs dal setôr, si à decidût di taiâ l’81,5% des oris di insegnament dal/par ocitan dal cicli primari. Chest al vûl dî, in buine sostance, lassâ cence insegnament de/in lenghe proprie passe cincuante classis e plui di un miâr di fruts.

Font: Jornalet, 03/09/15

Føroyar: sucès eletorâl de çampe unioniste e sovraniste

Lis elezions dal prin di Setembar a àn cambiât i ecuilibris politichis intes isulis Føroyar e a àn dât plui fuarce ai partîts di çampe – sei sul front unionist, sei su chel sovranist – che te legjislature stade si cjatavin ae oposizion.

Stât francês: mobilitazion in Otubar pes lenghis propriis

Par fâi cuintri al centralisim dal stât francês e par domandâ un ricognossiment uficiâl des nazionalitâts, des lenghis e des culturis storichis che si cjatin tal so interni, ai 24 di Otubar si varà une serie di mobilitazions che a interessaran dutis lis comunitâts minorizadis. La proteste, in plui di Alsazie, Bretagne, Catalogne Nord, Corsiche, Ocitanie e Paîs Basc setentrionâl, e cjape dentri ancje i cussì clamâts teritoris dal outre-mer tant che Antilis, La Réunion e Guiane francese.

Font: Sermos Galiza, 02/09/15

Asturiis: acuardi par une comission pe normalizazion de lenghe

Il gnûf esecutîf des Asturiis al metarà sù e si zovarà dal jutori di une comission su la promozion, la protezion e la normalizazion de lenghe proprie. La iniziative, proponude di Izquierda Unida, e à cjatât la poie ancje dai grups parlamentârs dal PSOE, di Podemos e di Foro Asturias intant che la diestre spagnoliste, formade di PP e Ciudadanos, e à votât cuintri. Par Podemos però la misure no je suficiente e si varès di inviâ un procès di riforme statutarie par garantî ad in plen i dirits linguistics dai asturians.

Font: El Comercio, 01/09/15

Paîs Basc: in Navare si ponte a rindi normâl l’ûs dal euskara

Tra lis novitâts che il gnûf guvier nazionalitari e progressist de Navare al à in program o vin il plen ricognossiment dal euskara tant che lenghe proprie de comunitât. Si va duncje a ribaltâ lis politichis puartadis indenant dai esecutîfs di diestre che a vevin guviernât la Navare fin cumò e che, intal tentatîf di dineâ ogni leam diret cu la identitât basche, a vevin imbastît un sisteme normatîf che al pidimentave l’ûs dal euskara te plui part dal teritori. Ta cheste logjiche di cambiament, e à spiegât la puartevôs dal guvier Ana Ollo, si larà ancje a normalizâ lis relazions cu la Comunitât Autonome Basche che tai agns stâts a jerin stadis une vore tiradis.

Font: El Diario, 31/08/15

Sami: pe ONU a coventin plui garanziis pal dirit ae tiere

Intant di une conference inmaneade in Svezie dal Consei parlamentâr sami, la inviade de ONU pai dirits dai popui natîfs Victoria Tauli-Corpuz e à manifestât la sô preocupazion pal stât dai dirits su la tiere des comunitâts sami di Finlande, Norvegje e Svezie. Garantî i dirits su lis lôr tieris nativis e su lis risorsis naturâls di chest teritori – e à dite la rapresentante de ONU – al è fondamentâl pe autodeterminazion dai sami e pe lôr esistence come popul specific. La cuistion e je simpri plui di atualitât a front de incressite di progjets che a pontin a disfrutâ lis tieris dai sami par sgjavâ minerâi o pe produzion energjetiche. Se al somee che il guvier svedês al vedi in program di tornâ a viodi la leç sui minerâi, la inviade de ONU e invide ancje Finlande e Norvegje a meti man ae lôr normative e a rispietâ i dirits des popolazions nativis, a partî de lôr consultazion e dal lôr consens informât su ogni progjet che al ven fat indenant. Victoria Tauli-Corpuz e à po declarât di sperâ di viodi in curt aprovade la convenzion nordiche sui dirits dai sami cumò al centri dal confront tra i guviers di Finlande, Norvegje e Svezie e i Parlaments sami in vore ta chescj stâts. Intal 2016 la inviade e presentarà un rapuart detaiât su la situazion cu lis sôs conclusions e lis sôs racomandazions al Consei pai dirits umans de ONU.

Font: OHCHR, 28/08/15