Gales: fats bogns i standards linguistics gnûfs pai ents publics

La Assemblee Nazionâl dal Gales e à fats bogns i gnûfs standards linguistics che il guvier galês, i conseis locâi e lis autoritâts dai parcs nazionâi a varan di rispietâ. I nivei a van a cjapâ il puest dai plans di politiche linguistiche fats bogns dai singui ents e al sarà il comissari pe lenghe galese a decidi, câs par câs a seconde des ativitâts davueltis, i standards di meti in vore. Tra lis novitâts previodudis si à ancje la pussibilitât pal comissari di multâ cui che nol rispiete i nivei previodûts. Tal Autun di chest an a varessin di jessi fats bogns i standards par struturis sanitariis, universitâts e altris sogjets publics. Une tierce butade e cjaparà dentri ancje sogjets privâts che a davuelzin un servizi public, tant che lis compagniis de aghe.

Font: Wales on line, 24/03/15

Finlande: mobilitazion sami cuintri di gnovis minieris

La decision de Agjenzie finlandese pe chimiche e pe sigurece (Tukes) di assegnâ une licence pe esplorazion minerarie inte aree di Ohcejohka / Utsjoki, Geavvu / Kevo e Deatnu / Teno ae compagnie KDR e à fat saltâ sù lis comunitâts sami che a vivin di simpri ta chê regjon. Un rapresentant politic de comunitât al è svolât a Dublin, là che e je la sede de compagnie, par consegnâ une difide a sgjavâ inte regjon. La difide, poiade de Coalizion antiminerarie de valade di Deatnu, e ricuarde che la licence assegnade de Tukes e je ilegâl par vie che i mancje il consens preventîf e informât des comunitâts sami che a son lis popolazions indigjenis di chês tieris e a ‘ndi àn il plen gjoldiment. Inte letare consegnade ae KDR si informe ancje che se la compagnie no si ritirarà, si procedarà a fâi cuintri cun ogni forme di lote, de mobilitazion sociâl aes campagnis di sensibilizazion, dai procediments legâi su nivel statâl fintremai ae segnalazion de violazion dai dirits des popolazions nativis denant de ONU.

Font: Finugor, 23/03/15

Cossovo: rivendicazions unitariis dai aministradôrs serps

Ai 18 di Març i aministradôrs locâi dai comuns a maiorance serbe dal Cossovo setentrionâl si son dâts adun par cirî di coordenâ i prossims pas di fâ. Ae fin de riunion si à metût jù un document unitari cun dîs obietîfs che si ponte a otignî. Par esempli si domande di inviâ cence altris ritarts la associazion dai comuns serps dal Cossovo e che la comunitât serbe e vedi une rapresentance tes aministrazions locâls, ancje cuant che no je maiorance. Si ponte po ancje a di une autonomie finanziarie dai comuns serps e al dirit di veto dai elets serps in Parlament su lis leçs che a àn un efiet diret su la lôr comunitât. Altris domandis a integnin la liberazion dai presonîrs politics serps, la tutele des proprietâts de glesie ortodosse e ancje il bloc des privatizazions.

Font: Balkan Insight, 18/03/15

Asturiis: tes superiôrs a risi il 75% des oris pal asturian

La organizazion Iniciativa pol Asturianu e à fat savê che i plans imbastîts dal assessorât pe educazion dal guvier asturian a previodin il tai di trê des cuatri oris setemanâls previodudis pal insegnament de lenghe proprie intes scuelis superiôrs de comunitât. Za la situazion e je grivie dal moment che l’asturian al è dome materie opzionâl, cun cheste iniziative si riscje duncje di meti fin ae presince de lenghe intes superiôrs. Adun cu la denuncie dal fat, Iniciativa pol Asturianu e domande al esecutîf locâl di tornâ su la sô decision e di mantignî la situazion dal insegnament almancul sui nivei dal dì di vuê.

Font: Iniciativa pol Asturianu, 17/03/15

Asturiis: manifest trasversâl pe couficialitât dal asturian

Plui di un centenâr di personalitâts, di mistîrs i plui diviers e di orientament politic trasversâl (dal PP a IU, di Podemos al PSOE), a àn firmât un apel par che l’asturian al vegni ricognossût de comunitât regjonâl tant che lenghe couficiâl. L’intindiment al è chel di profitâ dal svicinâsi de scjadince eletorâl par obleâ i partîts a cjapâ un impegn o almancul une posizion clare sul teme dal ricognossiment. Pai organizadôrs la iniziative za cumò e je un sucès par vie che e mostre che la difese dal asturian no je une cuistion ideologjiche o di partît, ma e parten a ducj in maniere trasversâl.

Font: El Comercio, 16/03/15

Finlande: rimandât il vôt pe convenzion sui popui natîfs

Ai 14 di Març il Parlament finlandês al à tignût la sô ultime riunion di lavôr prime de dade di inativitât che e anticipe lis elezions pe gnove assemblee. Al ordin dal dì e jere ancje la ratifiche de convenzion 169 de International Labour Organisation, la agjenzie de ONU dedicade ae tutele dai lavoradôrs e ae protezion sociâl. Si trate di une diretive vincolante che e garantìs dute une schirie di dirits aes comunitâts nativis e che e je za in vore in vincjedoi stâts ator pal mont. Il Parlament finlandês al à però decidût di no metile in votazion e duncje la sô ratifiche e je rimandade ae prossime legjislature. La ministre pe justizie Anna-Maija Henriksson e à declarât il so marum par cheste decision, ma e à ancje ricognossût che un vôt fat di presse al varès riscjât di pidimentâ in maniere definitive la ratifiche. Intant dai lavôrs de aule, denant dal Parlament, si è tignude une manifestazion inmaneade de organizazion de zoventût sami che e domandave la ratifiche de convenzion. La metude in vore de diretive e larès di fat a zovâ in primis propit aes comunitâts sami che a vivin tes regjons plui a Nord de Finlande, in plui che in Norvegje, in Svezie e intun toc de Federazion Russe.

Font: YLE, 14/03/15

Finlande: lis gnovis de radio publiche ancje par carelian

La radiotelevision publiche finlandese YLE e à inviât un gnûf program informatîf par carelian. Si trate di une trasmission radiofoniche setemanâl di gnovis metude adun cul jutori de Societât pe Lenghe Careliane. Daûr dai dâts dal ultin censiment, in Finlande a vivin plui o mancul 350 mil carelians, 30 mil di lôr a son ancjemò in stât di fevelâ la lôr lenghe proprie e 5 mil le doprin ogni dì. I prins dâts di scolte a mostrin che il program al è scoltât ancje di un pôcs di finlandês: un tant al è pussibil par vie che il carelian al è il lengaç plui dongje dal finlandês. Dongje dal finlandês (ancje te version semplificade e in forme di segns) e dal carelian, la radiotelevision publiche de Finlande e ufrìs programs ancje par svedês, sami, rus e inglês.

Font: Finugor, 04/03/15

Azawad: manifestazion de diaspore a Parîs pal autoguvier

Sabide ai 14 di Març la diaspore imazighen (tuareg) si è dade dongje a Parîs, denant de sede dal Parlament francês, par protestâ cuintri dai acuardis di pâs sotscrits a Alzer sul prin tacâ dal mês. Intal Zenâr dal 2012 grups armâts imazighen a vevin inviât un riviel che al veve permetût di bati l’esercit dal Mali e di proclamâ la indipendence dal Azawad, o sei la regjon sahariane là che la popolazion berbere e je maioritarie. La aree liberade e jere però finide sot dal control dai fondamentaliscj islamics de organizazion teroriste al-Qaeda dal Maghreb Islamic (AQMI). Par parâju vie al jere cussì intervignût ancje l’esercit francês cu la poie di diviers stâts africans. Chest al à puartât ai acuardis di pâs di Alzer che però a previodin dome une piçule autonomie pal Azawad e la creazion di assembleis regjonâls in dut il Mali. A poiâ cheste soluzion, in plui dal stât african, a son la France e la Alzerie, intant che il Moviment Nazionâl di Liberazion dal Azawad al è contrari. Di chi la mobilitazion inmaneade te capitâl francese par difindi il dirit ae autodeterminazion dai imazighen.

Font: Jornalet, 12-15/03/15

Paîs Catalans: il coletîf SEM pe difese de Catalogne Nord

Assemblea Nacional Catalana, Federació per a la defensa de la llengua i la cultura catalanes, Convergència Democratica de Catalunya, Esquerra Republicana de Catalunya, Candidatura d’Unitat Popular, Europe Ecologie Les Verts e Unitat Catalana a àn metût sù il coletîf SEM cun chê di sburtâ pal ricognossiment di un statût specific pe Catalogne Nord. Cun di fat, la riforme dal stât francês teritoriâl che si inviarà cul 2016 e previôt la nassite di regjons inmò plui grandis di chês di cumò e la disparizion progressive dai dipartiments: ta cheste maniere la Catalogne setentrionâl (Rosselló) e riscje di pierdi ancje chel friç di ricognossiment istituzionâl che e à in dì di vuê. Il coletîf SEM al lavorarà duncje sul plan politic, sociâl, culturâl e economic par rivâ a di un ricognossiment specific par chest toc di Catalogne. La pussibilitât di un statût particolâr dentri dal stât francês e je za, cemût che a dimostrin la Corsiche o la Martiniche, ma il dificil al sta tal cjatâ a Parîs la volontât politiche par metile in vore ancje pe Catalogne Nord.

Font: VilaWeb, 14/03/15

Paîs Basc: il PNV nol poie la “vie basche” pe indipendence

Interpelât sul teme intant di une riunion dal Parlament de Comunitât Autonome Basche, il lehendakari (president de Comunitât) Iñigo Urkullu al à declarât che il so guvier e il so partît (PNV) no poiaran la propueste fate indenant di EH Bildu par une “vie basche” pe indipendence. Par Urkullu, la strade proponude dai indipendentiscj e je rivoluzionarie par vie che e previôt la disubidience istituzionâl e par chest e crearès instabilitât. Il lehendakari al propon duncje di bati la strade di un acuardi tra i cuatri grups principâi dal Parlament basc – nazionaliscj moderâts, çampe indipendentiste, socialiscj e drete spagnoliste – e po tratâ cul stât centrâl par incressi l’autoguvier. Strade che però e ven boçade dai indipendentiscj di EH Bildu par vie che a Madrid, sei i popolârs che i socialiscj, a àn zaromai sierât ogni puarte ae tratative.

Font: Naiz:, 13/03/15

Cornualie: fonts dal stât par difindi la lenghe

Ai 13 di Març, intant di une visite istituzionâl in Cornualie, il prin ministri vicjari dal Ream Unît, Nick Clegg, al à comunicât che il guvier britanic al finanziarà cun 150 mil sterlinis la convenzion pe lenghe corniche, inviade ancjemò intal 2010 cun chê di promovi la presince di cheste lenghe te scuele e te societât. La convenzion e sarès scjadude ai 31 di Març e, sul imprin, l’esecutîf britanic al veve fat savê che no le varès tornade a finanziâ. La gnove comunicade dal prin ministri vicjari e je stade preseade sei dal Consei de Cornualie, sei des organizazions impegnadis intal promovi la lenghe di cheste piçule nazion celtiche. Clegg al à spiegât che si trate di un invistiment impuartant par vie che, cul promovi la lenghe, si promôf ancje i caratars origjinâi de Cornualie e si da cussì un sburt ancje ae economie, massime chê leade al turisim e aes produzions tipichis.

Font: Government UK, 13/03/15; Cornwall Council, 06/03/15

Paîs Catalans: ACPV e sburte par une gnove leç linguistiche

La organizazion Acció Cultural del País Valencià, adun cu lis universitâts di cheste comunitât, e à presentât un document là che a son dentri lis propuestis par rivâ a di une vere avualiance linguistiche jenfri catalan e spagnûl. La normative in vore, di fat, e promôf il catalan, inte sô varietât valenziane, ma in pratiche no garantìs i dirits linguistics dai citadins. Lis propuestis a pontin duncje a garantî un sisteme di bilinguisim là che ducj a vedin di cognossi il catalan, almancul in forme passive. Chest al vûl dî che il catalan al à di jessi lenghe veicolâr intal insegnament, che i funzionaris publics a àn di cognossi la lenghe e che i mieçs di comunicazion a àn di garantî une informazion di cualitât par catalan. Cun di plui, e zonte ACPV, si à di ricognossi ancje dal pont di viste normatîf la ecuivalence jenfri valenzian e catalan, za confermade di disinis di sentencis judiziariis.

Font: El Temps, 11/03/15; La Vanguardia, 11/03/15

Galizie: il pont su la situazion de minorance tal León

La setime edizion des Zornadis Martín Sarmiento e je stade la ocasion par fâ il pont su la situazion de minorance di lenghe galiziane che e vîf inte comunitât di Castilie e León. Si trate di une popolazion di diviers miârs di personis che e vîf intes regjons dal Bierzo e de Sanabria là che, in gracie di un acuardi cu la comunitât autonome de Galizie, i fruts a àn la pussibilitât di studiâ il e par galizian. In dì di vuê a son passe un miâr i arlêfs des scuelis primariis e secondariis che a gjoldin di cheste pussibilitât. L’insegnament dal e par galizian al è disponibil in 14 centris scolastics infantîi e primaris, in 3 istitûts secondariis e intal liceu linguistic di Ponferrada. L’acuardi sul insegnament jenfri Castilie e León e Galizie al è stât sotscrit intal 2001 e po infuartît intal 2006. Dongje di insegnâ la lenghe, intes scuelis cjapadis dentri dal acuardi il galizian al è ancje doprât in forme curicolâr par insegnâ un altri pâr di materiis. Par miorâ la cognossince de lenghe e de culture de Galizie a son po previodudis ancje ativitâts complementârs che a cjapin dentri ancje visitis di studi inte comunitât autonome.

Font: Xunta de Galicia, 09/03/15

UE: siopar pe esclusion dal gaelic des istituzions comunitariis

Dal prin ai 17 di Març la eurodeputade irlandese Liadh Ni Riada dal Sinn Féin e à metût in at un siopar linguistic par protestâ cuintri de discriminazion patide dal gaelic irlandês intes istituzions comunitariis. Cundut che al è lenghe uficiâl di un stât membri e che intal 2007 i è stât ricognossût il status di lenghe di lavôr de Union Europeane, cuntune deroghe che e restarà in vore almancul fin al 2017 l’irlandês al ven lassât fûr dai ûs istituzionâl. Par denunciâ cheste discriminazion la deputade e je intervignude simpri par gaelic intant dai lavôrs parlamentârs de prime metât di Març. In mancjance di un tradutôr uficiâl, a voltâ par inglês i siei intervents al è stât il so segretari: une pratiche contestade però dai presidents des sessions di lavôr che i àn cussì gjavât la peraule. La proteste e à però cjatât la solidarietât di diviers parlamentârs, a partî di chei bascs, catalans, scozês e galês, intant che dal guvier di Dublin si à fat savê che si è daûr a lavorâ par superâ cheste situazion.

Font: Aljazeera, 08/03/15

Paîs Catalans: la ANC e imbastìs il percors pe indipendence

La direzion de Assemblea Nacional Catalana e à metût jù la sô propueste pal percors di svilupâ par rivâ a di une Catalogne indipendente. Il test al sarà cumò stazât des sezions locâls prime di jessi fat bon de assemblee plenarie vie pal mês di Mai. I senaris pussibii che si vierzin a son doi, ven a dî che lis prossimis elezions a vedin un valôr costituent e a deventin une sorte di gnûf referendum su la indipendence, o pûr che si vedi un intervent diret dal stât spagnûl in Catalogne sul plan juridic e politic. In ogni câs, pe ANC, il prin pas al è chel di slargjâ la maiorance sociâl a pro de indipendence, il secont al è di pontâ a otignî une maiorance indipendentiste ancje tes elezions comunâls che e deventi po la fonde par une Assemblee dai elets de Catalogne che e puedi cjapâ in man il paîs intal câs che il guvier spagnûl al blochi la Generalitat (guvier catalan).

Paîs Catalans: sot atac la consulte su la indipendence tal Nord

Il stât francês al à denunciât la associazion Comitè per a l’Autodeterminació de Catalunya Nord cu la acuse di menaçâ la “integritât dal teritori statâl”. La organizazion e jere daûr a provâ a inmaneâ ancje intal Rosselló, o sei la part setentrionâl de Catalogne che e je cjapade dentri intal stât francês, une consulte popolâr par savê ce che a pensin i citadins su la ipotesi di un stât indipendent che al cjapi dentri sei il Sud che il Nord de Catalogne. La associazion e calcole la denuncie un abûs dal moment che no veve iniment di proclamâ la indipendence de Catalogne Nord, ma dome di savê ce posizion che a àn i citadins in mert a cheste idee.

Font: Naiz:, 06/03/15

UE: la cuistion dai presonîrs bascs e rive tal Europarlament

I rapresentants di Etxerat, la organizazion metude sù des fameis e dai amîs dai presonîrs, dai esiliâts e dai depuartâts bascs, a àn tignût diviers incuintris a Bruxelles par sensibilizâ lis istituzions europeanis su chest teme. Cun di fat, in dì di vuê, cundut de fin dal conflit armât a son ancjemò plui di 450 i bascs sparniçâts pes presons dal stât spagnûl e di chel francês. Un dai problemis plui sintûts al è che, si ben che la leç e previôt che la condane e sedi scontade inte preson plui dongje dal lûc di residence dal condanât, la plui part dai presonîrs bascs si cjatin intes presons lis plui lontanis dal Paîs Basc: une sorte di svindic istituzionâl che al colpìs in primis lis lôr fameis obleadis a viaçs di centenârs di chilometris che a voltis si sierin cence nancje podê viodi i lôr cjârs e che intai ultins agns a àn puartât ae muart di 16 familiârs par incidents di strade. La cuistion e je stade frontade sei intant di un incuintri cui parlamentârs dal eurogrup de çampe (GUE/NGL) sei cun chei de Aleance Libare Europeane (EFA) che a àn manifestât la lôr poie aes domandis di Etxerat su la fin de dispersion dai presonîrs bascs, sul rispiet dai dirits umans e ancje su la dibisugne dal superament des politichis repressivis metudis in at dai stâts spagnûl e francês.

Font: Naiz:, 05/03/15; EFA, 04/03/15

Ongjarie: 700 mil magjârs tal forest a vuelin la citadinance

Daûr dai ultins dâts comunicâts dal segretari di stât denant dal Parlament ongjarês, a son zaromai plui di 700 mil lis personis che a partegnin aes minorancis magjaris sparniçadis ator pe Europe centriorientâl che a àn domandât di vê ancje la citadinance ongjarese. A vuê, plui de metât di chestis domandis a àn za otignût une rispueste positive. La plui part des personis che a àn vût fin cumò la dople citadinance, ven a dî il 66%, al parten ae minorance magjare che e vîf in Romanie. Il 17% al rive de Serbie, là che lis comunitâts ongjaresis a vivin massime inte Voivodine. Il 14% al parten invezit aes comunitâts magjaris de Ucraine ocidentâl. Minorancis ongjaresis a vivin po ancje in Slovachie, in Slovenie e in altris stâts de aree. Par lôr il guvier di Budapest al à in program pal 2015 jutoris par 58 milions di euros.

Font: Finugor, 04/03/15

Irlande: prin an di vite pal periodic gaelic Dàna

Ai 7 di Març il periodic gaelic Dàna, disponibil dome in version digjitâl, al à finît il so prin an di vite. La nassite de riviste e je stade pussibile in gracie dal impegn di un grup di volontaris che a àn cirût di dâ un gnûf spazi ae lenghe irlandese dopo de sierade de riviste su cjarte Cothrom. Il periodic al propon articui su argoments i plui diviers che a van de critiche cinematografiche al sport, de politiche ae sience, ma che a àn di jessi ducj par gaelic e di cualitât. Un tant par mostrâ lis capacitâts de lenghe e par jessi atratîfs. Dal moment che al è fat di volontaris lis jessudis no àn simpri une periodicitât e une lungjece standard, ma intal stes i permet di no dipendi di contribûts publics e di vê une linie ad in plen indipendente.

Font: Am Pàipear, 02/03/15

Lusazie: apel par fermâ lis minieris che a fischin il teritori

Inte suaze di une iniziative che si è tignude ai 25 di Fevrâr intal Parlament european i rapresentants de Aleance Libare Europeane (EFA) e di altris sogjets politics rapresentâts intes istituzions comunitariis a àn jevât un apel par blocâ daurman il sgjâf di minieris di cjarbon a cîl viert in Lusazie. Ta cheste regjon logade a cjaval tra i lands de Sassonie e dal Brandeburc là che a vivin i serbians (o sorabis), o sei la uniche minorance slave autoctone dentri dal stât todesc, a son passe 130 i borcs e i paîs sacrificâts par permeti lis ativitâts minerariis e centenârs i citadins che a àn vût di bandonâ lis lôr cjasis e di trasferîsi a fuarce inaltrò. In plui dal impat diret su la int, sui paîs e sui paisaçs di cheste piçule nazionalitât, lis minieris a son ancje la cause di nivei di incuinament une vore alts de tiere e de aghe e un dam pe economie locâl, a tacâ dal turisim. La comunitât serbiane, cemût che a àn ricuardât i siei rapresentants politics, e vîf duncje sot de menace cuotidiane di chestis minieris. E magari cussì no, cundut che il sisteme energjetic todesc no ‘ndi vedi bisugne, il program di sgjâfs al varès no dome di lâ indenant, ma fintremai di incressi almancul fin ai 2030.

Font: EFA, 27/02/15