Paîs Catalans: gnove coalizion valenzianiste

Intes prossimis elezions in program intal Paîs Valenzian (2011) si proponarà une coalizion eletorâl formade dal Bloc Nacionalista Valencià, di Iniciativa del Poble Valencià e dai Verds – Esquerra Ecologista. La coalizion e varès di clamâsi Compromís e si ponte a slargjâle ancjemò cu la zonte di altris sogjets politics nazionalitaris, ecologjiscj e di çampe. L'obietîf – al à spiegât il segretari gjenerâl dal Bloc, Enric Morera – al è di svilupâ un tierç spazi politic che i fasi cuintri ae diestre dal PP e che al rapresenti une alternative ae oposizion simpri plui debule dai socialiscj (PSOE).

Font: VilaWeb, 25/01/10

Stât spagnûl: iniziativis cuintri de discriminazion dai Rom

La Cort europeane pai dirits umans e à ricognossût la validitât dal matrimoni di María Luisa Muñoz fat cul rît des “gnocis gjitanis” e, duncje, ancje il so dirit di vedue a tirâ la pension dal om. Il stât spagnûl, di fat, nol ricognòs la validitât di chest rît e al dinee i dirits civîi leâts al matrimoni a cui che si à sposât ta cheste maniere. La sentence dal tribunâl european, duncje, e vierç la strade ai rom che si cjatin intune situazion similâr a chê vivude di María Luisa Muñoz. Intant, intal stât spagnûl, si è daûr a lavorâ par un test di leç par domandâ perdon ai rom dal paîs pai maltrataments, pes discriminazions e pes violencis che a àn vût di patî. E je dal 1499 la prime leç spagnole che e interven in maniere discriminatorie cuintri dai rom, che a son stâts considerâts ad in plen come citadins spagnûi dome intal 1978.

Font: Unión Romaní, 25/01/10

Corsiche: une liste unitarie pai autonomiscj

Intes prossimis elezions pe Assemblee de Corsiche, in program tal mês di Març, si varà une liste autonomiste unitarie che, pal moment, e viôt adun il Partît de Nazion Corse (PNC) e la formazion Insieme. La gnove e je stade comunicade intant di une conference stampe che si è davuelte ai 23 di Zenâr là che i rapresentants dai doi sogjets politics a àn ancje invidât altris grups politics nazionaliscj e progressiscj a dâsi dongje ta chest gnûf progjet. Il prin spazi di elaborazion politiche unitarie si è davuelt ai 30 di Zenâr e, in curt, si metaran adun il program eletorâl e la liste dai candidâts. Daûr dai sondaçs fats fin cumò, une liste autonomiste unitarie e à sperance di passâ il 10% des preferencis e, duncje, di rivâ a passâ ancje al secont turni eletorâl. Ancje i partîts indipendentiscj cors a àn decidût di presentâsi aes elezions di Març cuntune liste unitarie.

Font: Món Divers, 25/01/10; PNC, 23/01/10

Paîs Catalans: catalan inmò penalizât inte segnaletiche stradâl

Ancje la Plataforma per la Llengua si à mote par poiâ la bataie des associazions par che su la segnaletiche autostradâl de Catalogne a sedin metûts par catalan ancje i nons des citâts de Catalogne Nord (intal stât francês). Cun di fat, in dì di vuê, chescj toponims a son metûts inte forme francese. La legjislazion catalane e previôt che su la segnaletiche stradâl logade tal so teritori ducj i toponims che a àn une forme tradizionâl par catalan a àn di jessi metûts ta cheste lenghe. Fin cumò, dut câs, il stât spagnûl nol à proviodût a cambiâ i segnâi stradâi contestâts par vie che la leç statâl e dîs che si à di doprâ simpri la forme uficiâl dal non e, dal moment che intal stât francês si ricognòs tant che uficiâl dome la forme francese dai nons, i segnâi stradâi a doprin dome cheste forme e no chê tradizionâl catalane. Daspò des ultimis protestis, lis autoritâts che a àn in gjestion lis stradis là che e je presinte la segnaletiche contestade a àn fat savê che a domandaran a Madrid di intervignî par mudâ la situazion. Il probleme, dut câs, nol rivuarde dome i toponims de Catalogne Nord, che a son par francês, ma ancje chei des localitâts de Franja de Ponent (che e je intal Aragon) che a son dome par castilian.

Font: El Punt, 24/01/10

Galizie: in disinis di miârs in place par difindi il galizian inte scuele

Disinis di miârs di personis – 30 mil pe polizie, 60 mil pai organizadôrs – a àn sfilât ai 21 di Zenâr pes stradis di Sant Jacum di Galizie (Santiago de Compostela) par protestâ cuintri dal decret de Xunta (il guvier galizian) sul ûs des lenghis inte istruzion che, intai fats, al va a limitâ la presince dal galizian inte scuele. La manifestazion e je stade inmaneade dal coordenament Queremos Galego, che al met adun cetantis organizazions e associazions impegnadis inte promozion de lenghe galiziane, e e à viodût la partecipazion ancje di cetancj rapresentants politics di oposizion – sei nazionaliscj, sei socialiscj – e dai sindacâts. Ta chê stesse zornade, cun di fat, si à davuelt ancje un siopar che al à cjapât dentri dutis lis scuelis de Galizie. Pal guvier galizian la adesion dai insegnants e je stade sul 45%, invezit pai sindacâts la partecipazion e je rivade fintremai al 90%. Alte la adesion ancje framieç dai students. I professôrs che a àn aderît ae proteste a àn ancje invidât il guvier a doprâ i bêçs che ur son stâts stratignûts pal siopar a pro dai taramotâts di Haiti. Solidarietât cu la proteste e je rivade ancje dai students e dai lavoradôrs de Universitât di A Coruña.

Font: Vieiros Galiza Hoxe, 21/01/10; La Voz de Galicia, 21/01/10; El País, 21/01/10

Macedonie: protestis pe decision di anticipâ l'insegnament dal macedon

La decision dal guvier macedon di anticipâ l'insegnament de lenghe macedone de tierce ae prime elementâr ancje pai fruts che a àn une marilenghe divierse no plâs masse ae comunitât albanese, che e rapresente un cuart de popolazion totâl dal stât balcanic. Un grup di organizazions leadis a cheste minorance si à za mot par contestâ il proviodiment denant de cort costituzionâl. Cun di plui, si fevele ancje di boicotâ lis lezions di macedon che, su la fonde dal decret dal guvier, a varessin di partî ancje pai fruts di prime e di seconde elementâr. I rapresentants albanês che a dan la lôr poie al guvier a invidin a frontâ la cuestion cun plui calme e a evitâ di ufrî scusis a chei che a cirin di tornâ a impiâ lis tensions etnichis intal paîs.

Font: Balkan Insight, 19-20/01/10

Slovachie: il MKP al domande di cambiâ la leç linguistiche

Il Partît de Coalizion Magjare (MKP, Magyar Koalicio Partja), moviment di riferiment de comunitât ongjarese de Slovachie, al domande di modificâ la leç linguistiche statâl e chê di protezion des minorancis linguistichis su la fonde dai indreçaments de Cjarte europeane pes lenghis regjonâls o minoritariis. Cun di fat, pal MKP, lis ultimis modifichis fatis buinis dal parlament slovac su la leç linguistiche statâl a laressin a limitâ l'ûs dal ongjarês e di chês altris lenghis minoritariis feveladis intal paîs.

Font: MKP, 19/01/10

Scozie: il Bòrd na Gaidhlig al domande di slargjâ la visibilitât di BBC Alba

Il Bòrd na Gaidhlig, l'organisim di riferiment de politiche linguistiche pal gaelic scozês, al à invidât il BBC Trust, o sei la struture che e gjestìs la rêt multimediâl britaniche BBC, a incressi i mieçs e lis risorsis a disposizion di BBC Alba, la rêt televisive dute par gaelic. Di cuant che al è partît, o sei tal Setembar dal 2008, chest canâl al à savût incressi lis oportunitâts di imparâ e di doprâ il gaelic, di aumentâ la visibilitât e il status di cheste lenghe, e di svilupânt il corpus. BBC Alba e rive a passâ i 200 mil spetatôrs par setemane e a atirâ cu la sô programazion ancje tantis personis che no fevelin par gaelic. Cun di plui – al ricuarde il Bòrd – cheste rêt e à permetût di creâ lavôr ancje in areis periferichis de Scozie. Par chest, in plui di fonts par incressi inmò la programazion di cheste television, si domande ancje di slargjâ lis pussibilitâts di viodile par mieç dal sisteme Freeview, vie cabli e cun BBC iPlayer.

Font: Bòrd na Gàidhlig, 15/01/10

Romanie: novitâts dal guvier pes minorancis nazionâls

Il prin ministri rumen, Emil Boc, al à fat savê che no si varà une gnove leç su lis minorancis nazionâls, ma che si proviodarà a slargjâ i dirits ricognossûts a chestis comunitâts cuntun regolament. Al è di almancul trê agns, di fat, che il parlament rumen al ten fer un test di leç su chest argoment. Cumò però il guvier rumen al ven fûr di une coalizion jenfri i liberâi democratics e la UDMR, partît di riferiment de comunitât ongjarese de Transilvanie. Cun di plui, pe prime volte, il ministri pe culture al è propit un membri de minorance ongjarese, Kelemen Hunor.

Font: Divers.ro, 15/01/10

Bulgarie: polizie condanade par brutalitât sui Rom

La Cort europeane pai dirits umans e à condanât un trop di poliziots bulgars par vê tratât in maniere disumane e degradante trê rom. I fats a jerin capitâts intal 2001 cuant che i trê a jerin stâts arestâts. I poliziots prime ur vevin trat cuintri par fâju fermâ e po, une volte blocâts, ju vevin pacâts e svilanâts pe lôr partignince etniche. La Cort europeane e à condanât ancje lis autoritâts bulgaris par no vê indagât su chest episodi di brutalitât de bande de polizie. Magari cussì no, in Bulgarie si à podût viodi ancje di resint câs di discriminazion e di ûs disproporzionât de fuarce cuintri dai rom – al dîs Mihail Georgiev, president de fondazion Romani Baht che si bat pai dirits dai rom bulgars – ma o sperìn che cheste sentence e puedi judâ a cambiâ lis robis.

Font: ERRC, 11/01/10

Galizie: ai 21 di Zenâr proteste par difindi il galizian inte scuele

Il coordenament Queremos Galego, che al met adun cetantis organizazions e associazions impegnadis inte promozion de lenghe galiziane, al à inmaneât pai 21 di Zenâr a Sant Jacum di Galizie (Santiago de Compostela) une manifestazion cuintri dal decret sul ûs des lenghis inte istruzion e, par chê stesse zornade, al à invidât il mont de scuele a fâ siopar. Cun di fat, a spieghin i organizadôrs, il progjet puartât indenant dal guvier autonomic al va a colpî cun fuarce l'ûs dal galizian intes scuelis. La proteste cuintri de politiche linguistiche de aministrazion vuidade dal popolâr Alberto Nuñez Feijóo e veve za puartât a dôs grandis manifestazions di place ai 17 di Mai e ai 18 di Otubar e chê dai 21 di Zenâr e riscje di jessi inmò plui grande. La iniziative e cjate ancje la poie dai nazionaliscj dal BNG e dai socialiscj galizians.

Font: Vieiros Galiza Hoxe, 11 e 12/01/10

Paîs Basc: mobilitazion popolâr e protestis pai presonîrs politics

Ai 2 di Zenâr a son stadis plui di 40 mil lis personis che a àn sfilât pes stradis di Bilbo / Bilbao par denunciâ la politiche repressive metude in vore des autoritâts spagnolis cuintri dai presonîrs bascs. La manifestazion e je stade clamade adun di diviersis fuarcis politichis, ven a dî Eusko Alkartasuna, Aralar, Abertzaleen Batasuna, Alternatiba e çampe indipendentiste basche, daspò che il tribunâl speciâl spagnûl (Audiencia Nacional) al veve proibît une manifestazion similâr inmaneade di Etxerat, la organizazion che e met adun fameis e amîs dai presonîrs bascs. Intant de iniziative, une des plui grandis che si àn viodudis intai ultins agns intal Paîs Basc, si à domandât fats concrets par meti fin aes violencis e aes condizions discriminatoriis metudis in at cuintri dai cuasi 750 presonîrs bascs sierâts intes presons spagnolis e francesis. Cuintri dai presonîrs bascs, di fat, dongje di câs di violence, a vegnin metudis in vore in maniere sistematiche misuris di dispersion, isolament, trasferiment no justificât, bloc dai sconts di pene e des comunicazions che a son contrariis ae stesse legjislazion penitenziarie. Cheste politiche repressive, cun di plui, e colpìs in maniere dure ancje i parincj dai presonîrs (viaçs di centenârs di chilometris pes visitis; trasferiments di preson no comunicâts; visitis impedidis in maniere arbitrarie; percuisizions corporâls; e v.i.).

Propit ta chestis zornadis, il coletîf dai presonîrs bascs – che in plui di membris di ETA, al met adun zovins acusâts di kale borroka, membris de çampe indipendentiste basche e ancje militants impegnâts intal cjamp informatîf e culturâl – al à dât fûr un comunicât che al denuncie la situazion patide in preson e al anticipe une gnove stagjon di mobilitazion e di protestis. Plui in detai, il coletîf (EPPK) al domande il rispiet dal status di presonîr politic pai militants bascs impresonâts, la fin de dispersion e dal regjim di isolament, la liberazion di chei che a àn za scontât la lôr condane e dai malâts in condizions critichis. La prime forme di proteste metude in at dai presonîrs bascs e je tacade ai 11 di Zenâr cu la decision di restâ sierâts inte lôr celis. Tra lis formis di lote anticipadis, dut câs, si à ancje il siopar de fam.

Font: Gara, 03,04 e 12/01/10

Sud Tirôl: azion par otignî la citadinance dople

Une delegazion de Südtiroler Volkspartei (SVP) si à cjatade tes zornadis stadis cul president de comission parlamentâr austriache pal Sud Tirôl, Hermann Gahr, e i à presentât la domande par inviâ il ricognossiment de citadinance dople, taliane e austriache, pai citadins che a son a stâ in provincie di Bolzan. La cuestion e jere za saltade fûr intai mês stâts, ma dome cumò si 'nd à tacât a fevelâ in maniere uficiâl. A front dai dubis che la propueste e à jevât intal guvier austriac, il parlamentâr de SVP Siegfried Brugger al à fat savê che al inviarà une racuelte di firmis par mostrâ trop che la citadinance dople e rispuindi ae volontât de popolazion sudtirolese. Segnâi di gradiment pe propueste a son rivâts ancje di altris formazions politichis dal Sud Tirôl.

Font: Austrian Times, 07/01/10; Món Divers, 12/01/10

Irlande: la UDA e conferme il disarmament

La Ulster Defence Association (UDA), la plui grande organizazion paramilitâr lealiste, e à comunicât di vê puartât insom il so percors par disarmâsi. Lis azions par meti fûr ûs l'arsenâl de organizazion a son stadis confermadis dal gjenerâl John De Chastelain che al vuide la Comission internazionâl che e viôt dal disarmament dai grups armâts inte Irlande dal Nord. I 9 di Fevrâr a son la ultime zornade par disarmâsi: passade chê date dutis lis armis recuperadis a podaran jessi dopradis tant che provis intai procès e lis organizazions che lis àn dopradis a saran tratadis tant che grups criminâi. Si stime che, tra il 1971 e il 2001, la UDA (ancje cul non di cuvierzidure di Ulster Freedom Fighters) e sedi responsabile di passe 400 sassinaments. Cundut achel, il guvier britanic al à permetût a cheste organizazion di restâ legâl fin al 1992. Inchiestis uficiâls a confermin che diviers dai atentâts firmâts de UDA/UFF a son stâts fats cul jutori o cu la complicitât dal esercit britanic e de polizie nordirlandese (RUC). I organisims che a controlin la ativitât des organizazions paramilitârs in Irlande dal Nord a segnalin che, almancul fin al Novembar stât, membris de UDA a jerin ancjemò impegnâts in ativitâts di stamp criminâl. La organizazion che e met adun i parincj des vitimis de violence lealiste e à declarât di no jessi interessade al disarmament de UDA/UFF, ma di volê la veretât sui responsabii dai servizis segrets britanics, dal esercit e de polizie nordirlandese che a àn armât, infilitrât e ordenât i omicidis di militants republicans e di citadins de Irlande dal Nord. Intal mês di Jugn dal an passât si vevin disarmâts altris doi dai grups paramilitârs lealiscj, ven a dî la Ulster Volunteer Force (UVF) e il Red Hand Commando. Sul front republican, invezit, chest pas al jere stât completât dal IRA ancjemò tal 2005.

Font: BBC, 06/01/10; AP/RN, 07/01/10

Turchie - Bulgarie: tension diplomatiche sui risarciments pes espulsions

Il guvier bulgar al à menaçât la Turchie di blocâ il so percors par jentrâ inte Union Europeane se no proviodarà a paiâ i risarciments pe espulsion sfuarçade des minorancis bulgaris metude in at dal imperi turc intal 1913. La cifre domandade dal guvier di Sofia e je di 14 miliarts di euros. La cuestion e je stade jevade dal ministri pai bulgars intal forest, Bozidar Dimitrov, ma e sarà ricjapade ancje dal prin ministri de Bulgarie che in curt al varès di lâ in visite in Turchie. Pal moment la uniche rispueste e je stade chê dal ministri turc pal forest, Ahmet Davutoglu, che al à invidât a lassâ di bande lis declarazions che a puedin menaçâ la amicizie che e je tra i doi paîs.

Font: Balkan Insight, 05/01/10

Gales: plui risorsis pes associazions pe lenghe galese

A son passe 2 milions e 300 mil sterlinis i fonts che il guvier galês al à decidût di dâ intal 2010 a trê organizazions judicadis strategjichis par promovi l'ûs de lenghe galese, ven a dî: Mudiad Ysgolion Meithrin, Urdd Gobaith Cymru e il National Eisteddfod. A comunicâlu al è stât il ministri pal patrimoni culturâl dal Gales, Alun Ffred Jones, che al à declarât che i fonts a permetaran aes trê organizazions di lâ dilunc a garantî a fruts, zovins e adults di davuelzi diviersis ativitâts par mieç dal galês. I fonts a àn vût un aument rispiet al an passât e a saran dâts fûr dal Ufici pe Lenghe Galese.

Font: Welsh Language Board, 04/01/10

Kurdistan: cul DTP fûr leç, si ative il BTP

Il DTP, che intes ultimis elezions al veve otignût doi milions e mieç di vôts, al veve 21 rapresentants intal Parlament turc e, intant des elezions aministrativis dai 29 di Març, al veve vinçût in cuasi un centenâr di comuns de aree curde. Daspò de decision de cort costituzionâl turche di meti fûr leç il Partît de Societât Democratiche (DTP, Demokratik Toplum Partisi), moviment di riferiment de comunitât curde, la repression e je lade indenant intai ultins dîs di Dicembar cul arest di disinis di sindics de aree curde, ma ancje di altris personis impegnadis inte difese dai dirits de comunitât curde, tant che il vicepresident de Associazion pai dirits umans IHD Muharrem Erbey. Inte plui part dai câs lis acusis si riferissin ai rapuarts che i aministradôrs a varessin vût cul PKK, il Partît dai Lavoradôrs dal Kurdistan, che di agns al vuide la vuerilie in Kurdistan. Tal câs di Erbey si fevele di ativitâts ilegâls come, juste par dâ un esempli di ce che al è proibît in Turchie, la partecipazion a conferencis su la cuestion curde e al festival dal cine dal Kurdistan. Dut câs, propit in prevision di une ilegalizazion dal DTP, al jere stât regjistrât un altri sogjet politic che al podès cjapâ sù la incarghe di rapresentâ la comunitât curde sul front politic. Daspò de decision de Cort costituzionâl turche, duncje, si à ativât chest moviment che al à non Partît de Pâs e de Democrazie (BTP, Bariş ve Demokrasi Partisi). Al BTP a àn cussì aderît ancje 19 dai 21 deputâts dal DTP, intant che a chei altris doi la Cort costituzionâl ur à improibît di davuelzi cualsisei ativitât politiche e aministrative. A chescj parlamentârs al varès di dâsi dongje ancje il deputât socialist indipendent Ufuk Uras di maniere di permetiur di formâ un grup parlamentâr autonom (che al previôt un minim di 2o membris).

Font: Món Divers, 23/12/09; UIKI, 24/12/09

Albanie: fonts pe minorance serbe dal Cossovo

Daspò di un incuintri cuntun pôcs di rapresentants de comunitât serbe dal Cossovo, il prin ministri albanês Sali Berisha al à fat savê che al metarà a disposizion de citadine di Gracanica, a maiorance serbe, un contribût di 400 mil euros. La decision e je rivade, in particolâr, daspò dal incuintri cun Slobodan Petrovic, rapresentant dal Partît Liberâl Serp (SLS), che intes ultimis elezions aministrativis al à vût la maiorance relative a Gracanica, ma che al gjolt di scjarse simpatie framieç di chês altris formazions politichis serbis. Il prin ministri albanês al à ancje comunicât di vê invidât il president serp Boris Tadic par une visite uficiâl in Albanie di maniere di miorâ i rapuarts tra i doi paîs che a jerin deventâts dificii propit daspò che Berisha al veve fevelât di unificazion nazionâl di ducj i albanês de aree balcaniche, a tacâ di chei dal Cossovo.

Font: Balkan Insight, 24/12/09

Bosgne: la costituzion e discrimine lis minorancis

La Costituzion de Bosgne Erzegovine e discrimine lis minorancis che a vivin intal paîs e no i garantìs i stes dirits politics di chei altris citadins. A dîlu e je une sentence dal Tribunâl european pai dirits dal om che al à dât reson ae denuncie fate indenant di doi citadins bosgnacs, un di religjon ebraiche e chel altri di nazionalitât rom. La sentence dal Tribunâl di Strasburc e ricognòs che la Costituzion, nassude su la fonde dai acuardis di Dayton dal 1995, e veve l'obietîf principâl di garantî la stabilitât dopo agns di vuere civîl, ma al lamente che il guvier bosgnac, contrari di ce che si veve impegnât a fâ, nol à proviodût a comedâle cu lis normis cuintri de discrimazion fissadis de Union Europeane. La Costituzion, in dì di vuê, e ricognòs cierts dirits politics e rapresentatîfs dome a bosgnacs musulmans, cravuats e serps, ma no ai membris di comunitâts presintis di secui su chel teritori tant che rom e ebreus.

Font: Món Divers, 23/12/09

Cornualie: nuie nazionalitât corniche tal prossim censiment

Tra lis nazionalitâts che i citadins a cjataran sul modul dal prossim censiment gjenerâl dal Ream Unît, che si davuelzarà ai 27 di Març dal 2011, no sarà chê corniche. Cun di fat, cun 261 vôts a 49, il Parlament di Londre al à boçât la propueste di meti dentri intai modui ancje une casele cun cheste nazionalitât. La domande e jere stade fate indenant dal parlamentâr liberâl democratic Dan Rogerson (elet inte circoscrizion de Cornualie setentrionâl) su la fonde di une iniziative partide su Facebook e poiade di plui di 3 mil personis. Sul modul si cjataran dome cinc pussibilitâts, ven a dî: inglês, scozês, galês, irlandês dal Nord e britanic. Intal compilâ i dâts dal censiment, intal moment di rispuindi ae domande su la nazionalitât, si podarà segnâ la casele “altri” e scrivi dongje “cornic”, ma cheste pussibilitât – a spieghin i promotôrs de iniziative – e je plui intrigose e al è probabil che e sarà metude in vore dome dai citadins in prime linie inte difese de identitât corniche.

Font: BBC, 01/12/09