Paîs Catalans: sierade la version di Yahoo! par catalan

La pagjine principâl di Yahoo! e je stade ristruturade in diviers stâts (tra chescj, par cumò, no son Italie e Gjermanie) e, tra lis novitâts, si à la eliminazion de version par catalan. La multinazionâl americane si è justificade cul fat che e vûl sburtâ sui marcjâts plui fuarts, tant che chel spagnûl, e che la pagjine par catalan no varès avonde utents. Dut câs, a saressin ancjemò dai spazis par catalan, ma par rivâi si à di passâ pe version spagnole dal portâl. Par vierzi la pagjine catalane, intal 2001, i guviers de Catalogne e di Andorra, la Corporazion radiotelevisive catalane (CCRTV) e la societât Nominàlia a vevin paiât 600 mil euros.

Font: Vilaweb, 25/09/09

Paîs Basc: in Navare si riscje la crisi pe modifiche de leç sul basc

Une crisi di guvier inte Comunitât Forâl de Navare leade ae modifiche de leç su la lenghe basche. Al è ce che a menacin i rapresentants de UPN (Unión del Pueblo Navarro), il partît di maiorance relative, daspò che i aleâts di guvier de CDN (Convergencia de Demócratas de Navarra) a àn mostrât di jessi disponibii a modificâ la leç. La balfuerie e je nassude de propueste fate indenant di IU (Izquierda Unida) di cjapâ dentri inte aree miste – là che a son previodudis des misuris minimis di tutele de lenghe basche – nûf comuns che in dì di vuê a son te zone cence nissune tutele. Daûr di cheste propueste e je une inchieste sociolinguistiche fate propit dal guvier de Navare là che la popolazion di chescj comuns e domande di jessi cjapade dentri te aree miste. La CDN e à mostrât di jessi disponibile a cheste modifiche, ma la UPN e à fat savê che se no cambiarà la sô linie e vierzarà une crisi di guvier. Il compuartament dal partît di maiorance relative al à cjatât la condane di dutis lis oposizions che lu acusin di doprâ la cuestion de lenghe tant che scuse par cuvierzi altris finalitâts.

Font: Gara, 25/09/09

Kurdistan: emissions par curdi, propueste par slizerî lis limitazions

Il Consei superiôr turc pe radiotelevision (RTÜK) al à proponût une riforme de leç statâl che e slizerìs lis limitazions cumò in vore pes emissions in lenghe curde. In pratiche, si larès a eliminâ l’oblic di sottitulâ par turc cualsisei trasmission par curdi (lassantlu dome pai notiziaris) o la proibizion di trasmeti programs par insegnâ la lenghe curde. Se la leç e ves di passâ, duncje, cheste lenghe e podarès cjatâ spazi ancje in diviersis emitentis privadis e si podarès rivâ a di une legalizazion di chês emitentis che in dì di vuê a funzion in maniere clandestine o ben a trasmetin vie satelit di altris paîs. Daspò de partence, cul principi dal 2009, di un canâl public di plante fûr in lenghe curde, si trate di une altre iniziative che l’esecutîf vuidât di Recep Erdogan al fâs par cirî di risolvi la cuestion dal Kurdistan setentrionâl. Dut câs, se sul front de lenghe si fasin dai pas indenant, sul front politic la situazion e devente simpri plui pesante, di une bande cul refût di discuti lis propuestis di risoluzion pacifiche dal conflit che a rivin dal PKK e di chê altre bande cui progjets par meti fûr leç ancje il DTP che al rapresente il partît di riferiment de comunitât curde intal stât turc.

Font: Nationalia, 23/09/09

Scozie: divisions tra i LibDems sul referendum pe indipendence

Se i Conservadôrs a vessin di vinci lis prossimis elezions intal Ream Unît, il Scottish National Party (SNP) al podarès otignî la maiorance assolude intal Parlament scozês e decidi di bessôl sul referendum pe indipendence. Cheste ipotesi e preocupe une vore diviers parlamentârs liberâi democratics scozês che a domandin al partît un cambi di strategjie, ven a dî votâ cul SNP e cui Verts par che il referendum si davuelzi intal 2010 e fâ po campagne referendarie par mantignî la union. Su la stampe si son moltiplicadis lis declarazions di cheste fate de bande di parlamentârs liberâi democratics, par chest la direzion dal partît e à mandât ai siei rapresentants intal Parlament scozês une note là che si ju invide a consultâsi cu la direzion prime di fâ declarazions ae stampe su chest argoment. I dirigjents scozês dai Liberâi Democratics che, su pression di Londre, a vevin decidût di no poiâ il referendum, si cjatin, duncje, simpri plui in dificoltât. Su la cuestion si vevin vudis divisions ancje framieç dai Laburiscj scozês, là che plui di cualchidun al pense che oponisi a di un referendum che al ven domandât de maiorance dai citadins scozês al riscje di sbassâ ancjemò di plui la lôr popolaritât.

Font: BBC, 22/09/09; Nationalia, 22/09/09

Romanie: riforme de leç su la educazion, lis propuestis dai ongjarês

Il guvier rumen al è impegnât a meti adun une gnove leç su la educazion. Intant di un incuintri cu la ministre pe istruzion, Ecaterina Andronescu, une delegazion de Union Democratiche Magjare in Romanie (UDMR) – che e met dongje i doi partîts di riferiment de comunitât ongjarese, o sei la Aleance Democratiche dai Ongjarês in Romanie (RMDSz) e il Consei Nazionâl Székely (SZNT) – e à presentât diviersis propuestis di modifiche rispiet al prin stampon de leç. Chê principâl si riferìs al ûs veicolâr des lenghis propriis intes scuelis logadis intes areis là che a vivin comunitâts minorizadis. La propueste dal guvier e previôt l’ûs di chestis lenghis par insegnâ dutis lis materiis fûr che lenghe e leterature rumene, storie de Romanie e gjeografie. Pai rapresentants de comunitât ongjarese, invezit, il rumen al varès di jessi doprât dome intant des oris dedicadis ae lenghe e ae leterature rumene.

Font: Divers.ro, 21/09/09

Ream Unît: rapuart incomplet e in ritart su la Cjarte europeane pes lenghis

Dome daspò des pressions rivadis dal Consei de Europe, il guvier britanic al à inviât il so rapuart su lis misuris metudis in vore pe promozion des lenghis minorizadis, ma si trate di un document incomplet e rivât cun cuasi un an di ritart rispiet ae scjadince uficiâl. Cun di fat, ogni trê agns i guviers dai stâts che a àn ratificât la Cjarte europeane pes lenghis regjonâls o minoritariis a àn di inviâ al Consei de Europe un rapuart che al presente i pas indenant fats inte promozion des lenghis minorizadis. Intal Ream Unît, chest compit al è dât in man ai guviers locâi di Scozie, Gales e Irlande dal Nord. Il probleme, dut câs, al è nassût propit ta cheste ultime aministrazion là che il stampon di document si è cjatât tal mieç di un scuintri tra lis diviersis fuarcis che a formin l’esecutîf e nol è mai stât inviât a Londre. Un pôcs dai detais di cheste vicende a son stâts sclarîts ta chestis zornadis intun aprofondiment curât de BBC ancje se, par cumò, lis resons dal scuintri tra i membris dal esecutîf nordirlandês a son stadis secretadis. Il ministeri britanic pai forescj, dut câs, nol à platât il so marum par cheste vicende che i à creât diviers problemis a nivel comunitari.

Font: BBC, 21/09/09

Paîs Basc: iniziativis cuintri de repression politiche

A jerin passe 2 mil lis personis che sabide ai 19 di Setembar si son dadis dongje a Donibane Lohizune / Saint Jean de Luz par denunciâ la disparizion dal militant abertzale Jon Anza e par domandâ la veretât su cheste vicende. La manifestazion, inmaneade des organizazions de çampe indipendentiste basche, si è davuelte framieç di une massive presince des fuarcis di polizie. Cun di plui, i passaçs di confin jenfri il stât francês e chel spagnûl a son stâts in pratiche blocâts par oris par impedî aes personis che a rivavin dal Paîs Basc meridionâl (Hegoalde) di partecipâ ae manifestazion. I organizadôrs de iniziative a àn denunciât a clâr lis responsabilitâts des autoritâts francesis e spagnolis inta cheste vicende. Al è di no crodi – a àn dite – che dopo di cinc mês de sô disparizion no si vedi nissune notizie. Chest cidin des istituzions – a àn zontât – al puce di complicitât e al da plui fuarce ae ipotesi di un secuestri di stamp politic. Cun di fat, l’episodi al riclame daurman ae memorie fats similârs di vuere sporcje metûts in at dai GAL, di altris scuadrons paramilitârs o fintremai des fuarcis di polizie.

Par chel che al rivuarde, invezit, la campagne cuintri des fotografiis dai presonîrs politics inviade dal socialist Rodolfo Ares, ministri pal interni de Comunitât Autonome Basche, si à di segnalâ un intervent istituzionâl significatîf che al rive de provincie de Gipuzkoa. Cun di fat, il consei provinciâl di chest teritori al à fat bon un document che al condane la politiche dal ministri Ares par vie che no varès nissune fonde legâl e e larès a violâ la libertât di espression. Il test al è stât votât di ducj i partîts (Alternatiba, Aralar, EB, Hamaikabat, PNV), fûr che socialiscj (PSE) e popolârs (PP). Dut câs, ancjemò plui pesante pe linie di Ares, e je la sentence dal tribunâl superiôr di justizie dal Paîs Basc che e ricognòs il dirit a esponi lis fotos dai presonîrs intant di manifestazions publichis.

Font: Gara, 20, 23 e 25/09/09

Galizie: fonts pes universitâts forestis là che si studie galizian

La segretarie gjenerâl pe politiche linguistiche dal guvier galizian e à decidût un finanziament di 331 mil euros par sburtâ l’insegnament de lenghe galiziane ancje tes universitâts che si cjatin fûr de Galizie. Cun chest stes fin, si proviodarà ancje a furnî materiâl didatic e a selezionâ un trop di letôrs par davuelzi lis lezions. In plui di insegnâ il galizian, si ponte ancje a judâ il svilup di studis e a promovi la cognossince de lenghe proprie e de culture de Galizie. A ricevi chescj fonts a saran la universitât dal Gales e chês di Bahía, Barcelone, Lisbone, Oxford e Tubinghe.

Font: Vieiros Galiza Hoxe, 19/09/09

Slovenie: prins pas pe gnove leç organiche su lis minorancis

Inte Republiche di Slovenie a son plui di cent i tescj legjislatîfs – de Costituzion jù jù fin ai statûts comunâi – che a previodin intervents di tutele pes minorancis, dut câs al mancje ancjemò un test organic che al regoli in maniere clare e unitarie cheste materie. Par chest i deputâts des dôs comunitâts nazionâls ricognossudis – Roberto Battelli (talians) e Laszlo Göncz (ongjarês) – a àn presentât in Parlament une propueste di leç in proposit. Cun di fat – a disin i doi parlamentârs – su la cjarte lis dôs minorancis a gjoldin di une gruesse tutele, ma intai fats la situazion e je plui ingredeade. In particolâr, il test al ponte a regolâ in maniere coerente i dirits linguistics, massime sul front de aministrazion publiche. La propueste e je za stade aprovade de comission su lis nazionalitâts de Cjamare di stât e cumò e je tes mans de comission governative pes minorancis. Il test definitîf al varès di jessi pront dentri de fin dal 2010. La comission parlamentâr, invezit, e à boçât la propueste di Zmago Jelincic (president dal Partît Nazionâl Sloven) di modificâ la Costituzion par gjavâ vie i puescj di deputât garantîts ae comunitât taliane e a chê ongjarese (un parom).

Font: Il Piccolo, 18/09/09

Bretagne: mobilitazion a Bruz par une gnove classe bilengâl

A Bruz, in Bretagne, e va indenant la mobilitazion dai gjenitôrs dai fruts de scuele materne bilengâl che a domandin la vierzidure di une gnove classe. Cun di fat, i fruts iscrits a son 49 e, in dì di vuê, si ricjatin tune classe sole. La ispetore ministeriâl, dut câs, e à refudât di vierzi une gnove sezion, lassant scaturîts sei i gjenitôrs dai frutins che lis mestris. Par protestâ cuintri de decision, i gjenitôrs a àn ocupât la scuele e vierzût une sezion gnove autogjestide. Su la cuestion si è mote ancje la aministrazion locâl che e à fat savê che no intint rindisi ae decision de ispetore. I gjenitôrs a contestin lis declarazions de ispetore su la mancjance di insegnants disponibii pal puest e a denunciin ancje lis sôs afermazions prejudiziâls sul insegnament dal breton.

Font: Agence Bretagne Presse, 16/09/09

Paîs Catalans: sucès intal referendum pe indipendence a Arenys de Munt

Domenie ai 13 di Setembar Arenys de Munt al è stât il prin comun catalan a ospitâ un referendum su la indipendence de Catalogne. La partecipazion al vôt e je stade dal 41%, ven a dî plui alte di chê pal referendum su la costituzion europeane e fintremai di chê des elezions europeanis. Il 96% dai citadins che a son lâts a votâ a àn dite di sì ae indipendence. I vôts a pro de indipendence a son stâts di plui di chei che, intal 2006, al veve otignût il gnûf statût di autonomie de Catalogne. La plui part dai partîts catalans al à laudât la iniziative e si à mostrade contente pal risultât. Il vôt al è stât, invezit, judicât inutil dai rapresentants dai partîts spagnoliscj, ven a dî socialiscj (PSC) e popolârs (PP). I organizadôrs e i sostenidôrs dal referendum, intant, a son za che a lavorin par che altris comuns a ledin daûr dal esempli di Arenys de Munt. In dì di vuê, a saressin bielzà uns sessante lis aministrazions locâls interessadis a davuelzi un referendum su la indipendence tal lôr comun.

Font: Vilaweb, 14/09/09

Galizie: primis azions dal grup “Cambia Galicia” a pro de lenghe

Si davuelzarà dai 18 ai 20 di Setembar in diviersis localitâts de regjon di Lugo, in Galizie, la manifestazion “Convers-ando”: la prime iniziative metude in cjamp di “Cambia Galicia”, une organizazion metude in pîts chest Astât cun chê di svilupâ propuestis gnovis par cambiâ i ategjaments negatîfs che une part de societât e à ancjemò tai confronts de lenghe galiziane. Cheste prime iniziative e previôt diviersis cjaminadis là che, plui che imbastî azions di rivendicazion, si ponte a tirâ dongje la int, a favorî il contat tra personis diviersis e a sburtâ l’ûs de lenghe tant che imprest di comunicazion normâl. Chest prin apontament al coventarà ancje par confrontâsi su lis prossimis iniziativis di imbastî.

Font: Vieiros Galiza Hoxe, 11/09/09

Moldova: il gnûf president a pro de union cu la Romanie

In Moldova, daspò de sconfite dai Comuniscj intes ultimis elezions politichis, chei altris partîts (ven a dî Liberâi Democratics, Liberâi, il Partît Democratic, e la Aleance Moldova Nestre) a àn sielzût il liberâl Mihai Ghimpu tant che gnûf president dal Parlament. Ghimpu si à declarât a pro de unificazion tra il so paîs e la Romanie, ancje se al à specificât daurman che si trate dome di une opinion personâl. La vicende, di fat, e je une vore delicade ancje par vie che a restin in pîts cuestions tant che chê dal avignî de regjon autonome de Gagausie e soredut chê de Transnistrie, regjon a maiorance russe che bielzà di agns si è autoproclamade indipendente. Propit il president di chest teritori, Igor Smirnov, al à confermât che no je nissune intenzion di tornâ a meti adun la Transnistrie cu la Moldova.

Font: Món Divers, 09/09/09

Paîs Catalans: campagne popolâr pe ricezion di TV3 intal Paîs Valenzian

Cul sburt de Acció Cultural del País Valencià e je stade presentade la iniziative di leç popolâr batiade “par une television cence frontieris”. I autôrs de iniziative, di fat, a proponin che intes comunitâts autonomis diferentis là che si fevele la stesse lenghe proprie si garantissi par leç la ricezion des emissions radiotelevisivis ta cheste lenghe. Daûr di cheste propueste e je la vicende de television catalane TV3 che par agns si à podût seguî ancje intal Paîs Valenzian in gracie dai trasmetidôrs tirâts sù di associazions ativis ta chê comunitât, ma che za di cualchi timp il guvier valenzian (tes mans dal PP) al è daûr a sierâ. Dut câs, di là dal câs specific de television catalane, la leç e permetarès ancje la ricezion des emissions de radiotelevision basche in Navare e di chê galiziane inte regjon dal Bierzo. Par che la iniziative di leç popolâr e rivi ae atenzion dal Parlament spagnûl e je bisugne di almancul mieç milion di firmis che a varan di jessi cjapadis sù dentri dai 24 di Març di chest an che al ven. La propueste e à za cjatât la poie di partîts politics (tant che Bloc Nacionalista Valencià, Esquerra Unida, Iniciativa del Poble Valencià, Esquerra Republicana e i Verts), sindacâts (tant che lis CCCO, la UGT e la Intersindical), associazions e fintremai di diviersis aministrazions locâls.

Font: Nationalia, 08/09/09; Món Divers, 09/09/09

Irlande: indenant cul procès di disarmament dai lealiscj

Daûr dal ultin rapuart de Comission internazionâl vuidade dal gjenerâl John De Chastelain, che e seguìs il disarmament dai grups armâts inte Irlande dal Nord, la Ulster Defence Association (UDA), la plui grande organizazion paramilitâr lealiste, e à tacât a disarmâsi. Intant di un incuintri tra lis parts, i rapresentants principâi dal grup paramilitâr lealist si son impegnâts a puartâ insom il procès dentri di Fevrâr, cuant che al scjât il tiermin ultin par disarmâsi. L’impegn al rivuarde sei lis cuatri brigadis ativis a Béal Feirste / Belfast, sei chês che a operin tes provinciis di Doire / Derry e di Aontraim / Antrim, e ancje il grup dissident de UDA atîf tal Sud Est di chest ultin teritori. La Comission e à ancje confermât che za cul mês di Jugn si vevin disarmâts altris doi dai grups paramilitârs lealiscj, ven a dî la Ulster Volunteer Force (UVF) e il Red Hand Commando. O ricuardìn ancje che, sul front republican, chest pas al jere stât completât dal IRA ancjemò tal 2005.

Font: Belfast Telegraph, 08/09/09

Romanie: i ongjarês a sburtin par une regjon autonome

La comunitât székely, che e je part de minorance ongjarese che e vîf in Romanie, e va dilunc a domandâ al guvier di Bucarest une regjon autonome in Transilvanie. La domande e je stade fate indenant ancje intant di une assemblee là che a àn partecipât uns 400 rapresentants di cheste comunitât. A inmaneâ la iniziative a son stâts doi dai partîts principâi de comunitât ongjarese, ven a dî il Consei Nazionâl Székely (SZNT) e il Partît Civic Magjâr (PCM). Intant de assemblee si à metût adun un stampon di statût di autonomie che al è za stât inviât al guvier rumen, ma si à ancje decidût une bandiere, un steme e un imni che a varan di rapresentâ in maniere uficiâl il Székelyföld, o sei la regjon là che e vîf la comunitât székely. Pal moment, dut câs, il guvier di Bucarest al rispuint che la costituzion e dîs a clâr che la Romanie e je un stât unitari e che, duncje, nol è spazi par nissune regjon autonome.

Font: Món Divers, 07/09/09

Paîs Basc: il PNV al atache la politiche linguistiche dal guvier socialist

Inte Comunitât Autonome Basche il gnûf an scolastic al à viodût une incressite des iscrizions intes scuelis là che si dopre il model D, ven a dî chel cul basc tant che lenghe veicolâr. Cun di fat, il 71% des iscrizions vudis intes provinciis baschis di Araba, Bizkaia e Gipuzkoa a son riferidis a chest model, cuintri di chel A cul castilian tant che lenghe veicolâr e di chel B là che basc e spagnûl a son doprâts plui o mancul in maniere compagne. Si trate di numars che a son stâts saludâts in maniere positive di ducj i partîts, fûr che dal PP che al volarès un impegn plui fuart intal promovi il castilian. Il PNV, invezit, al acuse il guvier basc, che cumò al è tes mans dai socialiscj, di platâsi daûr de promozion dal trilinguisim (basc, spagnûl e inglês) par sbassâ il nivel de politiche linguistiche a pro dal basc.

Font: Gara, 06/09/09

Paîs Catalans: agredît de polizie par vê rispuindût par catalan

La sezion pai dirits linguistics de Obra Cultural Balear e à denunciât un episodi une vore seri di discriminazion linguistiche capitât in Avost intal aeropuart di Palma là che un zovin al è stât pacât di oms de Guardia Civil par vie che al veve rispuindût aes lôr domandis par catalan. La leç e previôt la pussibilitât di esprimisi par catalan in cualsisei situazion, ma chest dirit nol ven simpri rispietât, massime cuant che si à a ce fâ cun rapresentants di organisims statâi. No je la prime volte che rapresentants de polizie di stât a àn vût un compuartament agressîf e intimidatori cun cui che ur fevelave par catalan, ma, almancul tai ultins agns, no si vevin vût câs di violencis fisichis. L’episodi, che al somee jessi ben documentât, al è stât denunciât cun fuarce de Obra Cultural Balear che e domande la fin de impunitât pai responsabii di chescj compuartaments e che e je daûr a seguî la vicende ancje sul plan legâl.

Font: Vilaweb, 02/09/09; Diari de Balears, 03/09/09

Slovachie: i ongjarês a protestin pe gnove leç su la lenghe slovache

A son jentradis in vore cul prin di Setembar lis modifichis ae leç statâl su la lenghe slovache fatis buinis dal Parlament di Bratislava. Il proviodiment al à discjadenât la proteste de minorance ongjarese che e vîf intal Sud dal stât e che e rapresente il 10% de popolazion totâl. Cun di fat, i rapresentants de minorance a acusin la leç di limitâ i dirits linguistics dai ongjarês e di imponi pardut la presince de lenghe slovache. Atacs ae leç a son rivâts fintremai di istituzions ongjaresis, tant che l’istitût di ricercjis linguistichis di Budapest che al à inviât une petizion di proteste. Dut câs, la traduzion dal proviodiment che e je stade doprade dai autôrs de petizion par dimostrâ la discriminazion linguistiche no je fedêl al test origjinâl. No son pôcs, duncje, chei che a pensin che de bande ongjarese si vedi fat un ûs strumentâl e distuart di cheste vicende. Lis autoritâts di Bratislava, intant, a rispuindin che il test di leç al difint la uficialitât dal slovac e nol pidimente l’ûs des lenghis minoritariis. Su la cuestion al è intervignût ancje l’alt comissari pes minorancis nazionâls de OSCE, Knut Vollebaek, che si è impegnât a vierzi un confront tra Bratislava e Budapest par difindi di une bande il dirit dai slovacs a infuartî la lôr lenghe di stât e di chê altre i dirits linguistics des minorancis.

Font: Eblul, 02 e 04/09/09; fonts orâls

Scozie: indenant cul progjet di leç pal referendum su la indipendence

Il popul scozês al à di jessi sintût sul so avignî, par chest si larà indenant cul progjet di inmaneâ intal 2010 un referendum su la autodeterminazion de Scozie. A dîlu al è stât il prin ministri scozês Alex Salmond (SNP) intant de presentazion denant dal Parlament di tredis progjets di leç che il so esecutîf al intint svilupâ tai prossims mês. Tra chescj si cjate ancje la propueste di leç par un referendum che al autorizi il guvier scozês a inviâ lis tratativis cun chel di Londre par rivâ ae indipendence. Rispiet al sì o al no al procès di indipendence, dut câs, par Salmond il referendum al varès di previodi ancje une tierce opzion, ven a dî chê di un aument dal autoguvier de Scozie. Su la cjarte, il SNP e i Verts a son i unics partîts rapresentâts in Parlament a pro dal referendum su la indipendence. Conservadôrs, Laburiscj e Sociâl Democratics, di fat, a van dilunc a oponisi al progjet, ma a àn di fâ i conts cuntune opinion publiche che si mostre a pro dal referendum cun percentuâls che, a seconde dai sondaçs, a van dal 60 al 80%, ancje se chei che po a votaressin pe indipendence a son ancjemò sot dal 50%.

Font: The Guardian, 01/09/09; Nationalia, 03/09/09