Ladinie: progjet di colaborazion internazionâl tra minorancis

Cuant che si lis met in rêt, lis comunitâts minorizadis si infuartissin sot dal aspiet identitari e a puartin indenant cun plui sucès lis politichis di promozion de lôr lenghe. Cun chest intindiment la Provincie di Trent e à inviât, ancjemò tal 2007, un progjet di colaborazion internazionâl batiât “Adotìn une lenghe” che al met adun i ladins de Val di Fasse e la comunitât achuar de zone amazoniche dal Ecuador. A son za diviersis lis azions puartadis indenant inte suaze di chest progjet che cumò al è daûr a sierâ la sô prime fase. Par tirâ lis sumis di chest lavôr, une delegazion ladine e je lade in Ecuador dai 30 di Avost ai 11 di Setembar. Chest viaç al veve ancje chê di imbastî un rapuart salt e diret tra i insegnants de scuele ladine e di chê achuar di maniere di infuartî la colaborazion sul plan didatic e sociolinguistic. Il prossim passaç dal progjet al è chel di meti adun des unitâts didatichis specifichis indreçâts ai fruts des elementârs par imparâ lis lenghis minoritariis.

Font: Provincie di Trent, 20/08/09

Rom: cunvigne de glesie, minorance tant che sburt par cambiâ

“Lis minorancis: dinamichis pe societât e pe Glesie”. Al è chest il titul de cunvigne, inmaneade dal ufici pe pastorâl dai rom e dai sinti de Fondazion Migrants de CEI (Conference Episcopâl Taliane), che si è davuelte ta chestis zornadis in Friûl. O vin sielzût il teme des minorancis parcè che par solit a son viodudis tant che un probleme – al à spiegât il diretôr dal ufici, pre Federico Schiavon – e, par une volte, cun cheste cunvigne, o volìn jessi nô a domandâsi cemût che o podìn miorâsi in gracie des minorancis, parcè che lis minorancis a son un sburt a cambiâ pe societât e pe glesie. Il teme si à svilupât propit a partî de comunitât minoritarie plui discriminade, sei a nivel talian che european, ven a dî chê dai rom e dai sinti. A son sì e no une disine i predis che intal stât talian a àn sielzût di davuelzi la lôr mission pastorâl framieç di cheste comunitât, vivint cun lôr e cirint di fâ di puint tra lôr e chei altris fedêi.

Font: ASCA, 26/08/09

Cossovo: ancjemò scuintris jenfri serps e albanês a Mitrovica

Une disine di personis a son restadis feridis ai 26 di Avost intant dai scuintris che a son sclopâts jenfri serps e albanês intune des vilis dulintor di Mitrovica. Daûr di chest gnûf sclop di violence al è il tentatîf di fâ sù des cjasis pai albanês inte aree a Nord di Mitrovica, là che la maiorance de popolazion e je serbe. Par cheste stesse reson, inte zone si vevin za vûts dai scuintris tra albanês e serps. A fâ sù lis cjasis a son lavoradôrs albanês che a rivin inte zone scortâts di membris de polizie cossovare e di militârs de mission internazionâl Eulex.

Font: Balkan Insight, 26/08/09

Scozie: altris fonts par incressi lis scuelis par gaelic

Il guvier scozês al à stanziât un altri milion e mieç di euros par vierzi gnovis scuelis cul gaelic tant che lenghe di insegnament. I bêçs a coventaran, in particolâr, par doi istitûts scolastics che a saran logâts a Port Rìgh / Portree, su la isule di Skye (par gaelic: An t-Eilean Sgitheanach), e a An Gearasdan / Fort William, su lis Highlands. Investî inte educazion e je sante scugne – al à dite il ministri scozês pe culture, Mike Russell – se si vûl che lis gnovis gjenerazions a fevelin ancje par gaelic. Si trate di stanziaments che a vegnin incuintri al aument de domande par scuelis là che il gaelic al sedi doprât tant che lenghe veicolâr pal insegnament. O volìn garantî ai gjenitôrs e ai fruts che a podaran lâ indenant a sielzi l’insegnament par gaelic – al à zontât Russell – parcè che a saran simpri avonde scuelis che a ufrissin chest servizi.

Font: BBC Scotland, 25/08/09

Paîs Basc: campagne dal guvier cuintri des fotos dai presonîrs

Il guvier di minorance che al vuide la Comunitât Autonome Basche, inte suaze de sô azion di criminalizazion de çampe indipendentiste, al à inviât un atac cence pareli cuintri de esposizion des fotografiis dai presonîrs politics bascs. Di cuant che i socialiscj, cu la poie dai popolârs, a son lâts al guvier, la polizie autonomiche (Ertzaintza) e à vût ordin di gjavâ vie dutis lis fotos dai presonîrs che si cjatin in sîts istituzionâi, in locâi publics o che a vegnin esponudis intant des manifestazions. Dispès, par fâlu, la ertzaintza e je intervignude in maniere violente cu la percuisizion di ambients e cun atacs cuintri di manifestazions pacifichis, che a àn causât diviers ferîts. Cun di plui, il ministri pal interni de CAB, Rodolfo Ares, no dome al à invidât la int a boicotâ i locâi là che a son esponudis fotografiis di presonîrs politics, ma al à ancje domandât aes aministrazions locâls di no dâi i permès ai ambients o ai barachins mobii cun fotos o scritis di solidarietât cui presonîrs politics. I intervents de polizie autonomiche a son stâts judicâts disproporzionâts dai rapresentants de plui part dai partîts bascs (Aralar, EA, PNV), che a àn ancje criticât cun fuarce lis declarazions di Ares. E je une robe pardabon grave che un rapresentant des istituzions al feveli cussì – a àn dite i rapresentants dal partît nazionalitari Aralar – cun di fat, i permès a van dâts daûr de leç e no dineâts par resons politichis.

Font: Gara, 24-25/08/09

Galizie: a risi la incressite de lenghe intes impresis

Lis polemichis su la lenghe galiziane e i tentatîfs dal guvier autonomic (vuidât dal PP) di fâ pas indaûr intal cjamp de politiche linguistiche, a son un pidiment ancje pe incressite dal ûs dal galizian intes impresis locâls. Tai ultins agns la presince di cheste lenghe intal mont imprenditoriâl e jere cressude, ma la situazion di atac continuât aes politichis linguistichis puartadis indenant fin cumò e riscje di invertî cheste tindince. La denuncie e rive di Antón Lado, rapresentant de societât “Reverso”, specializade in servizis linguistics pes impresis. Cun di plui – al segnale Lado – al è ancje il probleme dai finanziaments publics pe normalizazion linguistiche intes aziendis, che a son blocâts zaromai di cinc agns.

Font: Vieiros Galiza Hoxe, 23/08/09

Galizie: iniziative par mantignî la ricezion de TVG intal Bierzo

Il passaç dal analogjic al digjitâl, che al è previodût in curt, al lassarà la popolazion dal Bierzo, inte provincie dal León, cence la pussibilitât di cjapâ il segnâl de television publiche galiziane (TVG). Par chest la associazion Fala Ceibe e à domandât ae aministrazion de Castilie e dal León e a chê di Galizie di sotscrivi une convenzion che e permeti la ricezion de television galiziane ancje tal teritori dal Bierzo, là che la plui part de popolazion e fevele par galizian. Cence di un acuardi dal gjenar, di fat, la int dal Bierzo e restarès cence de pussibilitât di viodi programs televisîfs inte sô lenghe mari e, par Fala Ceibe, chest al larès cuintri dal Statût de Castilie e dal León che al garantìs il rispiet dai dirits linguistics de minorance galiziane. Cun di plui, convenzions di cheste fate a son za stadis sotscritis di altris Comunitâts autonomis che a vevin problematichis similârs.

Font: Vieiros Galiza Hoxe, 20/08/09

Macedonie: indenant cu lis riformis parlamentârs cundut dal boicotaç

Il Parlament de Macedonie al à fate buine a maiorance la gnove leç che e regole il so funzionament, cundut dal boicotaç puartât indenant dal Partît Democratic dai Albanês (Partia Demokratike Shqiptare / Demokratska Partija na Albancite), une des fuarcis politichis che a rapresentin cheste comunitât. La decision di boicotâ i lavôrs parlamentârs e je stade justificade par vie che il test di leç al sarès contrari ae volontât dai albanês. Un altri partît albanês, Gnove Democrazie (Demokracia e Re / Nova Demokratija), al à votât cuintri de leç parcè che no garantirès ad in plen il dirit di doprâ la lenghe albanese intant dai lavôrs de Assemblee. La leç e je stade votade, invezit, dal VMRO – DPMNE (Vnatrešna makedonska revolucionerna organizacija – Demokratska partija za makedonsko nacionalno edinstvo), il partît di centri diestre che al guvierne il paîs; dai Sociâi Democratics (Socijaldemokratski sojuz na Makedonija), che a son il partît plui grues di oposizion; e ancje de Union Democratiche pe Integrazion (Bashkimi Demokratik për Integrim / Demokratska unija za integracija), partît espression de comunitât albanese che al poie il guvier. Intant dal vôt, duncje, no si à vude une division su fonde etniche, ma, chel istès, chest episodi al riscje di tornâ a alçâ la tension framieç de comunitât albanese, che e rapresente sù par jù un cuart de popolazion totâl.

Font: Balkan Insight, 18/08/09

Paîs Catalans: campagne referendarie pe indipendence a Arenys de Munt

“Sêso dacuardi che la Catalogne e deventi un Stât di dirit, indipendent, democratic e sociâl, inte suaze de Union Europeane?”. E je cheste la domande che i citadins dal comun catalan di Arenys de Munt a saran clamâts a rispuindi domenie ai 13 di Setembar, cuant che si davuelzarà il referendum su la indipendence de Catalogne decidût ai 4 di Jugn dal consei comunâl dal paîs. A votâ a pro de iniziative a son stâts i rapresentants de liste Arenys de Munt 2000, di ERC, di CiU e de Candidatura d’Unitat Popular (CUP); invezit, i unics a oponisi, a son stâts i socialiscj (PSC). Ai 29 di Avost e je tacade la campagne referendarie che e viôt in prime linie la Comission organizadore de consulte pe indipendence. L’obietîf – al à spiegât un dai rapresentants de CUP – al è chel di stiçâ in dute la Catalogne il dibatit su la autodeterminazion, e di sburtâ il Parlament de Catalogne parcè che al ledi daûr dal troi segnât dal Comun di Arenys de Munt e al imbastissi un referendum su la indipendence.

Font: Món Divers, 16/08/09

Paîs Basc: e cres la repression cuintri de çampe indipendentiste

La çampe indipendentiste basche, che aromai si ricjate cun dutis lis sôs rapresentancis partitichis e associativis metudis fûr leç, e à comunicât la sô intenzion di inmaneâ une manifestazion popolâr a Bilbo / Bilbao ai 21 di Avost che e varà tant che sproc: par un cambi politic e sociâl dilunc de strade pe indipendence. Chest gnûf segnâl di vivarositât dal moviment abertzale al cole juste cualchi zornade dopo che il ministri spagnûl dal interni, Alfredo Pérez Rubalcaba, al declarave che ancje se la çampe indipendentiste basche e ves cjapât distance de violence no sarès stade legalizade (cundut che la motivazion uficiâl par meti fûr leç i partîts e lis organizazions de çampe abertzale e je propit chê de mancjance di une condane esplicite de violence di ETA). Dut câs, no dome intal Paîs Basc, si domandisi cemût che si puedi meti fin al conflit se di une bande si va dilunc a cressi la repression cuintri des organizazions politichis e associativis dal indipendentisim basc e a dineâur cualsisei spazi di espression, e di chê altre bande, di là dai proclamis, no si rive a bati ETA sul plan militâr come che a mostrin a clâr lis ultimis azions metudis in at de organizazion armade basche.

Font: Gara, 03-12/08/09

Corsiche: lavôr e ambient al centri des Ghjurnate Internaziunale

Ai 8 e ai 9 di Avost si è davuelte a Corti la edizion 2009 des “Ghjurnate Internaziunale”: l’apontament tradizionâl inmaneât dal indipendentisim cors par confrontâsi cui rapresentants di altris nazions cence stât in lote pe autodeterminazion. Chest an la rapresentance politiche e jere formade dai catalans di ERC e di Estat Català, dai sarts di iRS e di Sardigna Natzione, dai bascs di Batasuna, dai bretons dal Emgann, dai amazics (berbers) dal MAK e di une delegazion dal Quebec. Un dai temis frontâts intant de edizion di chest an al è stât chel des lotis sindacâls puartadis indenant dai lavoradôrs des comunitâts minorizadis dentri dal stât francês. Par fevelâ di chest argoment, dongje dal Sindacât dai Lavoradôrs Cors (STC), a son rivâts a Corti i rapresentants dal sindacât basc LAB, di chel breton SLB, di chel canac USTKE, di chei de Guadalupe UGTG e LKP, in plui di rapresentancis rivadis di altris dai cussì clamâts Teritoris dal oltri mâr (Outre-mer). La manifestazion e à viodût a dibati ancje sul svilup teritoriâl e ambientâl de Corsiche e su cuestions leadis al dirit di citadinance.

Font: Radio Alta Frequenza, 06-10/08/09

Galizie: nassût il coordenament ProLingua

La bataie pe difese e pe promozion de lenghe galiziane si insiore di un gnûf sogjet nassût intai prins dîs di Avost. Si trate dal coordenament ProLingua che al à chê di meti adun dutis lis personis che, di là de lôr partignince politiche o professionâl, si ricognossin inte lote pe lenghe. Intal so manifest, ProLingua si declare, duncje, apartitiche e plurâl, in plui di visâ che lis adesions a puedin rivâ dome a titul personâl. I obietîfs dal coordenament a son chei di “promovi il galizian tant che lenghe proprie de Galizie e di rivâ ae sô uficialitât reâl, che e passe par une presince normâl ancje intai cjamps là che vuê e ven lassade fûr, tant che lis impresis, la justizie e altris servizis public e privâts, massime i mieçs di comunicazion”. ProLingua e calcole di nivel minim di tutele chel sigurât de Leç pe normalizazion linguistiche dal 1983 e dal Plan gjenerâl di normalizazion de lenghe galiziane dal 2004. Ogni tentatîf di limitâ i dirits garantîts di chescj proviodiments – a disin i membris dal coordenament – al sarà combatût cun decision.

Font: Vieiros Galiza Hoxe, 06/08/09

Ossezie e Abkhazie: la Russie e domande un tratât di no agression

Il president rus, Dimitri Medvedev, intune letare mandade al president francês, Nicolas Sarkozy, al à sburtât su la dibisugne di un tratât di no agression tra Gjeorgjie, Abkhazie e Ossezie meridionâl. Dome ta cheste maniere, al spieghe il cjâf di stât rus, si pues evitâ che si vedin altris episodis di violence e che e sedi garantide la sigurece des popolazions civîls di chei teritoris. Cun di plui, inte letare, si invide ancje i membris de Union Europeane a blocâ la vendite di armis ae Gjeorgjie. L’intervent dal president rus al rive juste a un an di distance dal conflit discjadenât des trupis gjeorgjianis e che, daspò dal intervent rus, al veve puartât ae proclamazion unilaterâl de indipendence de Abkhazie e de Ossezie meridionâl. Pocjis zornadis indaûr, la tension si veve tornade a alçâ par vie di diviers scuintris a fûc causâts di milizians gjeorgjians.

Font: RIA Novosti, 06-08/08/09

Russie: tatars e baschîrs cuintri de assimilazion nazionâl

E je fuarte la preocupazion framieç des organizazions internazionâls che a rapresentin lis comunitâts tataris e baschiris par un progjet di leç che, a lôr parê, al smire ae assimilazion di dutis lis popolazions no russis de federazion. Il test, di fat, al ponte ae costruzion di une “nazion civiche russe” e nol ten cont de esistence di republichis nazionâls autonomis tant che chê dal Tatarstan e chê dal Baschiristan. Tatars e baschîrs a fevelin lenghis de famee turche e a vivin pe plui part propit intai teritoris di chestis dôs republichis autonomis.

Font: Món Divers, 06/08/09

Turchie: prin incuintri jenfri Erdogan e DTP sul avignî dal Kurdistan

Une riforme costituzionâl che e ricognossi la diviersitât culturâl in Turchie, la pussibilitât di tornâ a cjase pai 11 mil sfolâts che dal 1993 a vivin intal Kurdistan meridionâl (Irak), il recupar dai toponims in lenghe curde, investiments grues pal svilup de aree curde de Turchie. Daûr des primis indiscrezions, a podaressin jessi chescj i ponts di fonde che il prin ministri turc Recep Erdogan al à proponût ai delegâts dal Partît de Societât Democratiche (DTP), che al rapresente il partît di riferiment de comunitât curde in Turchie, par cirî di risolvi la cuestion dal Kurdistan. Si trate dal prin incuintri impuartant tra lis parts su chest teme. La iniziative e rive juste cualchi zornade dopo che, de preson là che al è sierât di agns, il comandant in cjâf dal Partît dal Lavoradôrs dal Kurdistan (PKK), Abdullah Öcalan, al veve fat savê di jessi daûr a meti jù un plan pe soluzion de cuestion curde in Turchie, traviers dal ricognossiment di une fuarte autonomie pe regjon.

Font: Nationalia, 06/08/09

Balcans: discriminadis lis minorancis serbis

Daûr dal ultin rapuart publicât de ONG serbe “Napredni Klub” lis comunitâts serbis che a vivin fûr dal stât serp a vivin dispès in condizions di discriminazion. Cundut de organizazion federâl dal paîs, intal rapuart si declare che lis comunitâts serbis de Bosgne no gjoldin dai stes dirits dai cravuats e dai bosgnacs. In Montenegro, là che i serps a son un tierç de popolazion, il lôr status tant che minorance nazionâl nol è stât ancjemò regolât e no gjoldin di une rapresentance istituzionâl proporzionade. In Slovenie, invezit, no ur ven ricognossût il status di comunitât nazionâl autoctone. Simpri daûr dal rapuart, i serps che a vivin in Romanie e in Ongjarie a riscjin la assimilazion, intant che chei de Macedonie no varessin plene libertât di religjon. In Albanie, invezit, no si rive nancje a savê il numar dai serps che a vivin inta chel paîs. La ONG serbe e invide, duncje, il guvier di Belgrât di ocupâsi cun plui atenzion de situazion dai serps che a vivin fûr dai confins di stât.

Font: BalkanInsight, 05/08/09

Sardegne: si è tornât a dâ dongje il Comitât pe lenghe sarde

Ai prins di Avost, a 33 agns di cuant che al jere nassût pe prime volte cun chê di inviâ une leç popolâr pal bilinguisim, al è tornât a dâsi dongje il “Comitadu pro sa limba sarda”. Il Comitât al domande ae aministrazion regjonâl di meti in vore il plan linguistic trienâl a pro dal sart e di garantî lis risorsis e i imprescj miôr par podêlu fâ. Cun di plui, tra i obietîfs dai fondadôrs, a son ancje chei di lâ indenant su la strade di un standard linguistic pal sart, ma ancje di garantî la normalizazion e la promozion di chês altris varietâts linguistichis feveladis su la isule (catalan dal Alguer, galurês, sassarês e tabarchin). Il Comitât si è dât dongje ator di un document cui obietîfs di fonde che al à viodût tant che prin firmatari Giovanni Lilliu. Adesions a son za rivadis di diviers operadôrs linguistics, scritôrs, e gjornaliscj sarts.

Font: L’Unione Sarda, 04/08/09; Tempus Nostru, 06/08/09

Ocitanie: metropolitane par ocitan a Tolose

Cul mês di Setembar inte metropolitane di Tolose lis comunicazions su lis fermadis no saran plui fatis dome par francês, ma ancje par ocitan. Si trate di une iniziative che e à un valôr simbolic une vore fuart, massime se si calcole che Tolose come la plui part des citâts de Ocitanie e je une vore francesizade. Lis comunicazions bilengâls a varessin di tacâ in ocasion dal “Festival Occitania”, rivât aromai ae sô diesime edizion e che si inviarà ai 21 di Setembar.

Font: Món Divers, 04/08/09

Serbie: i albanês a domandin une regjon autonome

I aministradôrs dai comuns di Presevo, Medvedja e Bujanovac a àn presentât al guvier e al Parlament de Serbie la propueste par une regjon autonome che e cjapi adun i teritoris di chescj trê comuns a maiorance albanese. Dut câs, i rapresentants di cheste comunitât a fasin indenant ancje altris propuestis, tra chestis une rapresentance etniche proporzionâl intes istituzions publichis serbis, in particolâr framieç de fuarcis di polizie, e il ricognossiment dai titui universitaris otignûts in Cossovo. La minorance albanese e domande ancje la liberazion dai membris dai grups armâts albanês arestâts l’an passât.

Font: BalkanInsight, 03/08/09; Món Divers, 04/08/09

Scozie: gnovis iniziativis dal guvier pal gaelic

Il prin ministri scozês Alex Salmond (SNP) al à comunicât che il so guvier al zontarà vie pal an altris 800 mil sterlinis ai 2 milions e 150 mil za previodûts pe educazion in lenghe gaeliche. La gnove e je stade comentade in maniere une vore positive dal Bòrd na Gàidhlig, la agjenzie pe lenghe gaeliche, che al à sigurât che cun chescj fonts si varà la pussibilitâts di incressi il numar di scuelis là che si dopre il gaelic. Cun di plui, dentri de fin dal an, al sarà metût jù un gnûf plan cu lis azions che si metaran in vore par slargjâ il numar des personis che a fevelin cheste lenghe. La conferme e je rivade dal ministri pal gaelic Michael Russell.

Font: Bòrd na Gàidhlig, 03/08/09