Corsiche: scuintris a Bastia tra indipendentiscj e polizie

Chê dai 4 di Avrîl e je stade une zornade di scuintris a Bastia tra militants indipendentiscj cors e fuarcis di polizie. Diviers miârs di personis, pe plui part zovins, a àn rispuindût al apel fat indenant di Corsica Libera par denunciâ la repression violente de polizie intant di une manifestazion cuintri de condane dal dirigjent indipendentist Yvan Colonna, là che un fantat al jere stât ferît in maniere une vore serie. La gnove manifestazion, dut câs, si à sierade cun altris incidents jenfri indipendentiscj e polizie, là che si fevele, dome tra chescj ultins, di une setantine di ferîts.

Font: Radio Alta Frequenza, 05-06/04/09; Corse Matin, 04/04/09

Galizie: in rêt al parone il castilian

L’Osservatori pe Lenghe Galiziane (Observatorio da Lingua Galega) al à dât fûr une gnove ricercje su la situazion linguistiche sui sîts internet in Galizie. A fâ di paron al è il castilian, ma la situazion e je une vore divierse tra public e privât. Cun di fat, ducj i sîts des istituzions autonomichis si vierzin cu la prime pagjine par galizian. Il stes a fasin, tal 88,7% dai câs, lis aministrazions locâls. Invezit, lis sezions locâls de aministrazion statâl a doprin come lenghe di riferiment il castilian. Tes pagjinis web des organizazions politichis e sindacâls, tal 83,3% dai câs, al è il galizian a vê plui visibilitât. Il stes si lu viôt par trê des cuatri universitâts de Galizie. Il castilian al è, invezit, maioritari tai sîts internet dai mieçs di comunicazion e des istituzions religjosis (plui o mancul tai trê cuarts dai câs). Là che però il castilian al fâs pardabon di paron al è su lis pagjinis web des impresis privadis: achì, di fat, dome tal 2% dai câs il sît si vierç inte version par galizian. Cun di plui, tal 75% dai câs, si cjatisi denant di sîts monolengâi. Il galizian al mostre une cierte vivarositât, invezit, te blogosfere, là che la lenghe proprie de Galizie e ven doprade tal 30% dai câs. Un dât curiôs al è chel de coretece dai tescj: cun di fat, a scrivin par galizian cun mancul erôrs i autôrs dai blogs che no i curadôrs des pagjinis istituzionâls.

Font: Galiza Hoxe, 03/04/09

Paîs Basc: acuardi fat jenfri PSE e PP par guviernâ la CAB

Il prin di Avrîl al è stât sotscrit in maniere uficiâl il pat jenfri PSE (la sezion basche dal PSOE) e PP par permeti ai socialiscj di guviernâ la Comunitât Autonome Basche intai prossims agns. Si trate di un acuardi sui ponts di convergjence tra lis dôs formazions politichis che al va de lote cuintri di ETA ae limitazion de politiche linguistiche a pro dal euskara, fin ae riorganizazion de radiotelevision basche EiTB daûr di criteris che a ‘nt fasin un imprest plui in linie cu la gnove situazion istituzionâl. No si trate, dut câs, di un vêr pat di guvier, dal moment che il PSE al aministrarà cuntun guvier di minorance e il PP al restarà ae “oposizion”, ma sigurant cui siei vôts une cierte stabilitât di guvier. Cun di fat, se il socialist Patxi López al sarà il gnûf president de Comunitât Autonome Basche, ae presidence dal Parlament e je za stade elete cun 38 vôts la popolâr Arantza Quiroga, intant che Izaskun Bilbao e à vût i 36 vôts dai partîts bascs (PNV, EA, EB e Aralar). In graciis de esclusion sfuarçade des listis de çampe indipendentiste basche e de sproporzion di rapresentance tra lis trê provinciis de CAB, il podê al è duncje tes mans dai partîts spagnoliscj, cundut che a son minorance intal paîs. A ricuardâlu al è stât ancje un rapresentant politic ben lontan di cualsisedi simpatie pal nazionalisim basc, ven a dî il president de Navare Miguel Sanz.

Font: Gara, 02-04/04/09; Món Divers, 31/03/09

Rom: e cres la intolerance in Ongjarie e inte Republiche Ceche

Intune clime za pesante par vie de crisi economiche che e à colpît ancje i paîs de Europe centriorientâl, a cressin i episodis di intolerance e, in cierts câs, fintremai di violence cuintri des comunitâts rom. La situazion e va in piês massime in Ongjarie, là che i roms a son uns 700 mil o sei sù par jù il 7% de popolazion, e inte Republiche Ceche, là che a rapresentin il 3% dai citadins. In ducj e doi i câs a soflâ sul fûc a son prin di dut i grups de diestre estreme che a son daûr a cressi la lôr poie, ancje eletorâl, cui atacs cuintri des minorancis internis, a tacâ dai rom, e cuintri de politiche europeane. In Ongjarie, za di timp, la Magyar Gárda (Vuardie Ongjarese), leade cul partît di diestre Jobbik, e sfile in maniere intimidatorie intai paîs là che e vîf la comunitât rom. Tal zîr di doi agns, a disin i siei dirigjents, e je passade di une cincuantine a 1.500 membris. A son avonde clârs i siei riclams ai fassiscj ongjarês che, intant de seconde vuere mondiâl, a vevin judât i naziscj intal gjenocidi di rom e ebreus. Inte Republiche Ceche, la situazion e je dificile massime inte Boemie setentrionâl, là che il nivel di puaretât e la percentuâl di rom a son plui altis che intal rest dal stât. Chi, dongje des azions di intimidazion vuidadis de diestre xenofobe, si tachin a viodi segnâi di intolerance ancje de bande dai aministradôrs locâi.

Font: Le Monde, 02/04/09; L’espresso, 02/04/09

Galizie, Paîs Basc, Paîs Catalans: pes europeanis aleance ERC, Aralar e BNG

Cul svicinâsi des elezions europeanis, ancje intal stât spagnûl a son daûr a concretizâsi i acuardis eletorâi tra lis formazions politichis di stamp nazionalitari. Cun di fat, al acuardi za sotscrit jenfri ERC (Esquerra Republicana de Catalunya) e i bascs di Aralar, si à zontât ancje il BNG, che lis voltis stadis si veve invezit presentât intune cui catalans di CiU e cui bascs dal PNV. Ta cheste maniere, a disin i nazionaliscj galizians, si vûl dâ plui fuarce ancje in Europe ae domande di autodeterminazion dai trê popui. Al acuardi eletorâl a podaressin zontâsi ancje Eusko Alkartasuna (Paîs Basc), Entesa per Mallorca (Paîs Catalans), Chunta Aragonesista (Aragon) e Andecha Astur (Asturiis).

Font: Gara, 31/03/09; Galiza Hoxe, 31/03/09 e 04/04/09; Món Divers, 01/04/09

Paîs Catalans: il PP cuintri de leç sul catalan te sanitât

Il PP al à fat savê che si movarà par puartâ denant de magjistrature il decret su la cognossince dal catalan de bande dai operadôrs sanitaris che il guvier des isulis Baleârs al à fat bon ai 27 di Març. Cun di fat, pai popolârs si trate di un proviodiment discriminatori. Il guvier des Baleârs, invezit, al rispuint che si trate dome di garantî a cui che al fevele par catalan il dirit di jessi assistût e curât te sô lenghe proprie. In pratiche, il decret al previôt che i operadôrs sanitaris che a lavorin tes Baleârs a vedin doi agns di timp par dimostrâ une cognossince dal catalan di nivel B (nivel mezan).

Font: Món Divers, 31/03/09

UE: assemblee gjenerâl a Barcelone pe EFA - ALE

Ai 27 di Març si è davuelte a Barcelone la cuinte assemblee gjenerâl de Aleance Libare Europeane (EFA), che e met adun cuarante partîts indipendentiscj e autonomiscj che a rivin di une vincjine di stâts de UE e che intal Parlament de Europe e forme un grup indipendent cui Verts. Intant de riunion si à metût jù un program pes prossimis elezions europeanis che al ponte a di une Europe plui atente al sociâl, ae difese dal ambient e des minorancis. La ALE e ponte a di une Union Europeane là che al cressi il numar dai membris in graciis dal percors di autodeterminazion des nazions cence stât. Intant de assemblee a son stâts fats jentrâ tant che membris a plen titule altris trê partîts, ven a dî: Die Friesen (comunitât frisone in Gjermanie), Strana Regiónov Slovenska (formazion regjonaliste multietniche de Slovachie), e Sud Tiroler Freiheit (Sud Tirôl). A ‘nt son po stâts acetâts altris sîs tant che osservadôrs: Südschleswigschen Wählerverbandes (comunitâts frisone e danese dal Schleswig Holstein); Lista per Fiume - Lista za Rijeku (autonomiscj di Flum, in Cravuazie); MMRÖP (partît dai rom de Ongjarie); Movimento per l’Indipendenza della Sicilia (indipendentiscj sicilians); Wendische Volkspartei – SLS (comunitât serbiane in Gjermanie); Die unabhänginge Kraft für Ostbelgien – ProDG (todescs de Belgjiche orientâl).

Font: EFA, 29/03/09

Bretagne: l’Ufici pe lenghe bretone al devente public

Ai 28 di Març si è davuelte a Kemper / Quimper la assemblee gjenerâl dal Ufici de Lenghe Bretone (Ofis ar Brezhoneg) cu la partecipazion ancje dal president dal Consei regjonâl de Bretagne, Jean-Yves Le Drian, e dal conseîr regjonâl pe politiche linguistiche, Jean-Pierre Thomin. Intant de riunion Le Drian al à comunicât in maniere uficiâl il vôt positîf dal Consei regjonâl pe trasformazion dal Ufici tune struture publiche di cooperazion culturâl che si clamarà Ofis Publik ar Brezhoneg. Cun chest passaç si va a garantî al Ufici une stabilitât di struture e di finanziaments che i permetaran di puartâ indenant lis sôs ativitâts cun plui fuarce. Il president dal Consei regjonâl al à ancje confermât la creazion di 40 borsis di studi par cui che si iscrivarà ai masters di breton cun chê di deventâ professôr intai istitûts scolastics bilengâi. La presidente dal Ufici, Lena Louarn, e à invezit fat il pont su lis ativitâts davueltis vie pal 2008 e su chês in program par chest an.

Font: Ofis ar brezhoneg, 29/03/09

Paîs Basc: prins acuardis jenfri PSE e PP par guviernâ la CAB

A van indenant lis tratativis jenfri lis comissions dal PSE e dal PP par rivâ a di un acuardi che al permeti al socialist Patxi López di deventâ il gnûf president de Comunitât Autonome Basche e di vê a disposizion une cierte stabilitât di guvier. I doi partîts spagnoliscj a àn tacât a lavorâ suntune schirie di ponts di convergjence su intervents economics, infrastruturis, educazion, mieçs di comunicazion, politiche linguistiche e v.i. Il prin stampon dal pat su lis azions di fâ, metût adun des comissions di negoziazion, al è cumò al esam des direzions dai doi partîts che a varan di cjatâ une linie condividude sui ponts inmò di sclarî. Acuardi bielzà cjatât, invezit, su lis incarghis uficiâls intal Parlament de CAB: il PP, di fat, al à otignût di sielzi il president de Assemblee, intant che i socialiscj a varan la vicepresidence e la posizion principâl tal ufici di segretarie. Se lis dôs formazions spagnolistis si metaran dacuardi, Patxi López al varà avonde vôts par podê guviernâ la CAB, che fin cumò e jere stade aministrade de coalizions vuidadis dai nazionaliscj bascs. Al è just di ricuardâ, dut câs, che cheste gnove maiorance e je stade pussibile dome in gracie de esclusion sfuarçade des listis de çampe indipendentiste basche.

Font: Gara, 27/03/09

UE: vôt dal Parlament in difese dal plurilinguisim

Inte riunion plenarie dai 24 di Març il Parlament european al à votât un rapuart sul plurilinguisim diviers di chel fat bon cualchi zornade prime dal Comitât parlamentâr pe culture e pe educazion. Cun di fat, il test jessût dal Comitât, là che i popolârs a àn la maiorance, al proponeve dai pas indaûr rispiet ai indreçaments di politiche linguistiche rivâts fin cumò des autoritâts comunitariis, massime in teme di tutele e di promozion des lenghis minoritariis. In rispueste a chest document, un grup trasversâl di parlamentârs europeans, cul jutori dal EBLUL e di cierts guviers autonomics, al à metût jù un rapuart diferent che al poie i sfuarçs di promozion des lenghis minorizadis de Europe. Al moment dal vôt, la maiorance dai parlamentârs, tra di lôr ancje un trop di popolârs (tant che chei ongjarês), al à duncje poiât chest secont rapuart. Cun dut che la Comission europeane e ves za fate buine la linie plui a pro des lenghis minorizadis, il vôt dal Parlament al à dimostrât che su chest teme, a nivel comunitari, al è aromai dificil fâ dai pas indaûr.

Chest nol vûl dî, però, che dut al ledi ben. Cun di fat, cualchi zornade indaûr intal Parlament european al è stât presentât un studi che al denuncie cemût che tai ultins agns a sedin stâts masse pôcs i pas indenant fats par meti in vore, intai diviers stâts de Union, i indreçaments de Cjarte europeane pes lenghis regjonâls o minoritariis. Ancje il plan di azion comunitari sul plurilinguisim pai agns 2004 – 2006 nol è lât masse ben, viodût che si calcole che a sedin stâts otignûts dome il 30% dai obietîfs programâts.

Font: Eurolang, 23 e 24/03/09; Nationalia, 20/03/09

Galizie: il monolinguisim castilian si infuartìs

Daûr dai dâts de inchieste sociolinguistiche puartade indenant de Real Academia Galega, tra il 1992 e il 2004 il numar des personis che no fevelin par galizian al è cressût dal 13 al 25,8%. A aumentâ a son stâts ancje chei che a doprin in maniere maioritarie il castilian, che a son passâts dal 26 al 35%. In dì di vuê, duncje, lis personis che in Galizie a fevelin pôc o nuie par galizian a son passe il 60%. Il numar des personis che si declarin monolengâls par galizian, invezit, si è sbassât dal 30,5 al 16%. Si trate di dâts che la Academie galiziane e veve in man za di timp, ma che e à pensât ben di no publicâ prime des elezions autonomichis che a àn tornât a puartâ ae vuide de Galizie il PP. Chest compuartament al à mandât in bestie chei che di agns a son in prime linie inte difese dai dirits linguistics dai galizians tant che A Mesa pola Normalización Lingüistica e il STEG (il sindacât dai lavoradôrs de istruzion in Galizie) che si son cjatâts a frontâ un atac violent, massime intant de campagne eletorâl, de bande dai popolârs che a denunciavin la situazion critiche dal castilian in Galizie e i pericui de leç di politiche linguistiche pal galizian fate buine dal guvier formât di socialiscj e nazionaliscj. La realtât e je une vore divierse, come che a dimostrin i dâts de Academie, e no vêju fats cognossi prime de campagne eletorâl al è plui che suspiet, a disin A Mesa e il STEG.

Ai 28 di Març, intant, si è tignude la assemblee gjenerâl di A Mesa, che e à confermât ae presidence Carlos Callón e il rest dal diretîf de organizazion. Dilunc vie de assemblee si à proviodût a di une revision dal implant interni di A Mesa che e à puartât a infuartî lis rapresentancis de organizazion a nivel locâl. A Mesa e reste un imprest util pe Galizie – al à dite Callón – ma a coventin des corezions. A son 3.500 i membris di cheste organizazion e il lôr numar al è cressût une vore intai ultins agns. Il prossim apontament impuartant par A Mesa al sarà la manifestazion pai dirits linguistics in program ai 17 di Mai a Sant Jacum di Galizie (Santiago de Compostela).

Font: Galiza Hoxe, 17-29/03/09

Paîs Catalans: un plan par formâ mestris catalans tal Rosselló

A front de mancjance di insegnants catalans intal Rosselló, la Universitât di Perpinyà / Perpignan e à presentât un plan che al ponte a garantî la formazion dal personâl che al à di insegnâ il e par catalan. Il document – batiât Plan strategjic pal catalan intai Pireneus orientâi – al à ancje chê di slargjâ l’insegnament di cheste lenghe inte Catalogne Nord sot aministrazion francese. Cun chest plan si cîr di coordenâ dutis lis istituzions ativis ta chest setôr di maniere di rispuindi simpri miôr a chel passe 60% di citadins che a domandin il catalan a scuele.

Font: Món Divers, 23/03/09

Transnistrie: si trate par rivâ a di un acuardi sul avignî dal paîs

Ai 18 di Març, pôc lontan di Mosche, si son dâts dongje i presidents de Federazion russe, Dimitri Medvedev, de Moldove, Vladimir Voronin, e de Transnistrie, Igor Smirnov. Al centri dal incuintri al jere propit l’avignî di chest ultin paîs che, cul sfantâsi de Union Sovietiche, nol veve acetât di jessi part de Moldove e, daspò di un conflit che al veve fat un miâr di muarts, al veve proclamât la sô indipendence. In dì di vuê, la Transnistrie e je, intai fats, un teritori indipendent, ancje se nol gjolt dal ricognossiment uficiâl di nissun stât. A garantî chest status e je la presince di une fuarce di interposizion russe. Cumò, daspò de azion militâr metude in cjamp par Abkhazie e Ossezie meridionâl, la aministrazion russe e vûl dimostrâ di jessi in stât di risolvi i conflits internazionâi ancje par vie diplomatiche. L’incuintri tra i trê presidents al à produsût dome un document là che dutis lis parts si impegnin a lâ indenant cui sfuarçs par cjatâ un acuardi sul destin de Transnistrie. Dut câs, alc si à mot, viodût che si trate dal secont incuintri diret in vot agns jenfri Voronin e Smirnov. Lis tratativis a varessin cumò di lâ indenant ancje cu la partecipazion di rapresentants de Ucraine e de OSCE e cu la presince, tant che osservatôrs, di delegâts de UE e dai Stâts Unîts. Se si cjatarà un acuardi tra lis parts, il cuarp militâr rus che si cjate inte regjon al podarès lassâ il puest a di une fuarce internazionâl vuidade de OSCE. Il president de Moldove, Voronin, nol è tornât a cjase mans scjassant. Il president rus i à prometût 50 mil toneladis di nafte di dâ fûr tant che jutori umanitari ai contadins dal so paîs, un dai plui puars de Europe.

Font: RFE, 18/03/09; Món Divers, 19/03/09

Cornualie: nazionaliscj in corse ancje pes europeanis

Ancje il Mebyon Kernow, il partît nazionalist de Cornualie, al è daûr a preparâ une liste par partecipâ aes elezions europeanis. Cheste piçule nazion celtiche cjapade dentri tal Ream Unît e à une popolazion di sù par jù mieç milion di abitants, ma – come che al sucêt par altris nazions cence stât europeanis – no à une circoscrizion eletorâl autonome. I eletôrs cornics, duncje, a votaran pes europeanis intune cui citadins inglês che a vivin tes conteis dal Sud Ovest (ven a dî Bristol, Devon, Gloucestershire, Somerset, e Wiltshire) e te dipendence britaniche di Gjibraltar. Si calcole che par elei un parlamentâr a coventin tra i 150 e i 160 mil vôts, ma, tes ultimis elezions, a jerin stâts pôc plui di 140 mil i cornics che a jerin lâts a votâ. La elezion di un rapresentant dal Mebyon Kernow intal Parlament european e à, duncje, cuasi dal impussibil. Cun dut achel, il partît al à decidût di cori distès par dâ visibilitât ae bataie pai dirits nazionâi de comunitât corniche. Tra i ponts puartâts indenant dal partît a son la creazion di une circoscrizion eletorâl autonome, ma ancje la nassite di une Assemblee Nazionâl pe Cornualie sul model di chê dal Gales.

Font: EFA, 18/03/09; Mebyon Kernow, 03/09

Austrie: rapuart de UE sul stât des lenghis minorizadis

Il Comitât dai ministris dal Consei de Europe al à dât fûr il secont rapuart su la situazion des lenghis minoritariis in Austrie. Intal document si invide il guvier austriac a meti adun une politiche organiche pe tutele e pe promozion des lenghis minorizadis daûr dai criteris fissâts de Cjarte europeane pes lenghis regjonâls o minoritariis. In particolâr si domande di garantî la pussibilitât di doprâ ad in plen sloven, cravuat e ongjarês cu lis autoritâts aministrativis e judiziariis des regjons là che a vivin chestis comunitâts. Il rapuart al sburte ancje par intervignî sul sisteme scolastic di maniere che al garantissi une ufierte formative intes lenghis minorizadis in stât di rispuindi al aument des domandis par chest servizi. Cun di plui si racomande di incressi la programazion radiotelevisive publiche massime pe comunitât ongjarese, e di judâ di plui la stampe locâl par sloven, cravuat e ongjarês.

Font: Eurolang, 17/03/09

Alsazie: si slargje la campagne pe lenghe

Tor de metât di Març, l’Ufici pe lenghe e pe culture de Alsazie (OLCA) al à lançât la sô campagne “Ja fer unseri Sproch” ancje framieç dai Comuns dal dipartiment dal Bas Ren. Si trate di une iniziative che e ponte a slargjâ la presince dal alsazian inte vite cuotidiane. Daspò di une prime edizion de campagne indreçade aes impresis dal teritori, che e à cjatât la adesion di passe 270 sogjets economics alsazians, cul an passât si à decidût di inviâ une operazion similâr ancje intes aministrazions publichis. La campagne e je scomençade tal Setembar dal 2008 intal dipartiment dal Alt Ren e, in dì di vuê, a son plui di 50 i Comuns che a àn aderît. Cumò, duncje, si à slargjât la campagne ancje a chel altri dipartiment de Alsazie. L’Ufici al presente aes aministrazions locâls une schirie di intervents di podê meti in vore e al ufrìs il so jutori par metiju in at: si va de segnaletiche bilengâl al ûs dal alsazian intai imprescj di comunicazion comunâi, des iniziativis culturâls inte lenghe locâl al bon acet par alsazian pe int che e va in Comun. Ogni aministrazion e sielç po cualis iniziativis meti in cjamp.

Font: OLC Alsace, 03/09

Gales: i beneficis de indipendence tun sît

Un Gales indipendent staressial miôr o piês di cemût che al sta cumò dentri dal Ream Unît? Pal Plaid Cymru, il partît nazionalist galês che in dì di vuê al guvierne il paîs in aleance cui laburiscj, la strade de indipendence e zovarès al Gales. Ta chestis zornadis, par motivâ la sô posizion, al à ancje viert un sît internet là che si cjatin materiâi che di une bande a dan vôs a cui che al è a pro de indipendence – politics, ma ancje int normâl – e, di chê altre, a rispuindin ai lûcs comuns sul parcè che il Gales nol podarès deventâ indipendent. Intal sît al è spazi par cui che al vûl dibati sul teme de indipendence e si cjatin i colegaments cun altris imprescj informatics dedicâts a chest teme. In dì di vuê, almancul daûr dai sondaçs, il 13% dai galês al sarès a pro de indipendence, ma – a disin i membris dal Plaid Cymru – cheste percentuâl e je daûr a cressi e, dentri dal 2020, e podarès passâ il 50%.

Font: Nationalia, 12/03/09

Albanie: sindic de comunitât greghe al riscje la preson pai cartei bilengâi

Un an di preson e cinc milions di lek (38 mil euros) al è ce che al riscje Vasil Bollano, sindic di Himara, un dai comuns albanês là che e vîf la minorance greghe. L’aministradôr al è finît sot procès par vê fat tirâ vie la segnaletiche stradâl dome par albanês par sburtâ lis autoritâts competentis a doprâ cartei bilengâi inte aree là che e vîf la comunitât greghe. La mancjance di segnaletiche e veve però causât no pôcs problemis al trafic, cuntun dam che lis autoritâts albanesis a calcolin sui 170 mil euros.

Font: Balkan Insight, 10/03/09

Irlande: atacs mortâi de dissidence republicane

No si varan pas indaûr intal procès di pâs in Irlande dal Nord. A son lis peraulis dopradis dal prin ministri britanic Gordon Brown a front dai atacs de dissidence republicane che tal zîr di nancje trê dîs a àn causât la muart di doi soldâts e di un poliziot in servizi in Irlande dal Nord. Condane pai atentâts e difese dal procès di pâs a son rivâts ancje dai rapresentants dal guvier nordirlandês e dal Sinn Féin, il partît di riferiment de comunitât republicane. Il prin atac, che ai 7 di Març al veve fat doi muarts e doi ferîts tra i soldâts dal 38^m Regjiment Gjenîrs, al è stât rivendicât dal Real IRA. Il secont, capitât ai 9 di Març a Craigavon, al è stât invezit rivendicât dal Continuity IRA. Si trate di doi grups jessûts za di agns dal Esercit Republican Irlandês (Provisional IRA) e che no àn acetât il procès di pâs. Dut câs, almancul tai ultins agns, la plui part dai lôr atentâts no veve vût consecuencis cussì penzis. Cumò, però, si stime che i doi grups, in plui di vê cressût cuantitât e cualitât di armis e oms, a sedin daûr ancje a coordenâsi tra di lôr. A dâur plui fuarce a son lis dificoltâts che il procès di pâs al à vût ta chescj agns, leadis massime ai pidiments fats indenant dai partîts unioniscj. Cun di fat, la mancjance di inchiestis imparziâls par sclarî i rapuarts tra servizis britanics e grups paramilitârs lealiscj, i berdeis tal meti in pîts une polizie che e vedi l’acet di dutis e dôs lis comunitâts, la lentece tal tirâ vie lis pratichis discriminatoriis e tal meti in vore i organisims di colaborazion tra il Nord e il Sud de isule, a àn jevât une vore di marum framieç de comunitât nazionaliste irlandese. Cun di plui, tai ultins timps a son nassûts ancje piçui grups che a taponin lis lôr ativitâts ilegâls daûr di siglis che si riclamin al moviment republican e che par cualchidun a saressin favorîts dai servizis britanics. Un suspiet che al è stât stiçât ancje dal riclam in Irlande dal Nord di reparts dal esercit leâts ae “vuere sporcje”. Lis menacis al procès di pâs, duncje, no son pocjis e a rivin di plui fronts.

Font: Times on line, 08 - 11/03/09; The Irish Times, 08-11/03/09; Gara, 08-10/03/09

Galizie: il vivôr de lenghe al passe ancje pal erotisim

La lenghe e va doprade in ducj i lûcs e si à di savêle doprâ. Cun chest spirt, il cuotidian telematic galizian Vieiros Galiza Hoxe, al à tornât a proponi ancje chest an il concors leterari “Ferve a Rede”, dut dedicât aes contis curtis di sogjet erotic par galizian. Si trate di une iniziative che l’an passât e veve rivât a tirâ dongje in a pene cuatri setemanis uns tresinte contis. Chest an, dut câs, il concors al à mudât sei il prin premi, ven a dî un viaç a Brugge / Bruges intes Flandris, sei la lungjece dai tescj che no àn di passâ lis 690 batudis. Par partecipâ al è timp fin ai 24 di Avrîl. La riviste galiziane e cîr cussì di stiçâ l’ûs de lenghe ancje tun cantin – chel dal erotisim – che nol cjate masse bon acet inta chei altris concors leteraris, ma che al môf invezit un grant interès intal public.

Font: Galiza Hoxe, 07 e 10/03/09