Paîs Basc: ricors a Strasburc su la consultazion proibide

A son doi i partîts bascs che a àn presentât ricors denant dal Tribunâl european pai dirits umans di Strasburc cuintri de sentence dal Tribunâl costituzionâl spagnûl che al à proibît la consultazion che il president de Comunitât Autonome Basche al veve voie di inmaneâ. Si trate di Eusko Alkartasuna, partît che al faseve part de coalizion di guvier che e poiave chê iniziative, e di Aralar. I doi ricors a son stâts presentâts in maniere indipendente un di chel altri. La decision des autoritâts spagnolis – si lei intai ricors – e larès cuintri di dirits di fonde tant la libertât di pinsîr e di espression, e cuintri de proibizion de discriminazion garantîts de Convenzion europeane sui dirits dal om.

Font: Gara, 04 e 06/02/09; Món Divers, 05/02/09

UE: dibatiment in Parlament su lis minorancis

Il dibatiment su lis minorancis nazionâls che si è davuelt intal Parlament european sul principi di Fevrâr al à marcât ancjemò une volte la diference di posizions jenfri il sburt che al rive dal bas, propit par mieç dal Parlament, par che si garantissin ad in plen e pardut i dirits des comunitâts minorizadis e chel che al rive de Comission europeane che e cîr di sbolognâ la cuestion sui singui stâts. Cun di fat, il comissari Jacques Barrot al à dite che la tutele des minorancis al è un aspiet di fonde de Union, ma che la responsabilitât i spiete prin di dut ai guviers statâi. La posizion di Barrot e je stade contestade a fuart massime dai membris dal Intergrup parlamentâr des minorancis nazionâls che al à marcât lis contradizions che a esistin inte Union, là che, par esempli, se a vessin di jessi metûts in vore i criteris fissâts tal 1993 pe jentrade di altris stâts, stâts tant che la France o la Grecie a varessin di jessi fûr de Union. I parlamentârs dal Intergrup a àn domandât che si comedi cheste situazion. Une des stradis di bati – a àn dite – e je chê di incressi la autonomie des comunitâts nazionâls minorizadis e di garantîur une partecipazion direte aes istituzions europeanis.

Font: Eurolang, 05/02/09

Svezie: impegn par infuartî la tutele des minorancis

Dal 2000 la Svezie e ricognòs in maniere uficiâl lis lenghis minoritariis che si fevelin sul so teritori, ven a dî finlandês, meänkieli (la varietât finlandese fevelade te valade de Torne), sami, romanès e yiddish. Dut câs la situazion di chestis lenghis e reste inmò dificile e, duncje, il guvier svedês al à decidût di presentâ une gnove leç su lis minorancis nazionâls e su lis lôr lenghis. Un dai obietîfs al è chel di garantî ai finlandês e ai sami la pussibilitât di doprâ la lôr lenghe no dome a nivel locâl, ma ancje cui principâi organisims statâi. Par dongje, cul 2010, si previôt di incressi i fonts pes comunitâts minorizadis cu la zonte di 70 milions di coronis (sù par jù 6,8 milions di euros).

Font: Eurolang, 05/02/09

Scozie: un sît dut pal gaelic

Ai 4 di Fevrâr il Bòrd na Gàidhlig, o sei l’Ufici pe lenghe gaeliche scozese, al à lançât un sît internet dut dedicât al gaelic che si pues cjatâlu ae direzion www.mygaelic.com . La presentazion e je stade fate de ministre scozese pe culture, Linda Fabiani (dal SNP), denant dai rapresentants des diviersis organizazions impegnadis inte promozion di cheste lenghe celtiche. Il sît al è pensât su trê nivei, ven a dî par chei che no cognossin la lenghe, par chei che a son daûr a imparâle e par chei che za le paronin. In plui des informazion su la lenghe e su la culture gaeliche, il portâl al ufrìs spazis di discussion e di informazion no dome pai utents singui, ma ancje pes organizazions impegnadis ta chest setôr. Il spazi par cui che al vûl imparâ il gaelic al sarà svilupât cun lezions progressivis, materiâi audio e video e cuntune sezion di pueste pai fruts. Il sît al vûl deventâ il pont di riferiment par ducj chei che a fevelin o che a son interessâts al gaelic, ma al ufrìs informazions e materiâi ancje pai turiscj che a vuelin cognossi miôr la Scozie.

Font: Bòrd na Gàidhlig, 04/02/09; Món Divers, 08/02/09

Aragon: petizion par une leç linguistiche

A son sù par jù 1900 lis personis che a àn za firmât la petizion in linie par domandâ une leç di politiche linguistiche che e rispieti lis dibisugnis di fonde dai citadins dal Aragon che a fevelin par catalan o par aragonês. La campagne, che si le cjate ae direzion internet www.leydelenguas.com , e je stade inviade ai 25 di Zenâr. A dâ la lôr adesion a son stadis ancje une vincjine di realtâts associativis ativis in diviers setôrs, di chel culturâl fintremai a chel sindacâl. Tra di lôr o cjatìn ancje il “Consello d’a Fabla Aragonesa” e la “Iniciativa Cultural de la Franja”. Al è za di timp che si domande che ancje cheste Comunitât autonome si indoti di une leç di politiche linguistiche sul model di chês za in vore in altris comunitâts dal stât spagnûl, ma cence sucès. Il PSOE (Partît Socialist) si è impegnât a fâ buine une leç che e tuteli lis dôs lenghis, ma cence rindilis couficiâls, ma il PAR (Partît Aragonês), che al è al guvier cui socialiscj, nol crôt che e coventi pardabon une leç di politiche linguistiche. La Chunta Aragonesista, Izquierda Unida, lis associazions culturâls catalanis e ciertis aministrazions locâls a domandin pal aragonês e pal catalan la couficialitât. L’aragonês al è ancjemò fevelât inte aree pirenaiche, il catalan al è invezit lenghe proprie de Franja, ven a dî la strisse orientâl dal Aragon.

Font: Món Divers, 03/02/09

Gales: trasferiment di podês, prin pas par une leç linguistiche gnove

La strade par incressi lis misuris di politiche linguistiche in Gales e je chê dal trasferiment des competencis legjislativis su cheste materie dal Parlament di Londre ae Assemblee Nazionâl Galese. Dome in chê volte si podarà imbastî une gnove leç organiche che e cjapi dentri, in plui dal setôr public, ancje chel privât, che e meti sù un comissari pe lenghe e che e garantissi un plen bilinguisim. E je cheste la rispueste che il guvier galês al à dât, par bocje dal ministri pal patrimoni nazionâl Alun Ffred Jones, a cui che di timp al domandave un intervent plui fuart dal guvier locâl par difindi i dirits linguistics dai galês. In dì di vuê, il guvier galês al à gruessis responsabilitâts tal cjamp linguistic, ma pôcs imprescj legjislatîfs e, duncje, il prin pas al è chel dal trasferiment di podês. Po si proviodarà cuntun intervent legjislatîf – al à spiegât il ministri – parcè che lis leçs di bessolis no sigurin l’avignî di une lenghe, ma a àn une funzion impuartante par rivâ a fâlu.

Font: Eurolang, 02-03/02/09

Paîs Basc: campagne par un domini internet pal euskara

E va dilunc a cressi la mobilitazion intes comunitâts minorizadis par rivâ a vê un domini internet indipendent. La volte stade si veve fevelât de Cornualie, ma sul finî di Zenâr e je partide ancje la gnove campagne par un spazi internet pe lenghe e pe culture basche. Daspò de nassite formâl intal Avrîl dal 2008, la Associazion PuntuEus e à metût sù un sît internet dulà che si puedin cjatâ dutis lis informazions e i materiâi par aderî e par promovi la campagne pe nassite dal domini pont eus (.eus). La associazion e met za adun lis plui impuartantis organizazions pe lenghe basche, la confederazion des ikastolas (scuelis cul basc tant che lenghe veicolâr), la Universitât dal Paîs Basc, la radiotelevision basche (EiTB) e altris realtâts ativis tal cjamp de comunicazion e des gnovis tecnologjiis. Cumò, dut câs, si vûl fâi fâ un salt indenant ae campagne cul slargjâ lis adesions a plui sogjets pussibii, sei istituzionâi che privâts daûr dal model che al à za puartât i catalans a otignî il domini pont cat (.cat).

Font: PuntuEus, 29/01/09; Galiza Hoxe, 01/02/09

Corsiche: e je nassude Corsica Libera

Si è davuelt il prin di Fevrâr a Corti il congrès che al à fat nassi in maniere uficiâl Corsica Libera, il gnûf sogjet politic che al cîr di meti adun lis diviersis animis dal indipendentisim cors. Il procès par meti adun sot di une bandiere uniche i diviers partîts indipendentiscj cors al jere tacât ancjemò l’an passât. Cul congrès dal prin di Fevrâr si son dâts dongje Corsica Nazione Indipendente, U Rinnovu, Anc-Psi (Accolta Naziunale Corsa – Partît Socialist pe Indipendence) e Strada Dritta. L’apontament al è stât ancje la ocasion par fissâ lis primis liniis di azion su diviers temis. Tra chescj il progjet batiât “Corsica 21”, ven a dî un program di svilup a lunc tiermin pe isule che al cjapi sù il model di Agjende 21 e che al rapresenti une alternative al PADDUC. Corsica Libera e à ancje pandût la sô poie ai presonîrs politics cors, ma e à ancje fat capî di jessi solidarie cul moviment armât clandestin. Par cumò la direzion dal gnûf sogjet politic e sarà gjestide in maniere coordenade di une vincjine di membris.

Font: Corse Matin, 01/02/09; Alta Frequenza, 02/02/09

Forum Sociâl Mondiâl: rêt internazionâl pai dirits coletîfs dai popui

La prime edizion dal spazi pai dirits coletîfs dai popui, che si è davuelte dai 29 ai 31 di Zenâr inte suaze dal Forum Sociâl Mondiâl, si à sierade cu la aprovazion di un manifest unitari che al met lis fondis par une rêt internazionâl pai dirits coletîfs dai popui. Il document al invide ancje la prossime edizion dal FSM a frontâ in maniere trasversâl chest teme che, pai firmataris, al rapresente un element che no si pues fâ di mancul se si vûl fâ sù un mont diviers e plui just. Intal manifest si pant la solidarietât pai popui che in chest moment si cjatin a frontâ une politiche di distermini, tant che palestinês, curdis, tamil e saharawi, e si poie la propueste dai popui natîfs di proclamâ i 12 di Otubar tant che Zornade de mobilitazion internazionâl par lotâ pe Mari Tiere. Ae iniziative, coordenade dal CIEMEN intune cu la Agjenzie catalane de cooperazion pal svilup, a àn partecipât, tra lis altris, rapresentancis catalanis, baschis, galizianis, corsis, palestinesis, curdis, tamil, mapuce, amazic.

Font: Autodeterminaciofsm, 29-31/01/09

Cossovo: la UE e domande ai serps di no separâsi

I serps dal Cossovo a son daûr a meti sù une rêt di struturis publichis alternativis a chês uficiâls, gjestidis dal guvier di Pristina, sei sul front aministratîf, sei tal cjamp de scuele, de salût e de protezion sociâl. Chest procès al cjate la plene ploie des autoritâts di Belgrât che, daspò de autoproclamazion de indipendence cossovare, a àn sburtât i serps dal Cossovo a no partecipâ aes struturis publichis de gnove realtât politiche. Une azion, cheste, che e ven invezit condanade de Union Europeane che e domande al guvier di Belgrât di bandonâ cheste posizion e di lavorâ par une integrazion graduâl tra la minorance serbe e la maiorance albanese dal Cossovo. Un gnûf apel in proposit al è rivât ta chescj dîs dal responsabil pal Ufici Civîl Internazionâl in Cossovo, Pieter Feith. Il rapresentant european al à ancje domandât al guvier serp di consegnâ ae justizie i responsabii principâi des violencis sclopadis tai mês stâts a Mitrovica.

Font: Balkan Insight, 30/01/09

Cornualie: inviade la campagne par un domini internet indipendent

Ancje in Cornualie si à inviade la bataie par otignî un domini internet indipendent pe lenghe e pe culture di cheste piçule nazion celtiche. I organizadôrs de iniziative si son dâts dongje intal sît internet www.dotker.org là che si puedin cjatâ dutis lis informazions su cheste iniziative. L’obietîf de campagne al è chel di viodi ricognossût dal organisim internazionâl che al gjestìs i dominis (ICANN) il spazi pont ker (.ker) par dut ce che si riferìs ae lenghe e ae culture corniche. Za diviersis nazionalitâts cence stât a àn otignût un domini indipendent, tant che i Paîs Catalans (.cat), lis Fær Øer (.fo), la Groenlande (.gl) e lis isulis Åland (.ax). Altris nazions cence stât a son inmò impegnadis ta cheste bataie, al è il câs, par esempli, dal Gales (.cym), de Scozie (.sco), de Galizie (.gal), de Bretagne (.bzh), e v.i.

Font: Món Divers, 30/01/09

Abkhazie e Ossezie: la Europe e domande ae Russie di zirucâ

La assemblee dal Consei de Europe e à votât une risoluzion che e domande ae Russie di ritirâ il so ricognossiment ae indipendence de Abkhazie e de Ossezie meridionâl e di rispietâ la integritât teritoriâl dal stât gjeorgjian. Lis autoritâts russis, dut câs, a àn daurman rispuindût di no vê nissune intenzion di fâ ziruc. La Russie, in plui di ricognossi lis dôs republichis caucasichis, e à za sotscrit cun lôr dai acuardis di difese. Propit inte suaze de colaborazion militâr tra chescj paîs, si podarès viodi in curt in Abkhazie la nassite di une base navâl pe flote russe dal mâr Neri.

Font: Nationalia, 29/01/09

Paîs Basc: sot atac lis listis de çampe indipendentiste

La machine politiche – judiziarie spagnole si à za metude in vore par impedî la partecipazion de ezkerra abertzale (la çampe indipendentiste basche) aes prossimis elezions autonomichis che si davuelzaran il prin di Març. I rapresentants dai doi partîts spagnûi di riferiment – PSOE e PP – no àn nancje spietât che a fossin publicadis sul Boletin uficiâl dal Paîs Basc lis listis di D3M (Demokrazia Hiru Milloi, o sei Democrazie Trê Milions) e Askatasuna par fâ savê che no varessin lassât di bande nissune strade par impedîur di partecipâ aes elezions. Su la fonde de “Ley de Partidos” (la Leç dai Partîts, fate su misure par meti fûr leç Batasuna) chest obietîf al somee facil di rivâi tal câs di D3M, dal moment che diviers dai siei rapresentants di liste a son nons storics dal indipendentisim basc che a àn fat part di partîts za metûts fûr leç. La operazion e somearès plui dificile, invezit, par Askatasuna: partît nassût tal 1998 (la “Ley de Partidos” e je dal 2002) e che i siei candidâts no mostrin leams direts cu lis formazions politichis baschis ilegalizadis. Cundut che ancje cuotidians peâts ae diestre spagnoliste tant che “El Mundo” e “La Razón” a declarin che lis sôs listis a son “netis”, il ministri pal interni spagnûl, Alfredo Pérez Rubalcaba, al à za declarât che i leams jenfri Askatasuna e Batasuna a son clârs. Par compagnâ l’atac politic si à za mote ancje la magjistrature, a tacâ dal judiç de Audiència Nacional spagnole, Baltasar Garzón, che in cunvigne cul ministeri pal interni, al à inviât tes zornadis stadis une operazion di polizie che e à puartât al arest di diviers militants indipendentiscj bascs cul obietîf, nancje masse platât, di colpî massime D3M. Il stes Garzón al varès po declarât che ancje Askatasuna, fintremai de sô nassite, e je peade ai partîts che ta chescj agns a son stâts metûts fûr leç. Intant, il tribunâl costituzionâl al à boçât il ricors fat indenant de storiche formazion indipendentiste basche ANV cuintri de sô ilegalizazion. Cun di fat, pal orghin judiziari spagnûl la decision di meti fûr leç ANV no va cuintri dai dirits costituzionâi di associazion politiche, libertât ideologjiche e di espression.

Font: Gara, 24-31/01/09; Deia, 24-31/01/09; Nationalia, 28/01/09

Scozie: celebrazions pai 250 agns dal poete nazionâl Burns

Ai 25 di Zenâr a colavin juscj i 250 agns de nassite di Robert Burns, scritôr calcolât tant che un dai pionîrs dal Romanticisim in Europe e che, in Scozie, al ven considerât il “poete nazionâl”. Ogni an la sô date di nassite e ven celebrade cun fiestis e incuintris in dute la Scozie, deventant aromai un apontament inmò plui sintût de fieste nazionâl dai 30 di Novembar, cuant che si fâs fieste par Sant Andree (patron de Scozie). In ocasion dai 250 agns de sô nassite, dut câs, il poete scozês al sarà al centri di cetantis iniziativis e ancje la fiere internazionâl dal libri, in program in Avost a Edimburc, e sarà dedicade ae figure di Burns e al teme de identitât. La sô poesie plui amade (e cjantade inmò in dì di vuê in ducj i paîs di culture britaniche) e reste Auld Lang Syne, scrite in scots, la varietât gjermaniche che si à svilupade tes Lowlands scozesis.

Propit chest lengaç al è stât al centri di une inchieste puartade indenant par cont dal guvier scozês, là che di une bande si marche la vitalitât e lis potenzialitâts dal scots e di chê altre bande si lamente la mancjance di un plan gjenerâl di politiche linguistiche pal so svilup. La ministre scozese pe culture, Linda Fabiani (dal SNP), e à sigurât che il guvier al intint impegnâsi ancje su chest front.

Font: Galiza Hoxe, 26/01/09; Món Divers, 29/01/09

Ocitanie: vierte la “Pòrta d’Òc”

La Regjon Languedoc-Roussillon e à vierzût che al è pôc un gnûf portâl internet dedicât ae Ocitanie e ae sô lenghe proprie. Il sît, che al à non Pòrta d’Òc, si lu cjate ae direzion www.laportadoc.eu . Su internet nol è dificil cjatâ sîts e materiâi par ocitan, ma dispès a son pôc leâts tra di lôr. Cheste e je la prime reson che e à sburtât la aministrazion de Lenghedoc a inviâ chest gnûf portâl che al permet di rivâ, partint di une direzion sole, a passe 700 sîts par o sul ocitan. A chest prin servizi, la Pòrta d’Òc a ‘nt zonte un altri di nature cooperative. Cu la colaborazion volontarie dai utents, di fat, si ponte a zontâ cetancj materiâi gnûfs su la Ocitanie e su la sô lenghe. Il portâl, za cumò une vore siôr di materiâi e cuntune grafiche atrative, al è disponibil sei par francês, sei tes cuatri varietâts principâls dal ocitan. La sô jessude e je stade saludade in maniere une vore positive des organizazions dai insegnants ocitans. Il sît, di fat, al ufrìs un grum di materiâl util ancje pai students e par cui che al vûl imparâ o miorâ il so ocitan.

Font: Pòrta d’Òc; Oui au breton, 25/01/09

Paîs Basc: dutis lis ikastolas intune organizazion

Intant dal sest congrès des scuelis baschis (lis ikastolas), che si è davuelt ai 24 di Fevrâr a Donostia, al è stât fat bon a grande maiorance il progjet “Ikastola 2020” che al met sù une societât cooperative europeane par meti adun dutis lis ikastolas dal Paîs Basc. Cun di plui, il progjet al met ancje lis fondis par un model educatîf unitari in stât di promovi une culture basche moderne. I ponts di fonde di chest model a son la lenghe basche, viodude tant che part centrâl di un svilup plurilengâl, lis gnovis tecnologjiis e lis siencis. Intant dal congrès al è stât aprovât ancje il gnûf curriculum comun pai prossims cinc agns.

Font: EiTB, 25/01/09

Paîs Catalans: il guvier catalan al cres i siei rapuarts internazionâi

Une rapresentance direte de Catalogne inte Unesco. E je la propueste fate indenant dal vicepresident de Generalitat, Josep-Lluís Carod-Rovira, intant dal sô visite a New York, là che al à sotscrit un acuardi gjenerâl cul program pal svilup de ONU (PNUD), il prin di chest gjenar firmât di une aministrazion no statâl. Il statût di autonomie catalan, di fat, al previôt ancje la pussibilitât di relazions internazionâls propriis. Chê di une rapresentance autonome te Unesco, e je une strade za metude in vore dal Canada pal Quebec. Il guvier catalan al à tacât la sô colaborazion cul PNUD za tal 2004, ma fin cumò no si veve inmò rivâts a di un acuardi gjenerâl tra i doi sogjets. Intant dal so viaç a New York, Carod al à ancje screât la gnove delegazion de Generalitat intai Stâts Unîts cun chê di facilitâ lis relazions bilaterâls cui guviers federâi e statâi inte Americhe dal Nord, cu la ONU e cun chei altris organisims internazionâi che a son logâts ta chê zone. Il guvier catalan al à delegazions uficiâls ancje a Londre, Parîs e Berlin.

Font: Nationalia, 22/01/09

Sardegne: cinc candidâts in corse pe Regjon

Si davuelzaran ai 15 e ai 16 di Fevrâr lis elezions che a decidaran cui che al varà di aministrâ la Regjon Sardegne tai prossims agns. A saran cinc i candidâts che a corin pe presidence regjonâl: il president dimissionari Renato Soru, poiât di PD, PRC, PdCI, Idv, Rossomori e Sinistra Autonomista; Ugo Cappellacci, che al à daûrsi PdL – Riformatori Sardi, UDC, Sardegna Insieme – UDS – Nuovo PSI, Movimento per le autonomie e PSd’Az; Peppino Balia, che al vuide la liste dal Partît Socialist; Gavino Sale, candidât di iRS; Gianfranco Sollai, poiât di Unidade Indipendentista. I prins trê candidâts a rapresentin i partîts di stamp talian, cu la poie dai autonomiscj locâi, ven a dî il PSd’Az cul centri diestre e i Rossomori cul centri çampe. A rapresentâ l’indipendentisim sart, invezit, a son iRS (indipendentzia Repubrica de Sardigna) e Unidade Indipendentista, un non che al met adun Sardigna Natzione, A Manca pro s’Indipendentzia, A foras e Juventude indipendentista 28 de abril. Di segnalâ po la presince ancje di un altri candidât, Alessandra Meli, che e varès vût di vuidâ la liste di Salvatore Meloni, president de autoproclamade republiche di Malu Entu (une isulute pôc fûr de Sardegne). Cheste liste, però, e je stade presentade cence lis firmis che a coventin par partecipâ aes elezions: une sielte fate cu la sperance po di presentâ ricors par rivâ a ripeti lis elezions

Font: Regione Sardegna; iRS; Unidade Indipendentista; Sardegna Oggi

Arbëria: master par operadôrs linguistics in Calabrie

La esperience di masters universitaris dedicâts aes lenghis minoritariis intal stât talian no je gnove, in particolâr in Sardegne e in Friûl. Cumò ancje la universitât de Calabrie e à inviât un master di secont nivel indreçât ai operadôrs linguistics e culturâi arberesh, o sei de minorance albanese che e vîf sparniçade in diviers comuns de Italie meridionâl. Dongje di cheste iniziative, finanziade cui fonts de leç statâl 482/99, al è stât metût sù ancje un cors di formazion pal personâl impegnât intai sportei linguistics des aministrazions locâls là che si àn comunitâts arberesh. Master e cors a àn ognidun trente puescj e a laran indenant par vot mês.

Font: Giornale di Calabria, 14/01/09

Italie: 194 progjets scolastics finanziâts cu la 482 pal an 2008/2009

Il ministeri talian pe istruzion al à decidût di finanziâ, cui fonts de leç statâl 482/99, 194 dai 235 progjets fats indenant pal an scolastic 2008/2009. Daûr de ultime circolâr ministeriâl su la materie, a son stâts favorîts i progjets che a previodin un ûs veicolâr de lenghe di minorance e a chei presentâts di plui scuelis in rêt. A nivel di regjons, la plui part dai progjets finanziâts a son concentrâts in Friûl – Vignesie Julie (72) e in Sardegne (52). Par chel che al inten, invezit, lis lenghis dopradis pai progjets, 58 si riferissin al furlan, 52 al sart, 25 al albanês, 17 al ocitan, 11 al sloven e al grecanic, 10 al ladin, 5 al todesc, 4 al francês e 1 al cravuat.

Font: La tecnica della scuola, 12/01/09