Cornualie: inviade la campagne par un domini internet indipendent

Ancje in Cornualie si à inviade la bataie par otignî un domini internet indipendent pe lenghe e pe culture di cheste piçule nazion celtiche. I organizadôrs de iniziative si son dâts dongje intal sît internet www.dotker.org là che si puedin cjatâ dutis lis informazions su cheste iniziative. L’obietîf de campagne al è chel di viodi ricognossût dal organisim internazionâl che al gjestìs i dominis (ICANN) il spazi pont ker (.ker) par dut ce che si riferìs ae lenghe e ae culture corniche. Za diviersis nazionalitâts cence stât a àn otignût un domini indipendent, tant che i Paîs Catalans (.cat), lis Fær Øer (.fo), la Groenlande (.gl) e lis isulis Åland (.ax). Altris nazions cence stât a son inmò impegnadis ta cheste bataie, al è il câs, par esempli, dal Gales (.cym), de Scozie (.sco), de Galizie (.gal), de Bretagne (.bzh), e v.i.

Font: Món Divers, 30/01/09

Abkhazie e Ossezie: la Europe e domande ae Russie di zirucâ

La assemblee dal Consei de Europe e à votât une risoluzion che e domande ae Russie di ritirâ il so ricognossiment ae indipendence de Abkhazie e de Ossezie meridionâl e di rispietâ la integritât teritoriâl dal stât gjeorgjian. Lis autoritâts russis, dut câs, a àn daurman rispuindût di no vê nissune intenzion di fâ ziruc. La Russie, in plui di ricognossi lis dôs republichis caucasichis, e à za sotscrit cun lôr dai acuardis di difese. Propit inte suaze de colaborazion militâr tra chescj paîs, si podarès viodi in curt in Abkhazie la nassite di une base navâl pe flote russe dal mâr Neri.

Font: Nationalia, 29/01/09

Paîs Basc: sot atac lis listis de çampe indipendentiste

La machine politiche – judiziarie spagnole si à za metude in vore par impedî la partecipazion de ezkerra abertzale (la çampe indipendentiste basche) aes prossimis elezions autonomichis che si davuelzaran il prin di Març. I rapresentants dai doi partîts spagnûi di riferiment – PSOE e PP – no àn nancje spietât che a fossin publicadis sul Boletin uficiâl dal Paîs Basc lis listis di D3M (Demokrazia Hiru Milloi, o sei Democrazie Trê Milions) e Askatasuna par fâ savê che no varessin lassât di bande nissune strade par impedîur di partecipâ aes elezions. Su la fonde de “Ley de Partidos” (la Leç dai Partîts, fate su misure par meti fûr leç Batasuna) chest obietîf al somee facil di rivâi tal câs di D3M, dal moment che diviers dai siei rapresentants di liste a son nons storics dal indipendentisim basc che a àn fat part di partîts za metûts fûr leç. La operazion e somearès plui dificile, invezit, par Askatasuna: partît nassût tal 1998 (la “Ley de Partidos” e je dal 2002) e che i siei candidâts no mostrin leams direts cu lis formazions politichis baschis ilegalizadis. Cundut che ancje cuotidians peâts ae diestre spagnoliste tant che “El Mundo” e “La Razón” a declarin che lis sôs listis a son “netis”, il ministri pal interni spagnûl, Alfredo Pérez Rubalcaba, al à za declarât che i leams jenfri Askatasuna e Batasuna a son clârs. Par compagnâ l’atac politic si à za mote ancje la magjistrature, a tacâ dal judiç de Audiència Nacional spagnole, Baltasar Garzón, che in cunvigne cul ministeri pal interni, al à inviât tes zornadis stadis une operazion di polizie che e à puartât al arest di diviers militants indipendentiscj bascs cul obietîf, nancje masse platât, di colpî massime D3M. Il stes Garzón al varès po declarât che ancje Askatasuna, fintremai de sô nassite, e je peade ai partîts che ta chescj agns a son stâts metûts fûr leç. Intant, il tribunâl costituzionâl al à boçât il ricors fat indenant de storiche formazion indipendentiste basche ANV cuintri de sô ilegalizazion. Cun di fat, pal orghin judiziari spagnûl la decision di meti fûr leç ANV no va cuintri dai dirits costituzionâi di associazion politiche, libertât ideologjiche e di espression.

Font: Gara, 24-31/01/09; Deia, 24-31/01/09; Nationalia, 28/01/09

Scozie: celebrazions pai 250 agns dal poete nazionâl Burns

Ai 25 di Zenâr a colavin juscj i 250 agns de nassite di Robert Burns, scritôr calcolât tant che un dai pionîrs dal Romanticisim in Europe e che, in Scozie, al ven considerât il “poete nazionâl”. Ogni an la sô date di nassite e ven celebrade cun fiestis e incuintris in dute la Scozie, deventant aromai un apontament inmò plui sintût de fieste nazionâl dai 30 di Novembar, cuant che si fâs fieste par Sant Andree (patron de Scozie). In ocasion dai 250 agns de sô nassite, dut câs, il poete scozês al sarà al centri di cetantis iniziativis e ancje la fiere internazionâl dal libri, in program in Avost a Edimburc, e sarà dedicade ae figure di Burns e al teme de identitât. La sô poesie plui amade (e cjantade inmò in dì di vuê in ducj i paîs di culture britaniche) e reste Auld Lang Syne, scrite in scots, la varietât gjermaniche che si à svilupade tes Lowlands scozesis.

Propit chest lengaç al è stât al centri di une inchieste puartade indenant par cont dal guvier scozês, là che di une bande si marche la vitalitât e lis potenzialitâts dal scots e di chê altre bande si lamente la mancjance di un plan gjenerâl di politiche linguistiche pal so svilup. La ministre scozese pe culture, Linda Fabiani (dal SNP), e à sigurât che il guvier al intint impegnâsi ancje su chest front.

Font: Galiza Hoxe, 26/01/09; Món Divers, 29/01/09

Ocitanie: vierte la “Pòrta d’Òc”

La Regjon Languedoc-Roussillon e à vierzût che al è pôc un gnûf portâl internet dedicât ae Ocitanie e ae sô lenghe proprie. Il sît, che al à non Pòrta d’Òc, si lu cjate ae direzion www.laportadoc.eu . Su internet nol è dificil cjatâ sîts e materiâi par ocitan, ma dispès a son pôc leâts tra di lôr. Cheste e je la prime reson che e à sburtât la aministrazion de Lenghedoc a inviâ chest gnûf portâl che al permet di rivâ, partint di une direzion sole, a passe 700 sîts par o sul ocitan. A chest prin servizi, la Pòrta d’Òc a ‘nt zonte un altri di nature cooperative. Cu la colaborazion volontarie dai utents, di fat, si ponte a zontâ cetancj materiâi gnûfs su la Ocitanie e su la sô lenghe. Il portâl, za cumò une vore siôr di materiâi e cuntune grafiche atrative, al è disponibil sei par francês, sei tes cuatri varietâts principâls dal ocitan. La sô jessude e je stade saludade in maniere une vore positive des organizazions dai insegnants ocitans. Il sît, di fat, al ufrìs un grum di materiâl util ancje pai students e par cui che al vûl imparâ o miorâ il so ocitan.

Font: Pòrta d’Òc; Oui au breton, 25/01/09

Paîs Basc: dutis lis ikastolas intune organizazion

Intant dal sest congrès des scuelis baschis (lis ikastolas), che si è davuelt ai 24 di Fevrâr a Donostia, al è stât fat bon a grande maiorance il progjet “Ikastola 2020” che al met sù une societât cooperative europeane par meti adun dutis lis ikastolas dal Paîs Basc. Cun di plui, il progjet al met ancje lis fondis par un model educatîf unitari in stât di promovi une culture basche moderne. I ponts di fonde di chest model a son la lenghe basche, viodude tant che part centrâl di un svilup plurilengâl, lis gnovis tecnologjiis e lis siencis. Intant dal congrès al è stât aprovât ancje il gnûf curriculum comun pai prossims cinc agns.

Font: EiTB, 25/01/09

Paîs Catalans: il guvier catalan al cres i siei rapuarts internazionâi

Une rapresentance direte de Catalogne inte Unesco. E je la propueste fate indenant dal vicepresident de Generalitat, Josep-Lluís Carod-Rovira, intant dal sô visite a New York, là che al à sotscrit un acuardi gjenerâl cul program pal svilup de ONU (PNUD), il prin di chest gjenar firmât di une aministrazion no statâl. Il statût di autonomie catalan, di fat, al previôt ancje la pussibilitât di relazions internazionâls propriis. Chê di une rapresentance autonome te Unesco, e je une strade za metude in vore dal Canada pal Quebec. Il guvier catalan al à tacât la sô colaborazion cul PNUD za tal 2004, ma fin cumò no si veve inmò rivâts a di un acuardi gjenerâl tra i doi sogjets. Intant dal so viaç a New York, Carod al à ancje screât la gnove delegazion de Generalitat intai Stâts Unîts cun chê di facilitâ lis relazions bilaterâls cui guviers federâi e statâi inte Americhe dal Nord, cu la ONU e cun chei altris organisims internazionâi che a son logâts ta chê zone. Il guvier catalan al à delegazions uficiâls ancje a Londre, Parîs e Berlin.

Font: Nationalia, 22/01/09

Sardegne: cinc candidâts in corse pe Regjon

Si davuelzaran ai 15 e ai 16 di Fevrâr lis elezions che a decidaran cui che al varà di aministrâ la Regjon Sardegne tai prossims agns. A saran cinc i candidâts che a corin pe presidence regjonâl: il president dimissionari Renato Soru, poiât di PD, PRC, PdCI, Idv, Rossomori e Sinistra Autonomista; Ugo Cappellacci, che al à daûrsi PdL – Riformatori Sardi, UDC, Sardegna Insieme – UDS – Nuovo PSI, Movimento per le autonomie e PSd’Az; Peppino Balia, che al vuide la liste dal Partît Socialist; Gavino Sale, candidât di iRS; Gianfranco Sollai, poiât di Unidade Indipendentista. I prins trê candidâts a rapresentin i partîts di stamp talian, cu la poie dai autonomiscj locâi, ven a dî il PSd’Az cul centri diestre e i Rossomori cul centri çampe. A rapresentâ l’indipendentisim sart, invezit, a son iRS (indipendentzia Repubrica de Sardigna) e Unidade Indipendentista, un non che al met adun Sardigna Natzione, A Manca pro s’Indipendentzia, A foras e Juventude indipendentista 28 de abril. Di segnalâ po la presince ancje di un altri candidât, Alessandra Meli, che e varès vût di vuidâ la liste di Salvatore Meloni, president de autoproclamade republiche di Malu Entu (une isulute pôc fûr de Sardegne). Cheste liste, però, e je stade presentade cence lis firmis che a coventin par partecipâ aes elezions: une sielte fate cu la sperance po di presentâ ricors par rivâ a ripeti lis elezions

Font: Regione Sardegna; iRS; Unidade Indipendentista; Sardegna Oggi

Arbëria: master par operadôrs linguistics in Calabrie

La esperience di masters universitaris dedicâts aes lenghis minoritariis intal stât talian no je gnove, in particolâr in Sardegne e in Friûl. Cumò ancje la universitât de Calabrie e à inviât un master di secont nivel indreçât ai operadôrs linguistics e culturâi arberesh, o sei de minorance albanese che e vîf sparniçade in diviers comuns de Italie meridionâl. Dongje di cheste iniziative, finanziade cui fonts de leç statâl 482/99, al è stât metût sù ancje un cors di formazion pal personâl impegnât intai sportei linguistics des aministrazions locâls là che si àn comunitâts arberesh. Master e cors a àn ognidun trente puescj e a laran indenant par vot mês.

Font: Giornale di Calabria, 14/01/09

Italie: 194 progjets scolastics finanziâts cu la 482 pal an 2008/2009

Il ministeri talian pe istruzion al à decidût di finanziâ, cui fonts de leç statâl 482/99, 194 dai 235 progjets fats indenant pal an scolastic 2008/2009. Daûr de ultime circolâr ministeriâl su la materie, a son stâts favorîts i progjets che a previodin un ûs veicolâr de lenghe di minorance e a chei presentâts di plui scuelis in rêt. A nivel di regjons, la plui part dai progjets finanziâts a son concentrâts in Friûl – Vignesie Julie (72) e in Sardegne (52). Par chel che al inten, invezit, lis lenghis dopradis pai progjets, 58 si riferissin al furlan, 52 al sart, 25 al albanês, 17 al ocitan, 11 al sloven e al grecanic, 10 al ladin, 5 al todesc, 4 al francês e 1 al cravuat.

Font: La tecnica della scuola, 12/01/09

UE: risoluzion dal Parlament a pro des lenghis minorizadis

Ai 14 di Zenâr il Parlament european al à fate buine une risoluzion che e fisse une schirie di indreçaments ancje par chel che si riferìs aes lenghis minorizadis e aes minorancis nazionâls storichis. Cundut che il document nol à valôr legjislatîf diret, al è impuartant par fissâ la direzion che lis istituzions europeanis si impegnin a lâ cui lôr proviodiments. Cun di plui si invide i stâts che ancjemò no lu àn fat a firmâ e a ratificâ la Convenzion cuadri pe protezion des minorancis nazionâls e la Cjarte europeane pes lenghis regjonâls o minoritariis. Intal test si marche “la impuartance dal difindi e dal promovi lis lenghis regjonâls o minoritariis, ricuardant che il dirit di fevelâ e di jessi educâts inte proprie lenghe native al è un dai plui impuartants dirits di fonde”. Il document al dîs ancje che “i principis de sussidiarietât e dal autoguvier a son la strade miôr par frontâ la cuestion des comunitâts nazionâls minoritariis storichis” e al invide a lâ daûr dai modei europeans plui fuarts ta chest setôr (par esempli Paîs Basc, Catalogne, Gales) e a cjatâ fûr, di chê strade, lis soluzions miôr di autoguvier. Cun di plui, si zonte che la politiche pal plurilinguisim de Union Europeane e à di promovi e di difindi lis lenghis regjonâls e minoritariis cun risorsis di pueste e programs specifics di zontâ a di chel sul aprendiment continuatîf (Lifelong Learning Programme).
Font: Eurolang, 15/01/09

Forum Sociâl Mondiâl: prin spazi tematic sul dirit ae autodeterminazion

Tra lis novitâts de edizion 2009 dal Forum Sociâl Mondiâl, che ca di cualchi zornade si inviarà a Bélém do Pará, inte aree amazoniche dal Brasîl, si varà un spazi tematic dedicât ae autodeterminazion. A gjestîlu e sarà, e ancje cheste e je une novitât, une organizazion catalane, ven a dî il CIEMEN, cu la poie de Agjenzie catalane de cooperazion pal svilup. In plui de autodeterminazion, il spazi pai dirits coletîfs dai popui – chest il so non uficiâl – si ocuparà ancje di lenghis minorizadis, popui natîfs e dirit ae tiere. La iniziative si davuelzarà ai 29, 30 e 31 di Zenâr cu la partecipazion di delegâts che a rapresentin une trentine di nazionalitâts cence stât dal mont, tant che catalans, bascs, galizians, cors, palestinês, curdis, tamil, mapuce, amazic, e v.i. Intant de iniziative si davuelzaran conferencis, taulis tarondis e confronts che a puartaran po a di une declarazion finâl sui argoments frontâts. Il coordenadôr dal progjet, Quim Arrufat (dal CIEMEN), al à dite che si vûl lavorâ par produsi des propuestis concretis e par sclarî che “nol esist un altri mont pussibil cence dal rispiet dal dirit ae autodeterminazion dai popui”. Par stâi daûr ai lavôrs dal spazi pai dirits coletîfs dai popui dal FSM al è stât ativât, propit ta chestis zornadis, un blog di pueste, che si lu cjate ta cheste direzion.

Font: Nationalia, 15/01/09

Paîs Catalans: buinis gnovis pe scuele catalane intal Rosselló

Il prefet dai Pireneus Orientâi al à informât l’istitût secondari Pompeu Fabra di El Soler / Le Soler che la aministrazion statâl francese e sotscrivarà un contrat di associazion cu la scuele, come a dî che l’istitût al sarà ricognossût in maniere uficiâl dal stât. E je la prime volte che il guvier francês al ricognòs l’insegnament secondari imersîf par catalan e si impegne a cjapânt sù une part dai coscj. Pe bressola (scuele privade che e dopre il catalan tant che lenghe veicolâr) a rivin buinis gnovis ancje des Baleârs, là che il guvier locâl al à sigurât che al garantirà pal 2009 un finanziament di 25 mil euros che a laran a cuvierzi lis spesis pal stipendi di un insegnant.
Font: Món Divers, 14/01/09

Irlande: rapuart sul gaelic inte educazion intal Nord

Ducj a àn dirit a vê un insegnament dal e par gaelic di alte cualitât. Al è chest l’assum di fonde che al ven fûr dal ultin rapuart su la educazion in lenghe irlandese dât fûr dal ministeri nordirlandês pe educazion. Ta chestis zornadis il document al è stât ancje al centri di un confront tra insegnants, gjenitôrs e rapresentants dai ents publics interessâts de cuestion. Ta cheste ocasion si à discutût dai modei scolastics miôr par lâ inte direzion mostrade dal rapuart, sei cul sisteme de imersion, sei cun chel des scuelis bilengâls. Un dai problemis frontâts al è ancje chel des risorsis, là che la situazion plui dificile e somee jessi chê des scuelis de infanzie. La educazion par gaelic, dut câs, e ven calcolade tant che un setôr inovatîf e in cressite inte Irlande dal Nord.

Font: Eurolang, 14/01/09

Bretagne: la Regjon e domande lis competencis sul insegnament dal breton

Inte suaze dal esam pe finanziarie pal 2009, il president Jean-Yves Le Drian al à informât la Assemblee regjonâl de Bretagne di vê domandât al prin ministri francês il trasferiment ae Regjon des competencis su la gjestion de mape scolastiche dal insegnament bilengâl. Ogni an si propon la nassite di gnovis classis bilengâls che, però, a puartin problemis dal pont di viste des risorsis disponibilis e de lôr distribuzion ecuilibrade sul teritori. Duncje, e dîs la aministrazion regjonâl, al sarès miôr che e fos la Regjon a gjestî lis risorsis umanis e economichis pal insegnament dal e par breton. Ai 18 di Dicembar la Assemblee regjonâl e veve votât, ducj dacuardi, un document che al domandave di lâ ta cheste direzion cuntune sperimentazion che e permetès di tacâ cul sisteme di gjestion diret za tal Setembar dal 2009.
Font: Agence Bretagne Presse, 12/01/09

Gales: Cymdeithas in place pai dirits linguistics

Ai 10 di Zenâr, daspò di une campagne di un an par sburtâ il dirit al ûs de lenghe galese ancje intal setôr privât – che e à puartât ancje al arest e a multis pesantis pai siei militants – la Cymdeithas yr Iaith Gymraeg (Societât pe Lenghe Galese) e à puartât pes stradis de capitâl Caerdydd / Cardiff diviers centenârs di militants par domandâ che dutis lis competencis su la politiche linguistiche a sedin trasferidis ae Assemblee Nazionâl Galese. Za di timp la Cymdeithas e domande al guvier locâl une gnove leç linguistiche che e garantissi il status uficiâl dal galês in ducj i cantins de vite di ogni dì. “Ancje tal setôr privât – al spieghe il vicepresident de associazion, Rhys Llwyd – dal moment che in dì di vuê il setôr privât al è chel principâl te nestre vite di ogni dì”. La Cymdeithas e domande ancje la nassite di un comissari su la lenghe.

Font: Cymdeithas, 10/01/09

Paîs Basc: presentade la gnove liste de çampe indipendentiste

Ai 10 di Zenâr 15 rapresentants storics de çampe indipendentiste basche a àn presentât intune conference stampe il gnûf sogjet politic che al ponte a rapresentâ tes prossimis elezions autonomichis dal prin di Març la ezkerra abertzale. I miltants indipendentiscj a àn dât fûr un document bilengâl là che a presentin il gnûf moviment, che al varà non D3M (Demokrazia 3.000.000), e a àn invidât i citadins bascs a poiâ cu la lôr firme la presentazion des listis eletorâls. Il gnûf sogjet politic – a àn dite i siei rapresentants – al vûl jessi “un imprest par che il Paîs Basc al puedi cjalâ al avignî e al finissi di jessi presonîr dal passât” come che, invezit, a volaressin il PNV e il PSE (sezion basche dal PSOE). La avocature dal stât, dut câs, e à za ativât lis fuarcis di polizie par tirâ dongje informazions sul moviment politic basc e sui siei membris par viodi se a son leams cun Batasuna, ANV o EHAK, i partîts indipendentiscj bascs za metûts fûr leç par mieç de “Ley de Partidos”. Al è duncje probabil che il gnûf sogjet politic al vegni blocât prime di podê presentâsi aes elezions, dal moment che diviers dai siei membris a rivin propit di chês formazions politichis. Tra i prins a domandâ di meti fûr leç D3M a son stâts i rapresentants dal PP (partît che al rapresente la diestre spagnoliste). I unics a difindi, invezit, il dirit dal gnûf moviment a presentâsi aes elezions a son stâts Eusko Alkartasuna e Aralar, o sei i unics partîts bascs inmò legâi a pro de indipendence.
Font: Gara, 11/01/09; EiTB, 10/01/09; Món Divers, 11/01/09; Galiza Hoxe, 10/01/09

Cossovo e Abkhazie: tal 2009 altris ricognossiments

Sei il guvier cossovâr, sei chel de Abkhazie a sperin che il 2009 al puarti altris stâts a ricognossi la lôr indipendence. Il ministri pai afârs forescj dal Cossovo, Skënder Hyseni, al à dite di spietâsi un grum di ricognossiments dilunc vie dal an. Che un tant al puedi sucedi, al ven ricognossût ancje dal ministri serp pai forescj, Vuk Jeremic, che al à declarât che a saressin almancul uns cincuante i stâts che a son daûr a subî pressions fuartis par ricognossi la indipendence dal Cossovo. In dì di vuê, il paîs balcanic al è za stât ricognossût di 53 stâts, tra chescj cuasi ducj chei de Union Europeane fûr che Cipri, Grecie, Romanie, Slovachie e Spagne. Situazion plui grivie, invezit, pe Abkhazie che, a vuê, e je stade ricognossude dome de Russie e dal Nicaragua. Il guvier de republiche caucasiche, dut câs, al à fat savê che la Belarùs e varès di jessi il tierç stât a ricognossi la sô indipendence. Dut câs, tra i guviers che a podaressin cjapâ cheste strade a son ancje chei jordan, libanês, libic e sirian.

Font: Món Divers, 09/01/09

Sardegne: preocupazions pal avignî de politiche linguistiche pal sart

Tai ultins agns lis risorsis metudis dal stât par finanziâ la leç 482/99, ven a dî l’imprest principâl pe difese e pe promozion des dodis lenghis minorizadis ricognossudis dal stât talian, si son sbassadis simpri di plui. Tai prossims agns si riscje che la situazion e ledi inmò in piês. A denunciâlu, cheste volte, a son i operadôrs linguistics sarts. Cun di fat, pal 2008 il guvier Berlusconi, al à sbassât a 3 milions di euros lis risorsis disponibilis par dutis e dodis lis comunitâts minorizadis ricognossudis, cun chê di puartâlis a 2 milions tal 2009 e a un milion tal 2010. I bêçs a varessin di coventâ par garantî i dirits linguistics previodûts de leç in dutis chestis comunitâts (tes scuelis, tes aministrazions publichis, tai mieçs di comunicazion publics, e v.i.), ma, par vê une misure di ce che si pues fâ cun chei bêçs baste pensâ che dome par garantî la presince dai sportei linguistics (regjonâi, provinciâi e comunâi) in Sardegne al coventarès un milion e mieç di euros. Cun di plui, i operadôrs linguistics sarts a lamentin che su la cuestion de lenghe, par cumò, de plui part dai candidâts in corse pes prossimis elezions regjonâls a vegnin dome promessis gjenerichis. Su la taule e reste la propueste di leç di politiche linguistiche (che e varès di cjapâ il puest de leç regjonâl 26/97) fate buine de aministrazion Soru prime des dimissions dal president de Regjon: cui che al vinçarà al varà di decidi ancje dal so destin.
Font: Sotziu Limba Sarda, 09-10/01/09

Corsiche: indenant cu la union dai indipendentiscj

Si davuelzarà ai 25 di Zenâr a Corti il congrès che al puartarà ae nassite di Corsica Libera, il gnûf sogjet politic che al ponte a meti adun lis diviersis animis dal indipendentisim cors. Dut câs, dut il mês di Zenâr al è fis di incuintris operatîfs che a coventin par preparâ il congrès che al puartarà sot di une bandiere uniche Corsica Nazione Indipendente, U Rinnovu, Anc-Psi, e Strada Dritti. Intant di une conference stampe par fâ il pont sul procès di unificazion, a son ancje stâts ricuardâts i ponts di fonde dal gnûf sogjet politic, ven a dî: promovi i dirits storics dal popul cors; difindi e svilupâ teritori, culture e lenghe corse; pontâ suntun svilup economic che al rispieti la justizie sociâl e i ecuilibris ecologjics de isule; tignî salde la solidarietât cu lis diviersis formis di lote nazionâl e cui presonîrs politics. Chest percors al ven cjalât di bon voli ancje dal FLNC (Front di Liberazion Nazionâl Cors – Union dai combatents) come che si pues capî di un comunicât uficiâl dât fûr ai 5 di Zenâr, là che il moviment armât al à ancje rivendicât lis azions fatis tai ultins sîs mês. Si trate di 14 atentâts indreçâts ducj cuintri di struturis residenziâls o di aziendis acusadis di “colonizâ” la isule o ben di “speculazion” o di “monopoli economic”. Intant, sul front politic, a van indenant ancje lis ativitâts dai partîts autonomiscj, tant che A Chjama Naziunale, par imbastî gnûfs sogjets politics pes elezions teritoriâls dal 2010.

Font: Corse Matin, 06/01/09; Rinnovu, 05/01/09; Alta Frequenza, 05-12/01/09