UE: risoluzion dal Parlament a pro des lenghis minorizadis

Ai 14 di Zenâr il Parlament european al à fate buine une risoluzion che e fisse une schirie di indreçaments ancje par chel che si riferìs aes lenghis minorizadis e aes minorancis nazionâls storichis. Cundut che il document nol à valôr legjislatîf diret, al è impuartant par fissâ la direzion che lis istituzions europeanis si impegnin a lâ cui lôr proviodiments. Cun di plui si invide i stâts che ancjemò no lu àn fat a firmâ e a ratificâ la Convenzion cuadri pe protezion des minorancis nazionâls e la Cjarte europeane pes lenghis regjonâls o minoritariis. Intal test si marche “la impuartance dal difindi e dal promovi lis lenghis regjonâls o minoritariis, ricuardant che il dirit di fevelâ e di jessi educâts inte proprie lenghe native al è un dai plui impuartants dirits di fonde”. Il document al dîs ancje che “i principis de sussidiarietât e dal autoguvier a son la strade miôr par frontâ la cuestion des comunitâts nazionâls minoritariis storichis” e al invide a lâ daûr dai modei europeans plui fuarts ta chest setôr (par esempli Paîs Basc, Catalogne, Gales) e a cjatâ fûr, di chê strade, lis soluzions miôr di autoguvier. Cun di plui, si zonte che la politiche pal plurilinguisim de Union Europeane e à di promovi e di difindi lis lenghis regjonâls e minoritariis cun risorsis di pueste e programs specifics di zontâ a di chel sul aprendiment continuatîf (Lifelong Learning Programme).
Font: Eurolang, 15/01/09

Forum Sociâl Mondiâl: prin spazi tematic sul dirit ae autodeterminazion

Tra lis novitâts de edizion 2009 dal Forum Sociâl Mondiâl, che ca di cualchi zornade si inviarà a Bélém do Pará, inte aree amazoniche dal Brasîl, si varà un spazi tematic dedicât ae autodeterminazion. A gjestîlu e sarà, e ancje cheste e je une novitât, une organizazion catalane, ven a dî il CIEMEN, cu la poie de Agjenzie catalane de cooperazion pal svilup. In plui de autodeterminazion, il spazi pai dirits coletîfs dai popui – chest il so non uficiâl – si ocuparà ancje di lenghis minorizadis, popui natîfs e dirit ae tiere. La iniziative si davuelzarà ai 29, 30 e 31 di Zenâr cu la partecipazion di delegâts che a rapresentin une trentine di nazionalitâts cence stât dal mont, tant che catalans, bascs, galizians, cors, palestinês, curdis, tamil, mapuce, amazic, e v.i. Intant de iniziative si davuelzaran conferencis, taulis tarondis e confronts che a puartaran po a di une declarazion finâl sui argoments frontâts. Il coordenadôr dal progjet, Quim Arrufat (dal CIEMEN), al à dite che si vûl lavorâ par produsi des propuestis concretis e par sclarî che “nol esist un altri mont pussibil cence dal rispiet dal dirit ae autodeterminazion dai popui”. Par stâi daûr ai lavôrs dal spazi pai dirits coletîfs dai popui dal FSM al è stât ativât, propit ta chestis zornadis, un blog di pueste, che si lu cjate ta cheste direzion.

Font: Nationalia, 15/01/09

Paîs Catalans: buinis gnovis pe scuele catalane intal Rosselló

Il prefet dai Pireneus Orientâi al à informât l’istitût secondari Pompeu Fabra di El Soler / Le Soler che la aministrazion statâl francese e sotscrivarà un contrat di associazion cu la scuele, come a dî che l’istitût al sarà ricognossût in maniere uficiâl dal stât. E je la prime volte che il guvier francês al ricognòs l’insegnament secondari imersîf par catalan e si impegne a cjapânt sù une part dai coscj. Pe bressola (scuele privade che e dopre il catalan tant che lenghe veicolâr) a rivin buinis gnovis ancje des Baleârs, là che il guvier locâl al à sigurât che al garantirà pal 2009 un finanziament di 25 mil euros che a laran a cuvierzi lis spesis pal stipendi di un insegnant.
Font: Món Divers, 14/01/09

Irlande: rapuart sul gaelic inte educazion intal Nord

Ducj a àn dirit a vê un insegnament dal e par gaelic di alte cualitât. Al è chest l’assum di fonde che al ven fûr dal ultin rapuart su la educazion in lenghe irlandese dât fûr dal ministeri nordirlandês pe educazion. Ta chestis zornadis il document al è stât ancje al centri di un confront tra insegnants, gjenitôrs e rapresentants dai ents publics interessâts de cuestion. Ta cheste ocasion si à discutût dai modei scolastics miôr par lâ inte direzion mostrade dal rapuart, sei cul sisteme de imersion, sei cun chel des scuelis bilengâls. Un dai problemis frontâts al è ancje chel des risorsis, là che la situazion plui dificile e somee jessi chê des scuelis de infanzie. La educazion par gaelic, dut câs, e ven calcolade tant che un setôr inovatîf e in cressite inte Irlande dal Nord.

Font: Eurolang, 14/01/09

Bretagne: la Regjon e domande lis competencis sul insegnament dal breton

Inte suaze dal esam pe finanziarie pal 2009, il president Jean-Yves Le Drian al à informât la Assemblee regjonâl de Bretagne di vê domandât al prin ministri francês il trasferiment ae Regjon des competencis su la gjestion de mape scolastiche dal insegnament bilengâl. Ogni an si propon la nassite di gnovis classis bilengâls che, però, a puartin problemis dal pont di viste des risorsis disponibilis e de lôr distribuzion ecuilibrade sul teritori. Duncje, e dîs la aministrazion regjonâl, al sarès miôr che e fos la Regjon a gjestî lis risorsis umanis e economichis pal insegnament dal e par breton. Ai 18 di Dicembar la Assemblee regjonâl e veve votât, ducj dacuardi, un document che al domandave di lâ ta cheste direzion cuntune sperimentazion che e permetès di tacâ cul sisteme di gjestion diret za tal Setembar dal 2009.
Font: Agence Bretagne Presse, 12/01/09

Gales: Cymdeithas in place pai dirits linguistics

Ai 10 di Zenâr, daspò di une campagne di un an par sburtâ il dirit al ûs de lenghe galese ancje intal setôr privât – che e à puartât ancje al arest e a multis pesantis pai siei militants – la Cymdeithas yr Iaith Gymraeg (Societât pe Lenghe Galese) e à puartât pes stradis de capitâl Caerdydd / Cardiff diviers centenârs di militants par domandâ che dutis lis competencis su la politiche linguistiche a sedin trasferidis ae Assemblee Nazionâl Galese. Za di timp la Cymdeithas e domande al guvier locâl une gnove leç linguistiche che e garantissi il status uficiâl dal galês in ducj i cantins de vite di ogni dì. “Ancje tal setôr privât – al spieghe il vicepresident de associazion, Rhys Llwyd – dal moment che in dì di vuê il setôr privât al è chel principâl te nestre vite di ogni dì”. La Cymdeithas e domande ancje la nassite di un comissari su la lenghe.

Font: Cymdeithas, 10/01/09

Paîs Basc: presentade la gnove liste de çampe indipendentiste

Ai 10 di Zenâr 15 rapresentants storics de çampe indipendentiste basche a àn presentât intune conference stampe il gnûf sogjet politic che al ponte a rapresentâ tes prossimis elezions autonomichis dal prin di Març la ezkerra abertzale. I miltants indipendentiscj a àn dât fûr un document bilengâl là che a presentin il gnûf moviment, che al varà non D3M (Demokrazia 3.000.000), e a àn invidât i citadins bascs a poiâ cu la lôr firme la presentazion des listis eletorâls. Il gnûf sogjet politic – a àn dite i siei rapresentants – al vûl jessi “un imprest par che il Paîs Basc al puedi cjalâ al avignî e al finissi di jessi presonîr dal passât” come che, invezit, a volaressin il PNV e il PSE (sezion basche dal PSOE). La avocature dal stât, dut câs, e à za ativât lis fuarcis di polizie par tirâ dongje informazions sul moviment politic basc e sui siei membris par viodi se a son leams cun Batasuna, ANV o EHAK, i partîts indipendentiscj bascs za metûts fûr leç par mieç de “Ley de Partidos”. Al è duncje probabil che il gnûf sogjet politic al vegni blocât prime di podê presentâsi aes elezions, dal moment che diviers dai siei membris a rivin propit di chês formazions politichis. Tra i prins a domandâ di meti fûr leç D3M a son stâts i rapresentants dal PP (partît che al rapresente la diestre spagnoliste). I unics a difindi, invezit, il dirit dal gnûf moviment a presentâsi aes elezions a son stâts Eusko Alkartasuna e Aralar, o sei i unics partîts bascs inmò legâi a pro de indipendence.
Font: Gara, 11/01/09; EiTB, 10/01/09; Món Divers, 11/01/09; Galiza Hoxe, 10/01/09

Cossovo e Abkhazie: tal 2009 altris ricognossiments

Sei il guvier cossovâr, sei chel de Abkhazie a sperin che il 2009 al puarti altris stâts a ricognossi la lôr indipendence. Il ministri pai afârs forescj dal Cossovo, Skënder Hyseni, al à dite di spietâsi un grum di ricognossiments dilunc vie dal an. Che un tant al puedi sucedi, al ven ricognossût ancje dal ministri serp pai forescj, Vuk Jeremic, che al à declarât che a saressin almancul uns cincuante i stâts che a son daûr a subî pressions fuartis par ricognossi la indipendence dal Cossovo. In dì di vuê, il paîs balcanic al è za stât ricognossût di 53 stâts, tra chescj cuasi ducj chei de Union Europeane fûr che Cipri, Grecie, Romanie, Slovachie e Spagne. Situazion plui grivie, invezit, pe Abkhazie che, a vuê, e je stade ricognossude dome de Russie e dal Nicaragua. Il guvier de republiche caucasiche, dut câs, al à fat savê che la Belarùs e varès di jessi il tierç stât a ricognossi la sô indipendence. Dut câs, tra i guviers che a podaressin cjapâ cheste strade a son ancje chei jordan, libanês, libic e sirian.

Font: Món Divers, 09/01/09

Sardegne: preocupazions pal avignî de politiche linguistiche pal sart

Tai ultins agns lis risorsis metudis dal stât par finanziâ la leç 482/99, ven a dî l’imprest principâl pe difese e pe promozion des dodis lenghis minorizadis ricognossudis dal stât talian, si son sbassadis simpri di plui. Tai prossims agns si riscje che la situazion e ledi inmò in piês. A denunciâlu, cheste volte, a son i operadôrs linguistics sarts. Cun di fat, pal 2008 il guvier Berlusconi, al à sbassât a 3 milions di euros lis risorsis disponibilis par dutis e dodis lis comunitâts minorizadis ricognossudis, cun chê di puartâlis a 2 milions tal 2009 e a un milion tal 2010. I bêçs a varessin di coventâ par garantî i dirits linguistics previodûts de leç in dutis chestis comunitâts (tes scuelis, tes aministrazions publichis, tai mieçs di comunicazion publics, e v.i.), ma, par vê une misure di ce che si pues fâ cun chei bêçs baste pensâ che dome par garantî la presince dai sportei linguistics (regjonâi, provinciâi e comunâi) in Sardegne al coventarès un milion e mieç di euros. Cun di plui, i operadôrs linguistics sarts a lamentin che su la cuestion de lenghe, par cumò, de plui part dai candidâts in corse pes prossimis elezions regjonâls a vegnin dome promessis gjenerichis. Su la taule e reste la propueste di leç di politiche linguistiche (che e varès di cjapâ il puest de leç regjonâl 26/97) fate buine de aministrazion Soru prime des dimissions dal president de Regjon: cui che al vinçarà al varà di decidi ancje dal so destin.
Font: Sotziu Limba Sarda, 09-10/01/09

Corsiche: indenant cu la union dai indipendentiscj

Si davuelzarà ai 25 di Zenâr a Corti il congrès che al puartarà ae nassite di Corsica Libera, il gnûf sogjet politic che al ponte a meti adun lis diviersis animis dal indipendentisim cors. Dut câs, dut il mês di Zenâr al è fis di incuintris operatîfs che a coventin par preparâ il congrès che al puartarà sot di une bandiere uniche Corsica Nazione Indipendente, U Rinnovu, Anc-Psi, e Strada Dritti. Intant di une conference stampe par fâ il pont sul procès di unificazion, a son ancje stâts ricuardâts i ponts di fonde dal gnûf sogjet politic, ven a dî: promovi i dirits storics dal popul cors; difindi e svilupâ teritori, culture e lenghe corse; pontâ suntun svilup economic che al rispieti la justizie sociâl e i ecuilibris ecologjics de isule; tignî salde la solidarietât cu lis diviersis formis di lote nazionâl e cui presonîrs politics. Chest percors al ven cjalât di bon voli ancje dal FLNC (Front di Liberazion Nazionâl Cors – Union dai combatents) come che si pues capî di un comunicât uficiâl dât fûr ai 5 di Zenâr, là che il moviment armât al à ancje rivendicât lis azions fatis tai ultins sîs mês. Si trate di 14 atentâts indreçâts ducj cuintri di struturis residenziâls o di aziendis acusadis di “colonizâ” la isule o ben di “speculazion” o di “monopoli economic”. Intant, sul front politic, a van indenant ancje lis ativitâts dai partîts autonomiscj, tant che A Chjama Naziunale, par imbastî gnûfs sogjets politics pes elezions teritoriâls dal 2010.

Font: Corse Matin, 06/01/09; Rinnovu, 05/01/09; Alta Frequenza, 05-12/01/09

Paîs Catalans: manifestazion pe autodeterminazion intes Baleârs

A jerin sù par jù 2.500 i manifestants che ai 30 di Dicembar a àn sfilât pes stradis di Palma, tes isulis Baleârs, par rivendicâ il dirit ae autodeterminazion de nazion catalane. La iniziative e je stade inmaneade dal coordenament pai 31 di Dicembar (Plataforma 31-D) cu la poie di organizazions politichis tant che il Partît Socialist di Mallorca, Esquerra Republicana, Entesa per Mallorca e Bloc per Mallorca, di cualchi sindacât e di diviersis associazions des Baleârs. Intant de manifestazion si à ancje rivendicât la zornade dai 31 di Dicembar – fieste dal standart – tant che vere Zornade di Mallorca (Diada de Mallorca). In ocasion di chê zornade, la Obra Cultural Balear e à inmaneât diviersis iniziativis ancje cun chê di sburtâ l’ûs de lenghe catalane su lis isulis.
Font: Món Divers, 31/12/08

Sud Tirôl: l’esecutîf al ponte a vê plui autonomie e plui competencis

E à tacât la sô ativitât ai 30 di Dicembar la gnove aministrazion provinciâl sudtirolese jessude des elezions dai 26 di Otubar. L’esecutîf, formât di rapresentants de SVP e dal PD, al è vuidât ancje cheste volte di Luis Durnwalder, in carghe bielzà dal 1989. Intal so intervent programatic, Durnwalder al à declarât che l’obietîf par cheste legjislature al è chel di incressi la autonomie fiscâl e lis competencis de Provincie di Bolzan. In mert al progjet di federalisim fiscâl che il guvier talian al volarès inviâ intal 2009, il president de aministrazion provinciâl al à ricuardât che no si acetarà nissune riduzion rispiet a ce che a previodin i acuardis internazionâi sul Sud Tirôl. Si à di pontâ, invezit, a cressi la autonomie fiscâl par compagnâ lis gnovis competencis che la Provincie e domande in materie di puestis, personâl des aministrazions periferichis dal stât e dai tribunâi, sigurece e radiotelevision publiche.

Font: Nationalia, 30/12/08

Serbie: albanês in place cuintri dai ultins arescj

Diviers centenârs di albanês si son dâts dongje ai 28 di Dicembar a Presevo, in Serbie, par protestâ cuintri dal arest di dîs ex membris dal Esercit di liberazion di Presevo, Medvedja e Bujanovac. I dîs arestâts a son acusâts di crimis di vuere cuintri de popolazion no albanese dal Cossovo. Pes autoritâts serbis, di fat, a varessin partecipât a azions che a àn puartât al sassinament di une sessantine di personis e al rapiment o a altris formis di violence cuintri di passe 150 civîi. I rapresentants de comunitât albanese che e vîf dongje dal confin cul Cossovo, invezit, a disin che intant de vuere i arestâts a àn sì partecipât a azions armadis, ma no cuintri di civîi. Cun di plui, a lamentin un ûs arbitrari de violence de bande de polizie serbe e a domandin la presince di osservatôrs internazionâi.
Font: Balkans Insight, 29/12/08

Galizie: la bandiere galiziane e sbarcje sul Mac

La incressite de autostime intun popul minorizât e je fate, a voltis, ancje di piçulis robis. Daûr di cheste logjiche cumò al è stât metût a disposizion dai utents galizians che a doprin un ordenadôr Mac un program che al modifiche l’implant grafic de striche adalt là che il model spagnûl de tastiere al vignive rapresentât cu la bandiere di chel stât. Il program, che si pues discjariâ de rêt a gratis, al permet di meti une bandiere galiziane al puest di chê spagnole. Un tant si podeve za fâlu ancje cu la bandiere catalane.

Font: Galiza Hoxe, 29/12/08

Bretagne: Regjon e Universitât di Rennes adun pal insegnament dal breton

La Regjon de Bretagne e la Universitât di Rennes 2 a àn sotscrit dôs convenzions par infuartî la presince dal breton e dal gallo intai cors universitaris. La aministrazion regjonâl e à investît 80 mil euros sui doi progjets che a laran indenant par trê agns. L’obietîf de prime convenzion al è chel di incressi la cuantitât di oris di insegnament di e par breton, ma ancje la cualitât de formazion, di maniere che ae fin dal percors universitari i students a sedin in stât di jentrâ daurman intal marcjât dal lavôr bilengâl che, in plui dal insegnament, al cjape dentri ancje traduzions, servizis pal public, informazion, animazion culturâl. La seconde convenzion, invezit, e je indreçade ae formazion in culture e lenghe gallo, o sei la varietât neolatine fevelade inte Bretagne orientâl. Des convenzions similârs a saran sotscritis in curt ancje cu la Universitât de Bretagne ocidentâl.
Font: Bretagne.fr, 28/12/08; Oui au breton, 28/12/08

Galizie: campagne pe educazion plurilengâl

La aministrazion comunâl de citât di Ourense e la Universitât di Vigo a àn sotscrit un pat pal insegnament plurilengâl che al jentre te campagne informative che e à tant che sproc: “La Europe e je plurilengâl. Cui che al sa il galizian al sa di plui” (Europa é plurilingüe. Quen sabe galego, sabe máis). Il program al cjaparà dentri diviers istitûts e centris educatîfs di Ourense, ma ancje di Vigo e di Pontevedra. La Universitât e curarà la part sientifiche de campagne. L’obietîf al è chel di incressi la ufierte formative par galizian che e je ancjemò masse basse, come segnalât di resint ancje di un rapuart des autoritâts europeanis.

Font: Galiza Hoxe, 26/12/08

Cossovo: montenegrins ricognossûts tant che comunitât par so cont

I montenegrins a son stâts ricognossûts des autoritâts cossovaris tant che comunitât par so cont e a àn cumò vôs ancje tal consei consultîf des comunitâts etnichis dal Cossovo. Il Montenegro al veve proclamât la sô indipendence e si veve separât de Serbie ancjemò tal 2006. Al è un dai stâts che a ricognossin la indipendence dal Cossovo e i rapuarts tra i doi guviers a son bogns. Intant de vuere, i montenegrins a vignivin calcolâts sul stes nivel dai serps cun consecuencis pesantis, duncje, intai rapuarts cu la maiorance albanese.
Font: New Kosova Report, 23/12/08

Ongjarie: celebrade in grant la Zornade des minorancis

Che in Ongjarie la tutele dai dirits des nazionalitâts minorizadis no sedi une cuestion calcolade di pocje impuartance si lu à podût viodi ancje in ocasion de Zornade des minorancis (18 di Dicembar) cuant che a son stâts dâts fûr i Premis dedicâts aes personis che plui si son impegnadis ta chest cjamp e si à celebrât i 15 agns di vite de leç statâl sui dirits des minorancis etnichis e nazionâls. Cun di fat, ae cerimonie, che si è davuelte intal salon di onôr dal Parlament, a àn partecipât ducj i rapresentants plui impuartants dal stât: de presidente de Republiche, Katalin Szili, al prin ministri, Ferenc Gyurcsány, dai membris dal Parlament ai dirigjents des istituzions publichis principâls. La iniziative e je stade la ocasion par fâ il pont sei sul funzionament de leç di tutele, fate buine dal Parlament intal 1993 cuntune grande maiorance, ma ancje sui problemis des diviersis comunitâts di minorance che a vivin in Ongjarie. Magari cussì no, al à dite il prin ministri, intai ultins timps e je daûr a cressi la intolerance, massime cuintri de gruesse comunitât rom ongjarese. Dut câs Gyurcsány al à ancje ricuardât che intai stâts là che lis diviersis comunitâts nazionâls e i lôr rapresentants a partecipin ai procès decisionâi al è plui facil superâ i contrascj.
Font: Eurolang, 22/12/08

Sardegne: leç linguistiche gnove pal sart fate buine de Zonte

La Zonte regjonâl de Sardegne e à fate buine une propueste di leç di politiche linguistiche che e varès di cjapâ il puest de leç regjonâl 26 dal ‘97. Il test al ten di riferiment, in plui de leç statâl 482 dal ’99, ancje lis leçs linguistichis fatis buinis de Regjon Friûl – Vignesie Julie pal furlan e de Provincie di Trent. Inte propueste si fevele di insegnament dal sart in orari curicolâr, di certificazion linguistiche, di segnaletiche bilengâl e di altris intervents che a smirin a alçâ il status de lenghe proprie de Sardegne. Une ricercje fate cognossi l’an passât e à di fat mostrât che il 70% de popolazion de isule e je in stât di fevelâ par sart, ma che la lenghe e ven doprade pôc intai moments uficiâi par colpe de minorizazion linguistiche patide dai sarts. Cun di plui, pûr tal rispiet des varietâts locâls, si va indenant cul progjet de lenghe sarde di riferiment (Limba Sarda Comuna). La propueste e ricognòs po misuris similârs di tutele ancje par chês altris lenghis o varietâts linguistichis feveladis su la isule: il catalan (Alguer), il tabarchin (isule di Sant Pieri), il sassarês, il galurês, il romanès e fintremai lis fevelis di riunde venite e istriane di Fertilia e Arborea. L’esecutîf regjonâl al à ancje inviât il progjet par une television su internet in lenghe sarde e misuris di poie par trasmissions radiofonichis par sart.
Font: Regione Sardegna, 21/12/08; Sotziu Limba Sarda, 22/12/08; Noas-insardu, 22/12/08

Romanie: materiâl gnûf pes scuelis su la storie des minorancis

Inte Zornade dedicade aes minorancis nazionâls de Romanie, che e cole ai 18 di Dicembar, al è stât presentât un volum indreçât a ducj i insegnants di storie là che si met adun materiâi didatics su la storie des diviersis comunitâts minorizadis de Romanie. Il test al è il risultât de colaborazion tra esperts dal ministeri rumen pe educazion e des diviersis organizazions di rapresentance des minorancis nazionâls ricognossudis dal stât rumen. La cognossince di chestis comunitâts framieç dai students rumens e varès di jessi sburtade ancje dal gnûf cors, par cumò dome facoltatîf, dedicât ae “storie des minorancis nazionâls”.
Font: Divers.ro, 22/12/08