Tal
dopodimisdì dai 11 di Zenâr uns 80 mil personis a àn partecipât
in contemporanie aes manifestazions inmaneadis a Bilbo / Bilbao e
Baiona / Bayonne par domandâ la fin dal regjim di ecezionalitât in
at cuintri dai presonîrs bascs intal stât spagnûl e, in part,
ancje ta chel francês. Di fat, cundut de fin dal procès di
disarmament di ETA tal 2017 e de sô dissoluzion definitive vie pal
2018, la
cundizion dai presonîrs bascs e reste inmò une vore grivie.
Se vie
pal an passât, intal stât francês, un numar impuartant di
presonîrs al è stât spostât in struturis carcerariis dongje dal
Paîs Basc e in diviers câs si à tacât a riviodi il regjim di
massime sigurece, la situazion intal stât spagnûl no mostre segnâi
di lâ in miôr. La maiorance dai presonîrs si cjate sparniçade in
struturis une vore lontanis dal Paîs Basc
e no
gjolt di chei permès e di chei sconts di pene che a valin par ducj
chei altris condanâts. Baste pensâ che a son 55 i bascs che a àn
za scontât plui di vincj agns e 5 chei che a son dongje o a àn za
passât in preson plui di trente agns. Chei malâts a son 85, di
chescj 19 a patissin di malatiis cetant seriis ma, chel istès, no si
ur garantissin nancje chês
misuris
di carcerazion alternative che a varessin bisugne par podê curâsi.
Tal 2019 chei muarts (di cancar) in preson a son stâts trê, un
cuart al à podût saltâ fûr a pene cuatri mês prime di murî. I
manifestants a domandin duncje di meti fin a cheste situazion di
ecezionalitât, che e à dute la ande di un svindic, e di garantî ai
militants bascs il svicinament e chei altris dirits che la leç e
ricognòs ai presonîrs. Fale pal PP, intal Paîs Basc ducj i partîts
a domandin a Madrid di riviodi la politiche carcerarie. Cumò cul
gnûf guvier socialist che, par insedâsi, al à vût bisugne ancje
dai vôts dal PNV e de astension di EH Bildu, si spere che la
situazion e puedi cambiâ ancje tal stât spagnûl.
Font:
Naiz:,
11-12/01/20
Nessun commento:
Posta un commento