29/03/12

Paîs Catalans: mobilitazions par difindi la lenghe tes Baleârs

E va dilunc a cressi la proteste cuintri des modifichis su la leç di normalizazion linguistiche des isulis Baleârs fatis indenant dal esecutîf vuidât di José Ramón Bauzá (Partît Popolâr). Un dai ponts plui criticâts al è chel che al calcole la cognossince dal catalan dome tant che un merit e no tant che element necessari par podê lavorâ intes aministrazions e intai servizis publics des isulis. Dopo de mobilitazion di associazions culturâls, istitûts scolastics e aministradôrs publics (ancje dal PP), disinis di miârs di personis (tra lis 20 e lis 50 mil, a seconde des stimis) si son dadis dongje ai 25 di Març a Palma par une manifestazion che e veve tant che sproc “Sí a la nostra llengua”, anticipade di un manifest sotscrit di passe 150 personalitâts des isulis.
Doi dîs prime miârs di personis a vevin manifestât pes stradis di Barcelone in rispueste al apel de organizazion Illencs pel Català. La iniziative – e veve spiegât la puartevôs dal grup, Irene Jaume – e je nassude de preocupazion de comunitât isolane che e vîf intal principât di Catalogne pe situazion di discriminazion linguistiche che il guvier Bauzá al vûl imponi a Mallorca, Menorca, Eivissa e Formentera. A mobilitâsi però no son stâts dome i catalans, cun di fat une vincjine di deputâts di ducj i grups politics dal Parlament european a àn domandât ae Comission e al Consei de Europe di intervignî, dal moment che a calcolin i proviodiments dal guvier Bauzá contraris ae legjislazion europeane pe protezion de diviersitât linguistiche e culturâl. Par tignî piade la atenzion su la cuistion al va indenant ancje il siopar de fam inviât passe vincjecinc dîs indaûr a Mallorca di Jaume Bonet, intant che altris volontaris a son pronts par dâi la volte cuant che lis sôs condizions a vessin di deventâ critichis.
Font: VilaWeb, 23-26/03/12

Nessun commento: